ལུ༌ཀ༌ 15

ལུག༌ སྟོར༌ཁན༌ནི༌ རུངས༌།

15:1-7

1ཁྲལ༌ནེན༌ཁན༌གུན༌ དང༌ སྡིག༌ཅན༌གུན༌ ཡེ༌ཤུའི༌ ལབ༌ཞ༌གུན༌ ཉན༌ན༌ལ༌ ཡོངས༌། 2ཨིན༌ནའང༌ ཕ༌རུ༌ཤི༌པ༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ བ༌ག༌བོ༌གེ༌ ཤད༌ཨིན༌ ཟེརས༌, “འི༌ མི༌བོའེ༌ སྡིག༌ཅན༌གུན༌ལ༌ གའ༌སུས༌ ཞུས༌ཏེ༌ ཁོང༌གུན༌ ཉམ༌པོ༌ ཟན༌ ཟའ༌དུག༌།”

3ཏེ༌ནེ༌ ཡེ༌ཤུའི༌ ཁོང༌གུན༌ལ༌ འི༌ རུངས༌པོ༌ ཤད༌ད༌ ཛདས༌, 4“ཁྱོ༌ཞ༌ ཅིག༌ག༌ ལུག༌ གྱ༌ ཡོད༌ཁན༌བོའེ༌ ནང༌ནེ༌ ལུག༌ ཅིག༌ སྟོར༌ན༌, ཞན༌ གུབ༌ཅུ༌ གོར༌གུ༌བོ༌ ཐང༌སྟོང༌ང༌ བོར༌ཏེ༌ སྟོར༌ཁན༌བོ༌ ཐོབ༌ཐོབ༌ ཚག༌པ༌ ཙལ༌ལ༌ མི༌ཆའ༌? 5ཐོབ༌བ༌ཅིག༌, གའ༌མོ༌ ཉམ༌པོ༌ ཇིང༌བའེ༌ཀ༌ ཁུར༌ཏེ༌ 6ཁང༌པ༌ ཁྱེར༌ཨིན༌། ཏེ༌ནེ༌ ཁོའེ༌ ཁོ༌རང༌ངི༌ ཛ༌འོ༌ དང༌ ཁྱིམ༌ཚེས༌ གུན༌ བོད༌ཏེ༌ ཟེར༌ཨིན༌, ‘ང༌ ཉམ༌པོ༌ གའ༌མོ༌ སྐྱིད༌པོ༌ ཅོས༌ ཅིའ༌ཟེར༌ན༌ ངའེ༌ ལུག༌ སྟོར༌ཁན༌བོ༌ ཐོབ༌།’ 7ངའེ༌ ཁྱོ༌ཞའ༌ ཟེར༌རད༌, ཏེན༌ན༌ ཙོགས༌ལ༌ ནམ༌ཁའེ༌ ནང༌ང༌ མི༌ ཀྲང༌པོ༌ སྡིག༌པའེ༌ ཀ༌ནེ༌ གྱོད༌པ༌ ཅོ༌གོས༌མེད༌ སམ༌ཁན༌ གུབ༌ཅུ༌ གོར༌གུ༌ སང༌ གྱོད༌པ༌ ཅོ༌ཁན༌ནི༌ སྡིག༌ཅན༌ ཅིག༌གི༌ ཕིའ༌ མང༌ང༌ གའ༌མོ༌ ཅོ༌ཨིན༌།”

