Matiu 16
16
Baah ban bin kan ligaril a toonl man
(Mag 8:11-13; Lug 12:54-56)
1Le Farasii yaab nin Sadusi yaab dan Yisa ban ki nan mag u lig, le ki baan u ke, un wɔɔn bi limagil lan nyan paab ni.
2Le u jiin ke, “Ni ye titalangbann nan mann kujɔɔg ke, ni ti bei le ke, ‘Won nan a taaŋ wo li ween,’ 3Amaa ni ye ke njakpanyiɛn titalangbann mann ki nan bɔnn ke, ni ti bei le ke ‘Dinan ma, ntafaam li da.’ Ni bugir titalangbann a sam, amaa le kaa sin fir bugir n-yonn nan ma. 4Npooton nin iwanchɔgin toon a ninfob nan ban bin kan ligaril a toon; amaa maa yin tun ligaril a toonl liba ki sei bi; see Jona a garil a toonlin a binba.” Le Yisa fɔr ki jiɛn bi.
Farasii yaab nin Sadusi yaab a wɔɔnim a bɔr
(Mag 8:14-21)
5Tɔ, Yisa nin u bɔɔnɔɔbin kaah tan lɔŋ limɔgil a dool n-yonn man ni, le u bɔɔnɔɔbin ni tiɛr ke baa ŋmag boroboro.
6Le u bei ke, “Ni li nyi ki li guu ni ba ki jiin Farasii yaab nin Sadusi yaab a boroboro a nyɔgimin bu.”
7Le bi nin piin ki bei tab ke, “Taah kaa ŋmag boroboro ki dan ni bu.”
8Le u biɛ baah pag man nmɔn ki baan bi ke, “Nim yada parim dam nan, babu wee ni bei tab ke naah kaa jɔɔ boroboro-n buu? 9Naa le laa biɛ ni taai yaa? Naa tiɛr maah nan ta boroboro kon iŋmu ki jin bijab turiŋmu-n naa? Tikachar ti ŋaa wee ni nan lagin tijiir tan nan gurin naa? 10Bee naa ji tiɛr bijab turina ban wee n nan ta boroboro kon ilile ki jin bin naa? Ni nan lagin tijiir tan nan gurin ki gbeen tikachar ti ŋaa? 11Nii wee naa biɛ ke naa ye boroboro le n pag gaa? Ni li nyi Farasii yaab nin Sadusi yaab a boroboro a nyɔgimin bu.” 12Le u bɔɔnɔɔbin nin biɛ ke naa ye boroboro a nyɔgim bamɔn bu le u pag bi ke bi li guu bi ba; amaa Farasii yaab nin Sadusi yaab a wɔɔnimin bu.
Piita kaah nan pag ki wɔɔn Yisa kaah ye wan
(Mag 8:27-30; Lug 9:18-21)
13Yisa kaah nan tan foo Sizariya Filipi a tingbɔŋin n-yonn man ni, le ki baan u bɔɔnɔɔb ke, “Bininfob ke Uninfosaal a Big ye ŋmiɛ?”
14Le bi jiin u ke, “Biba ke a ye Jɔnn Wan Fu Bininfob Uwonbɔr a Nyunfulin le, le biba mu ke a ye Elaja le, le biba mu ke a ye Jerimaya le, bee a ye bilinlem ban nan be yaayoo a ni uba le.”
15Le u nin baan bi ke, “Amaa ke ni mu, ni ke n ye ŋmiɛ?”
16Le Simɔnn Piita bei u ke, “Fin le ye Masiya, Uwonbɔr wan fo nan a bija.”
17Le Yisa jiin ke, “Fin Simɔnn Jona a bija nan, tikaar be a bu, nan bu-n naa ye uninfosaal le kpiir tibɔr nan ki wɔɔn niŋi, amaa n Baa wan be paab nan le kpiir ti ki wɔɔniŋ. 18N beiŋ le Piita#16:18 Piita a taai le ye litangbagil., a ye litangbagil le; litangbagil nan bu le n yin ta biwonjiɛm a laguŋ ki tɔɔn; le nkum kaa li fir nyaŋ bi. 19N li seiŋ paab a naamin a naanganpiim; nan wee a li lol dulinya nan yaan, ni ma le yin lol paab, nan wee a ji lor jaa dulinya nan yaan ni, man mu le ni yin lor jaa paab.”
20Le Yisa nan kpaan u bɔɔnɔɔbin ke bi li nyi bin bei uba ke u ma ye Masiya.
Yisa kaah nan pag u fala a jim nin u kum bu man
(Mag 8:31; 9:1; Lug 9:22-27)
21Naah nan nyan iyaayoo ki jɔɔ chaa, le Yisa nan piin ki bei u bɔɔnɔɔb ke ni kpaa le ke un jo Jerusalam, amaa kitiŋ a ninkpeeb, nin biminmanib a yudam, nin ban wɔɔnn Uwonbɔr a siim nan, li mugir u takpem ki ku u; amaa iweehn itaa daal Uwonbɔr li fiin u nkumin.
22Le Piita yin u ki nyan ngbaan, le ki fuun u bu ke, “Aai, Uyudaan!” Tibɔbir nan kaa li dan a bu.”
23Le Yisa gbiɛ lig Piita ki bei u ke, “Sintani nan, fɔɔr n ban na! A ye litangbag gbiɛrikaal le n samin, nan bu-n ŋaa tiɛr nan ye Uwonbɔr yaan bu, le ki tiɛr nan ye uninfosaal yaan.”
24Amaa le ki bei u bɔɔnɔɔb ke, “Wan ban un nɔɔm ke, see ke u yii u ba le ki yuur u kum a dapunpunl ki nɔɔm. 25Nan bu-n wan kaa chee un weeh u sayiig n bu ke, u ma na yin lan u miɛfol, amaa wan weeh u sayiig n bu ke u ma na yin kan limiɛfol nin ibamɔn. 26Ni ye uninfo jɔɔ dulinya nan a jɔɔm biɛn, wee ki nan lann u miɛfol ke, ba a nyɔɔr wee u yin kan naa? Ba wee uninfo li fir ta ki kpenn u miɛfolaa? 27Nan bu-n uninfosaal a Big na li jirin nin u Baa a pag, nin u malakam iyaayoo nmɔn, u na li yɔ uninfo biɛn nin u toon kaah ye man. 28N bei ni ibamɔn le, biba be doo kaa li kpo see ke bi nan kan Uninfosaal a Big kaah na li foon nin nnaam man.”
Currently Selected:
Matiu 16: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
