Luk 9
9
Yesu akwatuma ŵakulijiganya likumi ni ŵaŵili
(Mat 10:5-15; Mak 6:7-13)
1Yesu* ŵaŵilasile ŵakulijiganya* ŵakwe likumi ni ŵaŵili ŵala pampepe ni ŵapele ulamusi ni macili gakopocesya misimu jakusakala* ni kuposya yilwele. 2Kaneko ŵatumile ŵakulijiganyawo kuti akalalicile ya Ucimwene wa Mlungu* ni kwaposya ŵandu ŵakulwala. 3Yesu ŵasalile jemanjajo kuti, “Mkajigala kandu kalikose pa ulendo. Mkajigala simbo, msaku, yakulya, mbiya atamose malaja gapadela.#Luk 10:4-11; Mase 13:51 4Ku nyumba jilijose kutakampoceleko, mkatame kweleko mpaka pa ndaŵi jitimtyoce mu msindawo. 5Naga ŵandu ngakuja kumpocela jemanja, mkakung'unde luwundu lwa ku sajo kwenu pa ndaŵi jitimkatyoceje mu msindamo, kuti ukaŵe umboni wakwasisya jemanjajo.”
6Ŵakulijiganya ŵala ŵatyosile ni ŵapite m'misi josope acilalicilaga Ngani Syambone* ni kwaposya ŵandu ŵane m'malo mosope.
Kusimonga kwa Helodi
(Mat 14:1-12; Mak 6:14-29)
7Helodi* jwakulamulila jwa ku upande wa Galileya piŵapikene ŵandu ali mkuŵeceta yiyatendekwe yila yamasisye lunda, ligongo ŵandu ŵane ŵatiji kuti Yohane* M'batisi ŵajimwice ku ŵawe.#Mat 16:14; Mak 8:28; Luk 9:19 8Ŵandu ŵane ŵaliji mkuŵeceta kuti, Eliya* awonecele soni, nambo ŵane ŵatiji ali jumo jwa ŵakulocesya ŵakala aŵele soni cijumi. 9Nambo Helodi ŵatite kuti, “Yohane namkatile mtwe, nambi jweleju nduni jungupikana yakusimonjesya yakweju?” Myoyo Helodi ŵaliji mkulinjilila kuti awonegane ni Yesu.
Yesu ŵalisisye ŵandu 5,000
(Mat 14:13-21; Mak 6:30-44; Yoh 6:1-14)
10Piŵawusile ŵandumetume ŵala, ŵamsalile Yesu yosope yiŵatesile jemanjajo. Kaneko Yesu ŵajigele jemanjajo ni ŵapite ku musi wine ŵakuŵilanjidwa kuti Betisaida kuŵatiji akatame jikape. 11Ŵandu ŵajinji piŵapikene yeleyi ŵamkuyisye jwalakwejo. Yesu ŵapocele wosopewo, ni ŵaŵecete nawo ya Ucimwene wa Mlungu ni kwaposya ŵandu wosope ŵiŵaliji mkulwala.
12Pilyatandaga kukapila lyuŵa, ŵakulijiganya likumi ni ŵaŵili ŵala ŵamsalile Yesu kuti, “Ŵasalile ŵanduŵa kuti ajawulanganeje ku misi jili pakuŵandika kuti akapate yakulya soni malo gagona ligongo akuno kwitinji.”
13Nambo Yesu ŵasalile jemanjajo kuti, “Jemanja mwape yakulya.”
Jemanjajo ŵajanjile kuti, “Tukwete mikate msano ni somba siŵilipe. Ana tujawule tukasumile ŵandu wosopeŵa yakulya?” 14Kweleko kwaliji kwana acalume ciŵandika 5,000. Myoyo Yesu ŵasalile ŵakulijiganya ŵakwe kuti, “Mwasalile ŵanduŵa kuti atame pasi m'makuga, likuga lililyose liŵe lya ŵandu makumi msano.”
