Luke 21

Fangadaama vanalanɔ bala fondo pɔnɔ ndɔ vi-o yɔngu-o

(Marke 12.41-44)

1Yeesu heeloo hɔlla, mó ca vanaa bolofaa fangadaamala ndalan vowvo nɛɛ kɛsiaa bolofaa o Cɛi-Hala-o nin. 2Mó ca vɛlɛ vuɛɛn bala fondoo pɔnɔ ndɔ vi-o tààngálan tan tiɔn vowvo. 3O kon mó dimi aa: «Mì dimul niaa toɲaa, vuɛɛn bala fondo pɔnɔɔ vi hoo-o hiow vowvo a vanaa tɔ̀a kpow. 4Kani nda kpow, volin ndáà nɔ mako loon nda yɔngu ni, kɛ ndu-ndu, ɲɛ ndóò nɔ-o kpede o yɔngu ni, ɲɛ ndóò tiindan le dioo-o pɛɛn.»

Yeesu soo a tambii Yerusalɛm-nde o kɔɔ

(Matie 24.1-2, Marke 13.1-2)

5Vanaa pum a va sɔɛi a Cɛi-Hala-o o kɔɔ, má va cɔmndo mɛɛ powta ndáà cɔw ndu, má kɛmikɛmiaa ndu lan, a ɲɛm-kéan vannda ndáà hin-ndon mun naŋ yɛ. Mí Yeesu dimi aa: 6«Paale vanin, powvo pilɛ bɛɛ lonin o powvo coo o ɲɛ-ɲɛ niaa co hoo cɔu-vo nin te, la co hunɔɔ koombiaa kpow.»

Tɔɔmaselela tosannin lɔ́ɔ́ pá mì mɛɛlula ceendo la tiiya-o

(Matie 24.3-14, Marke 13.3-13)

7Má ɲuna ndu aa: «Kɔɔfa, telen kuɛɛ kon tosan yɛnin? Yɛɛ va yɛnin tɔɔmaseloo le dɛnnda lan cɔmndo?» 8Mí Yeesu muli aa: «La mandan taw, yɔŋii niaa luɛi o pɔwlan nin. Kani vanaa bɔɔ-bɔɔ a hunnin o diola nilan, mà cɔm maa o diola nilan nda hin ni. À diminin aa: ‹Telenndo co nin le tiiya›. Kɛ la del nda kɔɔli le. 9Tuma niaa tuɛinin sɔɔn cɔwvon a dɛnnda laasi-laasilan-ndo, siòòŋii bii niaa le. Kani fɔ mì kon tosan fɔlɔn. Kɛ mɛɛlulan la ve vɔnin kpɛɛlun te.» 10O kon kɔɔli, mí Yeesu dimul nda aa: «Vanaa-mangalaa-isɔɔa cannin vanaa-mangalaa-isɔɔa celen cɔlɔba, mì masalen le cɛn masale celen cɔlɔba. 11Lɛŋnden le ɲiiyanin taw, mì nààla halimaalan a yima fofolan ma luɛi o fondalan lapum. Dɛnnda kɔndɔfiltan a kaamaala bɛndulan la cɔmnunnin o halataala.»

Ɲɛ vannda tosalnin kaandeŋaa Yeesu-a o

(Matie 10.17-22, Marke 13.9-13)

12«Kɛ lɔ́ɔ́ pá mì kon kpede hun tosan, a biinin niaa, mà tol niaa yɛlen, mà kɔɛ a niaa o cɛila lekaanndan nin. A malnin niaa o kaasolan, mà kɔɛ a niaa o masaa lo a o masaa n'bungaa lo le diola nilan. 13Kon tosanin ni mì la soli seilen nda o hɔl. 14Lelan la nɔ pɔɔ o kɔl maa la suunin le niaa pila ciindian te. 15Kani i sɔaanin niaa sɔɔn o lasondo, mì ke niaa kɔlkaloo, o yaamɔaa niaa nɔlanin niaa simul mà sɛɛngiaa niaa loo. 16Hali fuɲaa niaa, kalaa niaa, puapilɛa niaa, vanayan niaan a caaŋaa niaa malnin niaa yaamɔaa niaa o ba. A diwnin vanaa pum niaa tɛɛn. 17Vannda kpow a kɛɛnin niaa le diola nilan. 18Kɛ hali yiiŋii co niaa o lebol-le, lepilɛ bɛɛ le delnin lɛŋ te. 19Lelan la ló biuvɔnndo, mì la sɔla cindaa.»

