Yohaana 5

Yesu okukiza ekimuga kya Beseseda

1Bwanyima y'ebyo hakaba hariho obugyenyi bw'Abayudaaya; Yesu yainamuka Yerusaalemu. 2Kandi omuri Yerusaalemu haihi n'eirembo ry'entaama, hakaba hariho ekiyanja, ekirikwetwa omu Ruheburaayo Beseseda, kiriho ebiju bitaano. 3Omwo nimwo baabaire bata abarwaire baingi munonga, empumi, abarema, n'abazingazingirwe, nibategyereza amaizi kubira; 4ahakuba obundi n'obundi maraika akaba ashuuma aija omu kiyanja, abiza amaizi; owaabaire atangamu abandi, amaizi gaatandika kubira, akaba akira endwara yoona ei yaabaire aba arwaire. 5Aho hakaba hariho omushaija owaabaire amazire emyaka makumi ashatu na munaana arwaire. 6Yesu ku yaamureebire abyami, kandi yaamanya ngu amazire aho omwanya muhango, yaamubuuza ati: Nooyenda kukira? 7Omurwaire yaamugarukamu ati: Mukama wangye, tingira muntu w'okunta omu kuyanja, amaizi gaaba nigatandika kubira; nyowe ku mba ninkiija, ondiijo antangamu. 8#Mat 9:6. Yesu yaamuragiira ati: Imuka, oyekorere ekirago kyawe, ogyende. 9Ahonaaho omushaija yaakira, yaagyenda. Kandi eizooba eryo ekaba eri Sabato.

10Abayudaaya baagambira owaatambirwa bati: Hati ni Sabato; ebiragiro tibirikukwikiriza kwekorera kirago kyawe. 11Yaabagarukamu ati: Omushaija owantambira niwe yandagiira ati: Yekorere ekirago kyawe, ogyende. 12Baamubuuza bati: Ogwo mushija n'oha owaakuragiira ati: Yekorere ekirago kyawe, ogyende? 13Kwonka owaatambiirwe tiyaamumanya, ahakuba Yesu akaba yaarugireho ahabw'omutwe muhango ogwabaire guriho. 14#Yoh 8:11. Bwanyima Yesu yaamushanga omuri hekalu, yaamugira ati: Reeba, waakira; otarigaruka kushiisha, nyentsya otarihikwaho akabi akarikukira ako. 15Omushaija yaagyenda, yaagambira Abayudaaya, ku Yesu niwe amukirize. 16#Mat 12:14. Ekyo nikyo Abayudaaya baahiigiire Yesu, ahabw'okuba akakora ebyo ahari Sabato. 17Yesu yaabagarukamu ati: Tata naakikora na hati, kandi naanye ninkora. 18#Yoh 10:33. Nikyo kyakizire kureetera Abayudaaya kusherura oburyo bw'okumwita, ti habw'okushiisha Sabato yonka, kureka n'ahabw'okugira ati: Ruhanga ni Tata, akeeringanisa na Ruhanga.

Ahu obushoboorozi bwa Yesu buruga

19Yesu yaagarukamu naabagira ati: Buzimazima nimbagambira nti: Omwana tabaasa kukora kintu kyona ahabwe, kureka eki areeba Ishe naakora; mumanye ngu ebi Ruhanga akora byona, n'Omwana nawe nibyo akora; 20#Yoh 3:35. ahakuba Ishe akunda Omwana, kandi amworeka ebi akora byona; kandi aryamworeka ebirikukira ebi, ngu imwe mutangaare. 21Nk'oku Isheboona azoora abafu, akabaha amagara, nikwo n'Omwana aha amagara abu ayenda kugaha. 22#Byak 17:31. Ahakuba na Ishe tacwera muntu weena orubanja, okucwa orubanja kwona akakurekurira Omwana, 23#Fil 2:10, 11. ngu boona bahe Omwana ekitiinisa, nk'oku bakiha Ishe. Otaha Mwana kitiinisa, takiha na Ishe owaamutumire. 24#Yoh 3:16; 8:51; 1 Yoh 3:14. Buzimazima nimbagambira nti: Orikuhurira ekigambo kyangye, akaikiriza Owantumire, aine amagara agatahwaho, kandi tariza mu rubanja; ahabw'okuba aherize kuruga omu kufa, yaataaha omu magara.

