Gen 21

Kupagwa kwa Isaki

1AMBUJE* ŵampele upile Sala, ni ŵamtendele yindu yele yiŵapangene najo, mpela mwele AMBUJEWO ŵaŵicile cilanga.* 2Sala ŵakwete cilu ni ŵamŵelecele Abulahamu* mwanace jwamlume mu ucekulu wakwe. Mwanace jwelejo ŵapagwile pa ndaŵi jisyesyene jiŵasasile Mlungu kuti mwanacejo tacipagwa.#Aheb 11:11 3Abulahamu ŵampele mwanacejo lina lyakwe Isaki. 4Pali papite masiku msano ni gatatu, Abulahamu ŵamwumbesye mwanacejo pakuya yiŵalamwile Mlungu.#Gen 17:12; Mase 7:8 5Abulahamu ŵaliji ni yaka 100 Isaki mwanagwawo piŵapagwaga. 6Sala ŵatite, “Mlungu ambele ciseko, mundu jwalijose jutajipikane nganiji tijimsecesye. 7Ŵani ŵangakombolece kwasalila Abulahamu kuti Sala tacijonjesya mwanace? Nambotu lelo naŵelecele mwanace mu ucekulu wawo.”

8Mwanace wakusile, nipo pa lisiku lyakuti tamlekasye konga, Abulahamu ŵalinganyisye cindimba cacikulungwa.

Hagala ni Ishimaeli akwatoposya

9Nambo Sala ŵam'weni mwanace jwa Hagala jwa ku Iguputo juŵamŵelecele Abulahamu ali ng'anda ni Isaki. 10Ni ŵatite kwa Abulahamu, “Mumtoposye kapolo jwamkongweju ni mwanace jwakwejo. Mwanace jwa kapoloju akapocela cipanje cenu, cele citacipocela mwanangu Isaki.”#Agal 4:29-30 11Maloŵe gelaga nginasangalala nago Abulahamu ligongo Ishimaeli nombe najo ŵaliji mwanagwawo. 12Nambo Mlungu ŵatite kwa Abulahamu, “Mkamdandawula ya mwanagwenu Ishimaeli ni kapolo jwenu Hagala, cilicose cakumsalila Sala mcitende, ligongo Isakiju ni jutaciŵa nangolo jwa yisukulu yenu, mpela mwele munatendele cilanga.#Alo 9:7; Aheb 11:18 13Mwanace jwa kapolo jwenu jwamkongwejo tinjimpa soni ŵanace ŵajinji, nipo taciŵa mtundu wawukulungwa, ligongo jwalakwejo soni ali mwanagwenu.”

14Myoyo Abulahamu ŵajimwice kundaŵindaŵipe ni ŵajigele yakulya ni msaku walipende wegumbale ni mesi, ni ŵampele Hagala. Ŵamŵelesye soni mwanace jwakwe jula ni ŵamsalile kuti ajawuleje. Hagala ŵanyakwice ni ŵaliji mkwendajenda mcipululu lya ku Belesheba. 15Mesi gaŵajigele gala gali gamasile, ŵagambile kumleka mwanace jula pasi pewukutu. 16Jwalakwe ni ŵajile kutama pasi pamti myoyo, pamkuli wa mamita 100, pelepo ŵaliji mkuliŵecetela jika kuti, “Ngakomboleka kuti une namwone mwanangu ali mkuwa.” Hagala ali citamile myoyo, mwanace jula ŵatandite kulila kwakukulungwa.

17Mlungu ŵakupikene kulila kwa mwanacejo, nipo lilayika lya Mlungu lyaŵecete ni Hagala kutyocela kwinani, kuti, “Ana m'mweji Hagala, cikumsawusya cici? Mkamjogopa pakuŵa Mlungu akupikene kulila. 18Nyakukani, mjawule mkamnyakule mwanacejo ni mkamyalasye, ligongo tinjimpa yisukulu yejinji mwanacejo.” 19Mlungu ŵawugwile meso ga Hagala ni ŵaciweni cisima. Jwalakwe ŵajawile pa cisimapo, ni ŵagumbesye msaku walipende lila ni mesi, gane ŵamwesisye mwanace jula. 20Mlungu mcipululu ca Pelani, ni ŵaliji mundu jwakupakombola kusakula nyama kwejinji. 21Mamagwe ŵamsosele jwamkongwe jwa ku Iguputo juŵalombele.

Cilanga ca Abulahamu ni Abimeleki

22Ndaŵi jelejo Abimeleki pamo ni Fikoli, jwamkulungwa jwa asilikali ŵakwe ŵa ngondo, ŵajawile kwa Abulahamu kuja kumsalila kuti, “Baba, Mlungu ali ni ŵalakwe mu yindu yosope yakutenda.#Gen 26:26 23Sambano ŵalakwe alumbile pameso pa Mlungu kuti ngasalambusya une, kapena ŵanace ŵangu, kapena soni yisukulu yangu. Une ndemi jwakulupicika kwa ŵalakwe, nombe nawo aŵice cilanga cakuti taciŵa ŵakulupicika kwa une, mcilambo cele cakuja kutamaco.” 24Abulahamu ni ŵatite, “Ngulumbila.”

25Abulahamu ŵadandawulile Abimeleki ya cisima cele ŵamasengo ŵakwe ŵacisumwile. 26Abimeleki ŵatite, “Ngingum'manyilila mundu juŵatesile yeleyi. Atamose ŵalakwe asyene nganasalila une ya cele cinduci, soni une kupikana kwakwe ni kweleku.” 27Abulahamu ŵampele Abimeleki ngondolo ni ng'ombe, nipo ŵandu ŵaŵiliŵa ŵapangene cilanga. 28Abulahamu ŵasapwile ŵanace ŵangondolo msano ni siŵili ŵatyosisye pa yilangwa yakwe. 29Abimeleki ŵamwusisye kuti, “Ana sikugopolela cici ngondolo msano ni siŵilisi?”

30Abulahamu ni ŵajanjile kuti, “Ŵalakwe apocele ngondolo msano ni siŵilisi, ligongo pakutenda myoyo ni kuti ŵalakwe akwiticisya kuti cisima celeci nawukwile une.” 31Myoyo malo gala ŵagapele lina lyakuti Belesheba ligongo kweleko ŵandu ŵaŵili ŵala ŵapangene cilanga.

32Ali atesile cilanga celeci ku Belesheba kula, Abimeleki pamo ni Fikoli jwamkulungwa jwa asilikali ŵakwe ŵa ngondo, ŵanyakwice kuwujila kumangwawo, ku cilambo ca Afilisiti. 33Abulahamu ŵapandile citela ca ukwesu ku Belesheba kula, nipo papopo soni ŵalambile AMBUJE Mlungu Ŵandaŵi syosope. 34Nipo Abulahamu ŵatemi mcilambo ca Afilisiti kwa masiku gamajinji.

Currently Selected:

Gen 21: YAWO

Highlight

Copy