Luk 22

Malindi gakumwulaga Yesu

(Mat 26:1-5; Mak 14:1-2; Yoh 11:45-53)

1Sambano ndaŵi ja mikate jangali cakusasaŵilisya* cele cikusakolanjidwa kuti Pasaka* jaŵandicile.#Eks 12:1-27 2Acakulungwa ŵa ŵakutaga mbopesi ni aciŵalimu ŵa Malamusi* ŵaliji mkusosasosa litala lyakuti amwulajile Yesu* nambo ŵajogopaga ŵandu.

Yudasi akwiticisya ya kumpeleka Yesu

(Mat 26:14-16; Mak 14:10-11)

3Kaneko Satana* jwajinjile mu mtima mwa Yudasi jwakolanjidwa kuti Isikaliyoti, jumo jwa ŵakulijiganya* likumi ni ŵaŵili ŵala. 4Yudasi ŵapite kukupikanganana ni acakulungwa ŵa ŵakutaga mbopesi, ni acimlongola ŵa acilonda ŵa ku Nyumba ja AMBUJE* ya mwele mutampelecele Yesu kwa jemanjajo. 5Jemanjajo ŵasangalele, ni ŵakamulene ya kumpa jwalakwejo mbiya. 6Yudasi ŵajiticisye, ni ŵatandite kusosasosa lipesa lyakumpelecela Yesu kwa jemanjajo mwangamanyilila jwalijose.

Yesu akuliŵicila cile kuti alye cakulya ca Pasaka

(Mat 26:17-25; Mak 14:12-21; Yoh 13:21-30)

7Lisiku lyakwanile lya cindimba ca mikate jangali cakusasaŵilisya, pa lyele lisikuli ŵandu ŵaliji mkuwulaga ŵanace ŵangondolo kuti atendele cindimba ca Pasaka. 8Yesu ŵamtumile Petulo* ni Yohane* ni ŵasalile kuti, “Mjawule mkatukolocesye cakulya ca Pasaka kuti tulye.”

9Jemanjajo ŵamwusisye Yesu kuti, “Ana mkusaka kuti tukalinganyicisye kwapi?”

10Yesu ŵasalile jemanjajo kuti, “Pitimkajinjile mu msindamo, timkasimane ni mundu jwamlume ali atwicile lulo lwa mesi. Jemanja mkamkuye jwalakwejo mpaka ku nyumba jitakajinjile. 11Mkamsalile msyene nyumbajo kuti, ‘Cemwalimu akuwusya kuti, ana cipinda citalilemo cindimba ca Pasaka ni ŵakulijiganya ŵawo ni capi?’ 12Jwalakwejo takamlosye cipinda cekulungwa camwinani cekolosye cenene, mutimkakolocesye cakulya ca Pasaka.”

13Myoyo jemanjajo ŵanyakwice ni ŵajile kuyisimana yosope mpela muŵasalilile Yesu mula, nipo jwakolosisye cakulya ca Pasaka.

Ya cakulya ca Ambuje

(Mat 26:26-30; Mak 14:22-26; 1 Akoli 11:23-25)

14Pijakwanile ndaŵi, Yesu pamo ni ŵandumetume ŵakwe ŵatemi pa malo gakulila cakulya. 15Yesu ŵasalile jemanjajo kuti, “Sacilile mnope kuti ndye cakulya ca Pasakaci pampepe ni jemanja mkanimbe kuyiwona yipwetesi. 16Pakuti ngumsalila kuti ngasindya soni Pasaka jine mpaka patijiciyika ndaŵi ja Ucimwene wa Mlungu.”*

17Kaneko Yesu ŵajigele mgawo ni ŵamtogolele Mlungu acitiji, “Pocelani mgawo ni m'mwe mwakupelegana jwine ni mjakwe. 18Ngumsalila kuti, kutandilila sambano jino, une ngasimwa soni cakumwa cakupanganyikwa kutyocela ku yisogosi ya mpeleya mpaka pa ndaŵi jitiwuciyika Ucimwene wa Mlungu.”

