Luk 23

Yesu ku nganya ja Pilato

(Mat 27:1-2, 11-14; Mak 15:1-5; Yoh 18:28-38)

1Likuga lyosope lyanyakwice ni kwawula najo Yesu* kwa Pilato.* 2Jemanjaji ŵatandite kumlambucisya Yesu acitiji kuti, “Tumsimene munduju ali mkwasokonesya ŵandu ŵa mtundu wetu. Akwasalilaga ŵandu kuti jemanjajo akakomaga msongo kwa Mwenye jwa ku Loma.* Jwalakweju akusaŵeceta soni kuti, ali Mesiya* nambo soni Mwenye.”

3Pilato ŵamwusisye jwalakwejo kuti, “Ana m'mwejo mli mwenye jwa Ayuda?”

Yesu ŵajanjile kuti, “Mŵecete mwasyene jika.”

4Papopo Pilato ŵasalile acakulungwa ŵa ŵakutaga mbopesi ni ŵandu wosope ŵala kuti, “Une ngangukuwona kulemwa kulikose mwa munduju.”

5Nambo ŵandu ŵala ŵapelengenye kuŵeceta mwakukanilila acitiji kuti, “Jwalakweju akusatandisyaga njojo mu msinda wa Yudeya mosope ligongo lya majiganyo gakwe. Jwatandite ku Galileya mwakuti sambano ali akuno.”

Yesu ku nganya ja Helodi

6Pilato piŵapikene yeleyi, ŵawusisye kuti, “Ana munduju ali jwakutyocela ku Galileya?” 7Myoyo piŵapikene kuti Yesujo ali jwakutyocela ku upande uwalamulilidwaga ni Helodi,* ŵamwucisye jwalakwejo kwa Helodi peko ŵele pa ndaŵi jeleji ŵaliji ali ku Yelusalemu.

8Helodi piŵam'weni Yesu ŵasangalele mnope, pakuti Helodijo ŵaŵele ali mkupikana ya jwele munduju. Myoyo ŵaŵele ali mkusaka kwa ndaŵi jelewu kuti amwone jwalakwejo ali mkutenda yakumasya lunda. 9Helodi ŵamwusisye Yesu yiwusyo yejinji, nambo Yesu nganajanga kandu kalikose. 10Acakulungwa ŵa ŵakutaga mbopesi ni aciŵalimu ŵa Malamusi* ŵajimi ni kumlambucisyaga Yesu yindu yejinji.

11Helodi pamo ni asilikali ŵakwe ŵatandite kumseka ni kumnyosya Yesu. Ŵam'wecice mkanjo ni kaneko ŵamwucisye soni kwa Pilato. 12Kutyocela lyele lisikulyo Helodi ni Pilato ŵatandite kukamulana, atamose kuti pandanda ŵaliji ŵakuŵengana.

Yesu ŵalamulidwe kuti awulajidwe

(Mat 27:15-26; Mak 15:6-15; Yoh 18:39—19:16)

13Pilato ŵasongenye acakulungwa ŵa ŵakutaga mbopesi, ni acakulungwa ŵa Ayuda* ni ŵandu ŵane wamba, 14ni ŵasalile kuti, “Myice najo munduju kukumpeleka kwa une kuti jwalakweju ali jwakusokonesya. Uneji nimwusisye pameso pa jemanja, nipo pa yosope yimkuŵecetayi ngangukuwona kulemwa kulikose kwa jwalakweju. 15Nombe najo Helodi* nganasimana cileŵi cilicose mwa munduju, ali ni ligongo lyakwe amwusisye soni kwa uweji. Jwalakweju nganatenda kandu kalikose kakulemwa kakwenela kuwulajidwa nako. 16Myoyo, tingambe kumkwapula ni kumgopola.” 17Pandaŵi ja cindimba ca Pasaka* Pilato ŵajenelaga kwagopolela ŵanduwo mundu jumo.

18Nambo ŵandu wosope ŵala ŵatandite kugumila acitiji kuti, “Mumwulaje jwalakweju nipo mtugopolele Balaba!” 19Balaba ŵataŵidwe ligongo lyakuti ŵatandisye njojo mu msinda ni kuwulaga soni mundu jwine.

