Genesis 17
17
Sivunniuġun Nalunaiñŋutchiġñikun#17.1 Nalunaiñŋutchiq sivuniŋa aŋutim quġġiviata amiŋa sivuaniittuaq iḷaŋŋaġmarruŋ.
1Abram tallimakipiaġutaiḷatun (99) ukiuniŋman, Atanġum niptaġvigivlugu uqallautiŋagaa, “Uvaŋa uvva Sapiġñaqtuaq God. Kamakkutiqaġutin uvamnun ataramiglu pasiñaġumiñaiḷḷutin. 2Sivunniuġunmik inillaiñiaqtuŋa iliŋnun aasii iñugiaktuanik kiŋuvaaksriḷḷutin.” 3Abram punŋaruq kiiñani tutiłługu nunamun, aasii God uqallaktuq, 4“Inillairuŋa uumiŋa sivunniuġunmik iliŋnun: Unniqsuqłiigikpiñ tavra ilvich maŋŋuuniaqtutin iñugiaktuanun nunaqpaich iñuŋiññun. 5#Ro 4.17.Atqiñ Abram-guŋaiġñiaqtuq, aglaan Abraham-guġluni, qanukkii maŋŋuuniaqtutin iñugiaktuanun nunaqpaich iñuŋiññun. 6Kiŋuvaaksriññiaġikpiñ iñugiaktuanik, aasii iḷaŋich umialiguġniaqtut. Iñugiaksivaił̣ł̣utiŋ iññiġniagaich qavsich nunaqpaich.
7 #
Lk 1.55. “Taŋŋiġñiaġiga unniqsuqłiisiga iliŋnullu kiŋuvaaġnullu kiŋuniġiigñiaqtuanun, isuksraiḷaamun inniaqtuq sivunniuġun. Uvaŋa iliŋnun God-auniaqtuŋa God-auluŋalu kiŋuvaaġiniaqtaġnun. 8#Ac 7.5.Qaiññiaġiga iliŋnun kiŋuvaaġnullu manna nuna paŋmami iñuuniaġvigiran. Tamatkiġḷugu nunaŋa Canaan piginiaġaat kiŋuvaaqpich isuitchuamun, aasii uvaŋa iliŋisa God-iginiaġaanŋa.”
9God-im uqallautigaa Abraham, “Ilvich tavra kamagiruksraġigiñ sivunniuġutaurruaq, ilviḷḷu kiŋuvaaqpiḷḷu kiŋuniġiigñiaqtuat. 10#Ac 7.8; Ro 4.11.Ilviḷḷu kiŋuvaaqpiḷḷu uvva sivunniuġun kamagiraqsraqsi: aŋutipayaat nalunaiñŋutchiqsuksraurut. 11-12Tavraŋŋaaglaan nalunaiñŋutchiqsuksraġigisi aŋutaiyaapayaat aniruat uvlianikpata tallimat piŋasuni, iḷagilugisuli kivgaġiravsi iġñiaġiraŋich aniruat igluvsiññi suli kivgasi tauqsiaguŋaruat allaniñ nunaniñ. Taaptuma nalunaiġñiaġaa inillaktauruaq sivunniuġutikun unniqsuqłiiñiq inniaqtilaaŋanik iligniḷu uvamniḷu. 13Iluqaisa aŋutit aŋutaiyaallu nalunaiñŋutchiqsauruksraurut, aasii taamna nalunaiñŋutauniaqtuq timivsiññi sivunniuġutiga inniaqtilaaŋanik isuksraiḷaamun. 14Kiñapayaaq aŋun nalunaiñŋutchiqsauŋaitchuaq iḷaullayumiñaitchuq uvaŋa iñugiramnun, qanukkii ilaata nalaunŋaitkaa inillaktauŋaruaq sivunniuġutikun unniqsuqłiiñiq uvamnun.”
15God-im uqallautigaa Abraham, “Tuvaaqatin taiguŋaiġñiaġiñ Sarai-mik; tavraŋŋaaglaan atiġiniaġaa Sarah. 16Quviasaaġusiaqaqtinniaġiga iġñiqaqtillutin ilaagun. Aakaġuġniaqtuq iñugiaktuanun nunaqpagnun, aasiisuli umialiŋŋuġniaġmiut iḷaŋich kiŋuvaaŋisa.”
17Abraham puttuq aksiutilġataqługu kiiñani nunamun, aglaan iglarraqsimaruq isumasaqłuni, “Iñuk imña miqłiqsiyumiñaqpa ukiuqtutigiruaq tallimakiapiatun (100)? Sarah miqłiqsiyumiñaqpa ukiuqaqtuaq sisamakipiaq qulitun (90)?” 18Abraham-gum uqallautigaa God, “Ishmael una kiŋuvaannaqtisiññaġuŋ!”
19Aglaan God uqallaktuq, “Naumi. Tuvaaqatin Sarah iġñiqaġniaqtuq aasii atchiġñiaġiñ Isaac-mik.#17.19 Hebrew-t uqaluŋanni “Isaac” sivuniŋa “iglaqtuq.” Inillagniaġiga sivunniuġutiga ilaanun kiŋuvaaġiniaqtaŋiññullu taimuŋa isuitchuamun. Sivunniuġun inniaqtuq isuksraiḷaamun. 20Tusaaŋagiga apiqsriaġiran Ishmael-kun, tainnaqługu piḷḷuatautiqaqtinniaġiga aitchuġniaġiga iñugiaktuanik miqłiqtuksraŋiññik iñugiaktuaniglu kiŋuvaaqaqtillugu. Aapaginiaġaat qulit malġuuruat (12) qaukłiuniaqtuat, aasiisuli kamanaqsiḷugu nunaqpaguqtinniaġitka ilaata kiŋuvaaġiniaqtaŋich. 21Aglaan sivunniuġutiga inniaqtuq iġñiġnun Isaac-mun, aniñiaqtuamun Sarah-miñ innaiḷikpan ukiutqigu.” 22God-im uqautiŋaiqamiuŋ Abraham, uniñŋagaa.
23Taaptumani uvlumi Abraham-gum kamagivlugu God iġñini Ishmael nalunaiñŋutchiqsinŋagaa iluqaisalu allat aŋutit igluqatiini, kivgaġiratiglu aniŋaruat aimmivigmiñi tamatkualu ilaata tauqsiaġiŋarani. 24Abraham ukiuqaŋaruq tallimakipiaġutaiḷatun (99) nalunaiñŋutchiqsaukami, 25aasii iġñiŋa Ishmael ukiuqtutigivluni qulit piŋasutun (13). 26-27Tavrani uvlumi Abraham-lu iġñiniḷu aŋutipayaallu iglumiuqatiŋich kivgauruallu aniŋaruallu tavrani iglumi tauqsiaguruallu allaniñ nunaniñ nalunaiñŋutchiqsauŋarut atautchikun.
Currently Selected:
Genesis 17: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
