ལུ༌ཀ༌ 17

སྡིག༌པ༌, ཏད༌པ༌ དང༌ ཁག༌ ཁུར༌ཅེས༌།

17:1-10

1གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “སྡིག༌པའེ༌ ནང༌ང༌ གྱེལ༌ཅུག༌ཁན༌ ཏན༌ཏན༌ ཇུང༌ཨིན༌, ཨིན༌ནའང༌ ཏེ༌བོ༌ ཇུང༌ཅུག༌ཁན༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌། 2འི༌ ཆུ༌ངུན༌གུན༌ནི༌ ནང༌ནེ༌ ཅིག༌ག༌ སྡིག༌པ༌ ཅོ༌ཅུག༌གི༌ སང༌ ཁོ༌རང༌ངི༌ སྐྱེའ༌ རན༌ཐག༌གི༌ རྡོའ༌ ཏགས༌ཏེ༌ གྱ༌ཚོའེ༌ ནང༌ང༌ ཕང༌ན༌ གྱལ༌། 3ཏེ༌ནེ༌ ཁྱོ༌ཞའེ༌ ཞས༌ཏེ༌ སུ༌ཞིག༌གའང༌ སྡིག༌པའེ༌ ནང༌ང༌ མི༌གྱེལ༌ཅེས༌ལ༌ ཏན༌ཏན༌ ཅོས༌།”

“ཀལ༌ཏེས༌ ཁྱོ༌ཞའེ༌ སྤུན༌ཞིག༌གི༌ སྡིག༌པ༌ ཅོ༌ན༌, ཁོའ༌ ཁའ༌སྐྱེས༌ཏེ༌ སྐྱོང༌, ཡང༌ ཀལ༌ཏེས༌ ཁོའེ༌ གྱོད༌པ༌ ཅོ༌ན༌ ཤགས༌པ༌ ཏོང༌། 4ཀལ༌ཏེས༌ ཁོའེ༌ ཉི༌མ༌ ཅིག༌གི༌ ནང༌ང༌ ལན༌ རྡུན༌ ཁྱོ༌ཞའེ༌ གྱབ༌གལ༌ལ༌ སྡིག༌པ༌ ཅོས༌ཏེ༌ ལན༌ རྡུན༌ ཁྱོ༌ཞའེ༌ཀ༌ ཡོངས༌ཏེ༌ གྱོད༌པ༌ ཅོ༌ན༌, ཁྱོ༌ཞའེ༌ ཁོའ༌ ཤགས༌པ༌ ཏོང༌།”

5སྐུ༌ཚབས༌གུན༌ནི༌ གཙོ༌བོའ༌ ཟེརས༌, “ང༌ཞའ༌ ཏད༌པའེ༌ ནང༌ང༌ ལྡན༌ ཅུག༌ག༌ ཛད༌།”

6གཙོ༌བོའེ༌ ལན༌སལས༌, “ཀལ༌ཏེས༌ ཁྱོ༌རང༌ང༌ ཉུང༌སྐར༌རི༌ ས༌འོན༌ ཆུ༌ངུན༌ ཟམ༌ཤིག༌གི༌ ཏད༌པ༌ ཡོད༌ན༌ ཁྱོ༌རང༌ངི༌ འོ༌སེ༌ ལྕང༌མའ༌ ཟེར༌, ‘པ༌ཀྲག༌ནེ༌ པུད༌ཏེ༌ ཚོའེ༌ ནང༌ང༌ སོང༌’ ཡང༌ ཏེ༌བོའེ༌ ཁྱོ༌རང༌ངི༌ ཁའ༌ ཉན༌ཨིན༌།”

