Acts 10

God sen wan mesij tu Cornelius

1Now iina di toun a Caesarea dehn wehn gat wan man niem Cornelius, weh dah wehn di kyapm a wan hundred suoldya iina di Roman aamy. Dehn kaal dis gruup di Italian Regiment. 2Him dah wehn wan man weh lov ahn ana God, lang wid ihn huol famaly. Ihn wehn gat wan gud haat ahn ihn wehn gi plenty gif tu di puor Jew pipl dem. Ahn him dah wehn wan man weh aalwiez prie tu. 3Now, roun three aklak wan iivnin, Cornelius wehn get wan vizhan fahn God, ahn iina dis vizhan wan ienjel kom iina ihn ruum ahn seh tu im, “Cornelius!”

4Az Cornelius luk pahn im, ihn wehn uova fried, ahn ihn seh, “Dah weh yo waahn wid mii, sah?”

Di ienjel seh, “God hapy wid yo, ahn ihn tek nuotis a yo praya dem ahn yo gif dem tu di puor. 5Now, sen som man dah Joppa fi dehn kech bak wan man weh niem Simon, huu dehn kaal Peter tu. 6Him wende stie wid wan nada man weh niem Simon, weh liv nier di sii ahn mek tingz outa leda.”

7Wen di ienjel gaan, Cornelius kaal two sorvant ahn wan a fi ihn uon suoldya, weh dah wehn wan gadly man. 8Afta ihn tel dem evryting weh wehn hapm, ihn sen dem dah Joppa.

Peter si wan vizhan

9Roun twelve aklak di neks die, wen di mesinja dem wehn niely get dah di sity, Peter gaan op pahn di hous-tap fi prie. 10Bot ihn get hongry ahn ihn wehn waahn somting fi iit. Wail di fuud wende get redy, ihn wehn gat wan vizhan. 11Ihn si di skai uopm op ahn somting laik wan uova big shiit kom dong tu di grong bai di four kaana. 12Iina di shiit wehn gat aal kain a four-fut animal, ahn reptail, ahn bord weh flai iina di ier. 13Den wan vais seh tu im, “Get'op, Peter, kil enywan a dem yu waahn ahn iit'ih.”

14“Ah kuda neva du dat, Laad,” Peter seh, “Iina aal mi laif Ah neva iit notn weh Moses Laa seh no kliin —weh no fit fi iit!”

15Bot di vais seh tu im agen, “Yuu no gat non rait fi seh somting no kliin wen God ihnself mek'ih kliin.” 16Dis hapm three taim; den aalava sodn di shiit gaan bak op dah hevn!

17Now wail Peter wende wanda plenty weh di vizhan miin, di man dem, weh Cornelius wehn sen, fain Simon hous ahn stan op outsaid dah di giet —afta dehn aks wish paat Simon wende stie— 18ahn dehn aks if wan man weh niem Simon Peter liv deh.

19Wail dah taim kom, Peter wehn stil deh tink bout di vizhan weh ihn wehn jos si, wen di Holy Spirit tel im seh, “Luk yah; som man deh dong deh fi si yo. 20Mikies ahn go dong stiez, ahn no tink haad fi go wid dem. Dah mii sen dem.”

21So Peter gaan dong stiez ahn seh tu dem, “Yees, mi dah di wan weh unu deh luk fah. Dah weh bring unu yah?”

22Dehn ansa seh, “Kyapm Cornelius sen wi. Him dah wan gud man iina God sait ahn ihn ana im plenty, so aal di Jewish pipl dem gi'im dehn rispek. Jos now wan ienjel fahn God tel im fi sen fi yo, ahn mek yo go dah ihn hous, so ihn kuda hier weh yo gat fi seh.” 23So Peter aks dem fi kom iin ahn stie di nait.

Peter gaan dah Cornelius hous

Di neks maanin Peter ahn som a di biliiva fahn Joppa get'op ahn gaan wid Cornelius mesinja dem, 24ahn di neks die dehn get dah Caesarea. Now Cornelius wende wiet fi dem ahn ihn wehn aks aal ihn famaly ahn kluos fren dem fi kom tu. 25Az Peter wende luk fi go iina di hous, Cornelius miit im ahn jrap dong dah ihn fut fi waaship im. 26Bot Peter mek im get'op, deh seh, “Yuu no fi waaship mi, Cornelius, bikaaz Ai dah jos wan man tu.”