19Kaneko Yesu ŵajigele mkate, ni ŵamtogolele Mlungu, ni ŵawugaŵenyegaŵenye mkatewo ni kwapa ŵakulijiganya ŵakwe ŵala, jwalakwejo ali mkuŵeceta kuti, “Celeci cili cilu cangu cikupelecedwa kwa jemanja. Mtendeje yeleyi kuti mungumbucileje.” 20Myoyo piŵamasile kulya cakulya ca ligulo, ŵajigele mgawo acitiji, “Mgawo awu cili cilanga* casambano ca Mlungu cakusindicisidwa ni miasi jangu jijajitice ligongo lya jemanja.”#Yel 31:31-34

21“Mlole, mundu jwakusaka kumbeleka une kwa amagongo ali apano akulya pampepe ni une.#Mas 41:9 22Mwanace jwa Mundu* taciwa mpela muŵalinganyicisye Mlungu, nambo likungu kwa mundu jwakumpeleka jwalakwejo.”

23Pelepo ŵakulijiganya ŵala ŵatandite kuwusyana jwine ni mjakwe acitiji kuti, “Ana nduni mwa uweji jwa mpaka atende yeleyi?”

Ŵakulijiganya akusisyana ya ukulungwa

24Ŵakulijiganya ŵala ŵatandite kusisyana acitiji, “Sikati jetuji, ana ŵakulungwa ŵani?”#Mat 18:1; Mak 9:34; Luk 9:46 25Yesu ŵasalile jemanjajo kuti, “Ayimwene ŵa pa cilambo capasi akwete macili pa ŵandu ŵawo, ni ŵakwalamulila jemanjajo akolanjidwa ‘Acimjawo ŵa ŵandu.’#Mat 20:25-27; Mak 10:42-44 26Nambo sikati ja jemanja yikaŵaga myoyo. Nambo jwali jwamkulungwa sikati ja jemanja aŵeje mpela jwamnondi mwa wosope, soni jwele jwakulamula aŵeje mpela jwakutumicila.#Mat 23:11; Mak 9:35 27Ana jwamkulungwa nduni, jwakutama pasi ni kulyaga kapena jwele jwakutumicila? Ana ngaŵaga jwakutumicilidwajo? Nambo une ndili pa sikati penu mpela jwakutumicila.#Yoh 13:12-15

28“Jemanja ni ŵimtemi ni une mu yisawusyo yangu yosope. 29Ali ni ligongo lyakwe mpela Atati ŵangu ŵambele ulamusi ŵakulamula, Une soni ngumpa jemanja macili gakuti mlamulileje mpela mwenye. 30Timcilya ni kumwa pampepe ni une mu Ucimwene wangu, soni timcitama mu yitengu kuti mlamulile ngosyo likumi ni siŵili sya ku Isalaeli.”#Mat 19:28

Yesu ŵalocesye kuti Petulo tacimkana jwalakwejo

(Mat 26:31-35; Mak 14:27-31; Yoh 13:36-38)

31“Simoni,* Simoni! Mkalamuce! Satana apocele ukumu kuti amlinje jemanja wosope, kuti alekanganye yambone ni yakusakala, mpela mwakusatendela mkulima pakulekanganya tiligu ni masapi. 32Nambo une nimpopelele m'mwejo kuti mkaleka kungulupilila une. M'mwejo pitimpitikucepo mtima, mjawule mkajongolele acalongo acimjenu.”

33Petulo ŵajanjile kuti, “Ambuje une ndili jwa cilepe kwawula kukutaŵidwa pamo ni ŵalakwe atamose kuwa kwene.”

34Nambo Yesu ŵamjanjile Petulo kuti, “Ngumsalila m'mwe Petulo, kuti, lelo jino, tambala ngatongola cilocino mpaka mli munganile katatu kuti ngamkumanyilila une.”

Ya kujigala misaku ja mbiya ni upanga

35Kaneko Yesu ŵawusisye jemanjajo kuti, “Ndaŵi jine pinamtumile mli ŵangali msaku wa mbiya, kapena msaku wa pa ulendo kapena sapato, ana cipali cicamsoŵile?”

