Luka 16

Ngagwok Jame kame Wie Tio

1Di Yesu oko waco ne josiao mege be, “Oudo tie icuo moro kobaro kame tie kede ngagwok jame mege. Bin oko kelo ne kop me pido, be icuo nono oudo tie dudubo jame mege. 2En eko lwonge di eko penye be, ‘Nyo ine kame ango awinyo jo tie yamo i komi? Nyut na epone kame in itie gwoko kede jame na, pien in likame bobo itwero meede bedo ngagwok jame nango.’ 3Di ngagwok jame nono oko waco i cunye kene be, ‘Nan do abino timo benyo, bala kame nan ngadwong na tie kwanya kede ki tic? Ango ali kede teko me pur, doko lewic maka kwac. 4Nan ango atieko ngeno gikame abino timo tetekeny kame kokwanya ki tic, jo bino gama i miere gi.’

5“En eko lwongo jo kame tie kede banyi me ngadwong mere acelacel, di eko cako penyo won banya me agege be, ‘Ngadwong na burao in banya kame rom amene?’ 6En eko dwoko be, ‘Galanin tol acel me mo.’ Di ngagwok oko waco ne be, ‘Kwany itabu ni me banya, di iko bedo piny awakawaka, iko wandiko be ot kany kenekene.’ 7Bobo en eko penyo ngat ocelu da be, ‘Do in kono, nyo kame koburao in?’ Loca oko dwoko ne be, ‘Ipukoi tol acel me engano.’ En eko waco ne be, ‘Kwany itabu ni me banya di iko wandiko be ot kanyauni erume.’

8“Ngadwong nono oko pako ngagwok jame mege kalikame genere nono pi rieko kame engolo; pien jo me i kare kanataman tie kede rieko me tic kede joe gi me i kare noni kalamo jo kame tie i lero.

9“Doko awaco ne wu be, tiunu kede abar kame iudunu i yore kalikame opoore pi mako awotino, tetekeny ka etiek, gin kikaruno gamo wu i miere kame bedo nakanaka. 10Ngat kame genere kede gikame titidi twatwal, udo egenere kede gikame dwong da; doko ngat kalikame genere kede gikame titidi twatwal, udo likame egenere kede gikame dwong da. 11Ka do ber wun likame igenerenu kede abar me piny kan kalikame genere, ngai do kame bino geno wu kede abar me ateni? 12Doko ka likame igenerenu kede jame ka ngat apat, ngai do kame bino mino wu kame mako wu?

13 # Matayo 6.24 “Likame tie ngatic moro kame romo tic ne jodongo are; pien ebino dagi ngat acel di eko maro ocelu, arabo ebino mire tic ne ngat acel di eko cano ngat ocelu. In likame ikaruno tic ne Rubanga kede bobo ne abar da.”

Pwony Mogo kame Yesu Omio

(Matayo 11.12-13; 5.31-32; Marako 10.11-12)

14Iparisayon, jo kame cuny gi oudo maro sente, bin owinyo kope nogi dedede di kiko bedo kede acae but Yesu. 15Do en eko waco ne gi be, “Wun en jo kame nyutere i nyim jo be ipoorenu, do Rubanga ngeo cunyu; pien gikame jo tero bala gikaber, obedo gikame neno rac i nyim Rubanga.

16 # Matayo 11.12-13 “Iswil ka Musa kede kop me inabin bin otio tuno i kare kame Yokana obino kede; cako i kare no Kop Aber me Ajakanut ka Rubanga en kame kobedo tatamo, di ngat acelacel donyo iye tetek. 17#Matayo 5.18Do eyoyot ne malo kede lobo tiek kalamo dul moro me Iswil doko li.

18 # Matayo 5.32; 1 Jokorinti 7.10-11 “Ngatamoroni kame riamo dako mere di eko nyomo ace, udo etimo adote. Doko ngat kame nyomo dako kopokere kede cware, udo etimo adote.

Ngabar kede Lasaro

19“Bin tie icuo moro kobaro, kame oudo ngapo igoen akwakwar kede kame meny, doko di etie kede kuo ajabajaba ceng dedede. 20Oudo tie icuo ngacan moro kame nyinge Lasaro, kame buge oudo otatapo i kome. En oudo esingo buto i dog erute me ngabar nono. 21En bin eparo camo angidingidin me cam kame popoto ki wi emesa me ngabar nono; igwogin da oudo bino ko donyo nango buge mege.

22“Ngacan nono oko to di imalaikan oko tere okete i kor Aburaam. Ngabar nono da bin oko to, di oko yike. 23Bin di ngabar nono oudo tie winyo lito i kabedo me jo oto, en eko tingo wange malo di eko neno Aburaam di tie kakabor, di Lasaro tie i kore. 24En eko lwongere be, ‘Papa Aburaam, Okwe bed kede cuny me kisa i koma di iko cwano Lasaro eoti erwak wi lwete i pii di eko kweno kede leba, pien atie kede lito atek i mac kan.’

25“Do Aburaam oko waco be, ‘Woda, yutuno ber i kare kame pwodi in oudo i kuo kede, in bin iudo jamini abeco, di Lasaro da iepone nono oko udo jamini areco; do nan eda kokweo cunye ki kan, di ida iudo lito. 26Doko medo i wi mano, i dierediere wan kede wun, koketo iye bur atut twatwal, tetekeny likame tie ngatamoro kikom wan kan kame twero ngolo tuno butu kuno, doko likame tie ngatamoro kibutu kuno kame twero ngolo bino but wan kan.’ 27Di do ngabar nono oko waco be, ‘Nan do papa Aburaam, atie kwani icwae eoti i ot ka papa na, 28pien atie kede imiegu na kany; wek eoti ekwenyaro gi, tetekeny kur gida doko kibin i kabedo me can noni.’

29“Do Aburaam oko dwoko ne be, ‘Gin kitie kuno kede Musa kede inabin, poore gin kiwiny kope kame gin kiwaco.’ 30Ngabar nono oko dwoko be, ‘Likame kamano papa Aburaam; do ka ngatamoro kikom jo oto ooto but gi, kibino swilaro.’ 31Do Aburaam oko waco ne be, ‘Ka gin likame kiyei kop ka Musa kede me inabin, likame kibino da yei akadi ka ngatamoro oyaruno kikom jo oto.’ ”

Currently Selected:

Luka 16: BILK13

Highlight

Copy