20Pilato ŵasakaga kumgopola Yesu, myoyo ŵaŵecete soni ni ŵandu ŵala. 21Nambo ŵandu ŵala ŵapitilisye kugumila acitiji, “Amkomele pa msalaba! Amkomele pa msalaba!”

22Pilato ŵawusisye soni ŵandu ŵala katatu acitiji, “Ana jwalakweju alemwisye cici? Unetu ngangukuwona kulemwa kulikose kwakuti jwalakweju awulajidwe. Myoyo tingambe kumkwapula ni kumgopola.”

23Ŵandu ŵala ŵapitilisye kugumila mwakwesya maloŵe kuti Yesu amkomele pa msalaba. 24Pambesi pakwe Pilato ŵalamwile kuti yitendekwe mpela muŵaliji mkuŵendela ŵanduwo. 25Pilato ŵagopolele ŵanduwo mundu juŵamsakaga jula jwele juŵaliji ali ataŵidwe ligongo lyakutandisya njojo ni kuwulaga mundu. Yesu ŵampelece kwa jemanjajo kuti atende najo yiŵasakaga jemanjajo.

Yesu akumkomela pa msalaba

(Mat 27:32-44; Mak 15:21-32; Yoh 19:17-27)

26Asilikali ŵamjigele Yesu ni kwawula najo kuti akamkomele pa msalaba. Petala asilikali ŵala ŵamkamwile mundu jwine lina lyakwe Simoni* jwele juŵaliji jwakutyocela ku Kilene. Jwalakweju jwaliji mkutyocela ku migunda nipo ŵamnyakulisye msalaba wa Yesu pa makoyo ni kumsalila kuti ajendeje panyuma pa Yesu.

27Ŵandu ŵajinji ŵaliji kumkuya jwalakwejo, kupwatikapo acakongwe ŵiŵaliji kumlilila jwalakwejo ni kuliputa pa mtima ligongo lya canasa. 28Nambo Yesu ŵagalawucile acakongwewo ni kwasalila kuti, “Jemanja acakongwe ŵa ku Yelusalemu, mkasimundilila une, nambo mlililileje mwacimsyene ni ŵanace ŵenu. 29Pakuti ndaŵi tijiciyika jele ŵandu tacitiji kuti, ‘Ŵana upile acakongwe ŵangaŵeleka, ŵele nganajonjesyeje mwanace!’ 30Pa jele ndaŵijo ŵandu tacigasalilaga matumbi kuti, ‘Mtugwile.’ Tacitusalila soni tumatumbi twa ŵana kuti, ‘Mtuwunicile.’#Hos 10:8; Ciw 6:16 31Naga yeleyi yikutendekwa pa citela caciŵisi, nambi mpaka yiŵe uli pa citela cejumu?”

32Asilikali ŵala ŵajigele soni ŵandu ŵaŵili ŵaciswamba kuti akawulaje pampepe ni Yesu. 33Piŵayice pa malo gakolanjidwa “Cikalakasa ca mtwe,” ŵamkomele Yesu pa msalaba. Ŵakomele soni ŵaciswamba ŵala pa misalaba jine, jwine mbali ja ku mkono wamlyo, jwine mbali ja ku mkono wa mciji wa Yesu. 34Yesu ŵatite, “Atati, mwakululucile ŵanduŵa, ligongo ngakumanyilila yakutenda.”

Jemanjajo ŵagaŵene yakuwala yakwe pakulondola cisango.#Mas 22:18 35Ŵandu wosope ŵajimi papopo ni kulolelaga, nipo acakulungwa ŵa Ayuda* ŵamlalatile jwalakwejo acitiji kuti, “Jwalakweju ŵakulupwisye ŵandu ŵane, sambano alikulupusye asyene naga ali Mesiya jwakusagulidwa* ni Mlungu.”#Mas 22:7

36Nombe nawo asilikali ŵatandite kumseka. Ŵayice ciŵandika ni jwalakwejo ni kumpa finyo jwamcesuce kuti amwe.#Mas 69:21 37Jemanjajo ŵaŵecete kuti, “Mlikulupusye mwasyene naga m'mwejo mli mwenye jwa Ayuda.”

