Yohaana 7

Yesu okwangwa beene waabo

1 # Mak 9:30. Bwanyima y'ebyo akagyendagyenda omuri Galilaaya; tiyaayenda kugyendagyenda omuri Buyudaaya, ahabw'okuba Abayudaaya bakaba nibenda kumwita. 2#Lev 23:34. Kandi obugyenyi bw'Abayudaaya, oburikwetwa obugyenyi bw'Ensiisira, bukaba buri haihi n'okuhika. 3Abarumuna baamugira bati: Ruga aha, oze Buyudaaya, abeegi baawe babone kureeba emirimo ei orikukora. 4Ahakuba tihariho muntu oyenda kumanywa butunu, akakora omu mubonano. Ku oraabe nookora ebi, oyeyorekye ensi. 5Ahakuba na barumuna abo tibaramwikiriize. 6Yesu yaabagambira ati: obunaku bwangye tibukahikire; kwonka obwanyu n'obw'obutoosha. 7#Yoh 15:18. Ensi terikubaasa kubanga, kwonka nyowe neenyanga, ahabw'okuba nimpamya ku emirimo yaayo eri mibi. 8Imwe mwinamukye aha bugyenyi; nyowe tinkabaire kuza ahari obwo bugyenyi, ahakuba obunaku bwangye tibukahikire. 9Ku yaaherize kubagambira ebyo, yaaguma Galilaaya.

10Abarumuna ku baaherize kwinamuka aha bugyenyi, nawe yainamuka, kwonka tiyaagyenda naareebwa, kureka yaagyenda bwesherekye. 11Abayudaaya baamusherura aha bugyenyi, nibabuuririza bati: Ari nkahi? 12Haabaho okumuhakanaho munonga omu bantu: abamwe nibagira bati: N'omushaija murungi; abandi bati: Ngaaha, naahabisa abantu. 13#Yoh 12:42. Kwonka ahabw'okutiina Abayudaaya tihariho n'omwe owaamugambireho butunu.

Yesu okwegyesa omuri hekalu

14Obugyenyi ku bwahikire ahagati, Yetu yainamuka omuri hekalu, yaayegyesa. 15#Mat 13:54. Abayudaaya baatangaara, nibagira bati: omushaija ogu akaiha hi obwengye obu, haza atakeegaga? 16N'ahabw'ekyo Yesu yaabagarukamu ati: Okwegyesa oku nyegyesa ti kwangye, n'okw'Ogwo owantumire. 17Omuntu weena, ku ayenda kukora ebi Ogwo akunda, niwe arimanya yaaba okwegyesa okwo kuruga ahari Ruhanga, nari shi ku nyegambira ahabwangye. 18Orikwegambira ahabwe, naaba naayesherurira ekitiinisa; kwonka orikusherurira Owaamutumire ekitiinisa, niwe w'amazima, kandi omuriwe tiharimu kutahikiirira kwona. 19#Yoh 5:16, 18; Byak 7:53. Musa tarabahaire Ebiragiro? Kwonka omuriimwe tihariho ohitsya Ebiragiro. Nimwendera ki kuunyita? 20#Yoh 8:48. Abantu baamugarukamu bati: oriho daimoni. N'oha orikwenda kukwita? 21Yesu yaabagarukamu ati: Nkakora ekintu kimwe, mwena mwakitangaarira. 22#Kut 17:10-12. Musa akabateeraho omugyenzo gw'okushara; (kwonka tikurarugire hari Musa, kureka ahari baashwenkuriimwe,) kandi mushara omuntu ahari Sabato. 23Mbwenu shi, omuntu ku araabe asharwa ahari Sabato, ngu ekiragiro kya Musa kitahendwa, nimungwererwa ki kubi ahabw'okukiriza kimwe omuntu ahari Sabato? 24Mutaricwa emanja nimwiha aha mireebekyere y'omuntu, mugume mucwe emanja z'oburyo.

