O Kandɔɔ 29
29
Yakɔb ciikan nda Rasɛl cua Laban bom ndɔ-o
1Mí Yakɔb faŋan nɛɛ o lɔ́l-la, mó bii nɛiyo le kɔlan o lɛŋii co a ba paalen le can-nde-e nin. 2Paale pilɛ, mó saalun soon kólaa yondoo nin. O soon kólaa kon vannda ndáà hun cɔlua ndaa koesio ni. Saa a cuinnda kundalan layàá a va ihini o soon kólaa kon ikɛi. A pow yɛ́ndɛ́ bɛndoo pum ndáà kinda soon kalaa ni. 3Te ndáà cuungiaa pɛ cɔlua le nda koesio, ndáà faŋa pow yɛ́ndɛ́ bɛndu kon o soondo sondoo. Te ndáà cii nda pɛ koesi, ndáà mingi powvo pimbulu o sondoo. 4Mí Yakɔb ɲuna vanaa mandaa n'cɔlua o komal lon-nda aa: «Caaŋaa niaa, kuɛɛ niaa fula yɛ?» Mí vanaa mandaa n'cɔlua mulul ndu aa: «Haran naa n fula ni.» 5O kon, mó ɲuna nda aa: «La sina pá Laban, po imama Nahɔr-o?» Má muli aa: «Oi, n sina ndu.» 6Mó ɲuna vɛlɛ nda aa: «Vɛ̀ɛ̀ o co kɛndɛ lon?» Má mulul ndu aa: «O co kɛndɛ. Má cè bɛɛ Rasɛl cua ndɔ hunɔɔ a cɔlua!» 7Mí Yakɔb dimul nda aa: «Paalen le co vɔ bɔɔ lekala ŋama-ŋama, o co telen vana cuungiaa n'cɔlu le co vɔ hoo le. O naŋ mì la koesi nda, mì la mingi nda diólan.» 8Má mulul ndu aa: «N bɛnda vɔ mì n tosa ɲɛ-ɲɛ le, fɔ mì cɔlua cuu cuungian nanu malan naa n faŋa powvo o soon kólaa sondoo le nda koesio.»
9Tuma nda va suukan kon-ndo kínɛí, mí Rasɛl hun a cɔlua fuɲa ndɔ-a: saa a cuinnda. Kani ndu Rasɛl bɛɛ, vana mandaa n'cɔloo o va ni. 10Mɛɛ Yakɔb ce Rasɛl cua Laban bom ndɔ-o a cɔlua bom ndɔa kan, mó sɔɔnguu, mó faŋa powvo o soon kólaa kon sondoo, mó koesi saa a cuinaa bom ndɔ-a. 11Mɛɛ o cii nda koesi, mó kɔman Rasɛl, mó piɔndi a caŋndo. 12Mó dimul Rasɛl maa toongoo Laban fuɲa ndɔ o co ni, maa ndu co po Rebeka yemaa Laban-ndo ni. Mí Rasɛl ɲaanun cɔ́-cɔ́, mó kɔ dimul fuɲa ndɔ. 13Mɛɛ Laban bɛɛ tuei dɔ́ɔ́ maa Yakɔb po Rebeka yema ndɔ-o hin ni, mó kɔa ndu diomɔɔ a kiltan. Mɛɛ o ce ndu, mó kɔ kɔman ndu, mó kɔa a ndu o ndu lo cɛinin. Mí Yakɔb downun ndu kona, mó cɔm ndu ɲɛ-ɲɛ tosan. 14Mí Laban dimul ndu aa: «Mɛɛ a caa hunɔɔ, vanayɛi nii kpeekpei n co ni.» Mí Yakɔb cii paangei yɛngɛsɛɛ o Laban bom ndɔ lo.
Laandaa Yakɔb-a
15Paale pilɛ, mí Laban dimul Yakɔb aa: «Bàà le co n co vanayɛi nii-o mà tosal-la vallo fondo? O bɛnda lende le. Lelan, dimul-la mɛɛ n yeema mì va nɔm salaa yɛ.»
16Nduyɛ, Laban ndóò nɔ cuaambɔa laandua nda ŋiɔn. O tasoo diolan aa Lea, o diinndɔɔ Rasɛl. 17Lea ndóò naŋ tiŋ hɔlla, kɛ Rasɛl ndóò caa simndan, ndóò naŋ vɛlɛ hɔlla taw. 18Mí Yakɔb luɛi Rasɛl lehɔl, mó dimul Laban aa: «Taa kɛsi pɛ Rasɛl cua nɔm ya o ba o nɔ̀u, i tosal nɔm vallo vɔsilan laŋɔmmɛw.» 19Mí Laban mulul ndu aa: «I sɔɔ laba. O co fisa le ya mò cal nɔm o ba o nɔ̀u a ndu kɛsio vanapɔnɔ celen o ba. Lelan, va ya o bɛngu coo.»
