Yokana 7

Yesu kede Imiegu mege

1Ingei man, Yesu oko ririmo Galilaya, likame oudo ekaruno ririmo Yudea pien Iyudayan oudo mito neke. 2#Jolebi 23.34; Iswilia 16.13Kare me ebaga me kimere#7.2 Ebaga me kimere en ebaga kame oudo Iyudayan camo pi yutuno kare kame oudo kibedo kede i kimere di kitie i tim. oudo iyapiyapi. 3Di do imiegu mege oko waco ne be, “Yai ki kan ioti i Yudea, tetekeny jo kame lubi nen tice kame itie timo. 4Pien likame tie dano kame timo tice mege i mung ka emito be engere kakaler. Ka itie timo gigi, nyutere wek piny lung ngei.” 5Pien akadi imiegu ka Yesu da oudo likame oyei en.

6Yesu oko waco ne gi be, “Kare nango pwodi likame otuno, do wun itienu kede kare nakanaka. 7Jo me piny likame sobolo dagi wun, do kidagi ango pien ango abedo waco ne gi be tice gi reco. 8Wun otunu i ebaga; ango likame ayaro ot i ebaga no, pien kare na pwodi likame otuno.” 9Ewaco kaman di eko dong Galilaya.

Yesu Ooto i Ebaga me Kimere

10Do i cen mere di imiegu mege oudo otieko ot i ebaga, Yesu da oko kwalere ooto kuno i mung. 11Iyudayan oudo tie mone ki kakame ebaga oudo tie iye di kipenyere be, “Ani en?”

12Jo oudo tie kede ingungur adwong i kome. Jo mogo oudo waco be, “En dano aber,” do jo ace waco be, “Li, en kom etie rwenyo jo.” 13Do likame tie ngatamoro oko yamo kop obe i kome, pien oudo kilworo Iyudayan.

14Kakame ebaga otuno kede diere, Yesu oko ot i tempulo di eko pwonyo jo. 15Iyudayan oko uro di kiwaco be, “Benyo benyo komio icuo ni tie kede rieko kame rom kaman do di likame esomo?”

16Yesu oko dwoko ne gi be, “Pwony na likame mega kikoma, do me ka ngat kame oora. 17Ka ngatamoro tie kede mit me timo gikame Rubanga mito, ebino ngeno ka pwony na owok kibut Rubanga arabo ka ango atie yamo i akarunikin nango kena. 18Ngat kame yamo i akarunikin mere kene mo deyo mere kene; do ngat kame mo deyo pi ngat kame oore, en dano me ateni, bobo eli kede angalo moro i kuo mere. 19Mam bin Musa omio wu Iswilia? Do likame tie ngatamoro kibutu kame gwoko Iswilia nogo. Pinyo bo komio imounu neka?”

20Jo oko dwoko be, “In itie kede jwogi! Ngai kame tie mono neki?”

21Yesu oko dwoko ne gi be, “Ango bin atimo gi acel di wun dedede ikounu uro. 22#Ageini 17.10; Jolebi 12.3Musa bin ociko wu pi kepere (likame pien kop noni oudo wok kibut Musa, do oudo ewok kibut joakwari), di wun ikounu donyo kepo awobe i Ceng Sabato. 23#Yokana 5.9Ka wun ikepunu dano Ceng Sabato be tetekeny kur iturunu Iswil ka Musa, pinyo komio idokunu ger keda, be pien ango amio kom dano lung ocango Ceng Sabato? 24Kur ingolunu kop di lubere kede gikame wangu neno, do ngolunu kop kede ateni.”

Jo Openyere ka Yesu en Kirisito

25Pi mano, jo mogo me Yerusalem oko waco be, “Mam icuo kame kitie mono neko nono ine? 26Aso en ine etie yamo obe i dier jo, do di likame kiromo yamo ne kop moro da! Benyo, karuno bedo di jotel ngeo ateteni be Kirisito en ine? 27Wan ongeo kakame icuo ni owok kiye; do kame Kirisito obino, likame tie dano kame bino ngeno kakame ewok kiye.”