7“ཁྱོ༌རང༌ངི༌ ཡོག༌པོ༌ཞིག༌ ཞིང༌སྔོའ༌ ཡ༌ ལུག༌ ཚོའ༌ སོང༌ཏེ༌ ཁང༌པ༌ ལོག༌ཏེ༌ ཡོང༌ང༌ཅིག༌, ཁྱོ༌རང༌ངི༌ ཁོའ༌ ཟེར༌ཨིན༌ན༌, ‘ཡོང༌, འི༌ཀ༌ དུགས༌ཏེ༌ ཁར༌ཇི༌ ཟོ༌’? 8ཁྱོ༌རང༌ངི༌ ཁོའ༌ མི༌ཟེར༌ར༌, ‘གོང༌ཟན༌ནི༌ གྲལ༌གྲིག༌ ཅོས༌, ཡང༌ ང༌ ཟའ༌ དང༌ ཐུང༌ ཚར༌ཚར༌ ཚག༌པ༌ སྐྱེ༌རགས༌ ཅིངས༌ཏེ༌ ཞབས༌ཏོག༌ ཅོས༌, ཏེ༌ སྟིང༌ནེ༌ ཁྱོ༌རང༌ ཟ༌ཐུང༌ནའང༌ གྲིག༌’ 9ཟེར༌ཁན༌ ནང༌ཞིན༌ ཡོག༌པོ༌བོའེ༌ ཅོས༌པ༌, ཁྱོ༌རང༌ངི༌ ཁོའ༌ ཐུག༌རྗེ༌ཆེ༌ ཟེར༌ཨིན༌ན༌? ཏན༌ཏན༌ལ༌ མི༌ཟེར༌། 10ཏེན༌ན༌ ཙོགས༌ལ༌ མོལ༌ཁན༌ ནང༌ཞིན༌ ཁྱོ༌ཞའེ༌, ཅི༌ཚང༌མ༌ ཅོ༌ཚར༌ཏེ༌, ཁྱོ༌ཞའེ༌ ཟེར༌གོས༌, ‘ང༌ཞའ༌ རྩི༌ཝའེ༌ འོས༌པ༌ མན༌ཁན༌ ཡོག༌པོ༌ ཨིན༌, ཁག༌ ཀལ༌ཁན༌ནི༌ ལས༌པོ༌ ང༌ཞའེ༌ ཅོས༌པིན༌།’”

ཛེ༌ནད༌ ཡོང༌ཁན༌ རྕུ༌ གྱལ༌ཅུག༌ག༌ ཛདས༌།

17:11-19

11གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌མི༌ གྱལ༌ས༌ ཆོགས༌ལ༌ སྐྱོད༌ ཟ༌ནེ༌ ས༌མར༌རི༌ཡཱ༌ དང༌ གཱ༌ལིལ༌ལིའི༌ ཡུལ༌ཇོངས༌སི༌ པར༌ཚམས༌ནེ༌ སྐྱོདས༌། 12ཁོང༌ གམ༌ཡུལ༌ཞིག༌གི༌ ནང༌ང༌ སྐྱོད༌ ཟ༌ནེ༌ ཛེ༌ནད༌ ཡོང༌ཁན༌ རྕུའི༌ ཡེ༌ཤུ༌ ཐོང༌ ཡང༌ ཐག༌རིང༌ང༌ དུགས༌ཏེ༌ 13ཀུ༌ཅོ༌ ཏང༌ཨིན༌ ཁོང༌གུན༌ནི༌ ཟེརས༌, “ཡེ༌ཤུ༌ སྤོན༌བོ༌ལེ༌, ང༌ཞའེ༌ཀ༌ སྙིང༌རྗེ༌ ཛད༌དའང༌།”

14ཁོང༌གུན༌ ཟིགས༌ས༌ཅིག༌ ཁོང༌ངི༌ མོལས༌, “སོང༌, ཁྱོ༌ཞ༌རང༌ངི༌ ཟུགས༌པོ༌ བླ༌མ༌གུན༌ལ༌ སྟོན༌།” ལམ༌ནེ༌ ཆེན༌ ཡོད༌ ཟ༌ནེ༌ ཁོང༌གུན༌ ཛེ༌ནད༌ནེ༌ ཕན༌།

