Luke 1

1Iñulluatapiaġatamun Theophilus-mun.

Iñugiaktuat iñuich pisuqtilaamiktun aglautiŋagaich sut piŋaruat akunnaptiŋni. 2Tamatkuniŋa quliaqtuaġutiŋagaatigut iñuich qiñiŋaruat tamatkua pimmata isuaniñqaŋa. Iñuich tamatkua paŋmapak alġaqsruiraurut tamattumiŋa tusaayugaaġiksuamik. 3Tavra iliŋnun, Theophilus, isummatigiŋammigiga nakuurualivḷugu aglautigupkich tamatkua iłuaqsruaġlugich, qanuq qaŋapasugruuraq qaunakłaaqłuŋa iḷitchuġiniataŋagiga iḷumun ittuaq iliŋisigullaa piruatigun. 4Aasiuvva aglautiŋagitka tamatkua, iḷisimatquvlutin iḷumun itilaaŋannik iḷisausiaġiŋakkatin.

John Paptaiqsim Aniñiksrautaa Quliaqtuaguruq

5 # 1 Ch 24.10. Herod iñuuŋŋaan umialguruaq Judea-mi, aŋaiyyuliqsiqpaqaŋaruq atiqaqtuamik Zechariah-mik. Aŋaiyyuvikpaŋmi savaqatauŋaruq aŋaiyyuliqsiqpaŋnun taiguutiqaqtuanun Abijah-m piqatiŋiñik. Zechariah nuliaqaŋaruq atiqaqtuamik Elizabeth-mik, maŋŋuqaqtuamik Aaron-miñ, aŋaiyyuliqsiqpaich maŋŋuanniñ. 6Tavra iluqatik nalaunŋarualiqirauŋaruk sivuġaani God-im, kamagivlugich iluqaisa pitquraŋi Atanġum pasiñaġumiñaił̣ł̣utik. 7Aglaan miqłiqtuiñŋaruk, qanuq Elizabeth miqłiqsiḷaiñŋaruq, suli iluqatik utuqqaliŋaruk.

8Abijah-m piqatiŋi tikiutimmagich savaŋniksraŋata aŋaiyyuvikpaŋmi, Zechariah-m savautiŋagaa God aŋaiyyuliqsiqpauvluni. 9Aasii aŋaiyyuliqsiqpaich piḷġusiatigun, Zechariah nalunaiqsauŋaruq aŋaiyyuliqsiqpauruksrauvluni ikipkaiḷuni tivraġiksaunmik. Ilaa isiŋaruq aŋaiyyuvikpaŋanun Atanġum ikipkaiviŋmun tivraġiksaunmik. 10Tavra Zechariah ikipkaipkaqtillugu tivraġiksaunmik, iluqaġmiŋ iñusalaich aŋaiyyuŋarut siḷataani. 11Tavra tavrani Atanġum isaġulga niptaŋaruq, makitavluni taliqpiata tuŋaani ikipkaivium tivraġiksaunmik. 12Tavra Zechariah-m tautukkamiuŋ isaġulik tupaŋaruq, iqsitchaŋaruġlu. 13Tavra isaġulgum uqallautiŋagaa, Iqsiñak Zechariah, qanuq God-im tusaaŋagaa aŋaiyyutin, aasii nulian Elizabeth iġñiqaġniaqtuq. John-mik atchiġñiaġiñ. 14Tavra quviasuutiqpaqaġniaqtutin, suli iñugiaktuat iñuich quviasuutiqpaqaġniaqtut anikpan. 15#Nu 6.3.Qanuq ilaa kamanaġniaqtuq sivuġaani Atanġum, suli imiġniaŋitchuq wine-mik naaggaunnii imiŋasiñaqtuamik, suli immiqsauniaqtuq Ilitqusiġiksuamik aniñiġmiñiñqaŋa. 16Ilaan utiġuliqsinniaġai iñugiaktuat Israel-guruat ukpiġuliqsillugich Ataniġmun God-iŋannun. 17#Ml 4.5, 6.Tavra Ataniq qaiŋaiñŋaan, taamna John alġaqsruiñiaqtuq Elijah-m alġaqsruisiatun suaŋŋatiqaġniŋatullu. Ilaan aŋayuqaaguruat atisipkaġniaġai miqłiqtuŋiññun. Tamatkua uqaqsiġiitchuat ukpiliqsinniaġai nalaunŋaruatun iñuktun. Tainna piḷuni, ilaan itqanaiyaġniaġai iñuich akuqtuġumiñaqsiḷugu Ataniq.