28Yesu oko waco ne gi bala kite kame oudo epwonyo gi kede i tempulo be, “Benyo, ateteni iparunu be ingeanu, doko ingeunu kakame ango awok kiye? Do ango likame abino pi mit na kena; ngat kame oora tie kede ateni, doko wun likame ingeenu. 29Ango angee, pien awok kibute, doko en kame eora.”

30Kikano, gin kiko mono make; do likame tie ngatamoro kame oko keto cinge i kome, pien esawa mere oudo pwodi likame otuno. 31Do jo atot i ekodet oko yei en di kiwaco be, “Kame Kirisito obino, iparunu be ebino timo gianena kame kalamo kame icuo ni otimo?”

Kocwao Isirikalen pi Ot Mako Yesu

32Iparisayon oko winyo di ekodet ngunguro i kom Yesu. Jodongo me josaseredoti kede Iparisayon oko cwano isirikalen me tempulo pi make. 33Yesu oko waco be, “Abino medo bedo kede wu pi kare moro acecek, di do ako ot but ngat kame oora. 34Ibinunu mona do likame ikounu wuda; pien kakame ango ayaro bedo iye, wun likame itwerunu bino iye.”

35Iyudayan oko donyo yamo ken gi ken gi be, “Tuai inonono kame icuo ni mito ot iye, kame mio wan likame otwero ude? Mam nat emito ot but joe wa kame osarakin i dier Jogurik di eko donyo pwonyo Jogurik? 36Pinyo komio en ewaco be, ‘Ibinunu mona do likame ikounu wuda,’ kede be, ‘Kakame ango abino bedo iye, wun likame itwerunu bino iye’?”

Icileta me Pii me Kuo

37 # Jolebi 23.36 I ceng kame jiko ebaga, en ceng kame pire dwong, Yesu oko cungo di eko waco kede dwane amalo be, “Ngat kame orio oneko, ebin buta, 38#Esekeri 47.1; Sakaria 14.8doko ngat kame yei ango wek emat pii. Bala kite kame iwandik kacil waco kede be, ‘Icileta me pii me kuo bino mol wok ki cuny ngat kame yei ango.’ ” 39Yesu bin owaco kop noni i kom Tipo Kacil kame jo kame yei en bino udo. I kare nono oudo pwodi likame komio Tipo Kacil, pien oudo pwodi likame komio Yesu deyo.

Apokapoka i diere me Jo

40Kakame kiwinyo kede kope go, jo mogo oko waco be, “Ateteni dano ni obedo enabi.”

41Jo mogo oko waco be, “Man en Kirisito.” Do jo mogo oko waco be, “Kirisito likame bino wok ki Galilaya. 42#2 Samuel 7.12; Mika 5.2Mam iwandik kacil waco be Kirisito en akwar Daudi, doko ebino wok ki Betelem, en paco kame Daudi bin bedo iye?” 43Jo oko bedo kede tam opopokun i kom Yesu. 44Jo mogo kikom gi oudo mito make, do likame tie ngatamoro kame oko keto cinge i kome.

Jotel me Iyudayan Odagi Yei Yesu

45Isirikalen me tempulo oko dok, di jodongo me josaseredoti kede Iparisayon oko penyo gi be, “Pinyo komio likame ikelenu?”

46Isirikalen oko dwoko be, “Cako lem pwodi likame tie ngatamoro kame oyamo bala icuo ni!”

47Iparisayon oko penyo gi be, “Mam kotieko rwenyo wuda? 48Itiekunu neno ngat acel moro kikom jotel arabo kikom Iparisayon kame oyei en? 49Do ekodet ni kalikame ngeo Iswil ka Musa, Rubanga olamo gi.”

50 # Yokana 3.1-2 Nikodemu, ngat kame oudo obedo ngat acel kikom Iparisayon, kame bin oudo ocako ot but Yesu, oko waco ne gi be, 51“Iswil wa likame yei ngolo ne dano kop di pwodi likame ber kogeo winyo yamo mere, di oko niang gikame etimo.”

52Gin kiko penye be, “Ida iwok ki Galilaya? Aso somi iwandik kacil di iko bino ngeno be, likame tie enabi moro kame bino wok ki Galilaya.”

53Di do ngat acelacel kikom gi oko dok paco.

Currently Selected:

Yokana 7: BILK13

Highlight

Copy