O Kandɔɔ 21
21
Violɔn Isaak-o
1Mí Mɛlɛka yiyan Sara coo mɛɛ ndu pila ndóò dimi yɛ, mó peelu kpema o yiilu ndu-o. 2Mí Sara cua folio. Mɛɛ telen Hala kelu-o tiiya, Abraham ndóò yuuva nin bɛɛ lende taw, kɛ mí Sara vilul ndu hɔ́ɔ́ piaandoo. 3Mí Abraham ke po Sara vilul ndu kon-ndo diolan aa Isaak (kon co dimio ni aa «O mam»). 4O paale ŋɔmaandɔlen, mó dii ndu tooma mɛɛ Hala dimul ndu le tosaa yɛ. 5Abraham ndóò nɔ vɔsilan kɛmɛ, mó vialu Isaak. 6O kon, mí Sara dimi aa: «Hala mɛmi ya, vanaa tuɛinin sɔɛi he-a kpow a mamnin a kɔlkɛndɔɔ le dɛnɛ yɔŋnun ya hoo-o. 7Kani nɛ̀ɛ́-nɛ̀ ndóò nɔla yɛ lɛ̀ Abraham dimullo maa Sara co hunɔɔ cuawva vɔɛsi? Kɛ nduyɛ, má ce mɛɛ ya vilul ndu hɔ́ɔ́ piaandoo o yuuvɛi ndɔɛi nin yɛ.»
Abraham tow Akar nda Ismaɛl po ndɔ
8Mɛɛ Isaak sul, mí Sara soli ndu mɛɛlen o sondo. Paale nda soli ndu mɛɛlen o sondo len, mí Abraham tosa kafo bɛndoo, mó toosiaa ɲɛdiaa taw.
9Paale pilɛ, mí Ismaɛl, po Akar Esiptenɔ vilul Abraham-ndo va pisultan. Mɛɛ Sara ce ndu, 10mó dimul Abraham aa: «Tow cɛɔ ho nda po ndɔɔ mà kɔɛ polon, kani po ndɔɔ bɛnda mò muulian kɛ́ɔ cuaa nda Isaak po ni le.»
11Mí sɔɛi ken tɛɛmbuu Abraham kɔllo taw. Mí mɔnɛi bii ndu le Ismaɛl po ndɔ. 12Kɛ mí Hala dimul ndu aa: «Tambu kɔl le poombɔɔ a le cɛ nɔm laandoo ho tovɔɔ le. Ɲɛ-ɲɛ Sara ɲuna nɔm pɛ le ndu tosallo, a tosal ndu lende. Kani cuavaa Isaak-a vanin polale nɔmnde solinin diola nɔmndan tɔ́ɔ́ len ni. 13Kɛ o va bɛɛ lende, i siinguunin po cɛ laandoo ho velu-o fuɲa-mamaa le vanaa-mangalaa-isɔɔa pum. Kani hɔ́ɔ́ nɔmndo ndu bɛɛ co ni.»
14Diimandɔɔ idiiyo púŋ, mí Abraham pena buloo cua, mó vow mɛnndan o bɔlɔ yáw cuinndo nin. Mó handu Akar ɲɛm mun o congú, mó yɔngu ndu vɛlɛ Ismaɛl po ndɔ, mó soli ndu cɛinin. Mí Akar kɔannun, mó kɔ luusian o lɛŋnde veselɛilen Bɛɛr-Seba nin. 15Mɛɛ mɛmma va ndu o ba o bɔlɔ yáw cuinndo nin-ndan má cuu, mó kɔ yambu po ndɔɔ o bɔɔ bɛngu, 16mó kɔ calnun lándán. Nɛɛ o mɛi po ndɔɔ-a a nɛɛ o va icali-a, ɲɔɔ va bandei maa le dunndo kɛmɛ lediin. Kani nuaa ndóò dimi ni aa: «I yeema mì ce po nuu o piɔ́mndo le.» Le hee, mó kɔ calnun kpengei pilɛi, mó va hiilaa a caŋndo coocoo. 17Mí Hala tuɛi poombɔɔ caŋndo, mí mɛlɛkanɔ Hala-o lo coocoo, mó veelu Akar, mó ɲuna ndu aa: «Akar, yɛɛ yɔŋnun yɛ nɔm? Buulan te, kani Hala tuei poombɔɔ caŋndo nɛɛ n mɛi ndu-a. 18Cɔn ma cua ndu, kani i siinguunin ndu fuɲa-mamaa le vanaa-mangalaa-isɔaa sɛ́lɛ́ bɛndua pum.» 19Mí Hala kumbi ndu hɔltan, mó ca dɔ́ɔ́ soon kólaa. Mó kɔ kɔandu mɛnndan ndon, mó vow man o bɔlɔ yáw cuin va ndu o ba-o nin, mó koesi poombɔɔ.
