Genesis 20
20
Abraham-lu Abimelech-lu
1Abraham nuunŋaruq Mamre-miñ kiluliñaaŋanun Canaan-gum, Negev-mik atiqaqtuamun aasii iñuuniaqłuni akunġagni Kadesh-guvlu Shur-vlu. Aquvatigun, iñuuniallaġmi Gerar-mi, 2#Gn 12.13; 26.7.Abraham uqallaŋaruq Sarah aniqatiginivḷugu. Tavraasii Umialiguruam Abimelech-gum Gerar-ġmiuguruam Sarah ilimiñuutipkaŋagaa. 3Unnuat iḷaŋanni God-im niptaġvigigaa Abimelech siññaktukun aasii uqallakłuni, “Tuquniaqtutin, qanuq uvva taamna aġnaq piksraqtaaġiŋagiñ katitkaniŋaruaq.”
4Aglaan Abimelech-gum aksiŋaiñŋagaa, aasii uqallaktuq, “Ataniiq, patchisaitchuŋa! Tavra suksraunġiġñiaqpiŋa iñugiratkalu? 5Abraham uvva ilaa uqallaŋaruq aniqatiginivḷugu, ilaasuli, Sarah, tainnaŋammiuq. Isumamni killukuaŋaitchuŋa.”
6God-im kiugaa siññaktuŋani, “Ii, iḷisimaruŋa taamna piŋagiñ pigiiḷḷiqunmik isumaqaġaluaġnak; tavraasii piḷuusiqipkaŋitkikpiñ paaqłagluŋa aksiktinŋaitkigalu iliŋnun. 7Aglaan uvva, qaitqiguŋ aġnaq uiŋanun. Uqaqtauruq God-mun, suli aŋaiyyutiniaġaatin, tuquŋitchumautin. Aglaan utiqtinŋisuaġupku, tavra kilikkikpiñ tuquniaqtutin, ilviḷḷu suli iluqaġmiŋ iñugiratin.”
8Uvlaatchaurami uvlaakumman Abimelech-gum ququaġaich atanauraġirani aasii uqallautivlugich nalautittuamik, tavraasii iqsitchapiaġataŋarut. 9Abimelech-gum ququaŋagaa Abraham aasii apiġivlugu, “Qanuq imña aŋalanniqpisigut? Sumik imña pimaqłuŋavigiñ qaġġirriyumiñaqsivḷutin suksraunġiunmik uvamnullu atanniqsuivigiramnullu? Kiñaunnii tainnatchimik aŋalatchiruksrauŋipiaġataqtuq ilvich aŋalatchisiktun uvamnun. 10Summan uvva tainna piruatin?”
11Abraham-gum kiugaa, “Isumavluŋa kiñaunnii maani qiksikkutiqaŋiññasugivlugu God-mun, aasiisuli tuqunniaġasugiluŋa iliŋiññun tuvaaqatiga piññaktaaġisuglugu. 12Uvvakii ilaa nanmiñiq aniqatigigiga. Panigigaa aapagma, aglaan allamik aakaqaqłuni, aasii tuvaaqatchiutiŋagiga. 13Tavraasi God-im tilimmaŋa aapama igluaniñ aullaquvluŋa allanun nunanun, uqallautigiga tuvaaqatiga ‘Iḷumun nakuaġigumŋa uqallausiġiyumagiŋma aniqatiginiḷuŋa.’”
14Tavraasii Abimelech-gum qaitqiŋagaa Sarah Abraham-mun, aitchuqługulu imnaiñik, pamiqsaanik, kivgaksraŋiññiglu. 15Uqallautigaa Abraham, “Marra iluqaan nunaga; sumipayaaq iñuuniaġukkuvich iñuuniaġumiñaqtutin.” 16Uqallaktuq aasii Sarah-mun, “Aitchuġniaġiga aapiyan 1,000-tun qatiqtuanik manigñik nalupqinaiyautigisaġlugu iñugnun ilvich patchisaisilaaġnik; iluqaġmiŋ iḷisimaniaqtut killukkuaŋaisilaaġnik.”
17-18Tavraasii Abraham-gum aŋaiyyutiŋagaa Abimelech, aasii God-im iłuaqsipkaqługu, iłuaqsipkaqługulu nuliaŋa kivgaŋiḷḷu aġnat, miqłiqsiullasivḷugich. Uvvakii Atanġum miqłiqtuqallaiyaŋavlugich aġnat Abimelech-gum igluqpaŋaniittuat, pisigivlugu Abraham-gum nuliaŋa Sarah.
Currently Selected:
Genesis 20: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
