Ageini 20

Aburaam kede Abimelek

1Aburaam oko yai ki Mamure di eko ot tetu Negeb eko donyo bedo i dierediere me Kades kede Sur. Di bin en etie bedo Gerar bala ngakumbor, 2#Ageini 12.13; 26.7Aburaam oko waco ne jo kop i kom dako mere Sara be, “En ebedo amina.” Di do Abaka Abimelek me Gerar oko cwano jo pi omo Sara kelo ne. 3Do i dier iwor Rubanga oko bino but Abimelek i lek di eko waco ne be, “Neningo, in itieko giri to, pien dako kame in itero no cware tie.”

4Akadi bed kamanono da, Abimelek oudo pwodi likame oribere kede Sara, omio en eko waco be, “Rwot, benyo, ibino muducaro kiton jo kalikame tie kede raco moro da? 5Mam en kame ewaco na be, ‘En ebedo amina’? Doko eda kikome eko waco be, ‘En ebedo omina.’ Ango atimo gini kede ngec me cuny aber doko cinga li kede raco moro.”

6Di Rubanga oko waco ne i lek be, “Ebo, ango angeo be in itimo gi noni kede ngec me cuny aber. Medo i wi manono, ango en kame agengi timo dub buta, en komio in likame iko mule. 7Nan do dwok dako no but cware. En ebedo enabi, doko en ebino lego piri di in iko bedo kuo. Do ka in likame iko dwoke ne cware, mito in ingei be ateteni in ibino to, in karacel kede jo ni dedede.”

8Manono oko mino Abimelek odilo yai odiko sek di eko lwongo jotic mege dedede eko waco negi kope nogi dedede. Lworo atek oko mako gi. 9Di do Abimelek oko lwongo Aburaam di eko waco ne be, “Nyo ine kame in itimo ne wan? Rac nyo kame ango atimo ni en komio in ikelo dub kame dwong rom kano i wia karacel kede ajakanut na? In itieko timo nango gi kalikame kopoore timo.” 10Di Abimelek oko penyo Aburaam be, “Nyo kame oudo tie i tam ni en komio in iko timo gini?”

11Aburaam oko gamo be, “Ango atimo kamano pien oudo aparo be likame tie ngatamoro kan akadi acel kame lworo Rubanga, doko kibino neka pi dako na. 12Medo i wi manono, en ateteni ebedo amina; ango kede en papa wa acel, do toti wa papat, doko en eko doko dako na. 13Aso, i kare kame bin Rubanga omia ayai kede tenge ki ot ka papa na, ango ako waco ne be, ‘Bero kame miero in inyut nango en ine: kabedo dedede kame wan obino tuno iye, in miero iwac ne jo be ango abedo omini.’ ”

14Abimelek di oko tero romini kede doke, jotic amon kede acuo eko mino Aburaam, di eko dwoko ne Aburaam dako mere Sara. 15Abimelek di oko waco be, “Neningo, lobo nango ine lung, bed karamoro kenekene kame wangi opwoyo.” 16Di eko waco ne Sara da be, “Neningo ango atie mino omini siliba tutumia acel pi nyuto ne jo dedede be in ili kede raco moro. Manono bino konyi pi mino jo ngeno be in likame itimo gimoro arac.”

17Di do Aburaam oko kwano Rubanga di Rubanga oko cango Abimelek kede dako mere, karacel kede apasoi mege, di do kiko donyo nywalo idwe; 18pien Rwot oudo ocego nywal ne mon dedede me i ot ka Abimelek pi Sara dako ka Aburaam.

Currently Selected:

Ageini 20: BILK13

Highlight

Copy