Luke 2

Violɔn Yeesu-o

(Matie 1.18-25)

1O telen kon, mí masaa Sesar Okust viam vannda le vanaa va o masale ndɔlen bɛngu-a kpow diolan sɛvaa. 2Sɛva tase kon yɔŋnun telen Kirinius va masa-ibungaa o lɛŋnde Siri len nin-ndo. 3Mí vannda kpow a kɔa le diolan sɛvanndo, vana-vana o kobi ndɔɔ nin. 4Mí Yosɛf bɛɛ can Nasarɛt o lɛŋnde Kalikee len nin, mó kɔa Bɛtlɛhɛm o tàndá Yuda-o nin, Bɛtlɛhɛm Kobi David-o pɛɛn. Kani o polale David len nin o fula ni. 5Mó kɔa le sɛvanndo nda Mari, o ó va kɔɔli le yilɔɔ o nɔ̀u nin, mo va a foli miaa-o. 6A lo Bɛtlɛhɛm lon, mí paale Mari ndóò bɛnda le violɔɔ len le tiiya. 7Mó vialu po ndɔ tasoo. Mó simbul ndu o kolaa nin, mó yambu ndu nɛɛ nda dow cɔlua billo-a, kani a sɔla fonda o cɛi yiyaa mialla nin te.

Mɛlɛkanɔɔ cɔmnun vanaa mandaa n'saa

8Vanaa mandaa n'saa pum va o tàndá pilɛ kon nin, a va saa ndaa mandaa icɔllo, 9mí mɛlɛkanɔ Hala-o cɔmnun nda, mí biilu Mɛlɛka-o balu nda teenga sɔ́, mí siòònde bii nda taw. 10Kɛ mí mɛlɛkanɔɔ dimul nda aa: «Siòòŋii bii niaa le. Kani Yoongu kɛndɔɔ ya hin niaa tiiyallo nuaa ni, ó vanin dɛnɛ ɲaale bɛndoo le vannda kpow-vo. 11Vana Ciindiaa vilun niaa hau o Kobi David-o nin, ndu co Krista ni, Maalii pɛɛn. 12Tɔɔmasele niaa sinanin ndu-o co hoo ni: la komalnin cɛlɛkpɔɔ o simbulaa ihini nɛɛ nda dow cɔlua billo-a.»

13Fɔ́ɔ́fɔ̀, mí mɛlɛkaa fula kunda bɛndoo o halataala, má sɔɔnguu mɛlɛkanɔ kon ikɛi. Má va Hala biiloo a dimio aa:

14«Biiloo co le Hala o halataalaa nin coocoo,

kɔlɲuloo co o lɛŋnden coo

le vanaa hɛnan ndu-a.»

Vanaa mandaa n'saa kɔɛ Bɛtlɛhɛm

15Lɔ́ɔ́ mɛlɛkaa faŋan vanaa mandaa n'saa ikɛi le muungoo o halataala-o, mí vanaa mandaa n'saa kan dimulan aa: «N kɔnnun Bɛtlɛhɛm, mì n kɔ cɔ ɲɛ yɔŋnun-ndo, o Mɛlɛka cɔm naa-o.» 16Má kɔa cɔ́-cɔ́, má komal Mari, Yosɛf a cɛlɛkpɔɔ o yambaa nɛɛ nda dow cɔlua billo-a. 17Mɛɛ nda ce ndu, má dimi sɔɛi ndáà tuei a cɛlɛkpɛ kalaa o kɔɔ-e. 18Mí vanaa tuei sɔɔn vanaa mandaa n'saa kpow a va dimio-a a dɔawnun kɔndɔfili. 19Kɛ Mari ndu va dɛnnda lan kpow mandanndo o kɔl, o va kɔllo keelaa lecoo ɲɛkɛndɛi. 20O kon kɔɔli, mí vanaa mandaa n'saa muungun. A va Hala biiloo, ma va ndu candɔɔ le dɛnnda nda tuei má ca lan kpow, mɛɛ mɛlɛkanɔɔ ndóò dimul nda yɛ.

A ke Yeesu diolan

21O paale ŋɔmaandɔlen, má dii ndu tooma, má ke ndu diolan aa Yeesu, mɛɛ mɛlɛkanɔɔ ndóò dimi lɔ́ɔ́ pá mí kala ndɔ cua foli ndɔɔ yɛ.

Mari nda Yosɛf kɔɛ a Yeesu o Cɛi-Hala-o nin

22O kon kɔɔli, mí palɛi Mari nda Yosɛf ndáà bɛnda le dindinndo mɛɛ tɔŋ Moise-o ndóò dimi yɛ-e i tiiya. Má cua Yeesu, má kɔa a ndu Yerusalɛm le ndu yɔngoo o Mɛlɛka lo, 23mɛɛ o co o sɛvaa o tɔŋ Mɛlɛka-o nin yɛ aa: «Hɔ́ɔ́ tase kɛ́-kɛ̀ velun pɛ vanapɔnɔɔ, le Mɛlɛka kon co ni.» 24Ndáà kɔɛ vɛlɛ le sálàá solio mɛɛ o co o sɛvaa o tɔŋ Mɛlɛka-o nin yɛ aa: «Piinda nda ŋiɔn, te kon te kangboa tɛlɛa nda ŋiɔn.»