པེ༌ནེ༌ སྟོར༌ཁན༌ནི༌ རུངས༌།

15:8-10

8“བུ༌མོ༌ཞིག༌ག༌ མུལ༌ལི༌ པེ༌ནེ༌ རྕུ༌ ཡོད༌ཁན༌བོའེ༌ ནང༌ནེ༌ ཅིག༌ སྟོར༌ན༌, ཁོའེ༌ འོད༌ དུགས༌ཏེ༌ ཁང༌པ༌ ལྡུས༌ཏེ༌ པེ༌ནེ༌ སྟོར༌ཁན༌བོ༌ ཐོབ༌ཐོབ༌ ཚག༌པ༌ གྱལ༌ལ༌ ཅོས༌ཏེ༌ མི༌ཙལ༌ལ༌? 9ཐོབ༌བ༌ཅིག༌, ཁྱིམ༌ཚེས༌ དང༌ ཛ༌འོ༌ གུན༌ བོད༌ཏེ༌ ཟེར༌ཨིན༌, ‘ང༌ ཉམ༌པོ༌ སྐྱིད༌པོ༌ ཅོས༌ ཅིའ༌ཟེར༌ན༌ ངའེ༌ པེ༌ནེ༌ སྟོར༌ཁན༌བོ༌ ཐོབ༌།’ 10ངའེ༌ ཁྱོ༌ཞའ༌ ཟེར༌རད༌, ཏེན༌ན༌ ཙོགས༌ལ༌ གྱོད༌པ༌ ཅོ༌ཁན༌ནི༌ སྡིག༌ཅན༌ ཅིག༌གི༌ ཕིའ༌ དཀོན༌མཆོག༌གི༌ ཕོ༌ཉ༌གུན༌ནིའང༌ གའ༌མོ༌ ཅོ༌ཨིན༌།”

བུ༌ཚའ༌ སྟོར༌ཁན༌ནི༌ རུངས༌།

15:11-32

11གཙོ༌བོ༌ ཡེ༌ཤུའི༌ ཏ༌རུང༌ངའང༌ མོལས༌, “མི༌ཞིག༌ག༌ བུ༌ཚ༌ ཉིས༌ ཡོད༌པིན༌། 12བུ༌ཚ༌ ཆུ༌ངུན༌བོའེ༌ ཨ༌བ༌ ཟེརས༌, ‘ཨ༌བ༌ ངའེ༌ སྐལ༌ལེ༌ ནོར༌སྐལ༌བོ༌ སལ༌།’ ཏེ༌ནེ༌ ཨ༌བའེ༌ ཁོ༌རང༌ངི༌ ནོར༌བོ༌ བུ༌ཚ༌ ཉིས༌ཀོའེ༌ ནང༌ང༌ བགོས༌།”

13“ཞག༌ ཁ༌ཅིག༌གི༌ སྟིང༌ནེ༌, བུ༌ཚ༌ ཆུ༌ངུན༌བོ༌ ནོར༌ ཚང༌མ༌ ཁུར༌ཏེ༌, ཐག༌རིང༌ངི༌ ཡུལ༌ཞིག༌ག༌ སོང༌། ཁོའེ༌ ནོར༌ ཚང༌མ༌ སམ༌བ༌ མ༌ཏང༌ང༌ སྕོད༌པ༌ ངན༌པའེ༌ ནང༌ང༌ གོད༌ལ༌ ཏངས༌། 14ནོར༌ ཡོད༌ཁན༌ ཚང༌མ༌ སྐྱག༌ ཚར༌ར༌ཅིག༌, ཏེ༌ ཡུལ༌ལ༌ མུ༌གེ༌ ཀྲག༌པོ༌ ལངས༌, ཡང༌ ཁོའ༌ སྟོག༌རི༌ དང༌ ཁྱག༌རི༌ ཐོང༌། 15ཏེ༌ནེ༌ ཁོ༌ ལས༌ ཙལ༌ལ༌ ཏེ༌ ཡུལ༌ལི༌ མི༌ཞིག༌གི༌ཀ༌ སོང༌, ཡང༌ ཁོའེ༌ ཞིང༌ངི༌ཀ༌ ཕག༌གུན༌ལ༌ ཟན༌ ཏང༌ང༌ ཁོ༌ ལམ༌ཅུགས༌། 16ཁོའེ༌ ཕག༌གི༌ ཟན༌བོ༌ ཟོས༌ཏེ༌ ཁོ༌རང༌ངི༌ གྲོད༌པ༌ གྲང༌ཅུག༌ཅེས༌སི༌ དོད༌པ༌ ཅོས༌, ཨིན༌ནའང༌ ཁོའ༌ སུའིང༌ ཅའང༌ མ༌ཏངས༌།”

