O Kandɔɔ 30
30
1Mɛɛ Rasɛl ce maa o co Yakɔb cua vilul te, mó kandu Lea bɛ ndɔ paŋalaa. Le hee, mó dimul pɔnɔ ndɔ aa: «Yɔngu ya cuawva, yɔŋii ya vu.» 2Mí Yakɔb tambu kɔl a ndu, mó ɲuna ndu aa: «Mò va maa o fonda Hala-o ya co ni? O co Hala le tuŋ nɔm violɔɔ le?» 3O kon, mó dimul pɔnɔ ndɔ aa: «Mɛɛ má cè Bilha buɛi ni laandu, lueinun ndu coo, haliko mo vilul-la hɔ́ɔ̀. Te o velu pɛ sumialii ni, ya bɛɛ i sɔla dɔ́ɔ́ hɔ́ɔ́ ndu o ba bɛngu.» 4Nuaa o hivi Bilha buɛi ndɔ laandoo pɔnɔ ndɔ kɔɔli ni, mí Yakɔb va a ndu.
5Mɛɛ nda bɔŋa, mí Bilha cua folio, mó vilul Yakɔb hɔ́ɔ́ piaandoo. 6Mí Rasɛl yonda aa: «Hala ke ya di. Kani o mulul-la piɛilen mó ke ya hɔ́ɔ̀.» Lelan o ke hɔ́ɔ́ kon diolan ni aa Dan (kon co dimio ni aa «Yamanɔɔ»).
7Mí Bilha, buɛi laandu Rasɛl-lo cua vɛlɛ folio, mó vilul vɛlɛ Yakɔb po diinndɔɔ. 8Mí Rasɛl dimi aa: «I ciŋilan bɛ nuu ciŋilanndo pila a cɔlɔba Hala-o, mí yɔl ndu.» Mó ke poombɔɔ kon diolan aa Nɛftali (kon co dimio ni aa «Cɔlɔbaa»).
9Mɛɛ Lea ce maa ndu bɛɛ co lɛ violɔɔ le, mó cua Silpa, buɛi ndɔ laandoo, mó hivi ndu pɔnɔ ndɔ kɔɔli. 10Mí Silpa vilul Yakɔb hɔ́ɔ́ piaandoo. 11Mí Lea dimi aa: «Má cè haliyɛɔ sanaa!» Mó ke ndu diolan aa Kad (kon co dimio ni aa «Haliyɛɔ»).
12Mí Silpa vilul vɛlɛ Yakɔb hɔ́ɔ́ piaandu diinndɔɔ. 13Mí Lea dimi aa: «I pɛl bɔɔ tɔnɔ! Kani vanlaandua co nin va ya veeloo aa vanalanɔ pɛl tɔnɔ-o.» Mó ke ndu diolan aa Asɛr (kon co dimio ni aa «Vana pɛl tɔnɔ-o»).
14A telen nda koaw maalon-ndo, mí Rubɛn kɔa yondoo nin, mó kɔ saalun mandrakɔr, mó cuu Lea kala ndɔ. Mí Rasɛl dimul Lea aa: «Ke ya mandrakɔr po nɔmndo cuu nɔm hoo-o yandi.» 15Mí Lea ɲuna ndu aa: «A hini vɔ kɔl a pɔnɔ ni n puu ya hoo o ba-o le? A yeema vɛlɛ mà puu ya mandrakɔr po nuu hin-ndo o ba?» Mí Rasɛl dimul ndu aa: «Ava, mɛɛ cɔɛllɛn, la co malɔ niaa Yakɔb le mandrakɔr po nɔmndo.»
16A paale delaalen, telen Yakɔb va cɔnɔnndo yondoo nin-ndo, mí Lea kɔa ndu demullo. Mó dimul ndu aa: «Naa nɔm co cɔɛllɛn malɔ ni. Kani le nɔm sɔlaa le lɔan hau naa nɔm, vɔngoo ya yɔngu ni, mandrakɔr po nuu ya yɔngu ni.» Icɔl kon, má lɔl nda ndu. 17Mí Hala mulul Lea piɛilen, mó cua folio, mó vilul Yakɔb po ŋuɛɛnundɔɔ. 18Mó dimi aa: «Hala yɔngu ya sala nuu le hivi ya hivi buɛi ni laandoo pɔnɔ nuu kɔɔli-o.» Mó ke po kon diolan aa Isakar (kon co dimio ni aa «Vana cua salaa-o»).
19Mó cua vɛlɛ folio, mó vilul Yakɔb po ŋɔmpumndɔɔ. 20Mó dimi aa: «Hala ke ya ɲɛ latɔ́ɔ́-tɔ́ɔ́. O laan nin, pɔnɔ nuu co ya bɛɛlen ke. Kani i vilul ndu hɔ́aa piaandua nda ŋɔmpum.» Mó ke poombɔ kon diolan aa Sabulɔn (kon co dimio ni aa «Bɛɛlen»). 21O mɛɛlulan kpɔŋ, mí Lea vialu hɔ́ɔ́ laandoo, mó ke ndu diolan aa Dina.
22Mí Hala yiyan niko Rasɛl coo, mó muli piɛile ndɔlen. Mó nɛŋi ndu ipulu. 23O kon, mó cua folio, mó vialu hɔ́ɔ́ piaandoo. Mó dimi aa: «Hala faŋa ya siɛmbulan.» 24Mó ke hɔ́ɔ́ kon diolan aa Yosɛf (kon co dimio ni aa «O cɔɔlu»). Mó piɛi Hala nuaa aa: «Màá Mɛlɛka cɔɔlu ya hɔ́ɔ́ piaandu celen fɔ́!»