18Tavra Zechariah uqallaŋaruq isaġuliŋmun, Qanuġlugu iḷisimaniaqpigu taamna piñiaqtilaaŋanik? Qanuq aŋayuqaaŋaruŋa, nuliaġasuli aaquaŋammiuq. 19#Dn 8.16; 9.21.Tavra isaġulgum kiuŋagaa, Uvaŋa Gabriel-guruŋa, savaktiŋa God-im iviġaumagivluŋa, aasii tilirauŋaruŋa uqautitquvlutin taavrumiŋa tusaayugaaġiksuamik. 20Qanuq ukpiġiŋiññapkich uqalutka, nalaunniaqtuat piviksramikkun, nipaiññiaqtutin uqalaitchuatun iñuktun tikiḷġataġlugu uvluq tamatkua nalaurviksraŋat.

21Tavrali iñuich utaqqiŋagaat Zechariah, suli isummatigiŋagaat muluvluni isiġmiuniŋa aŋaiyyuvikpaŋmi. 22Tavraasii anikami, uqautiyumiñaiñŋagai iñuich. Tavrani iḷitchuġiŋarut tautuktilaaŋanik qiñiqtuuraamik aŋaiyyuvikpaŋmi. Tavra urriqaŋagai argagmiñik uqallaiŋavluni.

23Tavra Abijah-m piqatiŋisa savagviksraŋat naannamiuŋ aŋaiyyuvikpaŋmi, Zechariah aiŋaruq. 24Tamatkua pianiŋmata, Zechariah-m nuliaŋa Elizabeth siŋaiyauŋaruq, aasii tallimani tatqiñi aimmiŋaruq isumalaaqłuni, 25Ataniq savaŋaruq aliuġnaqtuamik uvamnun. Paŋmapak kanŋusukkumiñaiqsuŋa miqłiqtuiññiġa pisigilugu.

Jesus Aniñiksraŋa Quliaqtuaguruq

26Tavra itchaksrat tatqich pianiŋmata Elizabeth siŋaiyausaaniŋman, isaġulik Gabriel tiliŋagaa God-im iniqpaŋmun atiqaqtuamun Nazareth-mik, Galilee-miittuamun. 27#Mt 1.18.God-im tiliŋagaa niviaqsiamun aŋusiuŋaitchuamun atiqaqtuamun Mary-mik, piksrautiniŋaruamun aŋunmik atiqaqtuamik Joseph-mik, kiŋunġuruaq umialiŋmun David-mun. 28[Tavra Gabriel-gum ullaŋagaa aasii uqallautivlugu, Tutqiutiqaġiñ, iviġaumagiraupiaqtuatiin, Atanġum itqatigigaatin. Quviatchaktitaurutin naamaruamik aġnapayaaniñ.] 29Tavra Mary-m atqunaqłuni tupauttaġiŋagaa uqalua isaġulgum, suli isumalaaġutigivlugu sumik paġlatiŋi sivuniqaġniaqtilaaŋannik. 30Tavra isaġulgum uqallautiŋagaa, Iqsiñak Mary. God-im iviġaummatigigaatin. 31#Mt 1.21.Uvvaasii siŋaiyauniaqtutin aasii iġñiqaġlutin. Atchiġumagiñ Jesus-mik. 32#2 S 7.12, 13, 16; Is 9.7.Ilaa kamanaġniaqtuq. Iġñiġiniaġaa sapiġñaġniqsrauruam God-im. Suli Atanġum God-im umialiguqtinniaġaa David-tun maŋŋuuruatun ilaanun. 33Aasii ilaa umialguniaqtuq isuitchuamun kiŋuniŋiñun Jacob, aasiisuli ilaan atanniqsimmataa isuiññiaqtuq.

