Luka 17

Dub

(Matayo 18.6-7, 21-22; Marako 9.42)

1Yesu oko waco ne josiao mege be, “Atama me poto i dub ateteni oyaro bino; do etie i can ngat kame bino mino gi kibino. 2Oudo koto bedo ber ka kotweo ne kidi me riego i ngute di oko uce kede i nam, akaka en mino jo kame titino gi poto i dub. 3#Matayo 18.15Pi mano, gwokerenu!

“Ka omini odubo, ronkino en, doko ka eswilaro, sasiro en. 4Ka dano acel nono odubo buti tien kanyaare i ceng acel, di tien acelacel kame edubo kede ebino buti di ewaco be, ‘Aswilaro,’ in miero isasiro en.”

Yei

5Joor oko waco ne Rwot be, “Med yei wa.”

6Di Rwot oko waco ne gi be, “Ka koto di oudo itienu kede yei kame rom kede nyige me karadali, oudo koto itwerunu waco ne cukamori ni be, ‘Putere ki kan iko ot pitere i nam,’ di koto en eko winyo dwanu.

Gikame Ngatic Timo

7“Ngai kikom wu ka etie kede ngatic mere kame puro ne ecuka arabo kwao ne romini mege, di en eko dwogo paco ingei tic, ewaco ne ngatic nono be, ‘Susunyo do ber bino cam’? 8Mam elunyo waco ne be, ‘In do ber iik nango cam me otieno, iko ngapere iko kelo na cam, iko donyo dara di ango acamo kede di amato, di do kame ango atieko, ida iko do cam kede mato.’ 9Iparunu be en emio pwoc but ngatic mere be pien etimo gikame en ewaco ne pi timo? 10Kamanono da, ka wuda itimunu gi dedede kame kowaco ne wu pi timo, poore iwacunu be, ‘Wan kom jotic kenekene; wan otieko timo tic kame oudo mako wa.’ ”

Yesu Ocango Jodobo Tomon

11Bin di Yesu oudo tie ot Yerusalem, en oudo etie beo ki adul kame tie dierediere me Samaria kede Galilaya. 12Kakame oudo etie donyo kede i calo moro, en eko riamo kede jodobo tomon. Gin kiko cungo kakabor, 13di kiko lwongere be, “Adwong, Yesu, mi kisa maki i kom wa.” 14#Jolebi 14.1-32Kakame Yesu oneno gi kede, en eko waco ne gi be, “Otunu imiunu ngasaseredoti ngic wu.” Kakame oudo kitie ot kede, kom gi oko cango. 15Di bin ngat acel kikom gi oneno be etieko do cango, en eko lokere edok but Yesu di epako Rubanga kede dwan amalo. 16En eko riebere i tien Yesu di epwoye. Oudo en ebedo Ngasamaria. 17Yesu oko penyere be, “Mam oudo jo tomon en kame kocango? Do jo kanyangon icegun tie tuai? 18Pinyo komio jo icegun likame oko dwogo mino Rubanga pwoc, kwanyo ngakumbor ni kenekene?” 19Di do Yesu oko waco ne icuo nono be, “Yai ioti; yei ni ocangi.”

Bino me Ajakanut ka Rubanga

(Matayo 24.23-28, 37-41)

20Bin i kare moro Iparisayon openyo Yesu awene en kame Ajakanut ka Rubanga oyaro bino kede, en eko dwoko ne gi be, “Ajakanut ka Rubanga likame oyaro bino kede gianena mogo kame neeno. 21Doko likame tie jo mogo kame bino waco be, ‘Neningo, en ine!’ arabo be, ‘En ica!’ Pien Ajakanut ka Rubanga tie i diere wu.”

22Di do en eko waco ne josiao mege be, “Kare tie bino kame ibinunu mito neno kede acel kikom ceng ka Wot ka dano, do likame ibinunu neno. 23Jo bino waco ne wu be, ‘Nenunu, en ica!’ arabo be, ‘En ine kan!’ Do kur iyeunu ot, akadi lubo gi da. 24Pien bala kite kame kot meny kede di eko caro malo cako ki tetu cel tuno kede tetu ocelu, ebino bedo kamanono da kede Wot ka dano i ceng mere. 25Do miero ber en ebei i can atot, di jo me i kare ni ko dage. 26#Ageini 6.5-8Bala kite kame riki etimere kede i kare ka Nua, en epone nono da kame ebino timere kede i kare me dwogo ka Wot ka dano. 27#Ageini 7.6-24Jo oudo tie cam kede amata, di kinyomere doko di kimio anyira gi me anyoma, paka tuno i ceng kame Nua odonyo kede i yi yee, di alele oko bino oko neko gin dedede. 28#Ageini 18.20—19.25Kamanono da, bala kite kame riki etimere kede i kare ka Lot; jo dedede oudo tie cam kede amata, mogo di tie cat kede wil, doko mogo di tie pito jame, di mogo gedo, 29do ceng kame Lot oyai kede ki Sodoma, mac kede salupa kame tie liel oko cwei di oko neko gin dedede. 30Ebino bedo kamanono da i ceng kame Wot ka dano da bino nyutere kede.

31 # Matayo 24.17-18; Marako 13.15-16 “Cenge no, ngat kame tie i wi ot, di jame mege tie i ot miero kur doko wok piny pi kwanyo gi; iepone nono da, ngat kame oudo tie i poto kur doko dok paco. 32#Ageini 19.26Yutununu gikame otimere ne dako ka Lot. 33#Matayo 10.39; 16.25; Marako 8.35; Luka 9.24; Yokana 12.25Pien ngat kame mito gwoko kuo mere, ebino rwenye, do ngat kame rwenyo kuo mere ebino gwoke. 34Awaco ne wu be, iwor me cenge no, kikom jo are kame tie ribo apien kobino kwanyo dano acel oko tero di oweko ngat ocelu. 35Doko kikom mon are kame tie riego karacel, kobino kwanyo ngat acel oko tero di oweko ngat acel dong.” 36(Kikom jo are kame tie pur i poto, kobino tero ngat acel di ngat acel dong.)

37Josiao mege oko penye be, “Rwot, tuai inonono?” Di Yesu oko dwoko ne gi be, “Kakame gi oto tie iye, kunono en kame acut da cokere iye.”

Currently Selected:

Luka 17: BILK13

Highlight

Copy