Fulaa 6

1Mí Mɛlɛka dimul Moise aa: «A canin mɔnɛ ya co soli a Faraɔnnɔɔ-o sisa. I co ndu kindila a kpaaya nuu háá mò mal Israɛlla kɔlan. I co ndu tolɔɔ kɔɔli háá mò tow nda le nda solio few-few o lɛŋnde ndɔlen nin.»

Mɛlɛka dimul Moise le Israɛlla baŋaa

2Mí Hala soaa vɛlɛ o Moise lo, mó dimul ndu aa: «Ya co Mɛlɛka ni. 3I cɔmnun Abraham, Isaak a Yakɔb. Mí dimul nda maa diola nilan aa Hala Vana-Kpaayaa-Kpow, kɛ ndáà sina vɔ maa diola nilan te la co Mɛlɛka le. 4O kon kɔɔli, mí yiilu nda kpemaa le nda lɛŋnde Kanaan-nden yɔngoo, lɛŋnde nda va icali nin o sumialle len pɛɛn. 5I co cuavaa Israɛlla tueyɔɔ koŋullo a saangiaa bɛndu Esiptea co nda-o, mí loonun a kpema ni ya yii-o. 6Lelan, dimul nda aa: ‹Ya co Mɛlɛka ni. I co niaa soli o baala lepɔtɔllo nin Esipte. I co niaa soli o cɛle ndalen nin. I co niaa baŋa a kpaaya ni bɛndoo, mì tuisi nda sangaa coo. 7I co niaa cua mì la va yungu nuu, mì ya i va Hala niaa. O kon niaa sinanin ni maa ya co Mɛlɛka ni, Hala niaa pɛɛn, maa ya co niaa soli o sanga lepɔtɔllo nin Esipte ni. 8I co niaa yɔɔ o lɛŋnde ya mɛnalan Abraham, Isaak a Yakɔb le nda len yɔngoo len nin. I co niaa len yɔngu ɲɛ niaa pɛ́-pɛ́. Ya Mɛlɛka soo nuaa ni.›» 9Mí Moise tɛɛngul Israɛlla sɔɔn mún kpede, kɛ a yeŋnun ndu le. Kani cɛle nda va nin-nden léè soli nda bɔɔ yoomuan.

10Mí Mɛlɛka soaa vɛlɛ o Moise lo, mó dimul ndu aa: 11«Kɔ soo o Faraɔnnɔɔ lo, masaa Esipte pɛɛn, mò mal Israɛlla, mà faŋan o lɛŋnde ndɔlen nin.» 12Mí Moise mulul Mɛlɛka aa: «Israɛlla yeŋ nilan o sɔɛi nii le, vɛ̀ɛ̀ Faraɔnnɔɔ yaŋnun yɛnin ya, ya cee hoo isɔɔ loo?» 13O kon, mí Mɛlɛka bɛɛndiaa Moise nda Aarɔn ɲɛkɛndɛi, mó viam nda le kɔlan sɔɛi o Israɛlla lo a o Faraɔnnɔɔ lo, masaa Esipte pɛɛn, haliko ma soli Israɛlla o lɛŋnde Esipte len nin.

Diola fuɲaa-mamaa Moise nda Aarɔn-nda

14Diola vanaa va bolii lapangɛi o Israɛlla tɛɛn-nda la co lan ni, poaa Rubɛn, po tase Yakɔb-o-a pɛɛn: Henɔk, Pallu, Hɛsrɔn a Karmi. Nda yɔŋnun bolii lapangɛi o polale Rubɛn-nden coo ni.

15Poaa Simeɔn-nda yɔŋnun haa ni: Yemuɛl, Yamin, Ohad, Yakin, Sohar a Saul po cua Kanannɔɔ velu-o. Nda yɔŋnun bolii lapangɛi o polale Simeɔn-nden coo ni.

16Diola poaa Levii-a a polama ndan la co lan ni: Kɛrsɔn, Kehat a Merari. Vɔsila Levii cii yoomu o ceendo coo lan la va kɛmɛ a beleyaa a laŋɔmmɛw. 17Poaa Kɛrsɔn-nda yɔŋnun Libni nda Simei ni. Nda yɔŋnun bolii lapangɛi o polale len coo ni. 18Poaa Kehat-a va haa ni: Amram, Yisehar, Hebrɔn a Usiɛl. Vɔsila Kehat cii yoomu o ceendo coo lan la va kɛmɛ a beleyaa a layàá. 19Poaa Merari-a yɔŋnun Mahli nda Musi ni. Haa yɔŋnun bolii lapangɛi o polale Levii len coo o paale ndalen ni.

20Mí Amram yil Yokebɛd, yemaa fuɲa ndɔ#6.20 yemaa fuɲa ndɔ: Diom hivin hoo nanu aa «yemaa fuɲa ndɔ»-o nɔla mò va le vanayɛi kpɛɛlun-nde, o nɔla vɛlɛ mò va le vanayɛi lándan-nde. Kɛ o nɛi oo nɛi coo, vanayɛi laanduei ni. Kani o hebrei nin «dodah» le vanalanɔɔ o co ni. Lelan, o kisiei pum nin, vana nɔla mì vana hivi fondaa ho aa «Mí Amram yil Yokebɛd bɔmɔ ndɔ o nɔ̀u nin». Kani yemaa fuɲaa vanndo co bɔmɔɔ vana kon ni. o nɔ̀u nin, má vialu Aarɔn nda Moise. Vɔsila Amram cii yoomu o ceendo coo lan la va kɛmɛ a beleyaa a laŋɔmmɛw.

21Poaa Yisehar-a yɔŋnun Kore, Nefɛk a Sikri ni. 22Poaa Usiɛl-la yɔŋnun Mikaɛl, Ɛlsafan a Sitri ni.

23Mí Aarɔn yil lanɔɔ diolan Eliseba, cua Aminadab-o a yemaa Naasɔn. Mó vilul ndu poaa nda hiɔɔlu: Nadab, Abihu, Eleasar a Itamar.

24Poaa Kore-a yɔŋnun Asir, Ɛlkana a Abiasaf ni. Nda yɔŋnun bolii lapangɛi o polale Kore len coo ni.

25Mí Eleasar, po Aarɔn-ndo yil cua Putiɛl-lo o nɔ̀u, mí lanɔ kon vilul ndu poo diolan Pineas. Haa yɔŋnun bolii lapangɛi le yungula ndalan o polale Levii len coo ni.

26O Moise nda Aarɔn ndo Mɛlɛka soo ni, mó dimul nda aa: «La soli Israɛlla a kundalan o lɛŋnde Esipte len nin a yungula ndalan kpow.» 27Nda dimul Faraɔnnɔɔ, o co masaa Esipte-o, le Israɛlla solio o lɛŋnde Esipte len nin ni.

Mɛlɛka yiilu Moise kpema sɛnɛiyo

28Paale Mɛlɛka soo o Moise lo o lɛŋnde Esipte len nin-nden, 29mó dimul ndu aa: «Ya co Mɛlɛka ni. Kɔ dimul Faraɔnnɔɔ, masaa Esipte pɛɛn, ɲɛ-ɲɛ ya soo.» 30Mí Moise mulul Mɛlɛka aa: «O co vana caa isɔɔ le ya co le, Faraɔnnɔɔ yeŋnin ya bɛɛ lani le.»

Currently Selected:

Fulaa 6: BKG

Highlight

Copy

Compare