Luke 20

Kpaaya Yeesu-o

(Matie 21.23-27, Marke 11.27-33)

1Paale pilɛ, mɛɛ Yeesu va vannda pɛɛkoo o Cɛi-Hala-o nin, mó va nda cɔmndo a Masale Hala len o kɔɔ. Mí bolii vanaa-solia-lasálàá, vanaa pɛɛkaa latɔŋnda a kaasoŋaa kɔlkalua lelɛŋnda hun, 2má ɲuna ndu aa: «Dimul naa, nɛ̀ɛ́-nɛ̀ vem yɛ nɔm dɛnndan ndan tosaa? Nɛ̀ɛ́ ke yɛ nɔm di kon?» 3Mí Yeesu mulul nda aa: «Ya bɛɛ i co niaa ɲuna: 4Yinɔɔ Nsaŋ va vannda-o, Hala óò vem ndu ni bàà vanndacieea?» 5O kon má yɔngan yiyanndan vellaa-velle, má dimi aa: «Te n muli pɛ aa ‹Hala vem ndu ni›, o co naa ɲuna aa: ‹Kɛ le yɛɛ nɛ niaa kɛɛ yɛ niko ndu laalan?› 6Kɛ te n muli vɛlɛ pɛ aa: ‹Vanndacieea vem ndu ni›, vannda kpow a co naa vii a powtan, kani a sina maa vana-tɛɛngaa-diom Hala-o Nsaŋ yɔŋnun ni.» 7O kon má kɔ mulul Yeesu aa a sina vana vem ndu vannda yinɔɔ-o le. 8Mí ndu bɛɛ dimul nda aa: «Mɛɛ ya bɛɛ, i cɔmnin niaa vana vem ya dɛnndan ndan tosaa-o le.»

Tale vanaa mandaa nakɔaa vɔɔnda

(Matie 21.33-46, Marke 12.1-12)

9O kon kɔɔli, mí Yeesu dimul vannda taloo aa: «Langbanɔɔ pum tɔl nakɔ n'rɛsɛnndo ni, mó sɔɔa vanaa tósà baalaa o nakɔ n'rɛsɛnndo nin-nda nakɔ kon o ba. O kon kɔɔli, mó kɔannun kelaa o lɛŋnde celen nin le telen vilɛi. 10Telen kiandaa tiiyaa, mó viam buɛi ndɔɔ o pilɛ o vanaa tósà baalaa o nakɔ n'rɛsɛnndo nin-nda lo haliko mi ndáà ke ndu tɔnɔ fula o nakɔ kon nin-ndo. Kɛ mí vanaa tósà baalaa o nakɔ n'rɛsɛnndo nin-nda lɔaa ndu, má mingi ndu bala fondo. 11Mó viam vɛlɛ buɛi celen. Má lɔaa vɛlɛ kon, má tɛɛmbuu ndu bɛ̀ɛ̀lan, má mingi bala fondo. 12Mó viam vɛlɛ buɛi yàándɔɔ. Má booluu kon, má toaw ndu. 13Mí vana nakɔɔ dimi aa: ‹Vɛ̀ɛ̀ ya co yɛ hee biyɔɔ? I co po ni kaolaa vomɔɔ, bɔɔle ma ke ndu bɛɛlen.› 14Kɛ vanaa tósà baalaa o nakɔ n'rɛsɛnndo nin-nda cɔu ndu, má dimulan vellaa-velle aa: ‹Vana nɔ kɛ́ɔ-vo co hoo ni. N diinun ndu haliko mi kɛ́ɔ lo le naa.› 15O kon má toaw ndu o nakɔɔ kɔɔli, má dii ndu.

Vɛ̀ɛ̀ vana nakɔɔ tosa yɛnin a nda? 16O hunnin, mò diw vanaa tósà kan baalaa o nakɔ n'rɛsɛnndo nin-nda, mò sɔɔ nakɔɔ vanaa celen o ba.» Mɛɛ nda tuei lende, má dimi aa: «Màá i yɔŋnun lende le!» 17O kon mí Yeesu tofa nda ciŋ, mó ɲuna nda aa: «Kɔlɔ yɛɛ sɔɛi co hee isɛvaa-e nɔ yɛ aa:

‹Pow vanaa tangulaa cɛiya viow-vo,

pow kon siŋnun pow lebollo ni?›

18Vana-vana del pɛ o pow kon coo, o yomiyomi, vana-vana pow kon del pɛ coo, o cui ndu.»

Le muloo malɔɔ Sesar o ba

(Matie 22.15-22, Marke 12.13-17)

19Fɔ́ɔ́fɔ̀, mí vanaa sɛvaa latɔŋnda a bolii vanaa-solia-lasálàá can nɛilan nuwviaa le ndu biyɔɔ. Kani má bii bila maa le nda ndóò dimi tale kon ni. Kɛ mí siòònde bii nda a vannda.

