Luke 2
2
Jesus Aniñiŋa
(Matthew 1.18-25)
1Taipkunani uvluni Caesar Augustus pitquraliŋaruq nunam iñupayauraŋi atanniqsimakkani atchiitquvlugich. 2Taamna atchiiñiq piqqaaŋaruq Quirinius atanauraumman Syria-mi. 3Tavra iñupayaat atchiiyaqtuaŋarut ilaisa nanmiñiq iniqpaŋmiŋñun.
4Tavraptauq Joseph aullaŋammiuq Galilee-miñ, iniqpaŋmiñ Nazareth-miñ, Judea-mun iniqpaŋanun David, atiqaqtuamun Bethlehem-mik, qanuq ilaa David-gum kiŋuniġivlugu. 5Joseph atchiiyyaqatigiŋagaa Mary, tuvaaqatiksrautini, siŋaiyauruaq. 6Tavra tavraniillaġmiŋ, iġñiviksraŋan tikiutiŋagaa. 7Tavra iġñiŋaruq aŋayukłiġmik aŋunmik aasii nimmaaŋagaa miquŋaitchuanik ukił̣haanik, aasii iḷivḷugu niġrutit niġġiviannun, qanuq iniksraiñŋarut tukkumaviŋmi.
Isaġulgich Niptaqtut Imnaiḷiqirinun
8Tavra tamaani nunami imnaiḷiqirit qaunaksriŋarut imnaimiŋnik unnuami. 9Tavra Atanġum isaġulgata niptaġvigiŋagai, suli qaumanġa Atanġum qaummaġiksinŋaruq avataannun, aasii iqsiḷiŋarut. 10Tavra isaġulgum uqallautiŋagai, Iqsiñasi, qanuq uvva, quliaqtuaġutiyaqtuġivsi tusaayugaaġiksuanik iñupayaat quviasuutiqpaginiakkaŋiññik. 11Qanuq uumani unnuami aniruq annaurriksi, iniqpaŋani David, Christ-guruaq Ataniq. 12Aasiuvva iḷitchuqqutiksraqsi ilaagutilaaŋanik. Ilivsi paqinniaġiksi miqłiqtuuraq nimmaaŋaruaq miquŋaitchuanik ukił̣haanik, suli nalavluni niġrutit niġġivianni.
13Tavra tavraŋŋatchiaq isaġulik piqasiŋagaat isaġulisalaich nanġaqługu God, suli uqaqłutiŋ, 14Nanġaqtauli God qiḷaŋmiittuaq, suli nunami aŋuyautairrutiqaġli akunġanni iñuich ilaan iviġaumagikkaŋisa.
15Isaġulgich qiḷaŋmuaniŋmata, imnaiḷiqirit uqaŋarut inmiŋnun, Aullaqtauvagut Bethlehem-mun tautugiaġlugu taamamna piruaq, Atanġum kilgutigikkaŋa uvaptiŋnun. 16Tavra qilamiqsruqłutiŋ aullaŋarut, aasii paqiłługich Mary-ḷu Joseph-lu miqłiqtuuraġlu nalaruaq niġrutit niġġivianni. 17Tavra tautuqqaaqługu, uqautigiŋagaat uqaluk uqausiusiaqtik taavrumuuna miqłiqtukun. 18Aasii iluqaġmiŋ iñuich tusaaruat imnaiḷiqiriniñ uqaluusiamiŋnik aliuŋarut. 19Mary-vḷiasii itqaumagiŋagai isumalaaġutigivlugich iluqaisa piruat. 20Tavra imnaiḷiqirit utiŋarut, kamanaqsiḷiqługu nanġaqługulu God iluqaisigun tusaaramikkun tautukkamikkullu uqausiusiamiktun.