15Ŵakulijiganya ŵala ŵasalile ŵandu ŵala kuti atame pasi. 16Kaneko Yesu ŵajigele mikate msano jila ni somba siŵili sila, ŵalolite kwinani ni ŵayipele upile, kaneko ŵagaŵenyegaŵenye mikate ni somba siŵili sila ni ŵapele ŵakulijiganya ŵakwe kuti ŵapeleganye ŵanduwo m'mawunjilimo. 17Ŵandu wosope ŵala ŵalile mpaka kwikuta. Ŵakulijiganya ŵa Yesu ŵalokotenye sigasiga ni ŵagumbesye ngalala likumi ni siŵili.
Yiŵaŵecete Petulo ya Yesu
(Mat 16:13-19; Mak 8:27-29)
18Lisiku line Yesu piŵaliji mkupopela pa malo gajikape, ŵakulijiganya ŵakwe ŵayice kuŵaliji jwalakwejo. Kaneko Yesu ŵawusisye jemanjajo kuti, “Ana ŵandu akusatiji une ŵani?”
19Jemanjajo ŵajanjile kuti, “Ŵane akusatiga ŵalakwe ali Yohane M'batisi, ŵane akusatiga ŵalakwe ali Eliya. Nambo ŵane soni akusati ŵalakwe ali jumo jwa ŵakulocesya ŵa kalakala ŵajimwice ku ŵawe.”#Mat 14:1-2; Mak 6:14-15; Luk 9:7-8
20Kaneko Yesu ŵawusisye soni kuti, “Nambi jemanja mkusati une ndili ŵani?”#Yoh 6:68-69
Petulo* ŵajanjile kuti, “Ŵalakwe ali Klistu* jwakutyocela kwa Mlungu.”
Yesu akuŵeceta ya kulaga ni ciwa cakwe
(Mat 16:20-28; Mak 8:30—9:1)
21Kaneko Yesu ŵalamwile ŵakulijiganya ŵakwe kuti akamsalila mundu jwalijose ya nganiji. 22Ŵasalile ŵakulijiganyawo kuti, “Mwanace jwa Mundu* akwenela kulaga mnope ni kukanidwa ni acakulungwa ŵa ŵakutaga mbopesi ni aciŵalimu ŵa Malamusi* ga Ciyuda giŵalembile Mose.* Jwalakwejo taciwulajidwa nambo pa lisiku lyatatu tacijimuka ku ŵawe.”
23Kaneko Yesu ŵasalile ŵandu wosope ŵala kuti, “Naga mundu jwalijose akusaka kuŵa jwakunguya une akwenela kuleka yiwukusaka mtima wakwe, nipo anyakuleje msalaba wakwe lisiku ni lisiku ni kunguya.#Mat 10:38; Luk 14:27 24Naga mundu jwalijose akusaka kuwukulupusya umi wakwe, taciwujasa, nambo jwalijose jwakwasa umi wakwe ligongo lya une taciwukulupusya.#Mat 10:39; Luk 17:33; Yoh 12:25 25Ana mundu tapindule cici naga akwete yindu yosope ya pa cilambo capasi pano, nambo pambesi pakwe ni kwasa umi wakwe? 26Naga mundu akutenda soni ligongo lya une ni kulalicila maloŵe gangu, nombe uneji Mwanace jwa Mundu tinjimtendela soni jwalakwejo pa ndaŵi jitaciyika mundujo mlumbili lwakwe ni mlumbili lwa Atati ŵakwinani pampepe ni acimalayika ŵaswela. 27Nambo kusyene ngumsalicisya jemanja kuti apali ŵandu ŵane panopano ŵele ngasawa mkinawuwone Ucimwene wa Mlungu.”
