Acts 9

Saul staat fala Jesus

1Now iina daty taim, Saul stil wende tretn di Laad falowa dem ahn waahn kil dem. So ihn gaan dah di Hai Priis, 2ahn aks im fi som leta fi ker dah di sinigag dem iina Damascus, fi get dem fi help im grab enybady rait dehso weh deh fala Di Nyuu Wie —no mata if dah man or uman— ahn ker dem tai wid chien bak dah Jerusalem.

3Bot pan ihn wie tu Damascus, az ihn wende get nier di sity, aalava sodn wan brait lait fahn hevn flash roun im! 4Saul jrap dong pahn di grong ahn ihn hier wan vais weh seh, “Saul, Saul, dah wai yo deh gi mi haad taim so?”

5“Dah huu yu, Laad?” ihn aks. Ahn di vais ansa seh, “Ai dah Jesus, di siem wan weh yu deh gi haad taim. 6Now get'op ahn go iina di sity ahn yo gwain hier weh yo hafy du.”

7Di man dem weh wende travl wid Saul wehn so sopraiz dehn jos stie stil, ahn dehn kudn seh notn. Dehn hier wan vais, bot dehn no si nonbady! 8Den Saul get'op aafa di grong, ahn wen ihn uopm ihn ai, ihn kudn si notn ataal. So dehn tek ihn han ahn dehn ker im dah Damascus. 9Ahn fi three diez Saul kudn si notn, ahn iina daty taim ihn neva iit nar drink notn ataal.

10Now iina Damascus dehn wehn gat wan biliiva weh niem Ananias, ahn di Laad kaal im iina wan vizhan deh seh, “Ananias!” Ahn ihn ansa, “Yees, Laad, Ah deh rait yah; dah weh yo waahn wid mi?”

11Di Laad tel im seh, “Get'op ahn go dong di ruod weh niem Striet; golang til yo get dah Judas hous. Wen yo get deh, aks fi wan man niem Saul fahn Tarsus. Rait now ihn deh prie; 12ahn iina wan vizhan ihn si wan man niem Ananias deh kom iina ihn ruum, put ihn han pan im, ahn gi'im bak ihn sait.”

13Wen Ananias hier dis, ihn seh, “Bot Laad, Ah hier aal kain a tingz bout dis man ahn aal di wikidnis ihn wende du tu yo pipl dem iina Jerusalem. 14Ahn now ihn deh yah, bikaaz ihn gat piepa fahn di chiif priis dem weh gi'im di atarity fi grab eny biliiva iina Damascus tu!”

15Den di Laad tel Ananias, “Go ahn du weh Ah seh, bikaaz dis man dah di wan weh Ai pik fi mek di Gentile pipl dem nuo huu dah mi, ahn fi go fronta plenty king ahn di pipl fahn Israel tu. 16Ahn mii miself gwain shuo im ho moch ihn gwain sofa fi mek di pipl dem nuo dah huu mi.”

17So Ananias gaan dah di hous weh Saul wende ahn put ihn han pahn im. Ihn seh, “Breda Saul, di Laad Jesus weh apier'op pahn yo pahn di ruod wen yu wende kom, sen mi so yu kyan si agen ahn get ful'op wid di Holy Spirit.” 18Ahn siem taim, somting weh luk laik fish skiel jrap fahn aafa Saul ai dem, ahn ihn kuda si agen! Den ihn get'op ahn get baptaiz. 19Afta dat, ihn iit somting ahn ihn fiil strang agen.

Saul staat deh priich bout Jesus

Now Saul stie fi som diez dah Damascus wid di ada pipl dem weh chros iina Jesus, 20ahn ihn neva wies nontaim fi staat priich iina di sinigag dem deh seh, “Jesus dah God Son fi chruut!”

21Ahn aal di pipl dem weh hier im wehn uova sopraiz ahn dehn aks wan anada seh, “Dis dah di siem man weh wende haraas di pipl dem weh deh fala Jesus iina Jerusalem, no chruut? Ihn mosy kom yah fi grab di biliiva, tai dem op ahn ker dem bak dah di chiif priis fi du di siem ting tu dem. Dah wada hapm tu him now?”

22Wid aala dis, Saul priichin get muo ahn muo powaful. Ihn pruuv tu di Jew dem dah Damascus seh Jesus dah di Mesaya weh God wehn pramis fi sen, ahn aal dehn kuda du dah shet dehn mout.

