Luka 14

Yesu Ocango Icuo kame Tuwo

1Ceng Sabato moro acel, di Yesu oudo ooto cam i ot me ngapug moro kame oudo obedo Ngaparisayo, jo oko donyo ngine pi mito ngeno gikame en eyaro timo. 2Icuo moro kame oudo tie kede tuwo me aurakom oko bino but Yesu. 3Di Yesu oko penyo jopwony me Iswil kede Iparisayon be, “Iswil yei ne wa cango jo Ceng Sabato arabo li?”

4Do likame kiko dwoko ne kop moro. Di do Yesu oko mako icuo nono, di eko cange, eko waco ne be eoti. 5#Matayo 12.11Yesu bobo oko penyo gi be, “Ngai kikom wu ka etie kede atin, arabo twon mere, di eko poto i kulo moro atut, likame eoto cucuto eko wane ooko Ceng Sabato?”

6Do likame kiko twero dwoko ne kop moro.

Mwolere kede Gamo Jo

7Yesu oko neno epone kame wele oudo tie yero kede kabedere me wor, di en eko waco ne jo kame bin kolwongo agole be, 8#Agole 25.6-7“Ka olwongi i ebaga me nyom, kur i ot bedo i kabedo me wor, pien cengemogo udo kolwongo ngatamoro kame pire tek kalamo in, 9di ngat kolwongo wu nono ko bino di eko waco ni be, ‘Yai iwek kom no ne dano ni’; di do in iko bino udo lewic adwong me cako dak bobo ot kabedo apiny. 10Do ka kolwongi, oti iko bedo kabedo apiny, tetekeny kame ngat kolwongi obino, etwero waco ni be, ‘Diera, yai ikob kabedo amalo.’ Mano bino mini wor i nyim wele wadu kame tie kedi kacam. 11#Matayo 23.12; Luka 18.14Pien ngat kame tingere kene, kobino dwoke piny, do ngat kame mwolere, kobino tinge malo.”

12Di bobo Yesu oko waco ne icuo kame bin olwonge i ode nono be, “Kame iyaro lwongo jo pi cam me iceng arabo me otieno, kur ilwong jowoti arabo imiegu ni, amotoko wade ni, arabo jokio ni kobaro, pien cengemogo gida kibino lunyo lwongi, iepone noni udo gin kitieko culi pi gikame in itimo. 13Do kame iyaro tedo ebaga, lwong jocan, ingwalasa karacel kede imuduka, 14di oko bino mini winyo, pien gin likame kikaruno culi. In kobino culi i kare me iyarun me jo opoore.”

Agole me Ebaga Adwong

(Matayo 22.1-10)

15Kakame ngat acel kikom jo kame oudo tie bedo karacel kede Yesu kacam owinyo kede kope nogi, en eko waco ne Yesu be, “Etie kede winyo ngat kame bino camo mugati i Ajakanut ka Rubanga!”

16Do Yesu oko waco ne be, “Icuo moro oudo oiko ebaga adwong, en eko lwongo jo atot iye; 17kakame esawa me camo ebaga do otuno kede, won ebaga nono oko cwano ngatic mere acel pi ot kwenyaro jo kame bin kolwongo be, ‘Bianu do, pien gi dedede do tie cuto.’ 18Do gin dedede kiko cako kwano be sasiro gi. Dano me agege owaco ne be, ‘Ango awilo lobo, kame poore aoti aneni; pi mano akwai isasiro ango.’ 19Ngat acel da bobo oko waco ne be, ‘Ango awilo twonin kame romo ayokon kany; miero aoti atam tweno gi kong; akwai isasiro ango.’ 20Di ngat acel da bobo oko waco be, ‘Ango pwodi anyomo dako anyoma, pi mano nan likame atwero bino.’

21“Kikano ngatic nono oko dwogo, di eko dwoko ne ngadwong mere kope nogi dedede. Di do wangcuny oko mako won paco, en eko waco ne ngatic mere nono be, ‘Aso oti awakawaka i yote adongo kede i yote atitino me bomba, iko kelo jocan, ingwalasa, karacel kede imuduka.’ 22Ngatic nono oko dwoko be, ‘Adwong, gi dedede kame iwaco kotieko timo, do pwodi kabedo tie.’ 23Di ngadwong oko waco ne ngatic mere nono be, ‘Oti i gudi adongo kede i yote lango iko dino jo tetek pi bino, me wek oda pongi. 24Pien amito waco ni be, likame bobo tie ngatamoro kikom jo kame bin kolwongo go, kame bino bilo cam me ebaga na.’ ”

Gikame Dano Jalo pi bedo Ngasiao ka Yesu

(Matayo 10.37-38)

25Ikodeta adongodongo me jo oudo tie upere kede Yesu; en eko lokere but gi di eko waco ne gi be, 26#Matayo 10.37“Ngat kame bino buta likame karuno bedo ngasiao na, kwanyo kenekene ka emara kalamo epone kame emaro kede papa kede toto mere, dako kede idwe mege, imiegu kede amiegu mege, ebo, kiton kuo mere da kikokome. 27#Matayo 10.38; 16.24; Marako 8.34; Luka 9.23Ngat kalikame riongo musalaba mere di eko donyo luba, likame etwero bedo ngasiao na.

28“Ngai kikom wu ka emito gero ot abor malo, likame ber ebedo piny di eko maro wel sente kame gedo mere no mito, me wek engei ka sente kame en etie kede romo tieko gedo? 29Pien ka likame etimo kamanono, di en eko cako gedo di likame eko karuno tieko, jo dedede kame neno gedo nono bino nyere, 30di kiwaco be, ‘Kom icuo ni ocako gedo da kiber, do bobo tieko oko bwone.’

31“Arabo abaka mene, ka etie ot i yi kede abaka ocelu, likame ber ebedo piny di eko tamo ka en kede isirikalen mege tutumia tomon, etwero ot yi kede abaka ocelu kame tie kede isirikalen tutumia ot are? 32Aso ka li, ebino oro jo mege pi ot riamo kede abaka ocelu nono di pwodi etie kakabor, pi kwane kop me mulem. 33Pi mano, likame tie ngatamoro kikom wu kame twero bedo ngasiao na tuno kede di ejalo gi dedede kame etie kede.

Kado Akony mere li

(Matayo 5.13; Marako 9.50)

34“Kado ber; do ka tuto odoko bot, kotwero mine bobo edoko kec benyo? 35En do udo likame bobo eber akadi ne lobo da, akadi me aketa i atukit me bolia; do en do kobwote obar. Ngat kame tie kede yite, wek ewinyi.”

Currently Selected:

Luka 14: BILK13

Highlight

Copy