Gen 17

Kuwumbala kuli cilocesyo ca Cilanga

1Abulamu piŵaliji ni yaka 99, AMBUJE* ŵamwonecele ni ŵamsalile kuti, “Une ndili Mlungu Jwamaciligosope, myoyo mumbikanileje une ndaŵi syosope, soni mtendeje yindu yagoloka. 2Tinjiŵika nomwe cilanga,* soni tinjimpa yisukulu yejinji.” 3Abulamu ŵatindiŵele pasi, nipo Mlungu ŵatite, 4“Aci ni cilanga citilangane ni m'mwejo. Nguŵika cilanga kuti timciŵa nangolo jwa ŵandu ŵa mitundu jejinji. 5Lina lyenu ngaliŵa soni Abulamu, nambo Abulahamu,* Lyeleli ni lina lyenu, ligongo namŵisile kuti mŵe nangolo jwa ŵandu ŵa mitundu jejinji.#Alo 4:17 6Tinampe yisukulu yejinji, nipo ŵane ŵa jemanjajo taciŵa acayimwene. Timcikola yisukulu yejinji mwakuti tiyiciŵa mtundu wekulungwa.

7“Cilanga canguci tinjiciŵika pa cilikati pa une ni m'mwejo ni yisukulu yenu ya msogolo, nipo ticiciŵa cangamala. Une tinjiŵa Mlungu jwenu ni Mlungu jwa yisukulu yenu.#Luk 1:55 8Tinjipeleka kwa m'mwejo ni yisukulu yenu, cilambo cimkutama mpela mlendo cino. Cilambo cosope ca Kenani ticiciŵa cenu pamo ni yisukulu yenu mpaka kalakala. Une soni tinjiŵa Mlungu jwawo.”#Mase 7:5

9Mlungu ŵatite kwa Abulahamu, “M'mwejo soni mkwenela kwiticisya kusunga cilanga cangu, pamo ni yisukulu yenu ya msogolo. 10M'mwejo pamo ni yisukulu yenu, mkwenela kusunga cilanga aci cakuti, jwamlume jwalijose jwali pasikati penu awumbaleje.#Mase 7:8; Alo 4:11 11Kutandilila sambano mwumbaleje: celeci ticiŵe cilocesyo ca cilanga pasikati pa une ni jemanja. 12Mumwumbasyeje mwanace jwamlume jwalijose ali akwanile masiku msano ni gatatu cipagwile cakwe. Mumwumbasyeje mwanace jwamlume jwalijose pa mipago jenu josope, mlukosyo kapena kapolo jwele jumwamsumile kwa mundu jwa cilendo jwangaŵa mbumba jenu. 13Jwalijose akwenela kuwumbala,* nipo celeci ticiciŵa cilocesyo ca pa cilu cenu, cakulosya kuti cilanga cangu ni jemanja cili cangamala. 14Mundu jwamlume jwalijose jwangawumbala ngasinamŵalanjila soni mpela mundu jwangu ligongo nganasunga cilanga cangu.”

15Mlungu ŵatite kwa Abulahamu, “Salayi ŵamkwenu lina lyawo ngaliŵa soni Salayi, nambo Sala. 16Jwalakweju tinampe upile nipo tacimŵelecela mwanace jwamlume. Tinjimpa upile nipo taciŵa nangolo jwa mitundu ja ŵandu ŵa yilambo yejinji. Pasikati pa yisukulu yakweyo ŵane taciŵa acayimwene.”

17Abulahamu ni ŵatindiŵele ni ŵajinamile pasi. Ŵatandite kuseka, ŵatite kuti, “Ana jwamlume jwa yaka 100 mpaka aŵelece soni mwanace? Ana ŵamkwangu Sala ŵakwete yaka 90 mpaka aŵelece mwanace?” 18Nipo Abulahamu ŵatite kwa Mlungu, “Ana uli ngagamba kumpa upile Ishimaeli peju, kuti aŵe jwakwinjila lina lyangu?”

19Mlungu ŵatite, “Iyayi, nambo Sala ŵamkwenu tacimŵelecela m'mwejo mwanace jwamlume nipo timcimpa lina lyakwe Isaki. Tinjisunga cilanga cangu ni jwalakwe pamo soni ni yisukulu yakwe, nipo cilangaco ticiciŵa ca yaka yosope. 20Mbikene soni kuŵenda kwenu pakwayana ni Ishimaeliju, tinjimpa upile, nipo tinjimpa ŵanace ŵajinji pamo soni ni yisukulu yejinji. Taciŵa baba ŵa acayimwene 12, nipo yisukulu yakwe tiyiciŵa mtundu wawukulungwa. 21Nambo tinjisunga cilanga cangu ni mwanace jwenu Isaki jutacipagwa mwa Sala ŵamkwenu, ndaŵi mpela jinojino caka ca malaŵi.” 22Mlungu piŵamasile kuŵeceta ni Abulahamu, ŵamlesile papopo.

23Lisiku lilyolyo Abulahamu ŵakumbucile yele Mlungu ŵamsalile, nipo ŵamjigele Ishimaeli mwanagwawo jwamlume pamo ni acikapolo ŵakupagwila m'nyumba mwawo ni ŵakusumidwa, kwisa soni jwamlume jwalijose jwa panyumba jakwe ni ŵawumbesye lisiku lilyolyo, mpela muŵaŵecetele Mlungu. 24Abulahamu ŵaliji ali ni yaka 99 piŵawumbalaga. 25Nipo Ishimaeli mwanagwawo ŵaliji ali ni yaka 13 piŵawumbalaga 26lisiku lilyolyo, Abulahamu ni Ishimaeli mwanagwawo ŵawumbele, 27pamo ni acalume wosope ŵapanyumba jawo, acalume ŵakupagwila mwiŵasa mwakwe ni ŵane wosope ŵiŵasumile ni mbiya kutyocela ku yilambo yine.

Currently Selected:

Gen 17: YAWO

Highlight

Copy