Jesus Atchiġaat
21 #
Lv 12.3;
Lk 1.31. Tavra tallimat piŋasut uvlut naanmata, nalunaiñŋutchiqsauganiŋman, atchiqsauŋaruq Jesus-mik, atchiutiksrirrutaanik isaġulgum siŋaiyaagusaŋaiñŋaan.
Jesus God-mun Aitchuutauruq Aŋaiyyuvikpaŋmi
22Nalautinman Mary-vḷu Jesus-lu aullaġviksraŋak aŋaiyyuvikpaŋmun nalautitchiyaqtuġlutiŋ Moses pitquraŋiñik miqłiqtuq animman, Jerusalem-muŋarut aitchuutigiyaqtuqługu miqłiqtuqtiŋ Ataniġmun. 23#Ex 13.2, 12.Taavrumuuna aglausimaruq God-im pitquraŋiñi inna, “Aŋugaiyaaq aŋayukłiq ilaaguaqtauniaqtuq Ataniġmun.” 24#Lv 12.6-8.Tavra tikiññamiŋ aŋaiyyuvikpaŋmun, aitchuiŋaruk ikipkautinik, Atanġum pitquraŋisa uqaluatigun, “Malġugnik nuyuaqturuagnik tiŋmiaŋnik, naagga malġugnik tiŋmiayaaŋnik nuyuitchuaŋnik.”
25Tavra iñuk inŋaruq Jerusalem-mi atiqaqtuaq Simeon-mik. Taamna iñuk nalaunŋaruaguŋaruq sivuġaani God-im, iñulluatauvluniḷu, aasii niġiuŋaruq qakugu God tilisiñiaqtilaaŋanik Annaurrimik Israel-nun, suli Ilitqusiġiksuam aŋalanŋagaa. 26Ilitqusiġiksuam iḷitchuġipkaŋagaa tuquniaŋiññivḷugu tautukkaluaġnagu Annaurri Atanġum tiliñiakkaŋa. 27Tavra Ilitqusiġiksuam isummiŋagaa aŋaiyyuviŋmuguliqsiłługu. Tavraasii aŋayuqaaguruak itqutimmatku miqłiqtuq Jesus, pisisaqtuqługu piḷġusiatigun pitqurat, 28Simeon tigumirriutiŋagaa aasii nanġaaqsivḷugu God uqaqłuni. 29Ataniiq, paŋmapak uvaŋa kivgan tuquyumiñaqsiruŋa tutqigḷuŋa, qanuq taŋŋiŋagiñ unniqsuqłiisin uvamnun. 30Qanuq uvamnik tautuanikkiga Annaurri, 31ilivich tiliŋakkan annautitquvlugich iñuich sumipayaaq. 32#Is 42.6; 49.6; 52.10.Tusaayugaaġiksuat ilaagun inniaqtut qaummaqtun Jew-guŋitchuanun, satqummiġḷugu iliŋiññun iḷumun ittuaq God-ikun, suli iñuktin Israel isumakkusiaqallasiḷugich qutchiksuakun.
33Tavra Joseph-lu Mary-vḷu aliuġiŋagaich Simeon uqautiŋi miqłiqtukun. 34Suli Simeon qiññuaġutiŋagik quviasuunmik, suli uqallautivlugu Mary aakaŋa. Sivunniutauŋaruq una miqłiqtuq agvisauniaġnivḷugu annagniksraŋannun iñugiaktuat Israel-guruani, suli iñugiaktuat tammaġniksraŋannun. Suli pisigilugu ilaan suutilaaŋa, iñugiaktuat akiḷḷiḷiqsuġniaġaat uqaluŋmiŋni, 35salapqialugu qanuq isummatiqaqtilaaqtiŋ ilaagun. Aasiiḷi ilivich isumaaġutiqpaum nagliksaaqtiniaġaatin.
