Luke 3

Kaannde Nsaŋ Vana-yinaa len

(Matie 3.1-12, Marke 1.1-8, Nsaŋ 1.19-28)

1O vɔsi tɔ́ a o ŋuɛɛnundɔɔ o masale Tibɛr Sesar len bɛngu, telen Pɔnse Pilate va masa-ibungaa o tàndá Yuda-o nin, mí Herɔde va masalen tosaa o tàndá Kalile-o nin, mí Filipe puapilɛ ndɔ ndu va masaa o lɛŋnde Iture len nin a o lɛŋnde Trakonitis len, mí Lisanias ndu va masalen tosaa o lɛŋnde Abilɛn-nden nin-ndo, 2Anɛɛ nda Kaif va bolii vanaa-solia-lasálàá, mí sɔɛi Hala-e dimulun Nsaŋ, po Sakario o lɛŋnde veselɛilen nin. 3Mí Nsaŋ kei o tàndáà Yurdɛn nin kpow, mó dimul vannda aa: «La mangala kela niaa, mì la sɔla yinɔɔ, o kon mì hakila niaalan la malnun haki.»

4O kon, mí sɔɛi Esai, vana-tɛɛngaa-diom Hala-o sɛva-e i peelun aa:

«Diomndo co yondaa o lɛŋnde veselɛilen nin aa:

‹La bɛɛndiaa nɛi Mɛlɛka-o,

la siɛɛnduu nɛila n'pelulan sakpo.

5Bóltan kpede la peelunnin,

mì pembon a buubuuon kpow n tol.

Nɛila tuunduan-ndan la sandunin,

mì nɛila vɔɔn-vɔɔnndan la muungu tɛlɛlɛ.

6O kon, vannda kpow a canin cinda Hala-o.›»

7O kon mí Nsaŋ ɲuna vanaa sɛ́lɛ́ bɛndua va hunɔɔ le yinɔɔ sɔlaa ndu o ba-a aa: «Niaa hɔ̀ɔ̀lɔ́a ha! Nɛ̀ɛ́ cɔm yɛ niaa nɛiyo le kɔltuw Hala co hunɔɔ tosan-ndo kpakpalaa? 8Mɛɛ la tosa niko dɛnnda kɛndɛla cɔm maa la mal kela niaa vɔɔndo, mì la mangalan ndan. La dimin o lakɔl te aa: ‹Abraham co fuɲa naa ni.› Kani mì dimul niaa, Hala nɔla mò siinguu powtan ndan cuavaa Abraham-nda. 9Cuei cuu nin toosiaa le puundun yɔmndo kilio. Yɔm oo yɔm kum komɔɔ kɛndɛ le, ndu kialunnin, mò viownun o yin.»

10Mí sɛ́lɔ́ɔ́ ɲuna Nsaŋ aa: «Yɛɛ naa n tosa yɛ niko?»

11Mó mulul nda aa: «Te vanndo nɔ pɛ domalan latiɔn, mɛɛ o ke vana nɔ loo o pilɛ, mì vana nɔ ɲɛdiaa-o bɛɛ piɔw ndu nda vana nɔ loo.»

12Mí vanaa biyaa mulua bɛɛ a hun le yinɔɔ sɔlaa, má ɲuna ndu aa: «Yɛɛ naa n tosa yɛ?» 13Mó mulul nda aa: «La handu ɲɛ-ɲɛ o ɲɛ nda dimul niaa le biyɔɔ-o coo le.»

14Mí vanaa cɔwva bɛɛ ɲuna ndu aa: «Naa yɛ, yɛɛ naa n tosa yɛ?»

Mó mulul nda aa: «La del vana coo le, la cua ɲɛ vana a lakafa le, la hìní kɔl a sala niaa.»

15Vannda va ɲɛ va hunɔɔ yɔŋnɔnndo cum, ma va ɲunanndo o lakɔl te Nsaŋ co Krista ni. 16O kon mí Nsaŋ mulul nda kpow aa: «Ya, o mɛnndan nin ya co niaa yinɔɔ ni, kɛ Vana hiow ya kpaayaa-o co hunɔɔ, i co bɛɛ o sɔvɛ le yoi ndɔɛi lasiamtai timbio le. Ndu, o yinnin niaa a Kɔl-Diandaa a á yinnden. 17Fɛlɛ hɛyaa ndɔɔ co ndu o ba, le kpele lɔaa n'mal ndɔɔ bɛɛsuuo, mò vow maalon o konda, mò lom foeende o yinnde ɲum te len nin.»

