Yohaana 4

Yesu n'Omusamariakazi

1Mukama waitu yaamanya ku Abafarisaayo bahuriire ngu naayegyesa kandi naabatiza abeegi baingi okukira Yohaana, 2#1 Kor 1:17. (haza kunu Yesu We tarabatiize, kureka abeegi be nibo baabatiize.) 3Ahabw'ekyo yaaruga Buyudaaya, yaagaruka Galilaaya. 4Yaahurira ashemereire kuraba Samaria. 5#Kut 48:22. Atyo yaahika omuri tauni ya Samaria, erikwetwa Sukaara, haihi n'ekibanja eki Yakobo yaahaire omutabani Yosefu. 6Kandi aho hakaba hariho eiziba rya Yakobo. Yesu ahabw'okuruhibwa orugyendo, yaashutama aha rubaju rw'eiziba; obwo eshaaha zikaba ziri nka mukaaga. 7Haija Omusamariakazi kutaaha amaizi; Yesu yaamushaba ati: Mpa eky'okunywa. 8Ahakuba abeegi be bakaba bagiire omuri tauni kugura eby'okurya. 9#Luk 9:53. Omusamariakazi yaamubuuza ati: K'ori Omuyudaaya, kandi nyowe Omusamariakazi, noobasa ota kunshaba eky'okunywa? (Ahakuba Abayudaaya bakaba batakwatanisa n'Abasamaria.) 10Yesu yaamugarukamu ati: Kuri noomanya ekiconco kya Ruhanga, n'Ogu orikukushaba ati, Mpa eky'okunywa, naiwe okaamushabire, nawe akaakuhaire amaizi g'amagara. 11Omukazi yaamugira ati: Mukama wangye, toine ky'okutahisa, kandi n'eiziba ni riraingwa; mbwenu ago maizi g'amagara noogaiha hi? 12Iwe nookira tatenkuriitwe Yakobo, owaatuhaire eiziba eri, eri yaabaire anywaho n'abaana be, akeesheraho n'amasyo ge? 13Yesu yaamugarukamu ati: Omuntu weena orikunywa aha maizi aga, aryagaruka agire eiriho; 14#Yoh 6:35; Yoh 7:37-39. kwonka weena orikunywa aha maizi agu ndimuha, tarigira iriho ebiro byona; ahakuba amaizi agu ndimuha garyahinduka enshuro y'amaizi, efumukye omuriwe, neereeta amagara agatahwaho. 15Omukazi yaamugira ati: Mukama wangye, mpa amaizi ago, ndekye kugira eiriho n'obu kwakuba okugaruka aha kutaha.

16Yesu yaamugira ati: Irooko oyete baro, ogarukye aha. 17Omukazi yaamugarukamu ati: Tiinyine mushaija. Yesu yaamugira ati: Waagamba gye okugira ngu, toine mushaija; 18ahabw'okuba okashwerwa abashaija bataano; n'ogwo ou oine hati ti baro; eki waagamba n'amazima. 19#Yoh 9:17. Omukazi yaamugira ati: Mukama wangye, naayetegyereza ku ori nabi. 20#Bir 12:5; Zab 122:1-9. Baatatenkuriitwe bakaba baramiza aha rushozi oru, kwonka imwe nimugira ngu Yerusaalemu niyo abantu bashemereire kuramiza. 21Yesu yaamugira ati: Mukazi 'we, nyikiriza, obunaku nibwija kuhika, obu mutariramizamu Isheboona aha rushozi oru, n'obu haakuba omuri Yerusaalemu. 22Imwe muramya eki mutarikumanya; itwe turamya eki turikumanya, ahakuba okujunwa kuruga omu Bayudaaya. 23Kwonka obunaku nibwija, kandi bwahikire, obu abaramya ab'amazima bariramizamu Isheboona omu mwoyo n'omu mazima; ahakuba Isheboona asherura abari nk'abo kumuramya. 24Ruhanga n'Omwoyo; kandi abamuramya bashemereire kumuramiza omu Mwoyo n'omu mazima. 25Omukazi yaamugira ati: Nimmanya ngu Mesia orikwetwa Kristo aryaija; ku ariija, aryatushobororera byona. 26#Yoh 9:37. Yesu yaamugira ati: Manya, niinye orikugamba naiwe.