Ya ugalawuce wa uwonece wa ngope ja Yesu petumbi
(Mat 17:1-8; Mak 9:2-8)
28Pigamasile masiku msano ni gatatu ciŵecetele Yesu gele maloŵega, jwalakwejo ŵakwesile litumbi kukupopela pamo ni Petulo, Yakobo* ni Yohane.#2 Pet 1:17-18 29Pandaŵi jiŵaliji mkupopela, uwonece wa ngope ja Yesu wasindile, ni yakuwala yakwe yawonekaga mwakunyesima mnope pa jele ndaŵiji. 30Mwacisisimucisya, ŵakulocesya ŵaŵili Mose ni Eliya ŵaliji piŵaliji Yesupo nipo ŵaliji mkuŵecetana ni jwalakwejo. Jemanjajo ŵaliji Mose ni Eliya, 31uŵalilosisye mu lumbili, nipo ŵaliji mkuŵecetana ni Yesu kwambaga ya ciwa cakwe ciŵatiji akawile ku Yelusalemu. 32Petulo pampepe ni acimjakwe ŵaŵaliji nawo ŵala ŵaliji mkugwesela. Nambo piŵajimwice ŵam'weni Yesu mu lumbili lwakwe nambo soni acalume ŵaŵili ŵiŵajimi pamo ni jwalakwejo. 33Pandaŵi jele Mose ni Eliya jiŵalekanganaga ni Yesu, Petulo ŵamsalile Yesu kuti, “Cemwalimu, yili cenene kuti uweji tuli nawo apano. Atukunde tutaŵe yisakasa yitatu, cimo ca ŵalakwe, cimo ca Mose, ni cine ca Eliya.” Nambo Petulowo nganamanyilila kose gopolela kwa maloŵe giŵaŵecetego.
34Petulo piŵaliji mkuŵeceta gele maloŵega, lyayice liwunde lyawunicile jemanjajo wosope, nipo ŵakulijiganyawo ŵakamwilwe ni woga. 35Mwiwundemo mwapikanice maloŵe gakuti, “Aju ni mwanangu junimsagwile, mumpikanileje.”#Yes 42:1; Mat 3:17; 12:18; Mak 1:11; Luk 3:22
36Gali gapikanice maloŵego, ŵakulijiganya ŵala ŵaweni kuti Yesu ali jikape. Myoyo jemanjajo ŵatemi jii ngamsalila mundu jwalijose yiyatendekweyo.
Yesu akumposya mcanda juŵakamwilwe ni msimu wakusakala
(Mat 17:14-18; Mak 9:14-27)
37Kundaŵi kwakwe Yesu ni ŵakulijiganya ŵakwe ŵatatu ŵala ŵatulwice kutyocela mwitumbi mula nipo ŵandu ŵajinji ŵayice kuti asimane najo jwalakwejo. 38Mundu jwine sikati ja ŵanduwo ŵaŵecete mwakwesya maloŵe acitiji kuti, “Cemwalimu, ngwaŵenda kuti amlole mwanangu jwali jumo peju. 39Jwalakweju akwete msimu wakusakala, naga umkamwile, jwalakweju akusatanda kugumila mwakusisimucisya. Sambano naga uli umgalagatisye mnope, mwanacejo akusagamba kopoka ciwulo kukamwa, soni msimu wakusakalawo wangamleka jwalakwejo mpaka uli umpwetece. 40Naŵendile ŵakulijiganya ŵawo kuti awukoposye msimu wakusakalawo mwa mwanaceju, nambo alepele.”
41Yesu ŵajanjile kuti, “Aa! Ŵandu ŵa mpago awuno ŵangali cikulupi soni ŵangalondeka nganisyo. Ana tindame namwe ni kumpilila jemanja mpaka cakaci?” Papopo ni ŵamsalile mundu jula kuti, “Myice najo akuno mwanacejo.”
42Piŵaliji mkwisa najo mwanacejo msimu wakusakalawo wamgwisisye pasi ni kumgalagatisya mwamacili. Yesu ŵawulamwile msimu wakusakalawo kuti umlece mwanacejo. Yesu piŵamposisye mwanacejo ŵampelece kwa babagwe. 43Ŵandu wosope ŵiŵaliji pelepo ŵasimonjile nago macili ga Mlungu.
Yesu ŵaŵecete soni ya ciwa cakwe
(Mat 17:22-23; Mak 9:30-32)
Ŵandu wosope ŵala piŵaliji mkusimongape pa yindu yosope yiŵatesile Yesu, Jwalakwe ŵasalile ŵakulijiganya ŵakwe kuti, 44“Mgapikanicisye cenene maloŵe ganguga: Mwanace jwa Mundu tacipelecedwa myala mwa ŵandu.” 45Nambo ŵakulijiganyawo nganapikanicisya gopolela kwa maloŵe giŵaŵecete Yesu. Maloŵega galiji gakusisika kwa jemanjajo mwakuti nganapikanicisya. Myoyo jemanjajo ŵajogopaga kumwusya jwalakwejo ya yeleyi.
