Yokana 6

Yesu Opito Jo Tutumia Kany

(Matayo 14.13-21; Marako 6.30-44; Luka 9.10-17)

1Ingei man, Yesu oko ngolo loka tetuca me nam me Galilaya, kame kolwongo da be nam me Tiberia. 2Ekodet adwong me jo oko lube, pien oudo gin kineno gianena kame en etimo ne jo kame oudo tuwo. 3Yesu oko yito malo i wi moru, en eko bedo piny kuno kede josiao mege. 4Ebaga me Kalamo, kame obedo ebaga me Iyudayan, oudo onoko. 5Kakame Yesu otingo kede wange malo, en eko neno ekodet me jo di kitie bino bute, di eko waco ne Pilipo be, “Obino wilo mugati kituai, tetekeny omi jogi cami?” 6En ewaco man pi tamo Pilipo, pien Yesu kikome oudo ngeo gikame en ebino timo.

7Pilipo oko dwoko ne be, “Denari tol are likame twero wilo mugati kame romo gi di ngat acelacel kikom gi ko twero udo atitidi moro.”

8Ngat acel kikom josiao mege kame nyinge Anderia, omin me Simoni Petero, oko waco ne Yesu be, 9“Awobi tie kan kame tie kede mugati kany kede deknam are; do mago kenekene timo ne twon jogi nyo?”

10Yesu oko waco be, “Miunu jo bed piny.” Oudo lum tot kanono; di jo kame wel gi romo cuo tutumia kany oko bedo piny. 11Yesu oko kwanyo mugati; kakame etieko mino kede pwoc, en eko popoko gi ne jo kame oudo obedo piny. En eko timo kamanono da kede deknam, gin dedede kiko udo gikame romo gi. 12Kakame kitieko do yeng kede, Yesu oko waco ne josiao mege be, “Cokunu angidingidin kame odong tetekeny kur gimoro dubere aduba.” 13Gin kiko coko angidingidin me mugati kany me mawele, kame jo bin ocamo oko weko, di oko pongo ibukito tomon kiwie are.

14Kakame jo oneno kede gianena kame Yesu otimo, gin kiko waco be, “Ateteni man en enabi kame oudo poore bino i piny!” 15Di Yesu ongeo be oudo kiyapuno bino make tetek pi mine doko abaka, en bobo eko yai eoto tenge i moru en kene.

Yesu Ooto ki wi Pii kede Tiene

(Matayo 14.22-33; Marako 6.45-52)

16Di bin piny oyuto, josiao mege oko ot i nam, 17kiko donyo i yi yee di kiko ngolo nam pi ot loka Kaperanaum. Piny oudo odoko col, do Yesu oudo pwodi likame obino but gi. 18Yamo atek oudo tie buko, oko mino nam otingere. 19Kakame kitieko kwang kede pi mairo kame romo bala adek arabo ongwon, gin kiko neno Yesu di etie ot ki wi pii kede tiene, di oudo etie nyiko doko iyapiyapi kede yee. Lworo atek oko mako gi, 20do Yesu oko waco ne gi be, “Ango inononi, kur lworo maku.” 21Cuny gi oko bedo yom pi mine donyo i yi yee. Cucuto yee oko tuno ooko kakame oudo kitie ot iye.

Jo Omoo Yesu

22Oru mere, jo kame oudo odong loka tetuca oko niang be yee oudo tie kuno acel kenekene; doko da be Yesu oudo likame odonyo iye kede josiao mege, do be josiao mege oudo ooto tenge gin ken gi. 23Bed bala kamanono da, yede kame bin owok ki Tiberia oko bino tuno i nget kakame oudo gin kicamo kiye mugati ingei Rwot mino pwoc. 24Kakame do jo oneno kede be Yesu oudo li ki kuno, akadi kiton josiao mege da, gida kiko donyo i yi yede kiko ot Kaperanaum di kimoo Yesu.

Yesu en Mugati me Kuo

25Kakame kiudo kede Yesu loka tetuca me nam, kiko waco ne be, “Apwony, in ibino kan awene?”

26Yesu oko dwoko ne gi be, “Ateteni, ateteni awaco ne wu be, wun likame itienu mona pien inenunu gianena, do pien icamunu mugati ikounu yeng. 27Kur icanenu pi cam kame dubere, do canenu pi cam kame kanyakino tuno i kuo kame bedo nakanaka, kame Wot ka dano bino mino wu, pien Rubanga Papa otieko keto alama mere i kome.”

28Gin kiko penye be, “Otim nyo, en kame mio udo otie timo tic ka Rubanga?”

29Yesu oko dwoko ne gi be, “Tic ka Rubanga en ine be, wun miero iyeunu ngat kame en eoro.”

30Aso gin kiko waco ne Yesu be, “Gianena nyo kame ikaruno timo, me wek wan onen di oko yei in? Ibino timo nyo? 31#Yai 16.4, 15; Sabuli 78.24Joakwari wa bin ocamo emana i tim; bala kite kame bin kowandiko kede be, ‘Emio gi mugati kowok ki malo pi camo.’ ”

32Yesu di do oko waco ne gi be, “Ateteni, ateteni awaco ne wu be, likame Musa en kame bin omio wu mugati kame owok ki malo; Papa na en kame bin omio wu mugati me ateni kame owok ki malo. 33Pien mugati ka Rubanga en maca kame wok ki malo di eko mino kuo i piny.”

34Gin kiko waco ne be, “Rwot, dony mino wa do mugati nono nakanaka.”

