Matiu 15

Juu yaab a kaal a bɔr

(Mag 7:1-13)

1Iyaayoo nmɔn le Farasiim nin ban wɔɔnn Uwonbɔr a siim nan nyan Jerusalam dan ki nan baan Yisa ke, 2“Ba ŋa wee a bɔɔnɔɔb kaa nɔɔ yaajam a kaalaa? Bi ji le kaa sin nir bi nɔɔi!”

3Le Yisa jiin ke, “Ba ŋa wee nim bii Uwonbɔr a siim, ni yaaja kaal buu? 4Nan bu-n, Uwonbɔr ke, ‘Sei a na nin a baa jilima’; ‘Wan sug u na bee u baa ke, bin ku wa.’ 5Amaa nim ma wɔɔn ke, u ninfo bei u na bee u baa ke, ‘Ŋaah bi li kan literil lan n ban ni, ni kpann Uwonbɔr yaan na’, 6naa ji ye limugil nin un sei u baa niba. Naah tun man nan, ni ma wɔɔn ke naa ŋmag Uwonbɔr a siimin ni, ni yaaja kaalin bu. 7Nim bilinlarib nan! Azaya kaah nan pag ilinlen leen ki jiin ni paami sin ye ibamɔn le:

8‘Bininfob nan tenn nim jilima bi mɔɔŋi a binba le,

amaa bi sufu fɔg nima.

9Bi jiɛnim yɔli le,

nan bu-n bi jɔɔ bininfosaalib a siinim le ki wɔɔn.’#Azaya 29:13”

Tiwann tan ŋaan uninfo tijaginn

(Mag 7:14-23)

10Le Yisa nan yin kuninfogbaluŋin ki bei bi ke, “Ni pela man, wee ki biɛ nan wee n yin pag nan. 11Nan kɔɔ uninfosaal a mɔnn kaa ŋa u ‘tijaginn’ ni; amaa nan nya u mɔnn ni, ni ma ŋaan u ‘tijaginn.’ ”

12Le u bɔɔnɔɔb nan dan u ban ki nan baan u ke, “A nyi ke Farasiimin kaah gbir a bɔrin bi ŋuui fii a buu?”

13Le u jiin ke, “Niwann nan biɛn wee n Baa wan be paab nan kaa ŋuun ni, bi li ŋab ni ki gab. 14Ni jiɛn baah, bi nann bijɔɔm le ki da bi jɔɔn tab; ke ni ye ujɔɔn da ujɔɔn kpiɛg ke, see ke bi biɛn tan lu kiboogin.”

15Le Piita len ke, “Wɔɔn ti libɔŋal nan a taai ni.”

16Le Yisa baan bi ke, “Naa le laa biɛ? 17Naa nyi ke nan kɔɔ bimɔbin yin jiir lipoolin le ki ji tan nya tigbanann ni naa?” 18Amaa tiwann tan nya bimɔbin ni nyann sufu ni le, ni ma ŋaan uninfo ‘tijaginn.’ 19Uninfo a sufu ni le tipotiɛbir, nin lininfokul, nin iwanchɔgin toon, nin lipiibanl nin lijabanl, nin nnaayigim, nin tibɔkar a siɛra, nin kutingbiig nya. 20Ni nan biɛn li ŋaan uninfosaal tijaginn amaa tinɔɔjaginn a jim kaa li fir ŋa uninfo tijaginn ni.”

Upii a yada

(Mag 7:24-30)

21Tɔ, le Yisa nyan nin yaan ki jon Taya nin Sidonn a yagil 22Ki miin Kenann#15:22 Kenann a ninfob nin Juu yaab kaa nan jɔɔ nɔɔ nin tabi. Nan bu-n Juu yaab kaa nan kaan Kenann a ninfobi. a tiŋ a pii uba mu nan be liyagil nmɔn paam, ki dan Yisa ban ki nan kuun paab ke, “Uyudaan, Defid a yaabil, sam kunyunyunbaag ni. Kinaanbiig le be n bisa ni, ki mugir u takpem.” 23Le Yisa kaa jiin tiba; amaa le u bɔɔnɔɔb bei u ke, “Ŋɔɔr upii nan na, nan bu-n u nɔɔ ti bɔɔn le kuun.”

24Le Yisa jiin ke, “Bi nan tum Iziral yaab ban nann ipee ki borin a binba ban le.”

25Le upii nmɔn dan ki nan gbaan u nintogil ki bei u ke, “Uyudaan terim ni.”

26Le u jiin ke, “Naa ŋan nin bin ta nbuwaab a jiir ki sei bi bɔyi.”

27Le upii nmɔn jiin ke, “Nn, Uyudaan, ni sin ye ibamɔn le; amaa ibɔ yan dɔ bi dam a jijibol kaa lan ijibul yan lur bi dam a nintogil a piimi.”

28Le Yisa jiin ke, “Upii, a jɔɔ yada takpem! Nan wee a ban nan tun na.” Libol nmɔn le u bisa nmɔn kan kutebug.

Yisa kaah nan teb bibaarib takpem man

29Le Yisa nyan niin ki jon Galilii a mɔgilin yaan. Le ki don lijɔɔl a paab ki tan kal. 30Le kuninfogbaluŋ dan u ban ki ŋmag nwɔbim nin bijɔɔm nin ndiɛm nin nbirim nin ban bu iwiɛn a booli biɛn, ki nan bil u nintogil; le u che bi biɛn kan kutebug. 31Kuninfogbaluŋin kaah kan nbirim pag, ndiɛm choon nbamɔmin, nwɔbim mu choon, bijɔɔm a num ligir wee bi ga-n, le ni gar bi le bi pag ki don Iziral yaab a Wonbɔru a yinl.

Yisa kaah jin bijab turina man

(Mag 8:1-10)

32Le Yisa yin u bɔɔnɔɔb ki bei bi ke, “Kunyunyunbaag jɔɔm nin bininfob nan, nan bu-n iweehn itaa sɔ le bi be n ban do, kaa jɔɔ tijiir bin ji. Maa ban bin kun nin nkomi, ke bi ta li fig nsann.” 33Le u bɔɔnɔɔb baan u ke, “La ban wee ti yin kan tijiir kukunkɔɔg nan yaan ki sei kuninfogbaluŋ nan wee tin foo bi biɛn naa?”

34Le u baan ke, “Ni jɔɔ boroboro kon i ŋaa?”

Le bi jiin u ke, “Ilile nin njanbum wama.”

35Le u bei bininfobin ke bin kalim tum. 36Le ki yuur boroboro kon ilile nin njanbumin, ki sei Uwonbɔr kunɔɔpoog i bu, le ki war war sei u bɔɔnɔɔb, le bi ta tol bininfob nmɔn. 37Le bininfobin biɛn jin ki gbee ki gur; le u bɔɔnɔɔb lagin tijiir tan gur nmɔn, le ti gbee tikachar tilile. 38Bijab ban nan jin tijiir nmɔn nan ye turina le, bipiib nin nbuwaab a kanl kaa nan kpiɛ niin ni. 39Ni bɔɔn bu le Yisa jaa bininfob nmɔn, le ki kɔɔ kuŋaluŋin ki jon Magadann a tingbɔŋin.

Currently Selected:

Matiu 15: KUGL

Highlight

Copy