15ཁོང༌གུན༌ནི༌ ཕྲོ༌ནེ༌ ཅིག༌གི༌ ནད༌ གྱལ༌ཁན༌བོ༌ ཐོང༌ཏེ༌ སྐད༌ ཆེན༌མོའེ༌ ནང༌ང༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ལོགས༌ཏེ༌ སོང༌། 16ཡང༌ ཡེ༌ཤུའི༌ ཞབས༌སི༌ དུན༌ལ༌ གྱེལ༌ཏེ༌ ཁོང༌ང༌ ཐུག༌རྗེ༌ཆེ༌ ཞུས༌། ཁོ༌ ས༌མར༌རི༌ཡཱ༌པ༌ཞིག༌ ཨིན༌པིན༌།

17ཡེ༌ཤུའི༌ མོལས༌, “ཁྱོ༌ཞ༌ རྕུ༌ ནད༌ནེ༌ ཕན༌ མ༌ཕན༌ས༌? ཞན༌ རྒུ༌བོ༌ ཀ༌རེ༌? 18ཡ༌ཧུ༌དཱ༌པ༌ མན༌ཁན༌ ཁྱོ༌རང༌ ཅིག༌པོ༌ མ༌ནེ༌, ཞན༌ ཚང༌མ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའ༌ལ༌ ལོགས༌ཏེ༌ མ༌ཡོངས༌ས༌?” 19ཏེ༌ནེ༌ ཁོང༌ངི༌ ཁོའ༌ མོལས༌, “ལོངས༌ ཡང༌ སོང༌, ཁྱོ༌རང༌ངི༌ ཏད༌པའེ༌ ཁྱོ༌རང༌ གྱལ༌ཅུགས༌ཏེ༌ ཨིན༌།”

དཀོན༌མཆོག༌གི༌ གྱལ༌སྲིད༌ ཉེ༌མོ༌ ལེབ༌།

17:20-37

20ཞག༌ཤིག༌ ཕ༌རུ༌ཤི༌པ༌གུན༌ནི༌ དཀོན༌མཆོག༌གི༌ གྱལ༌སྲིད༌ ནམ༌ ལེབ༌ཨིན༌ ཟེར༌ཏེ༌ ཏྲི༌ཁན༌བོའ༌ གཙོ༌བོ༌ ཡེ༌ཤུའི༌ ལན༌སལས༌, “ཞིབ༌ཅ༌ ཅོས༌ཏེ༌ ལྟེན༌ དུག༌ནའང༌ དཀོན༌མཆོག༌གི༌ གྱལ༌སྲིད༌པོ༌ ལེབ༌བ༌ མི༌ཐོང༌, 21ཡ༌ མི༌གུན༌ནི༌ ‘འི༌ཀ༌ནེ༌ ཡ༌ འ༌ཀ༌ནེ༌ དུག༌’ མི༌ཟེར༌ ཅིའ༌ཟེར༌ན༌ དཀོན༌མཆོག༌གི༌ གྱལ༌སྲིད༌ ནི༌ ཁྱོ༌ཞ༌གུན༌ནི༌ ཕྲོའ༌ ཡོད༌ཏེ༌ ཨིན༌ནོག༌།”

