Wambeela 14
14
Abaramu onomwaakiha Lothi
1Amerafile mwene a oXinari, Ariyoki mwene a oElasari, Kedarolawomere mwene a oElamu, ni Tidali mwene a oGoyiimi, 2ala yahiwaniha koddo ni Bera mwene a oSoddoma, ni Birixa mwene a oGomora, ni Xinabe mwene a oAdama, ni Xemeberi mwene a oZeboyiimi, vamohi ni mwene a oBela, ela sowi oZowari. 3Alena oogomihedha atanu yahaatugumanya anyakoddo eewa nddiba na Siddima wewo oli Nyaza Yookwa. 4Yaaka kumi nabiili yathongiwa ni Kedarolawomere mbwenye dhaakwanaga yaaka kumi nathaaru, yahikoodda othongiwa ni oliye. 5Dhaakwanaga yaaka kumi nennayi, ahidha Kedarolawomere vamohi ni mamwene mamohi yaandaniliiyena. Yahaaporosa aRefayiimi oAxtaroti-Karinayiimi, vamohi ni aZuzi oKami, aEmi ya oXave-Kiriyatayimu, 6ni aHori yakala omwaangoni dha oSeyire, yahawiigara aliwa ofiyedha oEli-Parani, waaddamela okokolani. 7Yahiwelela teto oEni-Mixipati, nda sowi oKadexi, othukula elabo yaatene ya aAmaleke ni ya aAmori, ayene yamagile oHazezoni-Tamari.
8Mbwenye mamwene ala a oSoddoma, oGomora, oAdama, oZeboyiimi ni oBela, ela enatapulela oZowari, favenyiliiwa odhowaga okoddoni. Yahiwana koddo nddiba na oSiddima. 9Yaali mamwene matanu ala ewanaga ni mamwene mannayi, Kedarolawomere mwene a oElamu, Tidali mwene a oGoyiimi, Amerafile mwene a oXinari ni Ariyoki mwene a oElasari.
10Nddiba na Siddima wadhaalile miliddi dha arikataraya, vano vowiigariwa mamwene ala a oSoddoma ni oGomora, ethawaga yahimorela mmiliddini mwemule. Amohi yahalile, yathawele mmwaangoni. 11Amwiiddani yahithukula dhooreela dha oSoddoma ni oGomora vamohi ni dhooja dhiwa dhaatedhene, odhowana. 12Yahimuthukula teto Lothi, mudhule Abaramu ni dhooreela dhaaye dhaatedhene, vowi Lothi ola amagile oSoddoma.
13Veva mmohi agoobowe ahidhowa omwaaddela Abaramu, muHeberi, dhedho dheereyile. Abaramu, agamagile mmithankoni dhuulubale dha Mamere muAmori. Ola ni emudhi yaaye Exikole ni Aneri bi ayene Abaramu yasasanyiliiyena nipangano no waandana. 14Ageewile wi mudhule ahihiddiwa, Abaramu ahaasasanyedha alobwana aaye oororomeleya, yabaliwe vaade vaaye. Wiinjiva weewa waali mazana maraaru ni kumi ni atanu ni araaru (318). Yahaathamagela amwiiddani ofiyedha oDani.#14.14 Abaramu aali oovilela mu mudhidhi wookathamiha. Aali owiisasanyedheene ni alobwana oosuuzihiwa. Naari aKirixtu enoodha ekalena dhoorusa mwa egumi ela. Soofuneya wiisasanyedhela owanana dhoorusa nda dhafiya. 15Abaramu ahaagawa alobwana aaye mmakuruni, yahaagurumusa mahiyu, vano yahawiigara, ofiyedha oHoba, epaddi ya omoononi woong'oto wa oDamasiku. 16Yahawaaka dhego dhaatedhene, omwaakihedha Lothi, mudhule, ni dhooreela dhaaye dhaatedhene, ni ahiyana ni athu amohi yahiddiwe.
Abaramu ni Melikizedeki
17Abaramu awelagawo okoddoni wewule wamporosiliiye Kedarolawomere ni mamwene mamohi yannigiiyena, mwene a oSoddoma ahimuharela wi amwaakelele nddiba na Xave, ela sowi nddiba na mwene.
18Melikizedeki, mwene a oSalemi,#14.18 OSalemi Ela sowi Zheruzalemi. ahaadheelagana mukaathe ni vinyu. Ola aali namakutha a Mulugu a Mudhulu-dhulu.#14.18 Mwene ola ahivaha yooja ya athu aatene ya nlabo nendde wi oonihedhe waandana ni wawaakela aleddo. Keelengile wi yaali Yooja ya Nabwiya.
19Ahimureeliha Abaramu ni madhu ala, wiira:
<<Wi Mulugu a Mudhulu-dhulu,
mpaddusi a odhulu ni elabo ya vati,
amureelihe Abaramu!
20Athithimihiwe Mulugu a Mudhulu-dhulu,
oyene wuuvahile waagonjiha amwiiddani aawo!>>#14.20 Kopolo dha Mulugu sinanikamihedha ogonjiha. Soofuneya omurumeedhela Nabwiya eehu nagonjiha dhoopadduwa dhabure. Kopolo dha Mulugu si ekalelo yaaye enavahiiye elabo ela. Oliye ohukalana kopolo, dowaakwaniha, dooreela, tthottho, oononelamo, doowodha ni namathonga a hiyo onanikamihedha. Misawo dhaatedhene dha mineba dhabure ni mineba dhootakala, ni aatene enakala elabo ela yinna owodha wa vang'ono naaliganiha ni oliye. Oliye oneere anikamihedhe wa aliwa namuloba okamihedhiwa.
Mowindo Abaramu ahivaha yaneekumi ya dhaatedhene dhawaakiliiye amwiiddani.#14.20 Abaramu ahimvaha mwene ole yaneekumi ya dhaatedhene mwaha wowi yaali ekalelo yeewa ya mudhidhi olene, kayaali epaddi ya neekumi ya Malamulo a Mozezi. Malamulo a Mozezi yavahiwe yaaka mazana mannayi dhigavirile mudhidhi wa Abarahamu.
21Vano mwene a oSoddoma ahiwogaga ni Abaramu, wiira: <<Muginke athuve, dhooreela muhalena>>. 22Abaramu ahimwaakulaga mwene a oSoddoma, wiira: <<Gihigwelihedha odhulu madada aaga, ginolibela wa Nabwiya, Mulugu a Mudhulu-dhulu, mpaddusi a odhulu ni elabo ya vati, 23wi wa eyene eli yeenyu kaginathukula, nivang'onong'ono, naari mungoyi woomagana sapatho. Kaginafuna wi muwogege wi: <Abaramu gihimureeliha>.#14.23 Abaramu kaafunile orumeedha mvahi wootthettheeliwa ni mwene a oSoddoma vowi aali muthu abure, mwahaya buuyene waharumeedheliiye mvahi dhaaye. 24Wa miyo yaaga si elene azombwe aaga yajiliiwa, ni eyene yaali ya athu alene yanniimina vamohi: Aneri, Exikole ni Mamere. Ala mbwenye ahiyeni ethukule yeewa>>.
Currently Selected:
Wambeela 14: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