27Omu mwanya ogwo abeegi be baija; baatangaara ahabw'okuba yaaba naagaaniira n'omukazi; kwonka tihaine waamubuurize ati: Nooyenda ki? Nari shi, ati: Ahabw'enki noogaaniira nawe? 28Atyo omukazi yaatsiga aho enyungu ye, yaagaruka omuri tauni, yaagambira abantu ati: 29Mwije mureebe omuntu owangambira ebi naakozire byona. Yaaba niwe Kristo? Shinta. 30Baaruga omuri tauni, nibaza ei ari.

31Ku baabaire batakamuhikire, abeegi be baamweshengyereza bati: Rabi, eby'okurya mbibi, ryaho. 32Yaabagira ati: Nyine eby'okurya ebi mutarikumanya. 33Abeegi be nikwo kubuuzana bati: Beitu shi, hariho owaamureetera eby'okurya? 34Yesu yaabagira ati: Eby'okurya byangye nikwo kukora eki Owantumire akunda n'okuhikiiriza omurimo gwe. 35#Mat 9:37. Imwe timurikugira ngu, hatsigaire ameezi ana okuhika aha igyesha? Nyowe nimbagambira nti: Munagye amaisho, mureebe emisiri ku eyezire, ku ehikire kugyeshwa. 36Omugyesi aheebwa ebihembo, ahsanguririza emyaka omu magara agatahwaho, ngu omubibi n'omugyesi bashemererwe hamwe. 37Ahakuba omuri ebi ekigambo eki nimwo kimanyirwa ku kiri eky'amazima, ngu: Habiba omwe, hagyesha ondiijo. 38Nkabatuma kugyesha ebi mutarahendekyeire; abandi bakahendeka n'emirimo, imwe mwaija, mwahikira omu bi baafeereire kubi.

39Abasamaria baingi ab'omuri tauni egyo baamwikiriza ahabw'ebigambo by'omukazi ebi yaagambire naahamya ati: Yangambira ebi naakozire byona. 40N'ahabw'ekyo Abasamaria, ku baamuhikire, baamushaba ngu agume nabo; nawe nikwo kumarayo kabiri. 41Haikiriza abandi baingi abarikukira ab'okubanza, ahabw'ekigambo kye. 42#1 Yoh 4:14. Baagambira omukazi bati: Mbwenu titurikwikiriza habw'ebigambo byawe byonka; ahakuba naitwe twayehuririra, twamanya ngu Ogu niwe Mujuni w'ensi buzima.

43Ebyo biro bibiri ku byahweire, yaarugayo, yaaza Galilaaya. 44Ahakuba Yesu akahamya ati: Nabi tagira kitiinisa omu nsi y'owaabo. 45#Yoh 2:23. Ku yaahikire Galilaaya, Abanyagalilaaya baamwakiira, ahabw'okuba bakareeba byona ebi yaakoreire Yerusaalemu aha bugyenyi; ahakuba nabo bakaba babutaahire.

Yesu okukiza mutabani w'omukungu

46Kandi yaagaruka, yaataaha Kaana eya Galilaaya, ahu yaahinduriire amaizi viinyo. Omuri Kaperenaumu hakaba harimu omukungu w'omugabe, owaabaire arwarize omutabani. 47Ku yaahuriire ngu Yesu arugire Buyudaaya, yaaza Galilaaya, yaagyenda yaamushaba ngu ashuume akize omutabani, ahakuba akaba ari haihi kufa. 48#1 Kor 1:22. Ahabw'ekyo Yesu yaamugira ati: Ku muba mutareebire bumanyiso n'eby'okutangaaza, timwikiriza na kakye. 49Omukungu yaamushaba ati: Mukama wangye, shuuma oije, omwana wangye atakafiire. 50Yesu yaamugira ati: Irooko otaahe; omwana waawe ahuriire. Omushaija ogwo yaikiriza ekigambo eki Yesu yaamugambira, yaagyenda. 51Ku yaabaire naashuuma, abahuuku be baamubugana, baamugira bati: Omwana waawe ahuriire. 52Yaababuuza eshaaha ei atandikiireho kubaho gye, baamugarukamu bati: Nyomwabazyo aha shaaha ya mushanju omushwija nibwo gumurugireho. 53#Byak 16:31. Ishe yaamanya ku nibwo bunaku obu Yesu amugambiriiremu ati: Omwana waawe ahuriire. Omushaija ogwo yaikiriza n'eka ye yoona. 54Ako niko kamanyiso ka kabiri aku Yesu yaakozire, okwiha obu yaaruga Buyudaaya, naija Galilaaya.

Currently Selected:

Yohaana 4: RR64

Highlight

Copy