Jemanjajo ŵatite, “Nganitusoŵa kandu.”#Mat 10:9-10; Mak 6:8-9; Luk 9:3; 10:4

36Yesu ŵasalile jemanjajo kuti, “Sambano jwakwete msaku wa mbiya akawuleka, yalumo soni msaku wakwe wa pa ulendo. Jwalijose jwakanakola upanga, asumisye cakuwala cakwe kuti akasume upanga. 37Ngumsalila kuti, yikwenela kutendekwa kwa une mpela muyilembedwele m'Malemba kuti, ‘Ŵamganicisyaga kuti ali jumo jwa ŵandu ŵakukasa Malamusi.’ Nipo yosope yiyalembedwe yakwamba une yikutendekwa.”#Yes 53:12

38Ŵakulijiganya ŵatite, “Ambuje, tukwete mawupanga gaŵili!”

Yesu ŵasalile jemanjajo kuti, “Basi gagogo gakwanile.”

Yesu ŵajile kukupopela Kwitumbi lya Olifi

(Mat 26:36-46; Mak 14:32-42)

39Yesu ŵakopwece mu msinda ni ŵapite Kwitumbi lya Olifi, mpela muŵatendelaga masiku gosope. Pa ulendowo ŵalongene ni ŵakulijiganya ŵakwe. 40Piŵayice ku maloko, Yesu ŵasalile ŵakulijiganya ŵakwe kuti, “Mpopeleje kuti mkalinjikwa ni Satana.”

41Kaneko Yesu ŵalekangene ni ŵakulijiganya ŵala ni ŵajawile pasogolo panandi, pelepo ŵatindiŵele ni kupopelaga acitiji, 42“Atati, naga akusaka andyocesye mgawo wa yisawusyowu, nambo ngaŵa lisosa lya une.” 43Lilayika lyakutyocela kwinani lyayice kukumlimbisya jwalakwejo. 44Yesu ŵalasile mu mtima, ni ŵapopesile mnope mwakuti citukuta cakwe caliji mpela madondo gamakulungwa ga miasi gakugwila pasi.

45Piŵamasile kupopela, ŵajimi ni ŵapite kuŵaliji ŵakulijiganya ŵakwe. Jemanjajo ŵaliji mkugona ligongo ŵakamwilwe ni canasa, 46Yesu ŵawusisye jemanjajo kuti, “Ana ligongo cici mkugona? Mjimuce ni mpopeleje kuti mkalinjikwa.”

Kukamulwa kwa Yesu

(Mat 26:47-56; Mak 14:43-50; Yoh 18:3-11)

47Yesu piŵaliji mkuŵeceta, likuga lya ŵandu lyayice lili lilongoleledwe ni Yudasi jumo jwa ŵakulijiganya ŵala. Jwalakweju jwapite piŵaliji Yesu pala ni kumkumbatila jwalakwejo. 48Nambo Yesu ŵamwusisye jwalakwejo kuti, “Yudasi, ana mkupeleka Mwanace jwa Mundu ni cikomasyo?”

49Ŵakulijiganya ŵaŵaliji ciŵandika ni Yesu piŵayiweni yeleyi yili mkutendekwa, ŵawusisye kuti, “Ambuje, twakape ni upanga?” 50Jumo jwa ŵakulijiganya ŵala ŵakatile lipikanilo lya kumlyo lya jumo jwa kutumicila jwa ŵakutaga mbopesi.

51Nambo Yesu ŵatite, “Basi lekani yeleyi.” Kaneko Yesujo ŵalikwayiye lipikanilo lya mundujo ni ŵamposisye.