20Hala va poombɔ kalaa ikɛi, mí poombɔɔ sul, mó cal o lɛŋnde veselɛilen nin. Mó siŋnun vana caa kpaasiaa vuuo taw-vo. 21Mó kɔ cal o lɛŋnde veselɛilen Paran nin. Mí kala ndɔ yil ndu lanɔɔ fulaa o lɛŋnde Esipte len nin.
Abraham yii kpemaa nda Abimelɛk
22O telen pilɛ kon bɛngu, mí Abimelɛk cua Pikɔl, bolle vanaa ndɔa cɔwva, má kɔa o Abraham ndo, mó dimul ndu aa: «Hala co nɔm ikɛi o dɛnnda n co tosaa lan kpow nin. 23Lelan sunsun, mɛnan le Hala maa a yiinin ya dúmbú naa cuavaa nia a cuavaa nia imamaa le. Mɛnan taa tòsalnin ya pila a lɛŋnde nile n co len icali nin-nden dɛnɛ kɛndɔɔ mɛɛ ya bɛɛ co nɔm dɛnɛ kɛndɔɔ tosallo yɛ.» 24Mí Abraham mulul ndu aa: «I mɛnan po!»
25Mí Abraham tɛɛlun Abimelɛk le soon kólaa ndɔ buɛyaa Abimelɛk-a ndáà puu a paa-kala-o. 26Mí Abimelɛk mulul ndu aa: «I sina vana puu soon kólaa kon-ndo le. Nduyɛ, nɔm Abraham pila bɛɛ, a dow ya bali vaa lende le. Hau ko ya co ndi tueyɔɔ nuaa ni.» 27Mí Abraham bii saa, cuinnda a nawva, mó fanda Abimelɛk. O kon, má yii kpemaa nda ŋiɔn. 28Mí Abraham bii vɛlɛ saa téndéa laandua nda ŋɔmmɛw, mó baa nda ikɛi. 29Mí Abimelɛk ɲuna ndu aa: «Le yɛɛ n bii yɛ saa téndéa ŋɔmmɛwva ha má baa nda ikɛi?» 30Mó mulul ndu aa: «Bíí ya saa téndéa ha o ba, mí kon va seilen maa ya tow soon kólaa kon ni.» 31Lelan nda ke fonda kon diolan ni aa Bɛɛr-Seba#21.31 Bɛɛr-Seba: Diolan ndan la nɔ kɔlɔlan tan tiɔn: «Soon kólaa a ŋɔmmɛwva», te kon te «Soon kólaa mɛnanndo»., kani lon nda mɛnan nda ŋiɔn kpow ni.
32Nuaa nda yii kpemaa Bɛɛr-Seba lon ni. Mɛɛ nda cii kpema ndaa yii, mí Abimelɛk can nda Pikɔl, bolle vanaa ndɔa cɔwva, má muungun o lɛŋnde Filistia nin. 33O kon kɔɔli, mí Abraham tɔal yɔmndo, tamariio, Bɛɛr-Seba lon. Mó biilu Mɛlɛka, Hala co le fɛɛn a fɛɛn-ndo pɛɛn. 34Mí Abraham viaw vɛlɛ o lɛŋnde Filistia nin taw.
Currently Selected:
O Kandɔɔ 21: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