18Nsaŋ ndóò va pɛ vannda silala celen yɔngoo, o tiiyal nda Yoongu kɛndɔɔ. 19Kɛ nduyɛ, mí Herɔde va masaa Kalile-o, o Nsaŋ va kon sɔɔn vɔɔnndon dimullo le Herodiade, lanɔɔ puapilɛ ndɔ-o, a le dɛnnda vɔɔnnda o tosa lan-ndo 20handu vɛlɛ dɛnɛ vɔɔn celen o la o tosa lan coo: mó mal Nsaŋ o kaasoo.

Yeesu sɔla yinɔɔ

(Matie 3.13-17, Marke 1.9-11)

21Lɔ́ɔ́ vannda kpow a sɔla yinɔɔ-o, mí Yeesu bɛɛ sɔla yinɔɔ. Telen o va Mɛlɛka piɛiyo-o, mí halataalaa kumbin, 22mí Hala Kɔl-Diandaa toal ndu coo maa kangbo. Mí diomndo fula o halataala aa: «Po ni ya kaola taw-vo n co ni, a hɛnan ya.»

Polale Yeesu fula coo len

(Matie 1.1-17)

23Yeesu ndóò nɔ nin ɲɛ vɔsila beleyaa, mó kandu baala ndɔɔ. Vannda va yiyanndo maa po Yosɛf-o o va ni, Yosɛf po Elii-o pɛɛn, Elii 24po Matatias-o, Matatias po Levii-o, Levii po Mɛlki-yo, Mɛlki po Yanai-yo, Yanai po Yosɛf-o, Yosɛf 25po Matatias-o, Matatias po Amɔs-o, Amɔs po Naum-ndo, Naum po Hɛsli-yo, Hɛsli po Nakai-yo, Nakai 26po Maat-o, Maat po Matatias-o, Matatias po Semein-ndo, Semein po Yosɛk-o, Yosɛk po Yoda-o, Yoda 27po Yohanan-ndo, Yohanan po Resa-o, Resa po Sorobabɛl-lo, Sorobabɛl po Salatiɛl-lo, Salatiɛl po Neri-o, Neri 28po Mɛlki-yo, Mɛlki po Adi-yo, Adi po Kosam-ndo, Kosam po Ɛlmadam-ndo, Ɛlmadam po Ɛr-o, Ɛr 29po Yeesu-o, Yeesu po Eliesɛr-o, Eliesɛr po Yorim-ndo, Yorim po Matat-o, Matat po Levii-o, Levii 30po Simeɔn-ndo, Simeɔn po Yuda-o, Yuda po Yosɛf-o, Yosɛf po Yonam-ndo, Yonam po Eliakim-ndo, Eliakim 31po Melea-o, Melea po Mena-o, Mena po Matata-o, Matata po Natam-ndo, Natam po David-o, David 32po Yisai-yo, Yisai po Obɛd-o, Obɛd po Bus-o, Bus po Sala-o, Sala po Naasɔn-ndo, Naasɔn 33po Aminadab-o, Aminadab po Admin-ndo, Admin po Arni-o, Arni po Ɛsrɔm-ndo, Ɛsrɔm po Farɛs-o, Farɛs po Yuda-o, Yuda 34po Yakɔb-o, Yakɔb po Isaak-o, Isaak po Abraham-ndo, Abraham po Tara-o, Tara po Nakɔr-o, Nakɔr 35po Seruk-o, Seruk po Rehu-o, Rehu po Falɛk-o, Falɛk po Ebɛr-o, Ebɛr po Sala-o, Sala 36po Kainam-ndo, Kainam po Arfasad-o, Arfasad po Sɛm-ndo, Sɛm po Noe-o, Noe po Lemɛk-o, Lemɛk 37po Matusalɛm-ndo, Matusalɛm po Enɔk-o, Enɔk po Yerɛd-o, Yerɛd po Malaleɛl-lo, Malaleɛl po Kenan-ndo, Kenan 38po Enɔs-o, Enɔs po Sɛt-o, Sɛt po Adam-ndo, Adam po Hala cɔw-vo pɛɛn.

Currently Selected:

Luke 3: BKG

Highlight

Copy