52Kaneko Yesu ŵaŵecete ni acakulungwa ŵa ŵakutaga mbopesi, acakulungwa ŵa acilonda ku Nyumba ja AMBUJE, ni acakulungwa ŵane ŵa Ayuda ŵele ŵiŵayice kukumkamula jwalakwejo. Yesu ŵawusisye jemanjajo kuti, “Ana myice ni mawupanga ni yimbonga mpelaga une jwawiyi? 53Lisiku lililyose mbeleje ndili ni jemanja m'Nyumba ja AMBUJE nambo nganimungamula. Sambano ajino jili ndaŵi jakuti mtende masengo ga mu cipi.”#Luk 19:47; 21:37

Petulo ŵamkanile Yesu

(Mat 26:57-58, 69-75; Mak 14:53-54, 66-72; Yoh 18:12-18, 25-27)

54Ŵandu ŵala ŵamkamwile Yesu, ni ŵapite nawo ku nyumba ja jwamkulungwa jwakutaga mbopesi; nipo Petulo ŵaliji mkwakuya pakutalicila pamti myoyo. 55Ŵandu ŵala ŵakolesisye moto mkati mwa luŵala lwa nyumbajo nipo ŵatemi pasi yalumo. Nombe nawo Petulo ŵatemi nawo papopo. 56Piŵatemi pelepo, mwali jwamasengo ŵam'weni jwalakwejo mumbali mwa motowo. Piŵamlolecesye Petulojo, mwalijo jwatite, “Nombe najo aju jwaliji ni Yesu.”

57Nambo Petulo ŵakanile acitiji, “M'mwe ŵakongwe, unetu Ngingum'manyilila mundu jumkwambajo!”

58Pijamasile ndaŵi panandi, mundu jwine ŵam'weni Petulojo, nipo mundujo jwatite, “Wawo soni ali jumo jwa womwanjawula.”

Nambo Petulo ŵakanile acitiji kuti, “Nganimba une.”

59Pijamasile awala jimo, mundu jwine jwalimbicile kumsalila Petulo kuti, “Kusyene, nombe najo mundu aju ŵaliji najo, pakuti nombe najo ali jwakutyocela ku Galileya.”

60Petulo ŵajanjile kuti, “Mjangu nganguyimanyilila yimkuŵecetayo.”

Piŵaliji mkuŵeceta myoyo tambala jwatongwele.

61Ambuje ŵagalawice ni kumlola Petulo. Kaneko Petulo ŵakumbucile maloŵe giŵaŵecete Ambuje gala gakumsalila kuti, “Lelo jino tambala mkanatongole timungane katatu.” 62Ndaŵi jijojo Petulo ŵakopwece kusa ni ŵalisile mwa canasa.

Ŵamsecile Yesu ni kumputa

(Mat 26:67-68; Mak 14:65)

63Ŵandu ŵaŵamkamwile Yesu ŵala ŵatandite kumseka ni kumputa. 64Ŵamsiŵile ku ngope ni kumwusya kuti, “Mlote, ana ŵamputile ŵani?” 65Ŵamŵecetele soni maloŵe gane gejinji ga cipongwe.

Yesu ku Nganya ja Ayuda

(Mat 26:59-66; Mak 14:55-64; Yoh 18:19-24)

66Pikwacele, likuga lya acakulungwa ŵa Ayuda,* acakulungwa ŵa ŵakutaga mbopesi ni aciŵalimu ŵa Malamusi ŵasongene. Ŵamjigele Yesu ni kwawula nawo ku nganya jawo. 67Kweleko ŵamwusisye kuti, “Naga m'mwejo mli Mesiya,* mtusalile mwangasisa.”

Nambo jwalakwejo jwajanjile kuti, “Atamose nimsalile ngamungulupilila; 68soni naga ngumwusya ciwusyo ngamunjanga. 69Nambo kutyocela sambano, Mwanace jwa Mundune tinjiŵa ku mkono wamlyo wa Mlungu Jwamaciligosope.”

70Ŵandu wosope ŵala ŵamwusisye jwalakwejo kuti, “Nambi sambano, ana nikuti m'mwejo mli Mwanace jwa Mlungu?”

Yesu ŵajanjile kuti, “Pakuti mŵecete mwacimsyene kuti Une ndili Mwanace jwa Mlungu.”

71Jemanjajo ŵatite, “Ana tukusosela cici umboni wine? Pakuti tulipikanile twacimsyewe maloŵe gakwe.”

Currently Selected:

Luk 22: YAWO

Highlight

Copy