Jwamkulungwa nduni?
(Mat 18:1-5; Mak 9:33-37)
46Ŵakulijiganya ŵatandite kusisyana kuti, “Ana ŵani ŵali ŵakulungwa pasikati petu?”#Luk 22:24 47Nambo Yesu ŵamanyilile yiŵaganisyaga jemanjajo m'mitima mwawo. Myoyo Yesu ŵamjigele mwanace ni kumjimika pambali pakwe. 48Kaneko ŵasalile ŵakulijiganya ŵakwe ŵala kuti, “Jwalijose jwakumpocela cenene mwanaceju ligongo lyakuti jwalakwejo ali jwakunguya une ni kuti akumbocela une. Jwakumbocela une cenene ni kuti soni akwapocela Atati ŵiŵandumile une. Pakuti jwali jwamnondi pasikati penu jwalakwejo ali jwamkulungwa.”#Mat 10:40; Luk 10:16; Yoh 13:20
Jwangakusisyana ni jemanja ali jwakukamusyana namwe
(Mak 9:38-40)
49Yohane ŵatite, “Cemwalimu, twam'weni mundu jwine ali mkukoposya misimu jakusakala pakukolanga lina lya ŵalakwe. Uwe twamlekasisye ligongo jwalakwejo nganaŵa jwakwakuya ŵalakwe mpela mutukusatendela uwe.”
50Nambo Yesu ŵamsalile Yohane kuti, “Mkasimumlekasya ligongo jwangakusisyana ni jemanja, jwelejo ali jwakukamusyana namwe.”
Ŵandu ŵa m'musi wa ku Samaliya ŵakanile kumpocela Yesu
51Masiku pigaŵandicilaga gakuti Yesu ajigalidwe kwawula kwinani, jwalakwejo ŵaganisisye yakuti ajawule ku msinda wa Yelusalemu. 52Ŵatumile ŵa mitenga kuti alongolele, akajinjile m'musi wine wa ŵandu ŵa ku Samaliya kuti akamkolocesye jwalakwejo malo gagona. 53Nambo ŵandu kweleko nganasaka kumpocela, ligongo jwalakwejo ŵaliji pa ulendo wa ku Yelusalemu. 54Piŵayiweni yeleyi ŵakulijiganya ŵakwe ŵaŵili ŵala Yakobo ni Yohane ŵatite, “Ambuje, ana akusaka kuti tuŵilasye moto kutyocela kwinani kuti watinisye ŵanduŵa?”#2 Ayi 1:9-16
55Nambo Yesu ŵagalawucile jemanjajo ni kwajamuka. 56Kaneko wosopewo ŵajile ku musi wine.
Ya kumkuya Yesu
(Mat 8:19-22)
57Jemanjajo piŵaliji mkwenda mwitala mundu jwine ŵamsalile Yesu kuti, “Cemwalimu, tinakuye kulikose kutajawuleje.”
58Yesu ŵatite, “Makule gakwete mbanga syakwe, soni yijuni yikwete yisusi yakwe, nambo Mwanace jwa Mundu nganakola palipose pakuti agone ni kupumula.”
59Kaneko Yesu ŵamsalile mundu jwine kuti, “Munguye.”
Mundujo jwatite, “Ambuje, ambe lipesa kuti njawule kumusi ngasice malilo ga baba ŵangu.”
60Yesu ŵajanjile kuti, “Mwaleceni ŵawe asiceje ŵawe acimjawo. Nambo m'mwejo mkalalicile ya Ucimwene wa Mlungu.”
61Mundu jwine soni ŵamsalile Yesu kuti, “Tinamkuye Ambuje, nambo pandanda angunde ngalanje ŵandu ku nyumba.”#1 Ayi 19:20
62Yesu ŵatite, “Mundu jwatandite kulima aku ali mkulola munyuma jwalakwejo ngakuŵajilwa mu Ucimwene wa Mlungu.”
Currently Selected:
Luk 9: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