17“ཏེ༌ནེ༌ ཁོའ༌ སམ༌བ༌ ཡོངས༌ཏེ༌ ཟེརས༌, ‘ངའེ༌ ཨ༌བའེ༌ ལ༌པ༌ མང༌པོའེ༌ བྲང༌བྲངས༌ ཟོས༌ཏེ༌ ལག༌ལུས༌ བོར༌རད༌པིན༌, ཨིན༌ནའང༌ ང༌ འི༌ཀ༌ སྟོག༌རི༌ ཐོང༌ཏེ༌ ཤི༌ཀྱིས༌ རག༌། 18ང༌ ང༌རང༌ངི༌ ཨ༌བའེ༌ཀ༌ ལོགས༌ཏེ༌ སོང༌ཏེ༌ ཟེར༌ཨིན༌, “ངའེ༌ དཀོན༌མཆོག༌ དང༌ ཉེ༌རང༌ངི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌ནོག༌། 19ངའ༌ ཉེ༌རང༌ངི༌ བུ༌ཚ༌ ཨིན༌ ཟེར༌ཅེས༌སི༌ འོས༌པ༌ མན༌, ཉེ༌རང༌ངི༌ ལ༌པ༌ཞིག༌ ཙོགས༌ལ༌ ངའ༌ བོར༌ར༌ ཛད༌།”’ 20ཏེ༌ནེ༌ ཁོ༌ ལངས༌ཏེ༌ ཁོ༌རང༌ངི༌ ཨ༌བ༌ ཡོད༌ས༌ སོང༌།”

“ཁོ༌ ཨ༌བ༌ནེ༌ ཏ༌རུང༌ ཐག༌རིང༌ང༌ ཡོད༌ཏེའང༌ ཁོའེ༌ བུ༌ཚའ༌ ཡོང༌ང༌ ཐོང༌ཏེ༌ ཨ༌བའེ༌ སེམས༌ སྙིང༌རྗེ༌ གངས༌། ཨ༌བ༌ བང༌ཏངས༌ཏེ༌ སོང༌ ཡང༌ བུ༌ཚའ༌ ཁྲིལ༌ཏེ༌ པུག༌ ཏངས༌། 21བུ༌ཚའེ༌ ཁོའ༌ ཟེརས༌, ‘ཨ༌བ༌ལེ༌, ངའེ༌ དཀོན༌མཆོག༌ དང༌ ཉེ༌རང༌ངི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌ནོག༌། ངའ༌ ཉེ༌རང༌ངི༌ བུ༌ཚ༌ ཨིན༌ ཟེར༌ཅེས༌སི༌ འོས༌པ༌ མན༌།’”

22“ཨིན༌ནའང༌ ཨ༌བའེ༌ ཡོག༌པོ༌གུན༌ བོད༌ཏེ༌ ཟེརས༌, ‘གྱོགས༌པ༌ ཅོས༌, ཚང༌མའེ༌སང༌ རིན༌ཅན༌ ཀོས༌ ཁྱོངས༌ཏེ༌ ཁོའ༌ སྐོན༌, ལག༌པ༌ སེར༌རི༌ སེར༌དུབ༌ དང༌ རྐང༌པ༌ པ༌བུ༌ སྐོན༌། 23བེ༌ཙོ༌ གྱགས༌པ༌ ཁྱོངས༌ཏེ༌ སོད༌, ང༌དང༌གུན༌ནི༌ གྲོན༌ ཏངས༌ཏེ༌ གའ༌མོ༌ སྐྱིད༌པོ༌ ཅོ༌ཨིན༌, 24ཅིའ༌ཟེར༌ན༌ ངའེ༌ འི༌ བུ༌ཚ༌བོ༌ ཤི༌ཏེ༌ ཨིན༌པིན༌, ཏ༌ སོན༌ཏེ༌ ཨིན༌ནོག༌། སྟོར༌ཏེ༌ ཨིན༌པིན༌, ཏ༌ ཐོབ༌ཏེ༌ ཨིན༌ནོག༌།’ ཡང༌ ཁོང༌གུན༌ནི༌ གའ༌མོ༌ སྐྱིད༌པོ༌ ཅོ༌ཅེས༌ གོ༌ཟུག༌།”

