Gɔwɔ tɔɔi 22
22
Isaakə kulɔ mɛ̨nį a haláá
1Ɓɛlɔwai Isaakə ə kɛnɛ̨ la, Yálá ə Abrahamə hukɔɔn. Nąąlɔwai, Yálá ə Abrahamə təli, yɛ mą: «Abrahamə!»
Abrahamə ə nwoo ŋąąpənə, yɛ mą: «Ną́mu, ɲą́ą́ kaa, nwɛ́li tɔɔi.»
2Yálá yɛ Abrahamə ɓa: «Ə́ lon ɉulɔnu kɔ́w tɔ̨nɔ̨i ɲɛ̨i a Isaakə, yai ŋɛ̨i nwɛli kaa yɛ́i, kpɔ kɛnɛ̨i, ɉəɠə ə́ li la Moriya lɔi hu, yee ta ɓa yii gáá pai nɛi yɛ́. Ya həli laa, ə́ Isaakə kulɔ laa mą́ą́ a haláá.»
3Mąą yələ laa ɓoɔ, Abrahamə ə humo, yələ ɓoi bɔ lɔwai ə kwɛi ɓɛla, yii di kaa li ɉaláá hɛn gələn ɉii la. Ə nwɔ hoohvaalən hąą yili, ə nwɔ luwɔ hinąą veelɛ həɠə, di tɛɛ diɛ li ɓɛi ŋɛ̨i di nąą lɛ mą, da Isaakə ni kəlee. 4Voló ɉaaɓa yələ, ɓɛi tii di nąą lɛ Abrahamə ɓa, ə nwun muhəɠə, ə nąą kaa kpɔ kwɛa la. 5Ə mo nwɔ luwɔ hveelɛi tii diɛ, yɛ diɛ: «Ka lɛɛ ɓɛ ɲee kɔ́wɔ la, ɉoohvaalən gwɛlɛ, kwa nokoloi ŋɛ̨i ku kaa li ku kwɛli hvilɛn Yálá ɓa, ku pənə ku pa.»
6Abrahamə ə gwɛi yili həɠə ə nąą non Isaakə nwuɔ̨, yaa kpinį tii, ə mowa həɠə, ə bɛlɛ nwɔ̨n ma, diɛ li. Di kɛɛ lii di nu hveelɛi, 7Isaakə ə nąn Abrahamə mąąnikɛ, yɛ mą: «Ną́n!»
Abrahamə ə nwoo ŋąąpənə, yɛ mą: «Nón, yɛ́ lə?»
Yɛ mą: «Nwɔ̨n gaa gu yəi, kwɛi yɛ ɓo gu yəi, kɛlaa, mɛlaa lon gu kaa lii gulɔi a haláá, gaa mį?»
8Abrahamə ə nwoo ŋąąpənə, yɛ mą: «Nón, Yálá kpinį ɓə pai mɛlaa lon gɛi.»
Di tɛɛ diɛ li. 9Ɓɛlɔwai kɛa di həli la ɓɛi ŋɛ̨i Yálá ə nąą lɛ Abrahamə ɓa, Abrahamə ə haláá kulɔi ta pɛli laa, ə gwɛi pu mɛ̨i, ə Isaakə hon, ə ɲee laa bulu, ə ɲili, ə dɛ ə naa gwɛi mɛ̨i. 10Ə mowa həɠə kɛa, yɛ pa non nwun deei la. 11Kɛlaa, Yai-Laa nwɔ malaka ə lɛɛ yələ, ə Abrahamə təli, yɛ mą: «Abrahamə! Abrahamə!»
Abrahamə yɛ mą: «Ną́mu, ɲą́ą́ ka, nwə́li tɔɔi.»
12Malaka yɛ mą: «Hvo mɛ̨nį ta kɛ a ɉulɔnon tii, ŋą́ą́ gɔlɔn gea, gɛ́ diɛ, yáá nwɔ́ kɛnɛ̨ laa mąąwiɛ, hvo kɛ lənə li ə́ lon gulɔi mą́ą́ a haláá.»
13Abrahamə yɛ gaa ɲɛ̨i laai gwɛlɛ, ə ɓɛlaa hilɛ ta kaa tɔɔni gwɛlɛ, kpɔlɔ aa kpəlaan mįnɛ̨ ɓa, ə li ə ɉon, ə gulɔ a haláá, a non mąąhvalin. 14Abrahamə ə gɛɛnąą tii laa hee, yɛ mą: «Yai-Laa a gili lɛɛ ɉu.» Mɛ̨nįi gɛi, háá ɓa háá, da kɛ gɛɛnąą tii laa ɓaa: «Yai-Laa a gili lɛɛ ɉu yee ɓa.»
15Yai-Laa nwɔ malaka ə lɛɛ ɲələi, ə Abrahamə təli gee mɛ̨i veelɛnąą, yɛ mą:
16«Yai-Laa aa gwɛla a gbɔwɔ, yɛ mą: Ɲą́ą́ ɓə gáá a Yálá hvulú, mɛ̨nįi ŋɛ̨i yáá gɛ, yii kpɔ hvo kɛ lənə li ə́ lon gɔw tɔ̨nɔ̨i ŋɛ̨i kulɔi mą́ą́ a haláái, 17gáá lúwɔ́ tooi yɛ́, ŋį́ ə́ huwu ɓɛɛlɛ; gbulu hu a kɛnɛ̨ yɛ gboloyá kwɛlɛ ɲɛa kɔ́w. Ə́ huwuhu nuą yee a tɛɛ di yowoɠaa diɛ, diɛ di wɔ taaɠaai həɠə di yəi. 18Gáá pai lúwɔ́ tooi lɔi mɛ̨i nuą diɛ, ə́ huwu haalai, mąąhɔlɔɓo, yáá nwóó hon.»
19Yili pulu, Abrahamə da non di pənə di pa nwɔ luwɔɠaai pɔ, da diɛni kəlee di pənə diɛ pa Beɛrə-Seva. Nąą ɓə Abrahamə ə kɛ laa heeni.
20Mɛ̨nįɠaai tii kəlee tɛɛ pulu, Abrahamə ə bələ mɛ̨n, diɛ mą: «Ə́ ləɠə hulɔnu Nahɔrə da nɛ̨ą Milka daa lon ɉinąą hɔlɔɓo. 21Di lonnii tii laa ka: Dɔlɔɔ ɓaa: Usə. Nəɠə laa ɓaa: Buzə, ɛlɛɛ, da Kemuɛlə, yai kɛ a Aramə nąn. 22Kemuɛlə nəɠəni ɓaa: Kɛsɛdə, Hazo, Pildasə, Yidlafə da Betuɛlə.» 23Nu mɛ̨ihaaɓai tii ɓə kɛ a Abrahamə nəɠə Nahɔrə da nɛ̨ą Milka di lonnii. Betuɛlə ɓə kɛ a Rebeka nąn. 24Nahɔrə nɛ̨ą veelɛ kɛɛnąą ə kɛ laa, diɛ kɛ nąą ɓaa: Reuma. Reuma da Nahɔrə di lonŋąą hɔlɔɓo, yiliɠaai laa ka: Tɛva, Gahamə, Tahasə da Maaka.
Currently Selected:
Gɔwɔ tɔɔi 22: BKPG
Highlight
Share
Copy
Want to have your highlights saved across all your devices? Sign up or sign in
