Yokana 9

Yesu Ocango Icuo kame Konywalo di Wange Oto

1Kakame Yesu oudo tie ot kede, en eko neno icuo kame wange oudo oto cako nywale. 2Josiao mege oko penye be, “Apwony, ngai en kame oudo odubo komio oko nywalo icuo ni di wange oto, en noni arabo jonywal mege?”

3Yesu oko dwoko be, “Likame pien icuo ni arabo jonywal mege oudo odubo, do etimere kaman tetekeny tice ka Rubanga nyutere i kome. 4Wan miero otimunu tice me ngat oora di pwodi ceng tie, iwor bino tuno di ngatamoro likame ko twero tic. 5#Matayo 5.14; Yokana 8.12Kame ango pwodi atie i piny, udo ango abedo lero me piny.”

6Kakame etieko waco kede kop no, en eko ngulo lau piny eko nyongo kede lobo, di eko puco i wang icuo nono, 7di eko waco ne be, “Oti ilwok wangi i atapar me Siloam” (kame dwong mere be Kocwao). En eko ot di eko lwoko wange iye, eko dwogo di eneno piny.

8Jokio kede jo apat kame oudo onene lem sek bala ngakwac oko waco be, “Mam icuo kame lem nare bedo di ekware ine?”

9Jo mogo oko waco be, “En inononi;” mogo oko waco be, “Likame en, do kical acala.” Icuo nono oko waco be, “Ango kom inononi.”

10Gin kiko penye be, “Wangi do ber oko yabere benyo?”

11En eko dwoko be, “Icuo kame kolwongo be Yesu en okwanyo lobo eko puco i wanga, di eko waco na be aoti alwok wanga i Siloam. Di do ango da ako ot lwoke, di ako cako neno piny.”

12Gin kiko penye be, “En etie tuai?”

En eko waco be, “Ango likame angeo.”

Iparisayon Ongingico epone kame Kocango kede Emuduk

13Gin kiko tero icuo kame wange oudo oto nono but Iparisayon. 14Yesu oudo onyongo lobo di eko cango kede wang icuo nono i Ceng Sabato. 15Iparisayon bobo oko penye epone kame wange oyabere kede. En eko waco ne gi be, “En eketo lobo kame konyongo i wanga, ako lwoke di ako cako neno piny.”

16Iparisayon mogo oko waco be, “Icuo ni likame owok kibut Rubanga, pien likame eworo Iswil me Sabato.” Do jo mogo oko waco be, “Ngat kame tie ngadubo karuno timo epone me gianena gi benyo benyo?” Tam gi oko popokun.

17Aso, gin bobo kiko penyo icuo kame wange oudo oto nono be, “Bala kite kame etieko yabo kede wangi, kop nyo kame in iromo do nan yamo i kome?”

En eko waco be, “En ebedo enabi.”

18Iyudayan oudo likame yei be wang icuo nono oudo oto lem sek di nan do oko yabe. Tuno kede gin kiko lwongo jonywal me icuo kame wange oudo oto nono, 19kiko penyo gi be, “Mam wod wu ine kame wun iwacunu be oudo konywalo di wange oto? Nan egeo do neno piny benyo?”

20Jonywal mege oko waco be, “Wan ongeo be wod wa ine, doko da be, oudo konywale di wange oto; 21do kite kame nan egeo neno kede piny wan likame ongeo, akadi ngat koyabo wange da wan girwa okwia. Wun penyenu, eda do etieko doko dwong, ebino yamo pire kene.” 22Jonywal mege owaco kaman pien oudo kilworo Iyudayan; pien Iyudayan oudo otieko yei be ka ngatamoro otuco be Yesu en Kirisito, kobino riame ooko ki sinagoga. 23Pi mano, jonywal mege oko waco be, “En etieko doko dwong, penyenu.”

24Gin kiko lwongo icuo kame oudo bin wange oto nono tien me are, di kiko waco ne be, “Yam kop me ateni i nyim Rubanga, wan ongeo be icuo no obedo ngadubo.”

25En eko dwoko be, “Ango akwia ka en ngadubo; do gi acel kame ango angeo en ine be, bed bala wangango oudo oto, do nan do ango aneno piny.”

26Gin kiko waco ne be, “Nyo kame en etimo ni? Eyabo wangi benyo?”

27En eko dwoko ne gi be, “Ango atieko waco ne wu kop, do ikounu dagi winyo. Pinyo komio imitunu bobo winyo kop nono tien ace? Wuda imitunu lokere doko josiao mege?”

28Gin kiko bunano en di kiwaco ne be, “In en ibedo ngasiao mere, do wan obedo josiao ka Musa. 29Wan ongeo be Rubanga bin oyamo kede Musa, do likame wan ongeo kakame dano no owok kiye.”

30Loca oko dwoko be, “Pinyo, man tie gi me aura! Likame ingeunu kakame ewok kiye, do di en kame eyabo wanga! 31Wan ongeo be Rubanga likame winyo jodubo, do ka ngatamoro woro Rubanga, doko di etimo gikame Rubanga mito, Rubanga winye. 32Cako cweno piny likame lem pwodi owinyere be ngatamoro oyabo wang ngat kame konywalo di wange oto. 33Koto oudo dano ni likame owok kibut Rubanga, koto likame etwero timo gimoro.”

34Gin kiko dwoko ne be, “Kom ida ngat kame konywali i dub atwal atwala en kame itie pwonyo wan?” Kiko riame tenge ki sinagoga.

To Wang me Cuny

35Yesu oko winyo be Iyudayan oriamo icuo nono ooko ki sinagoga. Kakame Yesu oriamo kede, eko penye be, “In iyei Wot ka dano?”

36En eko dwoko be, “Adwong, waca ngat nono tetekeny ada ayei en.”

37Yesu oko waco ne be, “In itieko nene, doko en inononi kame nan etie yamo kedi.”

38En eko waco be, “Rwot, ayei do;” di eko mine wor.

39Yesu oko waco be, “Ango abino i piny, me wek jo kalikame neno kineni, kede be, jo kame neno wek wang gi toi.”

40Iparisayon mogo kame oudo tie i ngete owinyo kop noni di kiko penye be, “Wada nan mam wang wa oto?”

41Yesu oko waco ne gi be, “Koto oudo wangu oto, koto iliunu kede dub; do kite kame nan iyamunu kede be, ‘Wan oneno piny,’ dwong mere be raco wu pwodi odong i komu.”

Currently Selected:

Yokana 9: BILK13

Highlight

Copy