Gen 16
16
Hagala ni Ishimaeli
1Salayi ŵamkwawo Abulamu, nganamŵelecela ŵanace Abulamujo. Nambo Salayi ŵakwete kapolo jwamkongwe jwa ku Iguputo lina lyakwe Hagala. 2Nipo Salayi ŵamsalile Abulamu kuti, “Mlole sambano, AMBUJE* nganamba upile wakuŵeleka mwanace. Uli agambe kutama malo gamo ni kapolo jwanguju? Kuti mwine mwakwe komboleka kumbelecela une ŵanace.” Nipo Abulamu ŵajiticisye yiŵaŵecete Salayi. 3Myoyo Salayi ŵampelece Hagala jula kwa Abulamu kuti aŵe ŵamkwakwe ŵanondi. (Ayi yatendece Abulamu ali atemi ku Kenani yaka likumi). 4Abulahamu,* ali atemi najo malo gamo Hagala, Hagalajo ŵakwete cilu. Piŵaliweni kuti akwete cilu ŵatandite kulikwesya, ni kwanyosya Salayi ambujegwe.
5Lisiku line Salayi ŵamsalile Abulamu kuti, “Kunyosya une Hagala, uli ulemwa* kwenumwe. Une nampele m'mwejo kapolo jwangu jweleju, nipo citandilile pa ŵakwete cilu pala, aŵele ali kunyosya. AMBUJE ni ŵatalamule kuti pawonece ŵani ŵali ŵakulemwa pasikati petu.”
6Nambo Abulamu ŵamjanjile Salayi kuti, “Jweleju ali kapolo jwenu, soni ali m'myala mwenu. Tendani najo yiliyose yitimsace.” Myoyo Salayi ŵatandite kumtamika Hagala mwa ngalwe, mpaka Hagalajo ŵatisile.
7Lilayika lya AMBUJE lyasimene nawo pacisima mcipululu, pa msewo wakwawula ku Shuli. 8Ni lyatite, “M'mweji Hagala kapolo jwa Salayi, ana mkutyocela kwapi, soni mkuja kwapi?” Jwalakwe ŵajanjile kuti, “Ngwatila ambuje ŵangu Salayi.”
9Lilayika lya AMBUJE lila lyamsalile kuti, “Iyayi, mwujile kwa ambuje ŵenu Salayi ni mkapikanileje.” 10Lyatite soni kuti, “AMBUJE atite, ‘Tinjimpa yisukulu yejinji, yangaŵalanjika.’ ” 11Lilayikalyo lyatite soni kuti, “Sambano msigele panandi kukola mwanace jwamlume, timumpe lina lyakwe Ishimaeli, ligongo lya kuti AMBUJE akupikene kulila kwenu pa ndaŵi ja yipwetesi yenu. 12Mwanacejo tacikola mtima wa ucilombo, taciŵengana ni jwalijose, soni ŵandu tacimŵenga. Ni tacitama mwakuŵengana ni acalongo acimjakwe wosope.”
13Nipo Hagala ŵaliwusisye jikape kuti, “Ana une nditu nam'weni Mlungu, ni nganimbwa?” Ni ŵamkolasile AMBUJE kuti ali, “Mlungu jwakusalola.” 14Ni ligongo lyakwe ŵandu akusacikolanga cisima ca pasikati pa Kadeshi ni Beledi kuti “Cisima ca Jwa umi Jwakumbona Une.”
15Nipo Hagala ŵamŵelecele Abulamu mwanace jwamlume, ni ŵamkolasile lina lyakwe Ishimaeli.#Agal 4:22 16Abulamu ŵaliji ni yaka 86 pandaŵi jelejo.
Currently Selected:
Gen 16: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