Yeesu soo a tambii Yerusalɛm-nde o kɔɔ

(Matie 24.15-21, Marke 13.14-19)

20«Telen niaa canin mì vanaa cɔwva balu Yerusalɛm-ndo, la sinanin o kon maa tambii ndɔɛi sɔɔnguu. 21O tuma kon, vanaa vanin o tàndá Yuda-o nin-nda bɛnda ma ɲaanun le kɔnndan o pembon coo. Vanaa vanin o kobio nin-nda bɛnda ma faŋan. Vanaa vanin o ciɛɔn nin-nda bɛnda lɛ ma muungu ciee le. 22Kani palɛi ken Mɛlɛka mingulnin vanaa ndɔa maa ni, haliko mi ɲɛ sɛvan-ndo peelun. 23Dɛnɛ palaa vanin le vanlaandua vanin a folilan-nda le vanlaandua vanin vɔɛsio palɛi ken-nda. Kani sanga bɛndoo vanin o lɛŋnden nden nin, mì kɔltuwvo#21.23 kɔltuwvo: Nanun, a kɔltuw Hala-o o kɔɔ Yeesu soo ni. tol vannda ha coo. 24A diwnin nda a mɔɛi cɔwve, a kɔanin a vanaa tɔ̀a, mà mal nda o kaasolan o lɛŋii vanaa-mangalaa-isɔɔa nin. Yerusalɛm delnin vanaa sina Hala le-a o ba, mà nɛw ndu, háá mì telen kelun le nda-o cuu.»

Le hunɔɔ Po vanacieo

(Matie 24.29-31, Marke 13.24-27)

25«Tɔɔmaselan la tosannin o paalen, o paangei a o loeon nin. O lɛŋnden coo, sanga bɛndoo toalnin vanaa-mangalaa-isɔɔa coo. À sinanin mɛɛ nda yɔŋnin a ɲɛ vuu bɛndu vanin cɔnɔnndo o mɛmma ihɛllan nin a o tindima mɛmma ihɛllan nin-ndo le. 26Vanndacieea malnunnin kɔl a siòònde le ɲɛ co hunɔɔ tosan o lɛŋnden coo-o. Kani kpaayala co o halataala lan la hiilunnin. 27O kon, vannda canin Po vanacieo hunɔɔ o yumbuyumboo nin a kpaaya bɛndoo a á biilu bɛndoo. 28Te dɛnnda lan la kandu pɛ tosan-ndo, la heelu hɔlla, mì la tofa coocoo, kani baŋan niaa sɔɔnguu.»

Pɛɛkoo a voosu tumndo o kɔɔ

(Matie 24.32-35, Marke 13.28-31)

29O kon kɔɔli, mí Yeesu dimul nda taloo aa: «La tofa vɔ voosu tumndo a yɔmnde kpow. 30Te i pui dɔ́ɔ́ pɛ, niaa pila sìná dɔ́ɔ́ maa vɔɔlen le co le tiiyaa. 31Lende koni, niaa bɛɛ, tuma niaa canin dɛnnda lan tosanndo-o, la sìná niko maa masale Hala len le co nin kpɛɛlun. 32I co niaa toɲaa dimul, lambio ho hiwnin te, mì dɛnnda lan kpede la peelun. 33Halataalaa a lɛŋnden le hiawnin, kɛ sɔɔn nun hiwnin te.»

Le sabu naa bɛnda mì n va a bɛɛndiannda-o

34«La caa taw! Yɔŋii niaa laasiaa kɔlta niaalan a pululen, a mɔiyan kolɔɔ a á buulannda ceenndan. Bau, paale Po vanacieo hunnin-nden le co tiiya, la venin nden kɔl te. 35Kani paalen le toalnin vanaa co o ceendo kpow coo-a coo mɛɛ visio haw o yaŋɔɔlen nuaa yɛ. 36La lɔl te, la va piɛilen lɔ́ɔ́-lɔ́ɔ̀. O kon, mì la sɔla yoomuan le dɛnnda hun tosannin-ndan kpow biuvɔnndo, le simndan Po vanacieo o hɔl.»

37Ipala Yeesu ndóò pɛɛku vannda o Cɛi-Hala-o nin ni. Icɔl, o kɔɛ, o kɔ lɔl o pembii nda veelu aa Pembii n'oliviee-e coo. 38Paalen léè sɛ dɔ́ɔ́ pɛ, vannda kpow ndáà hin le ndu nilan yaŋɔɔ o Cɛi-Hala-o nin.

Currently Selected:

Luke 21: BKG

Highlight

Copy