Luka 13

Ka likame Iswilarunu ibinunu To

1I kare nono oudo jo mogo tie kuno, gin kiko waco ne Yesu kop i kom Jogalilaya mogo kame bin Pilato oudo omio koneko, di oko nyalo remo gi kede giayala gi. 2Di Yesu oko penyo gi be, “Iparunu be Jogalilaya nogi oudo obedo jodubo twatwal kalamo Jogalilaya icegun, komio kineno can kamano? 3Ango awaco ne wu be, likame kamano; pi mano ka likame iswilarunu, wuda dedede ibinunu to kamanono. 4Arabo jo tomon kiwie kanyauni kame bin gedo abor malo me Siloam opoto i kom gi oko neko gi; iparunu be mano bin otimere pien gin do oudo kibedo jodubo areco kalamo jo dedede kame bin bedo Yerusalem? 5Ango awaco ne wu be, likame kamano; aso ka likame iswilarunu, wuda dedede ibinunu to kamanono.”

Agole me Yat Epigi kalikame Nyak

6Di Yesu oko tatamo ne gi agole ni be, “Oudo tie icuo moro kame opito yat epigi i poto mere; en eko bino mono anyakini mogo kiye, do likame eko udo moro. 7En eko waco ne ngatic me poto mere nono be, ‘Neningo, oromo nan mwakini adek di ango abino mono anyakini ki yat epigi no, do likame audo moro. Nan do tonge piny; pinyo komio edong dubo lobo.’ 8Do ngatic me poto nono oko dwoko ne be, ‘Adwong, likame kamano, weke ber bobo ebed pi mwaka ni do kenekene, ango ber kong abok lobo mogo i dude kede aony bolia moro i dude. 9Ka en eko nyak mwaka no, udo ber; do ka li, iko bino do tonge piny.’ ”

Yesu Ocango Angwalas Ceng Sabato

10Ceng Sabato moro acel, Yesu oudo tie pwony i sinagoga. 11Dako moro oudo tie kuno kame tipo areco oudo omio angwal pi mwakini tomon kiwie kanyauni; en oudo ekude di likame bobo etwero cungo di eriere da. 12Kakame Yesu bin onene kede, eko lwonge di eko waco ne be, “Dako ni, in do kotieko gonyi ki angwal ni.” 13Yesu oko keto cinge i wi dako nono, cucuto di eko cungo malo di eriere, di do en eko donyo pako Rubanga.

14 # Yai 20.9-10; Iswilia 5.13-14 Do ngadwong me sinagoga cunye oko wang, pien oudo Yesu ocango dano Ceng Sabato. En eko waco ne jo be, “Tie ceng kanyape kame jo poore timo kede tice; bianu i ceng nogo di oko cango wu, do weko bino Ceng Sabato.”

15Di Rwot oko dwoko be, “Wun joecuke, ngai kikom wu kalikame gonyo twon arabo asigira mere di eko tero ot mato pii Ceng Sabato? 16Do dako no, akwar Aburaam, kame Sitani oudo otweo pi mwakini tomon kiwie kanyauni, pinyo kame mio likame kogonye Ceng Sabato?” 17Kop mere kame edwoko nono oko mino lewic omako jokwor mege; jo dedede di do oko bedo kede kilel pi gi dedede me deyo kame Yesu oudo otimo.

Agole me Nyige me Karadali

(Matayo 13.31-32; Marako 4.30-32)

18Di do Yesu oko penyere be, “Ajakanut ka Rubanga ber cal bala nyo? Doko da, abin apore kede nyo? 19En ecal bala nyige me karadali, kame dano moro otero di eko ot cuno i poto mere; en eko dongo di eko doko yat adwong kame winy apor oko bino gero ude gi i ajange mege.”

Agole me Arup

(Matayo 13.33)

20Di bobo Yesu oko penyere be, “Abino poro Ajakanut ka Rubanga kede nyo? 21En ecal bala arup kame dako juko di eko nyalo kede moko alos me gipim adek, tuno kede di en eko mino moko alos lung buuno.”

Ekeko Adiding

(Matayo 7.13-14, 21-23)

22Yesu oudo tie ot tetu Yerusalem; en eko donyo bebeo i bomban kede i calere di epwonyo jo. 23Di ngatamoro oko penye be, “Rwot, mam jo anonok en kame bino udo alako?”

Yesu oko dwoko ne gi be, 24“Timunu teko twatwal pi donyo kiye ekeko adiding; pien awaco ne wu be, jo atot bino mito donyo i Ajakanut ka Rubanga, do likame kibino karuno. 25Pien kame won ot otieko yai malo di eko cego ekeko mere, wun ibinunu dong cungo ooko di ikukungunu ekeko di iwacunu be, ‘Rwot, Okwe yab wada,’ do en ebino dwoko ne wu be, ‘Ango akwia kakame wun iwokunu kiye.’ 26Di do wun ikounu donyo waco be, ‘Wan ocamo di omato da karacel kede in, doko in ipwonyo i miere wa.’ 27#Sabuli 6.8Do en ebino waco ne wu be, ‘Awaco ne wu be, ango akwia kakame wun iwokunu kiye; orwaunu tenge kibuta, wun jo kame timo tim areco!’ 28#Matayo 22.13; 25.30#Matayo 8.11-12Di wun ikounu bino koko kitek kede mwodo lak ka inenunu Aburaam, Isaka, Yakobo kede inabin dedede di kitie i Ajakanut ka Rubanga, do di wun kouco wu ooko. 29Jo bino wok ki tetu kide, kede ki tetu potoceng, ki tetu malo kede ki tetu piny, di kiko bedo kacam i Ajakanut ka Rubanga. 30#Matayo 19.30; 20.16; Marako 10.31Di do jo mogo kame nan tie me ajikini ko bino bedo me agege; jo mogo kame nan tie me agege ko bino bedo me ajikini.”

Amara ka Yesu pi Yerusalem

(Matayo 23.37-39)

31Esawa nono, Iparisayon mogo oko bino, kiko waco ne Yesu be, “In poore iyai iko ot tenge ki kan, pien Erode mito neki.”

32Do en eko dwoko ne gi be, “Otunu iwacenu ekwee no be, ‘Ango atie riamo jwogi kede cango jo tin kede diki, do i ceng me adek, ango ako bino tieko tic na. 33Do ango miero ameede kede ot na tin kede diki, kede ceng alubo mere; pien likame poore enabi to ooko me Yerusalem.’

34“Okwe in Yerusalem, Yerusalem! In bomba kame neko inabin, doko ididipo jo kame Rubanga ooro buti! Tien atot ango oudo amito be koto arukumo idwe ni bala kite kame gweno rukumo kede idwe mege i bwome, do in iko dagi na! 35#Sabuli 118.26; Yeremia 22.5Pi mano, Rubanga otieko weko ni odi. Doko nan awaco ni be, likame ibino nena bobo tuno kede i kare kame in ibino waco kede be, ‘Etie kede winyo ngat kame bino i nying Rwot.’ ”

Currently Selected:

Luka 13: BILK13

Highlight

Copy