Genesis 18
18
Abraham Unniqsuqłiusiaqaqtuq Iġñiksraŋanik
1Ataniq niptaŋaruq Abraham-mun qiksigñaqtuani napaaqtuqpaŋiññi Mamre-m. Abraham aquppiuraaqtillugu paaŋani tupiġmi uunaqsiviuraġmiuġlu uvluq, 2#He 13.2.aaġluqami tupaŋaruq tautukkamigi piŋasut aŋutit makitaruat tavrani. Tautuksaqługiḷḷu, aqpamik kasuġiaŋagaich tupiġmiñ. Pułłuni kiiñani aksiutivlugu nunamun, 3uqallaktuq, “Aŋutiit, iviġaumagiguvsiñŋa qaaŋiqsaaġnasiñŋa isiġitchi. 4Qaġġirriḷaŋa imiġmik isigavsiññun iqaġiviksravsiññik; uumani unaŋuiqsiallagitchi ataani napaaqtum. 5Qaġġirriñiaqtuŋa niqiłauranik; sayyaktaaġumagaasi iglauniksravsiññi. Quyaligivsiŋa uvva ullakkavsiñŋa aimmivimñun, ki aasii savautilavsi.”
Iliŋisa kiugaat, “Quyanaaġivsigiñ; taamna akuqtuġniaġikput.”
6Abraham qilamiqsruqłuni tupiġmignuktuq aasii uqallautivlugu Sarah, “Qilamiksruaġlutin, palauvalluatautignik punniliuqtualugiñ.” 7Abraham aqpałłuni niġrutimignuŋaruq naliġagiaqłuni nuġġaġmik aqitchuamik, aasii kivgamun qaił̣ł̣ugu, qilamiqsruqłuniḷi kukiuŋagaa. 8Tavraasii Abraham-gum paramik, immugmik, nuġġauvlu niqiŋanik, niqłiqsuŋagaich taapkua iñuich. Nayuŋagaich niġiruat napaaqtum ataani. 9Tavraasii iliŋisa apiġiŋagaat, “Nauŋ imña tuvaaqatin Sarah?”
“Qamma tupiġmiittuq,” kiugaich.
10 #
Ro 9.9. Iḷaŋat uqallaktuq, “Ukiutqigu tainnaiḷikpan qaitqiġñiaqtuŋa, aasii tuvaaqatin Sarah iġñiqaŋaniaqtuq.”
Sarah tunuanniiłłuni taapkua inuich, tupqum paaŋani, naalaġniŋaruq. 11Abraham-lu Sarah-lu utuqqaliŋaruk, aasii Sarah miqłiqsiyumiñaiŋaruq. 12#1 P 3.6.Tavraasii Sarah iglaġutchaŋaruq ilimiñun uqallakłuni, “Aaquaŋallaġma piḷguiḷiŋavluŋalu, tavrauvaŋa nalaqatiqannaraaġumiñaqpiksuli? Uvva suli, uiga aŋayuqaaŋammiuq.”
13Tavraasii Atanġum apiġigaa Abraham, “Summan Sarah iglaqpa aasii uqallakhuni, ‘Miqłiqtuqaġumiñaqpik tavra aaquaŋallaġma?’ 14#Lk 1.37.Sumik imña piqaqpa siġġaġnaqpaitchuamik Ataniġmun? Uqallausiptun, ukiutqigu tainaiḷikpan utiġniaqtuŋa, aasii Sarah iġñiqaŋaniaqtuq.”
15Sarah iqsivḷuni, iglaŋiññiruq. “Iglaŋitchuŋa,” uqallaktuq.
“Aaŋ, iglaqtuatin,” kiugaa Atanġum.
Abraham Qiññuaqtuqtuq Sodom Pisigivlugu
16Tavra aŋutit makinŋarut niġianikkamiŋ aullaqsaqłutiŋ aasii qiviaqłutiŋ Sodom tuŋaanun, Abraham-gum pisuaqasiŋagaich aullaqtuat. 17Aasii Ataniq uqallaktuq inmiñun, “Iriqsimalagu Abraham-miñ suyumaalliqsilaaġa? 18Ilaata kiŋuvaaġiniaqtaŋich kamanaqsiḷutiŋ nunaqpaguġniaqtut, aasii ilaaguaġlugu piḷḷuatautiqaqtinniaġitka iluqaisa nunapayaat. 19Naliġaaġiŋagiga piraksriiḷḷatquvlugu iġñiġutiiŋiññik kiŋuvaaġiniaqtaŋiññiglu kamakkutiqaquvlugich uvamnun iluaqtualiqirautquvlugiḷḷu nalaunŋaruakullu iñuutquvlugich. Taapkua maliġuaqpatigik nalautinniaġitka iluqaiññik unniqsuqłiisigiŋaratka Abraham-mun.”