20O kon ma va Yeesu hɔlten kɔɔli, má viam vannda, mí vanaa kan tosa maa a kɔlta ndalan kpeekpei ndáà kɔɛ ni. Ndáà yeema mì ndáà tosa, mì Yeesu ndóò biinun a sondo, o kon mì ndáà kɔ lɔlu ndu o vanaa kialaa n'yamaa a o simlacia lelɛŋnda lo. 21Má ɲuna ndu aa: «Vana bɛndoo, n sina maa o sandei nin n co sɔɛi le vannda pɛɛkoo ni, a co vana-vana tofa le, o toɲaa coo n co vannda sɔɛi Hala-e pɛɛkoo ni. 22Lelan dimul naa, vɛ̀ɛ̀ o bɛnda pá mì n mal muloo Sesar muloo o ba?» 23Kɛ le tùú Yeesu ndóò sina kɔlkalu nda vɔɔndo-o, mó mulul nda aa: «La cɔm ya volii támái. 24Hɔlaa nɛ̀ɛ́ a diola nɛ̀ɛ́ la co yɛ lan lecoo?» Má muli aa: «Sesar ni.» 25O kon mó dimul nda aa: «Mɛɛ la mingul Sesar ɲɛ co le Sesar-o, mì la mingul Hala ɲɛ co le Hala-o.» 26A nɔla ndu biyɔɔ o sɔɔn ndɔn nin vannda o hɔl te. Mí kɔndɔfillo bii nda a muli ndɔɔ, má mei.

Ɲunaa a tendul vanvílɛ́iya o kɔɔ

(Matie 22.23-33, Marke 12.18-27)

27Mí Sadusea, a va dimio maa vanvílɛ́iya tendulnin te-a, a hun ɲuna Yeesu aa: 28«Kɔɔfa, ɲɛ Moise sɛval naa-o co hoo ni aa: Te vanndo vi pɛ, mò mɛi lanɔɔ, kɛ mò mɛi hɔ́ɔ́ le, puapilɛ vana kon bɛnda mò loo lanɔ kon, mò koma vilul vana vi kon-ndo cuawva. 29Nduyɛ puapilɛa pum a va nda ŋɔmmɛw. Mí o tasoo yil lanɔɔ, mó vu, o mɛi hɔ́ɔ́ le. 30Mí o diinndɔɔ loo ndu, o kon kɔɔli o yàándɔɔ. 31Mí ɲɔɔ kɔa lende puapilɛa ŋɔmmɛvaa kan tɛɛn, má vu, a mɛi hɔ́ɔ́ le. 32O nda kɔɔli, mí lanɔ kon bɛɛ vu. 33O tendul vanvílɛ́iya, lanɔɔ nɛ̀ɛ́ cua kon va yɛnin? Kani o kei vanaa ŋɔmmɛvaa kan kpow o ba o nɔu.» 34Mí Yeesu mulul nda aa: «Vanpiaandua co vanlaandua yilɔɔ o nɔlan o ceendo ho coo nanu. 35Kɛ vanaa Hala ke dio le tendullo fulaa ciee-piɔ́m, mà luɛi o ceen co hunɔɔ-o nin-nda, nda yilnin n'laandu le, a celnin o lanɔ le. 36A vi lɛnin te, kani maa mɛlɛkaa nda vanin ni. Poaa Hala-a nda vanin ni, le tùú nda tendulnin mà muungu yoomu-o. 37Le tendul vanvílɛ́iya, Moise cɔm sɔɛi ken kpendekele a dɛnɛ bɔɔ leyinndo o kɔɔ, telen o veelu Mɛlɛka aa: ‹Hala Abraham-ndo, Hala Isaak-o a Hala Yakɔb-o-o pɛɛn.› 38Nduyɛ Hala co Hala n'vanvílɛ́i le, kɛ Hala vanaa yoomaa o co ni. Kani le ndu, vannda kpow a co yoomu.» 39O kon mí vanaa pɛɛkaa latɔŋnda pum dimul Yeesu aa: «Vana bɛndoo, a caa sɔɛi dɛ.» 40Nduyɛ, vana-vana tɔɔndan-ndɛ mò ɲuna ndu ɲuna celen te.

Yeesu, po David-o

(Matie 22.41-46, Marke 12.35-37)

41O kon mí Yeesu dimul nda aa: «Le yɛɛ vannda co yɛ dimio maa po David-o Krista co ni? 42Kani o sɛbɛ Condun Lisaa nin, mí David pila dimi aa:

‹Mɛlɛka dimul Maalii nuu aa:

Cal-la o ba kɛndɔɔ coo,

43háá mì siinguu yaamɔaa nɔmnda ɲɛ nɔm kɛsiaa n'peloo.›

44Nduyɛ, David pila veelu ndu aa: ‹Maalii›, vɛ̀ɛ̀ o nɔla yɛ vɛlɛ ò va po ndɔɔ?»

La tósà dɛnndan maa vanaa pɛɛkaa latɔŋnda le

(Matie 23.1-36, Marke 12.38-40)

45Telen vannda kpow a va Yeesu nilan yaŋɔɔ-o, mó dimul kaandeŋaa ndɔa aa: 46«La mandan a vanaa pɛɛkaa latɔŋnda. À yeema kelaa a domala bɛndulan lekɔɔ. À ɲɔɔ hɛ́nàn le vannda vaa keiyo nda yilɔɔ o bɛ́ɛ̀la bɛndulan-nda. À yeema vɛlɛ calle o kpɛŋɛla taselan coo o cɛila lekaanndan nin a o fondala taselan o ɲɛdiaa kafoo. 47Nda poondiàà ɲɔɔn vanlaandua piaandaa ndaa vi-a o ba ni, mà bɛndi piɛilen, haliko mi vannda ce maa a naŋ. Lelan, Yamɛi ndɛi kiandunin dɛ.»

Currently Selected:

Luke 20: BKG

Highlight

Copy