22ཏེ༌ནེ༌ ཁོང༌ངི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “ཏུས༌པོ༌ ལེབ༌ཨིན༌ ནམ༌ ཁྱོ༌ཞ༌གུན༌ནི༌ མི༌རིགས༌སི༌བུ༌ ལོགས༌ཏེ༌ ཡོང༌ཅེས༌སི༌ ཞག༌པོ༌ ཐོང༌ཅེས༌སི༌ དོད༌པ༌ བོར༌ཨིན༌ ཨིན༌ནའང༌ ཐོང༌ མི༌ཐུབ༌། 23མི༌གུན༌ནི༌ ཁྱོ༌ཞའ༌ ཟེར༌ཨིན༌, ‘ལྟོས༌, ཁོང༌ འི༌ཀ༌ནེ༌ ཡ༌ འ༌ཀ༌ནེ༌ དུག༌’, ཁོང༌གུན༌ནི༌ སྟིང༌རང༌ནེ༌ བང༌ཏངས༌ཏེ༌ མ༌ཆ༌། 24སྐམ༌ལག༌གི༌ འོད༌ ནམ༌ཁའེ༌ ཆོགས༌ ཅིག༌ནེ༌ ཞན༌ཆོགས༌ ཅིག༌ག༌ ཁྱེབས༌ས༌ ཙོགས༌ མི༌རིགས༌སི༌བུ༌ ལོགས༌ཏེ༌ ཡོང༌ ཟ༌ནེའང༌ ཆེན༌། 25ཨིན༌ནའང༌ ཏེ༌ཏུས༌སི༌ སང༌ སྔུན༌ལ༌ ཁོའ༌ རྡུག༌ངལ༌ མང༌པོ༌ ཐོངས༌ཏེ༌ འི༌ མི༌རབས༌པོའེ༌ ཁོ༌ སུ༌ ཨིན༌ཁན༌བོའེ༌ཀ༌ ཏད༌པ༌ མ༌ཅོའ༌ ཕང༌ཨིན༌།”

26“མི༌ ཀྲང༌པོ༌ ནོ༌ཨའེ༌ ཏུས༌ལ༌ ཇུང༌ཁན༌ ཙོགས༌ མི༌རིགས༌སི༌བུ༌ ཡོང༌ངི༌ ཏུས༌ལའང༌ ཇུང༌ཨིན༌ 27ནོ༌ཨ༌ གྲུ༌ཟིང༌ངི༌ ནང༌ང༌ ཞུགས༌སི༌ ཞག༌ ཚོག༌པ༌ མི༌གུན༌ ཟེན༌, ཐུང༌ཨིན༌, ན༌མ༌ ཅོ༌ཨིན༌ དང༌ བག༌མ༌ ཏང༌ཨིན༌ དུགས༌། ཏེ༌ནེ༌ ཇིག༌རྟེན༌ནི༌ཀ༌ ཆུ༌ལོག༌ ཡོངས༌ཏེ༌ མི༌ཚང༌མ༌ ཆུའི༌ ནང༌ང༌ ནུབ༌ཏེ༌ ཤི༌།”