38Penani pa msalaba ŵaŵisile cimanyisyo cicalembedwe mu yiŵeceto ya Cigiliki,* Cilatini ni Ciyuda. Maloŵe gigalembedwe pelepo galiji gakuti, “Aju ni mwenye jwa Ayuda.”

39Jwaciswamba jumo juŵamkomele pampepe ni Yesu jula jwatandite kumnyosya Yesujo aciŵecetaga kuti, “Ana mbesileje kuti m'mwejo mli Mesiya jula? Mlikulupusye mwasyene ni uwe ŵakwe.”

40Nambo mjakwe jula jwajanjile mwakumjamuka acitiji kuti, “Ana m'mwe, ngamkogopa Mlungu, mli mkumanyilila soni kuti nomwe ŵakwe mkupocela cilango cicici? 41Kwa uweji, yeleyi yikwenela kutendekwa, mwakulingana ni yitwatesile. Nambo aju munduju nganatenda cakulemwa cilicose.” 42Ni jwatite kwa Yesu kuti, “Akangumbucile pitakajinjile mu Ucimwene wawo.”

43Yesu ŵajanjile kuti, “Kusyene ngumsalila kuti, lelope jino m'mwejo timkaŵe ni une ku malo ga lukondwa.”

Ciwa ca Yesu

(Mat 27:45-56; Mak 15:33-41; Yoh 19:28-30)

44Ndaŵi pijakwanile 12 koloko ja musi, cipi cayice pa cilambo cosope, 45pakuti lyuŵa lyalesile kuŵala mpaka ndaŵi ja 3 koloko. Nguwo jakuciga ja m'Nyumba ja Ambuje japapwice pacilikati.#Eks 26:31-33 46Yesu ŵagumisile mnope acitiji, “Atati ngupeleka umi wangu m'myala mwenu.” Piŵamasile kuŵeceta gele maloŵega Yesu ŵawile.#Mas 31:5

47Jwamkulungwa jwa asilikali piŵayiweni yiyatendekweyo ŵamlumbile mnope Mlungu acitiji kuti, “Kusyene, munduju jwaliji jwakulungama.” 48Ŵandu wosope ŵiŵasongene kulolela yiyatendekwagayo, ŵawujile kumangwawo acidandawulaga m'mitima mwawo ligongo lya canasa pa ndaŵi jiŵayiweni yiyatendekwagayo. 49Ŵandu wosope ŵiŵamanyiganaga ni Yesu nambo soni acakongwe ŵiŵamkuyisye kutyocela ku Galileya ŵala, ŵajimi pakutalicila ni kulolaga yeleyi.#Luk 8:2-3

Kusicidwa kwa Yesu

(Mat 27:57-61; Mak 15:42-47; Yoh 19:38-42)

50Ŵapali mundu jwine lina lyakwe Yosefe, jwa ku Alimateya msinda wa ku Yudeya. Jwalakweju jwaliji mundu jwambone ni jwakulungama, nambo soni jwaliji jwa mwikuga lyekulungwa lya Ayuda. 51Jwalakweju nganakamulanaga nayo yiŵapanganaga acimjakwe mwikugamu, pakuti jwalakwejo jwajembecelaga kwika kwa Ucimwene wa Mlungu.* 52Jwalakwejo jwapite kwa Pilato kukuŵenda mtembo wa Yesu. 53Ŵawutulwisye mtembo ula ni kuwuŵijilila mu nguwo jeswela ja bafuta ni kuja kukuwusika mwilembe liŵatesile kusepa pa lwala. Mwelemo ŵaliji mkanaŵicemo malilo citandilile. 54Lyaliji lisiku lya msano nipo lisiku lyakupumula* lya Ayuda lyaliji lili lisigele panandi kutanda.

55Acakongwe ŵiŵayice pamo ni Yesu kutyocela ku Galileya ŵala ŵamkuyisye Yosefe kuti nombe nawo akalole lilembe ni mwele muŵawuwicile mtembo wa Yesu. 56Piŵamasile kuyiwona yosopeyo, ŵapite kumangwawo kukupanganya yakununjila nambo soni mawuta gambone.#Eks 20:10; Det 5:14

Pa lisiku lyakupumula lya Ayuda jemanjajo ŵapumwile mpela mugaŵecetelaga Malamusi.

Currently Selected:

Luk 23: YAWO

Highlight

Copy