O Kandɔɔ 20
20
Abraham nda Abimelɛk
1Mí Abraham faŋan nɛɛ o va icali-a, mó kɔa Nekɛv. Mó kɔ cal Kadɛs a Sur tɛɛn. Mó faŋan vɛlɛ lon, mó kɔ cal Kerar. 2Mó dimul vannda maa yema ndɔ Sara co ni, nduyɛ laa ndɔ o va ni. O kon, mí Abimelɛk, masaa Kerar cua ndu le ndu siinguuo laa ndɔ. 3Kɛ mí Hala hun o Abimelɛk lo icɔllo o lɔma sɔlaan nin, mó dimul ndu aa: «A co piɔ́mndo sɔla le lanɔ n cua hoo-o, kani o nɔ̀u o co ni.» 4Kɛ nduyɛ, Abimelɛk ndóò sina vɔ ndu vanalanɔ le. Le hee, mó koŋul aa: «Éé Maalii, bàà mà diw naa naa yungu nuu, hali n co bɛɛ vanaa sandaa? 5Langbanɔ kon pila dimul-la ni maa yema ndɔ cua kon co ni. Mí cua kon bɛɛ peelu diomnde len, mó dimi maa yema ndɔ langbanɔ kon co ni. O co a kɔlvesɛi le ya tosa dɛnɔɔ ho le, kɛ i síná ndi pɛɛngu nuaa le.»
6Mí Hala mulul ndu o lɔma sɔlaama pilɛma man nin aa: «Ya pila bɛɛ i sina maa o co a kɔlvesɛi le n tosa dɛnɔɔ ho le. Le kɔlɔ kon ya kuuna nɔm hakio tosaa ni, kani i cɛl ma sina ndu vanalanɔ le. 7Lelan, mingi ndu pɔnɔ ndɔ o ba, kani vana-tɛɛngaa-diom Hala-o pɔnɔ ndɔ kon co ni. O co ya Mɛlɛka piɛi le nɔm ma lo yoomu. Kɛ taa mingul ndu laa ndɔ le, mɛɛ sina niko maa a co piɔ́mndo sɔla niaa vanaa nɔmnda kpow.»
8Idiiyo púŋ, mí Abimelɛk veelu vanaa ndɔa baalaa, mó cɔm nda ɲɛ yɔŋnun ndu o lɔma sɔlaan nin-ndo. Mɛɛ vanaa kan tuei sɔɛi ken, mí siòònde bii nda taw. 9O kon, mí Abimelɛk veelu Abraham, mó ɲuna ndu aa: «Dɛnɛ yɛɛ n tosal-lɛ naa hoo? Yɛɛ ya yɔŋ yɛ nɔm, má hendul-la yaŋɔɔlen haliko mi yáà tosa hakio, ya pila a masale nilen? O co dɛnɛ vana bɛnda le tosa le n tosal-la hoo le. 10Le kɔlɔ yɛɛ n tosa yɛ dɛnɛ vaa nuaa?» 11Mí Abraham mulul ndu aa: «Yiyan nuu va ni maa ɲɛ-pɔmbɔ bɛɛ vannda ha nanu a nɔ siòòŋii Hala le, maa taa sina pɛ maa laa nuu cuaa ho co ni, a dii ya le ndu. 12Kɛ hali a kon, yema nuu lekɛ́ndɛi o co ni. Kani fuɲa pilɔɔ naa n co naa ndu ni, kɛ n co kala pilɛ le. O co macoaa o siŋnun nin laa ni. 13Tuma Hala faŋa ya o yungu fuɲa nuu nin mí can kelaa o lɛŋnde nin-ndo, mí dimul laa ni kalaa maa fonda oo fonda naa n tiiya pɛ, o yiyan ya coo mò dimul vanaa naa n komalnin lon-nda maa yema ndɔ ya co ni.»
14O kon, mí Abimelɛk bii saa, cuinnda, nawva, buɛyaa piaandua a buɛyaa laandua, mó yɔngu Abraham, mó mingul ndu vɛlɛ laa ndɔ. 15Mó dimul ndu vɛlɛ aa: «Mɛɛndian lɛŋnde nilen kpow, fonda oo fonda hɛnan nɔm pɛ le calle, a cal lon.» 16Mó mulin vɛlɛ o Sara lo, mó dimul ndu aa: «I yɔngu yema nɔm volin latámán vàá pilɛ. Kon co tɔɔmaseloo ni le vanaa co nɔm ikɛi-ya cɔmndo maa a cue haki o dɛnɔɔ ho nin te.»
17Mí Abraham piɛi Hala, mí Hala singi Abimelɛk, laa ndɔ a buɛyaa ndɔa laandua. Mí vanlaandua kan vialu cuawva. 18Kani Mɛlɛka ndóò cii nin vanlaandua va o Abimelɛk lo cɛinin-nda kpow violɔɔ tɛɛmbuu o n'dial le hiɔlɔɔ ndóò hɛlu kon Sara, lanɔɔ Abraham-ndo.
Currently Selected:
O Kandɔɔ 20: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