20Tavraasii Ataniq uqallaktuq Abraham-mun, “Pigiipiaġataqtuanik pasiraurut Sodom-miut Gomorrah-miullu, suli piḷuusiqiaŋat piaġiipiaġataqłuni pigiitchuq. 21Ullautiruksrauruŋa takanuŋa iḷitchuġisaġluŋa iḷumun inmagaisa tusaaratka pasirauniŋatigun.”
22Tavraasii malġuk iññuk aullaqtuk tuŋaanun Sodom, aglaan Ataniġlu Abraham-lu uniktinŋaruk. 23Abraham-gum ullakługu Ataniq apiġigaa, “Tavra ilvich suksraapiaġniaqpigich patchisaiḷaat taputilugich pasirauruanun? 24Malġukipiaq qulit (50) patchisaiḷaat iñuich inniqpata iniqpagmi, tavra suksraunġiġñiaqpiuŋ iluqaan iniqpak? Suksraunġiŋiḷḷakkumiñaqpiuŋ annautisaġlugich malġukipiaq qulit (50) patchisaitchuat? 25Nalupqinaitchuq tuqutchiyumiñaitchutin patchisaiḷaanik piqatigilugich pasirauruanun. Tainna piyumiñaitchutin. Tainna pigaluaġuvich, patchisaiḷaat tatavsaqtauniaqtut iḷaulutiŋ pasirauruanun. Taamna nalautitchumiñaitchuq. Isivġiqtiŋa nunapayaam savaktuksrauruq nalaunŋaruakun aŋalatchiḷuni.”
26Atanġum kiugaa, “Paqitkuma malġukipiaq qulinik (50) patchisaiḷaanik iñugnik Sodom-mi, suksraunġiġñiaŋitkiga iluqaan iniqpak pisigilugich.”
27Abraham uqallalgitchuq: “Suliqutigiŋaiŋŋa sapiqtusuutaił̣ł̣uŋa uqaqatigivsaaġukkapkiñ, Ataniiq. Iñugruiññauvluŋa uqallakkumiñaitkaluaqtuaŋa tainna. 28Aglaan uvva malġukipiaq tallimałhiñat (45) patchisaiḷaat iñuich inniqpata malġukipiaq quliŋiḷaat (50), tavra suksraunġiġñiaqpiuŋ iluqaan nunaaqqiq inuŋaniḷugu tallimanik?”
Atanġum kiugaa, “Suksraunġiġñiaŋitkiga nunaaqqiq paqitkuma malġukipiaq tallimanik (45) patchisaiḷaanik iñugnik.”
29Abraham uqallalgitchuq: “Aasii iḷaanni malġukipiałhiñatun (40) iñugiaktigiruat patchisaiḷaat inniqpata.”
Ilaata kiugaa, “Suksrauġiġñiaŋitkiga malġukipiatun (40) iñugiaktigiruat patchisaiḷaat inniqpata.”
30Abraham uqallaktuq, “Qinnautinaŋa, Ataniiq, aglaan uvva uqallavsaaqtuksrauruŋa. Aasii iḷaanni iñuiññaq qulitualuich (30) patchisaiḷaat inniqpata?”
Ilaa uqallaktuq, “Suksrauġiġñiaŋitkiga paqitkuma iñuiññaq qulinik (30).”
31Abraham uqallaktuq, “Suliqutigiŋaiŋŋa sapiqtusuutaił̣ł̣uŋa uqautivsaaqapkiñ, Ataniiq. Iḷaanni aasii iñuiññatun (20) iñugiaktigitualuktuat patchisaiḷaat inniqpata?”
Ilaa uqallaktuq, “Suksrauġiġñiaŋitkiga nunaaqqiq paqitkuma iñuiññatun (20) iñugiaktigiruanik.”
32Abraham uqallaktuq, “Qinnautinaŋa, Ataniiq, uqallavsaallagniaqtuŋa atausimik. Aasii qulitualugnik patchisaiḷaanik paqitkuvich?”
Ilaa uqallaktuq, “Suksrauġiġñiaŋitkiga quliuruat inniqpata.” 33Uqaqatigianikkamiuŋ Abraham, Ataniq aullaqtuq, aasii Abraham utiqłuni aimaaġvimiñun.
Currently Selected:
Genesis 18: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