35Yesu oko waco ne gi be, “Ango en mugati me kuo; ngat kame bino buta kec likame bino neke, doko ngat kame yei ango orio likame bino neke. 36Do ango atieko waco ne wu be wun itiekunu nena, do pwodi likame iyeunu. 37Jo dedede kame Papa mia oyaro bino buta; doko ngat kame bino buta, likame abino riame tenge. 38Pien ango abino ki malo, likame pi timo gikame ango amito, do pi timo gikame ngat kame oora mito. 39Gikame ngat oora mito en ine be, likame apoore rwenyo ngatamoro kikom jo dedede kame en emia, do miero ayaruno gi i ceng me ajikini. 40Pien gikame Papa na mito en ine be, ngat acelacel kame neno Wod di ko yei en poore udo kuo kame bedo nakanaka; doko ango ako bino yaruno en i ceng me ajikini.”

41Iyudayan oko cako ngunguro i kom Yesu pien oudo ewaco be, “Ango en mugati kame obino piny yai ki malo.” 42Gin kiko waco be, “Mam icuo noni en Yesu wot ka Yosepu? Wan ongeo papa mere kede toto mere da. Benyo benyo doko komio en nan ewaco be, ‘Ango ayai ki malo abino piny?’ ”

43Yesu oko dwoko ne gi be, “Kur ingungurunu kenu kenu. 44Likame tie ngatamoro kame twero bino buta kwanyo kenekene ka Papa ngat kame oora en okele; doko abino yaruno en i ceng me ajikini. 45#Isaya 54.13Kowandiko i itabu me inabin be, ‘Doko Rubanga bino pwonyo gin dedede.’ Ngat acelacel kame winyo kop ka Papa na di eko udo pwonyere kibute, en ebino udo alako. 46Likame dwong mere be tie ngatamoro kotieko neno Papa, do kwanyo ngat kowok kibut Rubanga en kame otieko neno Papa. 47Ateteni, ateteni awaco ne wu be, ngat kame yei tie kede kuo kame bedo nakanaka. 48Ango en mugati me kuo. 49Joakwari wu bin ocamo emana i tim do kiko to. 50Man en mugati kowok ki malo, tetekeny dano came di likame eko to. 51Ango en mugati me kuo kame owok ki malo; ngat kame camo mugati noni bino kuo ikar kede ikar. Mugati kame ango abino mino pi kuo me piny en ringokoma.”

52Iyudayan oko donyo piem ken gi ken gi be, “Icuo ni karuno mino wan ocamo ringokome benyo benyo?”

53Yesu oko waco ne gi be, “Ateteni, ateteni awaco ne wu be, ka likame icamo ringokom Wot ka dano kede imato remo mere, likame ibino bedo kuo. 54Ngat kame camo ringokoma kede kame mato remo na, en etie kede kuo kame bedo nakanaka, doko abino yaruno en i ceng me ajikini, 55pien ringokoma en cam me ateni, doko remo na da en giamata me ateni. 56Ngat kame camo ringokoma kede mato remo na bedo i ango doko ada abedo i en. 57Bala kame Papa kakuo oora kede, doko di ango akuo pi Papa, kamanono da ngat kame camo ringokoma bino bedo kuo pi ango. 58Man en mugati kame bin owok piny ki malo, likame bala maca kame bin joakwari ocamo di kiko to; ngat kame camo mugati noni bino kuo ikar kede ikar.”

59Yesu owaco kope nogi di oudo etie pwony i sinagoga i Kaperanaum.

Kope me Kuo kame Bedo Nakanaka

60Kakame josiao ka Yesu atot owinyo kede kop mere, gin kiko waco be, “Man kop atek; ngai kame karuno yei lube?”

61Do Yesu oko ngeno i cunye kene be josiao mege oudo tie ngunguro pi gikame en ewaco, omio en eko penyo gi be, “Mam kop noni owango cunyu? 62Do benyo ka koto oudo inenunu Wot ka dano di etie ot malo kakame oudo bin egeo bedo iye sek? 63Tipo ka Rubanga en kame mio kuo, do kom dano likame tie kede kony moro; kope kame ango atieko waco ne wu tie Tipo ka Rubanga kede kuo da. 64Do tie jo mogo ki komu kalikame yei.” Pien Yesu oudo ngeo cako ki agege jo kalikame yei kede da ngat kame oudo oyaro rupao en. 65En eko waco be, “Gini en komio ango awaco ne wu be, likame tie ngatamoro kame sobolo bino buta, kwanyo di Papa na en oyei ne.”

66Ingei man, jo atot kikom jo kame bin oudo lubo Yesu oko dok cen, likame bobo kiko meede upere kede. 67Yesu oko penyo josiao mege tomon kiwie are be, “Wuda nan do imitunu weko luba?”

68 # Matayo 16.16; Marako 8.29; Luka 9.20 Simoni Petero oko dwoko ne be, “Rwot, wan bobo otwero ot but ngai? In en kame itie kede kope kame mio kuo kame bedo nakanaka; 69doko wan otieko yei di oko ngeno da be in en Ngat Kacil ka Rubanga.”

70Yesu oko dwoko ne gi be, “Mam ango en kame ayero wu, wun jo tomon kiwie are? Do di ngat acel kikom wu obedo Sitani.”

71Yesu oudo tie waco kop i kom Yuda wot ka Simoni Isikariot, pien bed bala en oudo ebedo ngat acel kikom josiao tomon kiwie are, en oudo eyaro rupao Yesu.

Currently Selected:

Yokana 6: BILK13

Highlight

Copy