23Den, afta som diez gaan bai, di Jewish liida dem work out wan plan fi kil Saul, 24bot Saul fain out bout dehn plan. Die ahn nait di Jewish liida dem wach di sity giet dem fi ker out dehn plan fi morda im, 25bot dehn kudn du'ih, bikaaz wan nait, dem weh wehn kom fi chros iina Jesus chruu Saul priichin, tek im ahn hais im dong iina wan big baaskit chruu wan huol iina di sity waal, ahn Saul get-weh!

Saul gaan bak dah Jerusalem

26Wentaim Saul get dah Jerusalem, ihn trai fi jain'op wid di biliiva dem, bot dehn wehn fried fi him; dehn neva biliiv seh him dah wehn wan chruu biliiva. 27Bot Barnabas biliiv im ahn ker im dah di apasl dem. Ihn eksplien tu dem how di Laad wehn apier'op tu im ahn taak tu im pahn di ruod tu Damascus, ahn how afta dat ihn neva fried fi priich dah dat sity fi dehn nuo huu dah wehn Jesus. 28So Saul stie wid dem ahn neva fried fi go aal bout Jerusalem deh priich iina di niem a di Laad. 29Ahn ihn wehn taak ahn aagyo wid som Jewish pipl weh taak Greek tu, bot dehn wende trai fain wan wie fi kil im. 30Bot wen di ada biliiva dem wehn hier bout'ih, dehn ker Saul dong dah Caesarea ahn dehn sen im aaf tu Tarsus.

31So iina demde diez aal di chorch pipl dem iina Judea, Galilee, ahn Samaria lan wehn gat som piis. Ahn di Holy Spirit help dem gruo stranga, ahn muo ahn muo pipl jain dem. Dis hapm wail dehn shuo rispek fi God ahn wende liv rait.

Som mirakl weh Peter du

32Roun dis siem taim, Peter wende travl fahn plies tu plies fi vizit di biliiva dem. Pahn di wie ihn stap fi vizit dem weh wende dah di toun a Lydda. 33Iina daty toun ihn bok'op pahn wan man weh niem Aeneas, weh wehn paralaiz ahn lidong iina ihn bed fi eight yierz. 34Peter seh tu im, “Aeneas, Jesus Christ kyuor yo! Get'op ahn spred yo bed.” Siem taim Aeneas get'op pan ihn fut! 35Wen di pipl weh wehn liv iina Lydda ahn Saron sity si dis, aala dem staat chros iina di Laad Jesus tu.

36Now iina di neks toun a Joppa, wan uman weh liv deh wehn niem Tabitha, weh iina di Greek langwij dah Dorcus. Shii dah wehn wan biliiva ahn spen aal ihn taim deh help puor pipl ahn du ada gud tingz. 37Bot wan die bout dis siem taim, ihn get sik ahn ded. Den ihn fren dem wash di bady ahn put'ih iina wan ruum opstiez. 38Now, di toun a Lydda neva deh foor fahn Joppa, ahn wen di biliiva dem hier seh Peter wende rait dah Lydda, dehn sen two man fi go beg im fi mikies kom dah Joppa.

39So Peter kom wid dem ahn wen ihn get deh, dehn ker im opstiez dah di ruum. Ahn wen ihn gaan iinsaid, di ruum wehn ful'op a som wido weh wende muon ahn hala. Wen dehn si Peter, dehn kom roun im ahn shuo im di difrent kain a kluoz weh Dorcus yuuztu mek wen ihn wehn alaiv.

40Bot Peter sen aala dem outa di ruum, ahn ihn niil dong ahn prie. Den ihn ton tu di bady ahn seh, “Tabitha, get'op!” Siem taim di uman uopm ihn ai, luk striet pahn Peter, ahn den ihn sidong op! 41Peter huol ihn han ahn help im fi stan op. Den ihn kaal iin aal di biliiva ahn di wido dem tu, ahn ihn shuo dem Tabitha wehn alaiv agen! 42Di huol a Joppa hier bout weh wehn hapm, ahn wan paila dem staat chros iina Jesus tu. 43So Peter stie dah Joppa fi som diez deh liv wid Simon, wan man weh mek tingz outa leda.

Currently Selected:

Acts 9: NTIC

Highlight

Copy