34Mary-m uqallautiŋagaa isaġulik, Qanuġluni taamna piyumiñaqpa uigiḷḷaġma? 35Tavra isaġulgum kiuŋagaa, Ilitqusiġiksuaq qaiñiaqtuq iliŋnun, aasii suaŋŋataata sapiġñaqtuam God-im itqatiginiaġaatin nalautillasiḷugu. Taamnaasii pisigilugu piḷuutaitchuaq miqłiqtuq tairauniaqtuq Iġñiŋanik God-im. 36Aasiuvva, nanmiñiq iḷan Elizabeth aaquaŋagaluaqtuq, siŋaiyausaaniŋammiuq aŋunmik. Uvvaasii iḷisimanaqtuam miqłiqsiḷaitchuaguvlugu itchaksriġai tatqich siŋaiyausaqami. 37#Gn 18.14.Qanuq God piḷḷaruq supayaamik.

38Tavra Mary uqallaŋaruq, Uvva Atanġum kivgaġigaaŋa. Piḷi uvamnun tuvraġlugu uqaluiñ. Tavra isaġulik aullaŋaruq ilaaniñ.

Mary-m Ullakkaa Elizabeth

39Taavruma aquagun, Mary aullaġnasuaŋaruq qimialuuruamun nunamun, nunaaqqich iḷaŋannun Judea-miittuamun. 40Aasii isiŋaruq igluanun Zechariah-m, paġlavlugu Elizabeth. 41Tavrali Elizabeth tusaakamiuŋ paġlataa Mary-m, miqłiqtuq aulaliqtuŋaruq iḷuani, suli Elizabeth Ilitqusiġiksuam aŋalałługu, 42uqallaŋaruq nipatuvluni, God-im iviġaumagiłhaaŋagaatin aġnapayauraniñ God-im iviġaumagigaa siŋaiyaan. 43Qanutun iviġaumakkusiaqaqtigivik aakaŋata Ataniġma ullakkumiñaġmaŋa. 44Qanuq uvva, paġlatin tusaapqauraqapku, miqłiqtuuraq iḷumni aulaliqtuŋaruq quviatchaktuatun. 45Aasii quviatchaktitaugiñ ukpiliŋarutin taŋŋiqsauniaġnivḷugich uqausiusiatin Ataniġmiñ.

Mary-m Nanġautaa

46Tavra Mary uqallaŋaruq, Uummatimniñ iluqaaniñ nanġaġiga Ataniq, 47suli iḷumni quviasukpaktuŋa qanuq God-im annaurrigikkaġma 48#1 S 1.11.piksraqtaaġiŋagaaŋa kamanaił̣ł̣uŋa kivgaġigaluaqłuŋa. Qanuq uvva, tavraŋŋaaglaan iñupayaat taiñiaġaanŋa iviġaumakkusiaqaqtuamik. 49Qanuq taavruma sapiġñaqtuam God-im savautiŋagaaŋa kamanaqtuakun aliuġnaqtuamik. God piḷuutaitchuq. 50Suli ilaan nagliktuutaa ittuq iñupayaanun qiksiksrautiqaqtuanun inmiñun kiŋuniġiipayaani. 51Ilaa savaŋaruq aliuġnaqtuanik. Kamanaiŋagai kamasaaqtuat taputivlugich sivunniuġutiŋich. 52#Job 5.11; 12.19.Tamatkua atanniqsimanniktuat suaŋŋataiŋagai, suli kamanaitchuat kamanaqsipkaqługich. 53Tamatkua ikayuqtisiuqtuat piqaqtuksrauvlutiŋ pisuġuiqsitkai, aasiiḷi ikayuqtisiuŋitchuat pigiraksraġikkaġmikkun ilaan pisuŋitkai. 54,55#Gn 17.7.#1 S 2.1-10.Ilaan ikayuŋagai kivgani Israel-guruat, suli nagliktuqługich, unniqsuqłiisimisun maŋŋuptiŋnun Abraham-mun kiŋuniŋiñullu isuitchuamun. 56Tavra Mary-m nayuŋagaa Elizabeth miksraułługich tatqich piŋasut, aasii utiŋaruq aimaaġviŋmiñun.

John Paptaiqsi Aniruq

57Tavra tikiutiŋagaa Elizabeth iġñiviksraŋanun, aasii iġñiqaŋaruq. 58Tavra siḷalliŋisa nanmiñiŋisalu tusaaŋagaat Ataniq kamanaqtuamik nagliktuiñivḷugu Elizabeth-mun, aasii quviasukpaqatigiŋagaat.