36Tavraptauq aġnaq atiqaqtuaq Anna-mik inmiñiqsuq, uqaqtaa God-im pania Phanuel-gum maŋŋuqaqtuam Asher-mik. Anna aaquaŋaniqsuq, tuvaaqatiqaŋaniqsuaq tallimat malġugni ukiuni, aasii uiŋa tuquvluni. 37Taimaŋŋaaglaan iñuuŋaruq uiḷgaŋavluni, aasii sisamakipiaq sisamanik ukiuniŋaruq. Aŋaiyyuvikpaŋmiñ piiḷaiḷaaguŋaruq unnuakkaluami uvlukkaluamiḷu niġiḷaiḷaaguraġaluni nanġaqługu aŋaiyyuvigivlugu Ataniq. 38Aasii tavruŋa ullakługich taavrumanivsauq ikarraġmi, quyyavigiŋagaa God. Quliaqtuaġisaġataŋagaa miqłiqtuq iluqaiññun Jerusalem-miittuanun niġiuktuaguruanun annaunmik.
Utiqtut Nazareth-mun
39 #
Mt 2.23. Tavra taŋŋianikamitkik supayaurat pitquraŋiguaqtuat Atanġum, utiŋarut Galilee-mun, aimaaġviŋmiŋnun Nazareth-mun. 40Tavra miqłiqtuq Jesus agliŋaruq saŋŋisivḷuniḷu, isumattusiqpakłuniḷu. Suli God-im iviġaummatigiŋagaa.
Nukatpiaġruk Jesus Aŋaiyyuvikpaŋmiittuq
41 #
Ex 12.1-27; Dt 16.1-8. Tavra Jesus aŋayuqaak aullaġaqtuk Jerusalem-mun ukiutuaġman niqinaqiviani Qulaurrusiqutikun Itqautim. 42Tavra Jesus qulit malġugnik ukiuniŋman, aullaŋalgitchuk piḷġusikaamiktun niqinaqiyaqtuqłutiŋ. 43Tavra niqinaqivik isukłiñman, utiqsaġmaŋnik nukatpiaġruk Jesus qimaktinŋaruq Jerusalem-mun. Aŋayuqaak aasii naluŋaruk. 44Tavra isummatigivlugu iglaani iglauqataunasugivlugu, iglauŋaruk uvluqtutilaaŋatun, aasii ivaŋagaluaġaak nanmiñiġmiŋni aunniuġusimakkamiŋniḷu. 45Tavraasii paqinŋisanikamitku, utiqsaŋaruk Jerusalem-mun ivaqługu. 46Uvlut piŋasut pianiŋmata paqinŋagaak aŋaiyyuvikpaŋmi, aquppiruaq akunġanni iḷisaurrit pitquranik, naalaġnivḷugich apiqsruqtuqługiḷḷu. 47Tavra iluqaġmiŋ tusaaruat ilaanik kamasuŋarut kaŋiqsisuġniŋanik kiggutiŋiñiglu. 48Tavra aŋayuqaakisa tautukamitku, niġiiḷḷaqtauŋaruk. Aasii aakaŋata uqallautiŋagaa, Iġñiiŋ, summan inna piŋiksraqtitpisiguk? Uvva, aapallu uvaŋalu ivaŋagiptigiñ uŋiarrisigivlutin. 49Tavra Jesus kiuŋagik, Qanuq imña ivaġniqpisiñŋa? Puttuqsriŋayumiñaŋagaluaqtutik ittuksrautilaamnik Aapama igluani. 50Tavra kaŋiqsiŋaitkaak ilaan uqallautaa inmiŋnun.
51Tavra Jesus utiqatigiŋagik Nazareth-mun. Suli kamakkutiqaŋaruq iliŋiŋnun, aasiiḷi aakaŋan tamatkua iluqaisa itqagiŋagai. 52#1 S 2.26; Pr 3.4.Tavra Jesus isumatusisaiññaŋaruq aglivḷuniḷu, suli iñuuŋaruq nalaunŋaruakun iviġaumavlugu God iñuiḷḷu.
Currently Selected:
Luke 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