28“ཏེན༌ན༌ ཙོགས༌ལ༌ ལོད༌ ཟེར༌ཁན༌ནི༌ ཏུས༌ལའང༌ སོང༌པིན༌, མི༌གུན༌ ཟེན༌, ཐུང༌ཨིན༌, ཉོ༌ཨིན༌, ཚོང༌ཏང༌ཨིན༌, ཞིང༌ ཏབ༌ཨིན༌ དང༌ ཁང༌པ༌ རྩིག༌ཨིན༌ ཡོད༌པིན༌, 29ཨིན༌ནའང༌ ལོད༌ སོ༌དོམ༌མི༌ གྱལ༌ས༌ནེ༌ བིང༌ང༌ཅིག༌, ནམ༌ཁའ༌ནེ༌ མེ༌ དང༌ མུ༌ཟི༌ ཞེན༌ཨིན༌ ཡོད༌ཁན༌གུན༌ བབས༌ཏེ༌ ཚང༌མ༌ མེད༌ཁན༌ སོང༌། 30ཏེན༌ན༌ ཙོགས༌ མི༌རིགས༌སི༌བུ༌ ཡང༌སྐྱར༌ སྐྱོད༌དི༌ ཏུས༌ལ༌ ཇུང༌ཨིན༌། 31ཏེ༌ ཞག༌ག༌ ཁང༌པའེ༌ ཁེ༌ཐོག༌ག༌ ཡོད༌ཁན༌གུན༌ ཡོག༌ག༌ བབས༌ཏེ༌ ཁང༌པའེ༌ ནང༌ང༌ ནོར༌གུན༌ ལེན༌ན༌ལ༌ མ༌ཆ༌། ཏེན༌ན༌ ཙོགས༌ལ༌ ཞིང༌ངི༌ཀ༌ ལས༌ ཅོ༌ཨིན༌ ཡོད༌ཁན༌གུན༌ ལོགས༌ཏེ༌ ཁང༌པའ༌ ཅི༌ཏོང༌ ལེན༌ན༌ལ༌ མ༌ཆ༌། 32ལོད༌དི༌ ན༌མའ༌ ཇུང༌ཁན༌བོ༌ ཨིད༌ཏུ༌ ཅོས༌། 33རང༌སྲོག༌ ཐམས༌ཏེ༌ དུག༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ངའེ༌ ཕིའ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ནི༌ དེན༌བའེ༌ མི༌ཚེ༌བོ༌ སྐྱོབ༌ཨིན༌། 34ངའེ༌ ཁྱོ༌ཞ༌གུན༌ལ༌ ཟེར༌རད༌, ཏེ༌ ཚན༌ལ༌ མི༌ ཉིས༌ མལ༌ཙ༌ ཅིག༌གི༌ཀ༌ ཉིད༌ ཏངས༌ཏེ༌ ཡོད༌ཁན༌གུན༌ནི༌ ནང༌ནེ༌ ཅིག༌པོ༌ ནམ༌ཁའ༌ ཁྱེར༌ར༌ ཛད༌ཨིན༌ ཡང༌ ཅིག༌པོ༌ བོར༌ཨིན༌། 35རང༌ཐག༌གི༌ཀ༌ ཀྲོ༌ ཐག༌ཨིན༌ ཡོད༌ཁན༌ བུ༌མོ༌ ཉིས༌སི༌ ནང༌ནེ༌ ཅིག༌པོ༌ ནམ༌ཁའ༌ ཁྱེར༌ར༌ ཛད༌ཨིན༌ ཡང༌ ཅིག༌པོ༌ བོར༌ཨིན༌།” 36#17:36 སྔུན༌མའེ༌ གརིས༌པའེ༌ སྐད༌དི༌ སྤེ༌ཆའེ༌ མང༌ཆེའེ༌ ནང༌ང༌ 17:36 མེད༌ཏེ༌ ཨིན༌ནོག༌། སྟིང༌མ༌ ཁ༌ཅིག༌གི༌ “མི༌ ཉིས༌ ཞིང༌ང༌ ཡོད༌ཏུས༌ ཅིག༌པོ༌ ལེན༌ཨིན༌, ཡང༌ ཅིག༌པོ༌ བོར༌ཨིན༌” བྲིས༌ཏེ༌ ཡོད༌ཏེ༌ ཨིན༌ནོག༌།

37ཁོང༌གུན༌ནི༌ ཏྲིས༌, “གཙོ༌བོ༌, འི༌ ཚང༌མ༌ ཀ༌རུ༌ ཇུང༌ཨིན༌?”

ཁོང༌ངི༌ ལན༌སལས༌, “རོ༌ ཡོད༌ས༌ ཤ༌ ཟའ༌ཁན༌ནི༌ ཅ༌གུན༌ ཁོར༌ར༌ནོག༌། ༼ཁྱོ༌ཞའེ༌ ཏེ༌ སྟགས༌གུན༌ ཇུང༌ང༌ ཐོང༌ང༌ཅིག༌ ཐའ༌མའེ༌ ཏུས༌ ལེབ༌ཅེས༌པོ༌ ཁྱོ༌ཞའ༌ ཧ༌གོ༌གོས༌།༽”

Currently Selected:

ལུ༌ཀ༌ 17: lbj

Highlight

Copy