59 # Lv 12.3. Tavra tallimat piŋasuanni uvlut, iliŋikta nalunaiñŋutchiqsitchaqtuŋagaak miqłiqtuq, aasii atchiġuŋagaluaġaat Zechariah-mik aapaŋatun. 60Tavra aakaŋa uqallaŋaruq, Taavrumiŋa atiqaġniaŋitchuq. Ilaan atiġiniaġaa John. 61Tavra ilaisa kiuŋagaat, Nalliat-unnii nanmiñiq iḷavich atiqaŋaitchuq taavrumiŋa atiġmik. 62Tavra iliŋich urriqaŋarut aapaŋanun, apiqsrivḷutiŋ sumik ilaanun atchiqummagaan nukatpiaġruk. 63Tavra Zecharias apiqsriŋaruq aglagviksramik, aasii aglakłuni uumiŋa. Ilaan atqa John. Tavra iliŋich aliuŋarut. 64Tavra tavraŋŋatchiaq Zechariah uqallasiŋaruq, aasii uqallakłuni, nanġaqługu God. 65Tavra aliuġutchaŋarut iluqaġmiŋ siḷalliŋi. Suli tamatkua iluqaisa uqautigiŋagaich iluqaani qimialuŋiññi Judea-m nunaaqqiŋisa. 66Tavra iluqaġmiŋ tusaaruat tamatkuniŋa piiguitkaaġiŋagaich, uqaurrutiŋarut avanmun, Qanutun aliuġnaqtiginiaqpa una miqłiqtuq. Qanuq nalunaiñŋaruq Ataniġmun itqatigitilaaŋa.

Zechariah-m Nanġautaa

67Tavra John-gum aapaŋa Zechariah Ilitqusiġiksuam aŋalałługu uqaqtinŋagaa nanġautinik piyumaaqtuaniglu. 68Nanġaġlakput Ataniq God-iŋat Israel-guruat, qanuq ilaan ikayuġiaŋagai aasii annautivlugich iñuŋni. 69Akunġanniñ kiŋuniŋisa David, God piksraŋaruq Iñuŋmik suaŋŋatiqaqtuamik annautiyumiñaqłuta. 70Taimaŋŋaqaŋa uqausiġmisun ilaan nanmiñiq uqaqtimigun, 71annaurrauniaġnivḷuta akiḷḷivsiŋñiñ, suli iluqaiññiñ uumikłiqsuaniñ uvaptiŋnik. 72God nagliktauruq aŋayuqaaptiŋnun taŋŋiqł̣ugich unniqsuqłiisini miqłiqtuŋiññun. 73Uvva unniqsuqłiiñ nalupqinaiŋaraŋa maŋŋuptiŋnun Abraham-mun. 74Uvagut ilaan annautiniaġnivḷuta akiḷḷivsiŋñiñ uvaptiŋnun savautitquvluni iqsiŋaiġḷuta. 75Suli savautilugu iñuuniqtutilaaptiktun piḷuutaitchuakun nalaunŋaruakullu. 76#Ml 3.1.Aasii ilivich miqłiqtuuŋ, tairauniaqtutin uqaqtaanik sapiġñaġniqsrauruam God-im, qanuq aulaniaqtutin sivuani Atanġum itqanaiyaġlugich iñuich akuqtuġumiñaqsiḷugu Ataniq, 77iḷitchuġipkaġlugich God-mun annautiniḷugich, suliqutigiŋaiqł̣ugich itqaumayumiñaiġḷugich piḷuutiŋich. 78Qanuq God-ikput nagliktuutiqpaqaqtuq piaqłuktautiqaŋitchuġlu uvaptiŋnun. Uvlum nutauruam qausaġatauraġniŋatun inniaqtuq uvaptiŋnun, tilikpagu Annaurri. 79#Is 9.2.Tamatkua paŋmapak taaqtuamiittuat sivuuġagivlugu tuqqun, iñuurraqsiñiaqtut qaummaġmi, ukpiġlutiŋ ilaanun, aasii ilaan iñuupkaġluta tutqiksilluta.

80Tavra miqłiqtuq agliŋaruq suaŋasisaiññaqłuniḷu nalaunŋarualiqiniġmun. Suli nunagluktuami iñuuŋaruq uvluanunaglaan satqummiġñiksrami Israel-guruanun.

Currently Selected:

Luke 1: INUPIAQ

Highlight

Copy

Want to have your highlights saved across all your devices? Sign up or sign in

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Learn More About Iñupiatun Mumiksat Uqalugiksuat