Abafarisaayo okutuma ab'okukwata Yesu

25Kandi aha ba Yerusaalemu baagira bati: Omushaija ou barikusherura kwita tiwe ogu? 26Mbwenu ari aha, naagamba butunu, kandi tibaine ku baamugira! Ebyo, abakuru nibamanya buzima ku Ogu ari Kristo? 27Itwe nitumanya omushaija ogu ei arikuruga; kwonka Kristo we ku ariija, tihariho n'omwe orimanya ahi arikuruga. 28Nikyo Yesu yaagambiire n'eiraka rihango naayegyesa omuri hekalu ati: Nyowe nimummanya, kandi nimumanya n'ei naarugire. Tindaizire habwangye; Owantumire n'ow'amazima, kwonka We timurikumumanya. 29#Mat 11:27. Kwonka nyowe nimmumanya, ahabw'okuba nkaruga ah'ari, kandi niwe yantumire. 30#Yoh 13:1. N'ahabw'ekyo baayenda kumukwata; kwonka tihariho n'omwe owaamutaireho emikono, ahakuba obunaku bwe bukaba butakahikire. 31#Yoh 8:30; Yoh 12:42. Kwonka bantu baingi baamwikiriza, nibagira bati: kristo ku ariija, aryakora obumanyiso bwingi okukira obu omushaija ogu akozire?

32Abafarisaayo baahurira abantu nibamugambaho mpora batyo; abanyamurwa abakuru n'Abafarisaayo nikwo kutuma abakuru b'abaserukare kumukwata. 33#Yoh 13:33. Nikyo Yesu yaagiriire ati: Hatsigaire omwanya mukye, nyowe nkiri hamwe naimwe; bwanyima ngarukye ahari Ogwo owantumire; 34#Yoh 8:21. muryansherura, timurimbona; kandi ei ndi, timurikubaasa kwijayo. 35Abayudaaya baabuuzana bati: Omushaija ogu naayenda kuza hi, ei tutarimubona? Naayenda kuza omu baataataaniire omu Bagriika, ayegyese n'Abagriika? 36Eki eki yaagamba n'enki, ati: Muryansherura, timurimbona, kandi ati: Ei ndi, timurikubaasa kwijayo?

Emigyera y'amaizi g'amagara

37 # Yoh 4:10, 14. Aha izooba ry'aha muheru ery'ekiro kikuru ky'obugyenyi, Yesu yaayemerera, yaagamba n'eiraka rihango ati: Omuntu weena, ku araagire eiriho, aije ahariinye, anywe. 38#Isa 44:3; 55:1; 58:11; Yoel 3:18. Orikuunyikiriza, emigyera y'amaizi g'amagara eryahimintuka omunda ye, nk'oku Ebyahandiikirwe bigamba. 39#2 Kor 3:17. Ekyo akaba naakigamba aha Mwoyo, ou abarikumwikiriza bariija kuheebwa; ahakuba Omwoyo akaba atakahairwe, ahabw'okuba Yesu akaba atakahimbisiibwe.

40 # Yoh 6:14. Abantu bamwe, ku baahuriire ebigambo ebyo, baagira bati: Buzima ogu ni nabi ori. 41Abandi baagira bati: Ogu ni Kristo. Kwonka abandi bati: Hoona Kristo n'ow'okuruga omuri Galilaaya? 42#Mik 5:2. Timurikumanya ku Ebyahandiikirwe bihamya ngu Kristo aryakomooka omu ruganda rwa Daudi, omu Betelehemu, ekirorero eki Daudi yaabaire atwiremu? 43Okwo abantu nikwo baamuhakaineho batyo. 44Abamwe aharibo bakenda kumukwata; kwonka tihaine waamutaireho engaro.

Nikodemu okutonganira Yesu

45Abakuru b'abaserukare baagaruka aha banyamurwa abakuru n'Abafarisaayo; bo baababuuza bati: Ahanki mutaamureeta? 46Abakuru b'abaserukare baagarukamu bati: Tihakabahoga muntu orikugamba nk'ogu mushaija! 47Abafarisaayo baabagarukamu bati: Kandi shi naimwe yaabahabya? 48#Yoh 12:42. Hariho n'omwe omu bategyeki nari omu Bafarisaayo oramwikiriize? 49Kureka abo bantu, abatamanya Biragiro, n'abakeyeenirwe. 50#Yoh 3:1, 2. Nikodemu, omwe aharibo, owaizire ahari Yesu ira, yaababuuza ati: 51Beitu ebiragiro byaitu nibiikiriza kucwera omuntu orubanja, batabandize kuhurira eki arikwetonganira, n'obu kyakuba eki akozire? 52#Yoh 1:46. Baamugarukamu bati: Hari naiwe ori owa Galilaaya? Sherura oreebe, ku hatariho nabi oruga Galilaaya. 53Baagyenda, buri muntu yaataaha owaabo.

Currently Selected:

Yohaana 7: RR64

Highlight

Copy