20Mí Yakɔb tosa vallo vɔsilan laŋɔmmɛw le Rasɛl kɛsio o nɔ̀u ndu o ba. Kɛ mó ca vɔsila ŋɔmmɛwla lan maa palɛi bingi, kani ndóò kaola bɔɔ Rasɛl. 21Mɛɛ vɔsila lan la cuu, mó dimul Laban aa: «Yɔngu ya niko laa nuu, kani i cii vallo tosa le ndu. I yeema mì n kandu nɔ naa.»
22Mí Laban tosa kafoo, mó veelu vanaa va o tàndà kon nin-nda kpow. 23Mɛɛ ɲumndan ma tol, mó cua Lea, cua ndɔ tasoo, mó kɔa a ndu o Yakɔb lo cɛinin. Mí Yakɔb sina ndu vanalanɔ. 24Mí Laban cua Silpa, buɛi ndɔ laandoo, mó yɔngu Lea cua ndɔ. 25Mɛɛ paalen le sɛ, mí Yakɔb sina maa o co nda Rasɛl te lɔl te, kɛ nda Lea ni. Mó kɔ ɲuna Laban bom ndɔ aa: «Dɛnɛ yɛɛ n tosal-lɛ ya hoo? O co le Rasɛl te ya tosal nɔm vallo le? Le yɛɛ nɛ n hui yɛ ya?» 26Mí Laban mulul ndu aa: «Naa naa o naa lo, cuaambɔɔ cel nɔu bɛ ndɔ tase le. 27Lelan, siow niko palɛi ŋɔmmɛwve niaa Lea. Taa yeema pɛ mà sɔla vɛlɛ Rasɛl, mɛɛ tosal-la vɛlɛ vallo vɔsilan laŋɔmmɛw.» 28Mí Yakɔb cɛl, mó siow palɛi ŋɔmmɛvii ken a Lea. Mí Laban kɛsi vɛlɛ Rasɛl cua ndɔ o nɔ̀u ndu o ba. 29Mó yɔngu Rasɛl buɛi ndɔ laandoo, diolan aa Bilha. 30Mí Yakɔb sina vɛlɛ Rasɛl vanalanɔ, mó kaola ndu taw. Ndu ndóò hiow kaola a Lea. Mó tosal vɛlɛ Laban vallo vɔsilan laŋɔmmɛw.
Cuavaa Yakɔb velu-a
31Mɛɛ Mɛlɛka ce maa Yakɔb kaola Lea taw le, mó nɛŋi ndu ipulu, mí Lea vialu cuawva. Kɛ Rasɛl ndu ve vana vialaa le. 32Mí Lea cua folio, mó vialu hɔ́ɔ́ piaandoo. Mó ke ndu diolan aa Rubɛn (kon co dimio ni aa «Má cè poo!»). Mó dimi aa: «Mɛlɛka ce mɔnɛi co ya biyɔɔ-e. I ce maa pɔnɔ nuu co ya nin kaola.»
33O kon kɔɔli, mó cua vɛlɛ folio, mó vialu vɛlɛ hɔ́ɔ́ piaandoo. Mó dimi aa: «Mɛlɛka tuei maa háá hau, i sɔla vɔ kaola le, lelan o ke ya vɛlɛ hɔ́ɔ́ ho ni.» Mó ke ndu diolan aa Simeɔn (kon co dimio ni aa «O tuei»).
34Mó cua vɛlɛ folio, mó vialu hɔ́ɔ́ piaandoo. Mó dimi aa: «O laan ndu, pɔnɔ nuu co ya holnɔn. Kani i vilul ndu hɔ́aa piaandua nda yáá.» Lelan, mó ke ndu diolan aa Levii (velanndo pila diola lan la velan a dimio ni aa: O holnun).
35Mó cua vɛlɛ folio, mó vialu hɔ́ɔ́ piaandoo. Mó dimi aa: «O laan ndu, i candunin Mɛlɛka. Lelan o ke ndu diolan ni aa Yuda (velanndo pila diola lan la velan a dimio ni aa: O candu).» O kon kɔɔli, mo pɛngi violɔɔ.
Currently Selected:
O Kandɔɔ 29: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