27Den Peter ahn Cornelius taak tugeda wail dehn wehn gwain iinsaid weh paat di paila pipl wehn gyada tugeda. 28Peter seh tu aala dem, “Unu wel ahn nuo seh ih go gens fi wi Jewish kostom dem fi miks'op wid pipl weh dah no Jew or go dah dehn hous. Bot God shuo mi seh Ah no fi seh nonbady no kliin nof fi miks'op wid wi sieka dehn dah no Jew laik wi. 29So wen yo sen fi mi, Ah neva tink haad fi kom ataal. Ahn now, Ah waahn nuo wai yo kaal mi yah.”

30Cornelius ansa seh, “Dah wehn bout four diez abak, roun dis siem taim —three aklak di iivnin— Ah wende du mi yuuzwal iivnin prayaz, wen aalava sodn wan man iina uova brait kluoz kom ahn stan op fronta mi. 31Ihn seh, ‘Cornelius! God hier yo praya dem, ahn ihn memba yo gif dem tu puor pipl. 32Now sen som man dah Joppa fi aks fi Simon, huu dehn kaal Peter tu, fi kom. Ihn deh stie iina Simon hous, di man weh mek tingz outa leda, weh liv nier di sii.’ 33So Ah mikies sen fi yo, ahn yu so kain fi kom. Now aala wi deh rait yah iina God sait fi hier weh God gi'yo fi tel wi.”

Weh Peter seh dah Cornelius hous

34Den Peter tel dem seh, “Ah andastan now: fi God aala wi dah di siem iina ihn sait. 35Enybady, no mata ihn ries or weh ihn kom fram, weh ana God ahn du weh rait, ihn gwain welkom im iina ihn famaly. 36Unu nuo seh God wehn sen ihn mesij fos tu di pipl fahn Israel: di gud nyuuz seh piis kom chruu Jesus Christ, huu dah di Laad uova aal weh egzis. 37Ahn unu mosy wehn hier bout weh wende hapm aal uova Judea lan, dis ting weh staat iina Galilee afta di baptizam weh John priich bout. 38God wehn pik out Jesus fahn Nazareth fi bii di Mesaya ahn ihn gi'im di Holy Spirit ahn powa. Den Jesus gaan aal bout di plies deh du gud ahn ihn kyuor aal weh wende aanda di kanchruol a di devl, bikaaz God wende wid im.

39“Wii dah wiknis tu aal di tingz weh ihn wehn du iina Jerusalem ahn iina di res a fi wi Jewish lan tu. Bot dehn morda im, wen dehn niel'im op pahn wan kraas. 40Three diez lieta God bring im bak tu laif ahn mek ihn apier'op, 41no tu evrybady, bot tu wi weh God wehn pik out fahn lang taim. Ihn shuo im tu wii, az wi iit ahn drink wid im afta ihn wehn kom bak fahn di ded. 42Ahn Jesus gi wi di aadaz fi priich tu di pipl dem, ahn mek dem nuo seh God mek him joj uova evrybady —dem weh alaiv ahn dem weh ded tu. 43Aal di prafit dem weh wehn taak ahn rait bout Jesus lang taim abak, seh evrybady weh wehn gwain chros iina im, God gwain fargiv dehn sin dem chruu Jesus powa.”

Di Gentile pipl dem get di Holy Spirit tu

44Wail Peter stil wende seh demde tingz, di Holy Spirit kom dong pahn aala dem weh wende hier ihn mesij. 45Bot di Jewish biliiva weh huol haad tu di Laa, ahn weh wehn gaan wid Peter, wehn uova sopraiz wen God gi di gif a di Holy Spirit tu di pipl dem weh dah neva Jew tu, 46bikaaz dehn wehn hier dem deh taak iina wan fony langwij deh priez God fi ihn gudnis. Den Peter seh, 47“Demya pipl get di Holy Spirit jos laik wi, so huu deh yah mongs wi weh kyan stap dem fahn get baptaiz wid waata?” 48So, Peter aada dem fi get baptaiz iina di niem a Jesus Christ. Den afta dat, Cornelius beg im fi stie wid dem fi som diez.

Currently Selected:

Acts 10: NTIC

Highlight

Copy