Yakɔb sɔla bolofaa taw
25Mɛɛ Rasɛl velu Yosɛf, mí Yakɔb dimul Laban aa: «Mal-la niko n'pelu mì muungu o ya lo, o lɛŋnde nilen nin. 26Ke ya laandaa niaa, a ya tosal nɔm vallo le nda-a, a cuavaa niaa, mì muungu o ya lo. Kani nɔm pila sina mɛɛ ya tosal nɔm vallo yɛ.» 27Mí Laban mulul ndu aa: «Mɛɛ tuinun ya iɲíí, lo niko ya o bɛngu coo nanu. Halaa nia cɔm ya maa le co n co ya o bɛngu coo-o Mɛlɛka dɔw ya duaa ni. 28Lelan, kiolu sala nɔmndo mì sala nɔm.» 29Mí Yakɔb mulul ndu aa: «Nɔm pila sina mɛɛ ya tosal nɔm vallo yɛ. A sina vɛlɛ mɛɛ ya kuilul nɔm cɔlua nɔmnda yɛ. 30Kani ɲɛ bɔɔ ve nɔm o ba telen ya hin-ndo le, kɛ o hunɔɔ nuu, mí ɲɛ-sɔlaa nɔmndo kui taw-taw. Kabi ya hin nɔm o bɛngu coo, duaa Mɛlɛka co nɔm dɔvɔɔ-o co o bɔɔ. Te i lo pɛ nɔm o bɛngu coo lende, telen kuɛɛ ya co yɛ niko vallo tosa le yungule nilen?» 31Mí Laban ɲuna ndu aa: «Yɛɛ ya ke yɛ nɔm le sala nɔmndo?» Mí Yakɔb mulul ndu aa: «Ke ya ɲɛ-ɲɛ le. Kɛ taa cɛl pɛ tuu nuu, i hiow laci a cɔlua nɔmnda mandaa a hɔlla landɔɔ nda coo. 32I co hau cɔlua nɔmnda kpow mɛɛndian a pilɛn-pilɛnnda, mì hivi cɔlua pooɲɛiya kpow ikɛi, a saa tiŋia kpow, a cuinaa pooɲɛiya kpow. Cɔlua ya co kan hɛli-a vanin sala nuu ni. 33Te kon tosan pɛ, a canin kela ni sandaa telen n hunnin le sala ni kon mɛɛndanndo-o. Siɔdii, a hun mɛɛndan cɔlua ya hɛlinin le sala nuu-a. Taa ce pɛ cuin co o pooɲɛi loo, te kon te ma ce saa co o tiŋi loo, mɛɛ vuilen ya tosa ni.» 34Mí Laban dimul ndu aa: «Bala tiɔn. Tosa mɛɛ n dimi yɛ.»
35Kɛ paale len, mí Laban faŋa cuinaa toovia pooɲɛiya, a laandua pooɲɛiya kpow, cɔlu oo cɔlu nɔ pongan súú celen o kɔɔle humbulen coo, a saa tiŋia kpow, mó yɔngu poaa ndɔa nda. 36Mó bɛndi tiŋndo nda tɛɛn nda Yakɔb le kɔla palɛi yaa. Mí Yakɔb koma lo cɔlua tɔ̀a Laban-nda mandaa, a o mɛi-ya pɛɛn.
37Mí Yakɔb cua siondii yɔmnde pum: pepliee, amanndiee a platan, mó peenguu ndi o fondalan lapum le bungan humbon cɔmndo vakpa. 38Mó kɛsi siondii ken o fɛngɛ bɛndu-bɛndu mamɛn cɔlua hun mɛnndan kolɔɔ nin-ndo nin, haliko mi cɔlua kan ndáà va ndi cɔu telen nda hun kolɔɔ-o. Kani lon koni cɔlua kan ndáà hun vɛlɛ helɔɔ telen ndáà hun kolɔɔ-o ni. 39O siondii ken hɔl-ndɔ ndáà hun helɔɔ ni. Te ndáà kom pɛ, a pooɲɛiya cuavaa kan ndáà va ni. 40Mí Yakɔb cua saa a cuinaa o va kɛsio le ndu pila-a, mó kɛsi nda o cɔlua pooɲɛiya a cɔlua tiŋia va o cɔlua Laban-nda coo-a hɔl-ndɔ.
Lende o soli cɔlua le ndu pila ni, o muulian nda a cɔlua Laban-nda le. 41Telen oo telen cɔlua celulaa ndáà va pɛ helɔɔ, Yakɔb kɛsi nda siondii pooɲɛi ken o hɔl o fɛngɛla nda kol nin-ndan nin, haliko mi ndáà va ndi cɔu telen ndáà va kon helɔɔ-o. 42Kɛ te cɔlua mɛsɛlɛiya ndáà va pɛ helɔɔ, ndóò hendu nda sionnde o hɔl te. O kon, mí cɔlua mɛsɛlɛiya lo le Laban, mí cɔlua celulaa siŋnun le Yakɔb. 43Lende Yakɔb sɔla bolofaa taw ni. Mó sɔla cɔlua taw, buɛyaa laandua, a piaandua, ɲɔɔmɛɛa a sofɛlɛa.
Currently Selected:
O Kandɔɔ 30: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