25Nduyɛ fallo pum va Yerusalɛm, diolan Simeɔn, vana sandaa a vana óò lo o lediom coo a Hala-o o va ni, o va vana óò ciindiaanin Israɛlla-o cumndo. Hala Kɔl-Diandaa va ndu coo. 26Hala Kɔl-Diandaa kon ndóò cii nin ndu cɔm maa: «O vi le, fɔ mo ce Krista, o Mɛlɛka vem-ndo.» 27Mí Kɔl-Diandaa va ndu kon coo-o ke ndu yiyanndo, mó kɔa o Cɛi-Hala-o nin. Vanaa Yeesu-a hunɔɔ a ndu Yeesu le tosaa a ndu mɛɛ o va o sɛvaa o tɔŋndo nin yɛ, 28mí Simeɔn bii Yeesu o ba, mó mel Hala balika, mó dimi aa:

29«Mɛlɛka, mal niko vana baalaa nɔmndo

kɔlan ciee-piɔ́m o kɔlɲuloo nin mɛɛ n dimi yɛ. 30Kani i ce Vana ciindiaa fula nɔm o ba-o a lehɔl ciŋ,

31cinda n toosiaa vannda kpow o hɔl-lo:

32ndu co ɲɛ-tengaa cɔmnin vannda kpow sɔɛi nɔmnde-o ni,

ndu vanin vɛlɛ biiloo le Israɛlla ni, vanaa nɔmnda.»

Sɔɔn siɔdii laci Simeɔn dimi-on

33Kɔndɔfillo va fuɲaa nda kalaa le sɔɔn Simeɔn va dimio a hɔ́ɔ́ kon o kɔɔ-on. 34Mí Simeɔn dɔaw nda duaa, mó dimul kala ndɔ Mari aa: «Poo ho tosanin mì vanaa bɔɔ-bɔɔ del, te kon te mì a bɔɔ-bɔɔ cɛn o lɛŋnde Israɛl-ten nin. Kɛ vannda kɛɛnin ndu, 35mì nɔm pila bɛɛ sɔla sangaa mɛɛ mɔɛi cɔwve tɛnda vana kɔllo nuaa yɛ. O kon, yiyannda co vanaa bɔɔ-bɔɔ o kɔltan la sinannin.»

Anɛɛ, vanalanɔ-tɛɛngaa-diom Hala-o

36Vanalanɔ-tɛɛngaa-diom Hala-o pum va lon, diolan Anɛɛ, cua Panuɛl-lo, fulaa o polale Asɛr len nin. Anɛɛ ndóò yuuva nin taw. Mɛɛ o cal o nɔu o felengiyɛi nin, vɔsilan tan ŋɔmmɛw o kon kɔɔli, 37mí pɔnɔ ndɔ vu. Mó lo a vii ken háá vɔsilan belaŋɔmaa a lahiɔɔlu, o faŋan o Cɛi-Hala-o nin te, o va kɔlan kaannden tosaa idii a icɔl. O va sumndo biyɔɔ mo va piɛilen. 38Telen Simeɔn va kon lon-ndo, mí Anɛɛ hun, mó mel Hala balika. Mó dimul vanaa va cumndo mì Hala ndóò baŋa Yerusalɛm-nda sɔɔn a poombɔ kon o kɔɔ.

Yosɛf muungu Nasarɛt

39Lɔ́ɔ́ Yosɛf nda Mari cii sɔɔn tɔŋndon peelu mɛɛ ndóò bɛnda yɛ-o, má muungu o kobi ndaa nin Nasarɛt, o tàndá Kalile-o nin. 40Poombɔɔ va hiovɔɔ laci a hindɔɔ, o va vɛlɛ yoomuan sɔlaa. Mó sɔla kɔlkaloo taw, Hala va vɛlɛ ndu kɛndɛi tosallo.

Yeesu luɛi o Cɛi-Hala-o nin

41Vɔsi oo vɔsi, yungu Yeesu-o va kɔlan Yerusalɛm le kafo-hiavaa-coo. 42Yeesu sɔlaa vɔsilan tɔ́ a latiɔn, má kɔa Yerusalɛm mɛɛ ndáà dema tosa a naamu kafo kon o kɔɔ yɛ. 43Kafoo cuvɔɔ, mí yungu ndɔɔ muungun, mí Yeesu lonnun Yerusalɛm, a sina le. 44A va yiyanndo maa o va vanaa nda va kɔlan-nda tɛɛn, má kɔa kɔla paale pilɛ. O kon kɔɔli, má kandu ndu nuwviaa puapilɛa ndaa a caaŋaa ndaa tɛɛn. 45Kɛ a seelun ndu le. Má muungu ndu nuwviaa háá Yerusalɛm. 46O paale yàándɔlen, má kɔ saalun ndu o Cɛi-Hala-o nin, o va icali vanaa pɛɛkaa latɔŋnda tɛɛn. O va nda nilan yaŋɔɔ mo va nda yuuniaa. 47Mí vanaa va ndu diomndo tueyɔɔ-a kpow a dɔawnun kɔndɔfili a kɔlkalu ndɔɔ a á mulila o va yɔngoo lan. 48Yungu ndɔɔ cɔu ndu, má dɔawnun kɔndɔfili, mí kala ndɔ ɲuna ndu aa: «Po nuu, le yɛɛ n tosal-lɛ naa dɛnɛ vaa nuaa? N co nɔm nuwviaa a buulanndo naa fuɲa nɔm.» 49Mó mulul nda aa: «Le yɛɛ niaa co yɛ ya nuwviaa? La sina le maa mɛɛ mì va o Fuɲa nuu lo cɛinin?» 50Kɛ a bii sɔɛi o va nda ken dimullo-e bila le.

51Mí Yeesu muungu nda ndaa Nasarɛt, mó bii sɔɛi ndɛi. Kala ndɔ va sɔɔn mun kpow mandanndo o kɔl. 52Yeesu va hiovɔɔ laci a hindɔɔ a á kɔlkaloo sɔlaa, dɛnnda ndɔlan la va Hala hɛnanndo, la va vɛlɛ vannda hɛnanndo.

Currently Selected:

Luke 2: BKG

Highlight

Copy