25“ཏེན༌ན༌ ཏུས༌ལ༌ བུ༌ཚའ༌ ཆེན༌མོ༌བོ༌ ཞིང༌ནེ༌ ལོག༌ཏེ༌ ཁང༌པའེ༌ ཉེ༌མོ༌ ལེབ༌བ༌ཅིག༌, ཁོའ༌ ལུ༌ དང༌ རྩེས༌ ཏང༌ཁན༌ ཚོར༌། 26ཁོའེ༌ ཡོག༌པོ༌ཞིག༌ བོད༌ཏེ༌ ཅི༌ ཨིན༌ནོག༌ ཟེར༌ཏེ༌ ཏྲིས༌, 27ཡོག༌པོ༌བོའེ༌ ལན༌ཏངས༌, ‘ཉེ༌རང༌ངི༌ ནོ༌ ལོགས༌ཏེ༌ ཡོངས༌ ཡང༌ ཁོ༌ ཁམ༌ཟང༌ ཁྲངས༌པོ༌ ལེབ༌ པ༌སང༌ ཉེ༌རང༌ངི༌ ཨ༌བའེ༌ པེ༌ཙེ༌ གྱགས༌པ༌བོ༌ སད༌ཏེ༌ གའ༌མོ༌ སྐྱིད༌པོ༌ ཅོ༌ཨིན༌ ཨིན༌ནོག༌།’”

28“ཨ༌ཅོའ༌ སྲོ༌ ཡོངས༌ཏེ༌ ནང༌ཀུག༌ག༌ མ༌སོང༌། ཏེ༌ནེ༌ ཨ༌བ༌ ཕི༌ལོག༌ག༌ ཡོངས༌ཏེ༌ ཁོའ༌ ཇུ༌ཇུ༌ ནང༌ང༌ ཡོང༌ ཟེརས༌། 29ཨིན༌ནའང༌ བུ༌ཚའེ༌ ཨ༌བའ༌ ཟེརས༌, ‘ངའེ༌ འི༌ཟམ༌ ལོ༌ མང༌པོ༌ ཉེ༌རང༌ང༌ ཡོག༌པོ༌ ཙོགས༌ལ༌ ཞབས༌ཏོག༌ ཞུས༌པིན༌ ཡང༌ ཉེ༌རང༌ངི༌ ཁའ༌ ནམ༌ མ༌ཉནས༌? ངའ༌ ང༌རང༌ངི༌ ཛ༌འོ༌གུན༌ ཉམ༌པོ༌ གའ༌མོ༌ ཅོའ༌ལ༌ ཉེ༌རང༌ངི༌ རེ༌གུ༌ཞིག༌གའང༌ མ༌ཏངས༌། 30ཨིན༌ནའང༌ ཉེ༌རང༌ངི༌ འི༌ བུ༌ཚ༌ ཀ༌བོའེ༌ ཟུགས༌ཙོང༌མ༌གུན༌ ཉམ༌པོ༌ ཉེ༌རང༌ངི༌ ནོར༌ ཚང༌མ༌ གོད༌ལ༌ ཏངས༌ཏེ༌ ལོགས༌ཏེ༌ ཡོང༌ང༌ཅིག༌, ཉེ༌རང༌ངི༌ ཁོའེ༌ ཕིའ༌ པེ༌ཙེ༌ གྱགས༌པ༌བོ༌ སདས༌།’”

31“ཏེ༌ནེ༌ ཨ༌བའེ༌ ཁོའ༌ ཟེརས༌, ‘ངའེ༌ བུ༌ཚ༌ ཁྱོ༌རང༌ ཏུས༌གྱུན༌ ང༌ ཉམ༌པོ༌ ཨིན༌ནོག༌, ཡང༌ ངའེ༌ ཨིན༌ཁན༌ ཚང༌མ༌ ཁྱོ༌རང༌ངི༌ ཨིན༌ནོག༌། 32ཨིན༌ནའང༌ ང༌དང༌གུན༌ནི༌ གའ༌མོ༌ སྐྱིད༌པོ༌ ཅོ༌གོས༌ ཅིའ༌ཟེར༌ན༌ འི༌ ཁྱོ༌རང༌ངི༌ ནོ༌ ཤི༌ཏེ༌ ཨིན༌པིན༌, ཏ༌ སོན༌ཏེ༌ ཨིན༌ནོག༌། ཁོ༌ སྟོར༌ཏེ༌ ཨིན༌པིན༌, ཏ༌ ཐོབ༌ཏེ༌ ཨིན༌ནོག༌།’”

Currently Selected:

ལུ༌ཀ༌ 15: lbj

Highlight

Copy