25Buzimazima nimbagambira nti: Obunaku nibwija, kandi buriho na hati mbwenu, abafu obu barihurira eiraka ry'Omwana wa Ruhanga; n'abo abaririhurira baryaba abahuriire. 26Ahakuba nk'oku Ishe aine amagara omuriwe wenka, nikwo yaahaire n'Omwana kugagira omuriwe wenka; 27kandi akamuha obushoboorozi bw'okucwa emanja, ahabw'okuba niwe Mwana w'omuntu. 28Mutatangaarira eki; ahakuba obunaku nibwija, abari omu bituuro boona obu barihurira eiraka rye, 29bakarugamu, abo abaakozire gye, bakazookyera amagara; nabo abaakozire kubi, bakazookyera okucwerwa orubanja. 30#Yoh 6:38. Tindikubaasa kukora kintu kyona ahabwangye; oku mpurira, nikwo ncwa orubanja; n'emanja ezi ncwa, nzicwa omu mazima, ahabw'okuba tiinyenda kutwaza nk'oku ndikwenda ahabwangye, kureka nk'Owantumire oku arikwenda.

Ebirikuhamya Yesu

31Ku ndikwehamya nyenka, okwehamya kwangye nikuba kutari kw'amazima; 32#Yoh 5:36, 37; 1 Yoh 5:9. hariho ondiijo orikumpamya, kandi nimmanya ngu okuhamya oku ampamya n'okw'amazima. 33Imwe mukatuma ahari Yohaana, nawe yaabahamiza amazima. 34Okuhamibwa, oku ndikwegamira, tikurikuruga ha muntu; kwonka ebi nimbigamba, ngu imwe mujunwe. 35Yohaana ogwo akaba ari etabaaza erikwaka, ekamurika; naimwe mukamara akaanya kakye nimwikiriza kushemerererwa okumurika kwe. 36Kwonka nyowe nyine ebirikumpamya ebikuru ebirikukira ebya Yohaana; ahakuba emirimo ei Tata yampaire kuhikiiriza, emirimo egyo ei ndikukora niyo erikumpamya ku Tata yantumire. 37Kandi Tata owantumire niwe ampamize. Imwe timukahuriraga iraka rye, n'obu kwakuba okureeba enshusha ye; 38kandi ekigambo kye tikituura muriimwe; ahabw'okuba timwikiriza u yaatumire.

39 # 2 Tim 3:15-17. Musherura munonga omu Byahandiikirwe, ahakuba muteekateeka ngu omuribyo nimwo mwine amagara agatahwaho; haza kandi ebyo nibyo bimpamya. 40Kwonka mwanga kwija ahariinye, ngu muheebwe amagara. 41Tindikwikiriza kitiinisa eki ndikuheebwa abantu. 42Ahakuba nimmanya imwe ku mutarikukunda Ruhanga omu mitima yaanyu. 43Nyizire omu iziina rya Tata, timwanyakiira; ondiijo ku ariija omu iziina rye wenka, we muryamwakiira. 44#Yoh 12:43. Nimubaasa muta kwikiriza, imwe abahaana ekitiinisa, haza mutasherura kitiinisa ekiruga ahari Ruhanga omwe wenka? 45#Bir 31:26. Murekye kugira ngu niinye ndibarega ahari Tata; hariho omwe obarega, niwe Musa, ou mwesiga. 46#Bir 18:15. Kuri mwaikiriize Musa, naanye mukaanyikiriize, ahakuba niinye yaahandiikireho. 47#Yoh 7:19. Ku muraabe mutaikiriza bi yaahandiikire, muryabaasa muta kwikiriza ebigambo byangye?

Currently Selected:

Yohaana 5: RR64

Highlight

Copy