Yokana 10
10
Agole me Ngakwai Romini
1“Ateteni, ateteni awaco ne wu be, ngat kalikame donyo i anok me romini di ebeo ki erute, do eko lokere yito i kakame pat, ngat nono udo obedo ngakuwo, doko en ngayak. 2Do ngat kame donyo di ebeo ki erute, udo en ngakwai romini; 3ngadar erute yabo ne erute, doko romini winyo dwane. En elwongo romini mege kede nying gi, di eko telo gi wok ooko. 4Ka etieko woto romini mege dedede ooko, en eoto i nyim gi, di romini ko lube, pien gin kingeo dwane. 5Ka ngat apat, gin likame kiyei lubo, do kiringo tenge kibute, pien likame gin kingeo dwan jo apat.”
6Yesu oyamo ne gi agole noni, do gin likame kiko niang gikame en oudo etie waco ne gi.
Yesu en Ngakwat Aber
7Yesu bobo oko waco ne gi be, “Ateteni, ateteni awaco ne wu be, ango en erute kame romini donyo kiye. 8Jo dedede kame bin ogeo bino nango oudo obedo jokuwo kede joyak; do romini likame oko winyo dwan gi. 9Ango en erute, ka ngatamoro odonyo ki buta ebino udo alako, doko ebino donyo kede wok ooko, di eko udo lum kolot. 10Ngakuwo bino kenekene pi kwalo, neko kede pi dudubo. Do ango abino tetekeny jo ud kuo, kuo kopong.
11“Ango ngakwat aber, ngakwat aber yei rwenyo kuo mere pi romini mege. 12Do dano kame kopango apanga, kalikame obedo ngakwat kikome, kalikame obedo won romini, ka oneno ipeon di tie bino, en eweko romini di eko ringo tenge; ipeon ko mako romini, di romini apat ko sarakin. 13En eringo piento en dano kame kopango apanga, doko likame eparo pi romini. 14Ango en ngakwat aber; ango angeo romini na, doko romini na da ngea, 15bala kite kame Papa ngea kede, doko ada angeo Papa. Ango ayei rwenyo kuo na pi romini. 16Doko atie kede romini ace kame li ki anok noni; miero akel gida, di gin kiko bino winyo dwana. Gin kiko bino bedo romini me anok acel kame tie kede ngakwat acel.
17“Pi mano, Papa mara pien ango ayei rwenyo kuo na, di bobo ako bino ude. 18Likame tie ngat kame bino kwanyo kuo nango, do ango abino mino kuo na i mit na. Ango atie kede twer me yei rwenyo kuo na kede me ude; Papa na en kame omia cik noni.”
19Kope nogi bobo oko mino tam me Iyudayan opokere. 20Jo atot kikom gi owaco be, “Lono tie kede jwogi, doko epoi da; pinyo komio iwinyunu kop mere?”
21Apat mege oko waco be, “Mage likame kope me dano kame tie kede jwogi. Jwogi twero yabo wang emuduk benyo?”
Iyudayan Odagi Yesu
22Oudo manono obedo kare me ebaga me kwero ceng kame komio kede tempulo but Rubanga i Yerusalem; kare me ngico oudo inonono. 23Yesu oudo tie ot ki balasa ka Sulumani kame oudo tie i tempulo. 24Iyudayan oko cokere oluke di kiko waco ne be, “Ibino mino tam wa bedo abongo kacungo pi kare arom amene? Ka in en kame Kirisito, wac ne wa kakaler.”
25Yesu oko dwoko ne gi be, “Ango atieko waco ne wu, do wun ikounu dagi yei. Tice kame ango atimo i nying Papa na jura, 26do wun likame iyeunu pien likame wun itienu i kom romini na. 27Romini na winyo dwana, ango da angeo gi, doko gida kiluba. 28Ango atieko mino gi kuo kame bedo nakanaka, doko likame kibino to. Likame tie ngat kame bino waraso gi ki cinga. 29Papa na ngat kame omio gi buta pire dwong kalamo jo dedede, doko likame tie ngat kame sobolo waraso gi ki cing Papa. 30Ango kede Papa otie acel.”
31Iyudayan bobo oko kwanyo kide pi mito didipo en kede. 32Yesu oko waco ne gi be, “Ango atieko nyuto ne wu tice atot adongodongo kame owok kibut Papa; mene kikom gi en kame imitunu didipo ango pire?”
33 #
Jolebi 24.16
Iyudayan oko dwoko ne be, “Likame wan omito didipo in pi tic aber, do pi acae; pien in dano adana imito be idok Rubanga.”
34 #
Sabuli 82.6
Yesu oko dwoko ne gi be, “Mam kowandiko i Iswil wu be Rubanga owaco be, ‘Wun ibedunu rubangan?’ 35Do ka Rubanga olwongo jo kame bin komio kop mere be rubangan (doko di iwandik kacil likame kotwero turo), 36benyo, itwerunu waco ne ngat kame Rubanga opoko tenge di eko ooro i piny be, ‘In itie cano Rubanga,’ be pien ango awaco be, ‘Ango Wot ka Rubanga?’ 37Ka likame atie timo tice ka Papa na, kur do iyeunu ango. 38Do ka atimo gi, akadi bed bala idagunu yei ango, yeunu do tice nogo, tetekeny ingeunu di ikounu niang be Papa tie i ango, doko ada atie i en.”
39Gin bobo kiko mono mako Yesu, do en eko lwi ne gi.
40 #
Yokana 1.28
Yesu oko bobo ngolo nam me Yorodan tuno kakame bin Yokana ogeo batiso kiye jo, di eko dong bedo kuno. 41Jo atot oko ot bute di kiko waco ne be, “Yokana bin likame otimo gianena moro, do kope dedede kame Yokana owaco i kom icuo ni tie gi me ateni.” 42Jo atot kame oudo tie kuno oko yei en.
Currently Selected:
Yokana 10: BILK13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.
