Matiu 27

Baah ta Yisa ki sei Palati man

(Mag 15:1; Lug 23:1-2; Jɔnn 18:28-32)

1Naah nan won kutaag njakpiin, le kumanug a yudam nin bininkpeeb nan bon baah li ku Yisa man. 2Le bi lol u tikulor ki ta u ki ŋubin ubɔr yudaau wan wee bi yi u ke Palati a nɔɔn.

Judasi kaah kpo man

(Litoonl 1:18-19)

3Judasi, wan nan kɔɔr Yisa n kaah gbir ke bi yin ku Yisa n ni, le u sufu bii pam, le u ta tikur a ligibim pitaa-n ki ta jiin ki tan sei kumanug a yudam nin bininkpeebin. 4Le ki len ke, “N ŋa tibira, nan bu-n n kɔɔr uninfo wan kaa jɔɔ tibira.” Le bi jiin ke, “Aho, ti mu a baga ji be niin lee? Ni ye a yaa bɔr le.”

5Le Judasi ta iligin ki gab iwonjiɛn niin n-yaan le ki nyan ki tan jɔn uba.

6Le kumanug a yudam pii nligibimin nmɔn le ki ke, “I ye ncham a ligi le, ti siim kaa chee ke ti ta iligi nmɔn ki kpiɛ iwonjiɛn niin a ligin bu.” 7Mambu, le bi kal ki tiɛr jiin ilig nmɔn paam, ki nan ta daa uyɔgmaar a tiŋ ke bi li pii bicham nin yaan. 8Mambu le che bi yi kitiŋ nmɔn ke, Ncham a tiŋ hali nin dinan. 9Le ni gbeen ulinlenn Jerimaya kaah nan len nan ni ke: “Bi ta tikur a ligibim pitaa ki yɔn u bu, ke Iziral yaab biba kaah chee ke u daag le ye man ni, 10ki daa uyɔgmaar a tiŋ, ke Uyudaan Uwonbɔr kaah wɔɔnim man ni.”

Palati kaah nan baan Yisa ibinbaan man

(Mag 15:2-5; Lug 23:3-5; Jɔnn 18:33-38)

11Le bi ta Yisa ki tan siin kitiŋ nmɔn a bɔr yudaau a nintogil, le ubɔr yudaan mu baan u ke, “Fin le sin ye Juu yaab a bɔr win naa?”

Le u jiin ki ke, “Nn, ke ŋaah len man ni.” 12Kumanug a yudam nin bininkpeebin kaah bii u man ni, waa nan jiin niba. 13Le Palati baan u ke, “Ŋaa gbir baah pag man ki biiŋ ŋaa?” 14Amaa le Yisa si ŋmin hali kaa jiin niba. Le ni gar ubɔr yudaan nin takpem.

Palati kaah jaa ke bin ku Yisa man

(Mag 15:6-15; Lug 23:13-25; Jɔnn 18:39—19:16)

15Tɔ, yuglagir a chiig a jim a yonn biɛn ke, kitiŋ nmɔn a yudaau ti nyan uninfo uba le kuloondiigin, wan wee bininfob ban win ki jaa. 16Uba nan be kuloondiig nmɔn yaan iyaayoo, le u yinl ye Barabasi, ke bininfobin nyi u toonbir bu. 17Baah nan nan lagin n-yonn man ni, le Palati baan bi ke, “Ŋma wee ni ban n nyan u kuloondiigin ki jaa: Barabasi bee Yisa wan wee bi yi u ke Masiya nnaa?” 18Nan bu-n Palati nan nyi naah ye linunchɔril bu le bi choo Yisa ki nan ŋa u nɔɔn.

19Palati kaah la nan ka ji Yisa tibɔr nan, le u poo tun ntoon ke: “Nyan a nɔɔ uninfo wan kaa jɔɔ bir nan a bɔrin na, nan bu-n kunyiɛg n won dɔgin uja nmɔn a dindɔgin ti mugim pam.”

20Le kumanug a yudam nin Juu yaab a ninkpeeb bei kuninfogbaluŋin ke bin bei Palati ke un nyan Barabasi jaau wee ki sin ku Yisa.

21Le Palati le ji mann ki baan bi, “Bininfob bilee nan ni ban n nyan ŋma jaa?” Le bi jiin ke “Barabasi.”

22Le Palati le ji mann baan bi ke, “Ke Yisa wan wee bi yi u ke Masiya n ma, ni ban n ŋa u nii?”

Le bi biɛn len ke, “Kpaa mu lidapunpunl buu!”

23Le Palati baan bi ke, “Ba buu? U bir lee jann ye ti laa?”

Le bi mann tiɛn paab ki ke, “Kpaa mu lidapunpunl buu!”

24Palati kaah nan biɛ ke u pag ki chaa ke naa jɔɔ tinyɔɔrin, amaa wee bininfob a mɔb nan pɔɔgirin, le u ta nnyum ki nir u nɔɔi, bininfob n-yaa numin, le ki sin len ke, “N nɔɔ kaa be uja wan kaa jɔɔ tibir nan a cham a nyamin ni. Ni ye ni yaa bɔr le.”

25Le bininfobin jiin ke, “Nn, che u cham li be tim nin ti buwaab a yuli buu!”

26Le Palati nyan Barabasi ki jaa. Amaa le ki sin che bi boo Yisa inaalab, ki jaa bi ke bin tan kpaamu lidapunpunl buu.

Bitɔtogib kaah nan laa Yisa man

(Mag 15:16-20; Jɔnn 19:2-3)

27Le kitiŋ nmɔn a yudaau Palati a tɔtogib ta Yisa ki kɔɔn Palati a naakoon#27:27 Palati a naakoon nmɔn Juu yaab a leen yin bi yi ki ke ‘Peritoriɛm’ le., le bitɔtogib lagin ki nan gɔɔn u. 28Bi nan pir u daala n le, le ki ta daalamaŋ ki yeen u, 29ki loo ikunkon a yuchigirig ki chigin u. Ki ta kijaangbiɛg ki ŋubin u nɔɔjiim. Le ki gbaan u nintogil ki laa u ki ke, “Juu yaab a bɔru, ti pooriŋ!” 30Ki piin ki siin timɔsann jaar u bu, le ki ga kijaangbiɛg kan wee bi bi ta ŋubin win ki ta fa fa u yul. 31Baah nan laa u ki gbee n-yonn man ni, le bi pir u daalamaŋin, le ki ta u tɔɔl a daala ki yeen u, le ki ta u ki jon nan yaan wee bin yin kpaa win.

Baah nan kpa Yisa lidapunpunl bu man

(Mag 15:21-32; Lug 23:26-43; Jɔnn 19:17-27)

32Baah nan chaa nyan Palati a naakoon nin, le bi tan kan Sarene a tiŋ a jaa uba le u yinl ye Simɔnn, le bi choo u, ki mug u le u tu Yisa a dapunpunl. 33Le bi tan foo nan yaan wee bi yi ke, Goligota (wee ni taai ye kuyukpabugin). 34Le bi ta ndaam nin tiwantunton ki ŋmarin tab ki ta sei Yisa ke un nyu, le u len mi ki yii kaa nyun mi. 35Baah nan kpa u lidapunpunl bu ki diɛ n-yonn man ni, le bi tɔn inaa ki por u wan yɔɔr, 36le ki nin ka niin ki guu u. 37Bi nan sɔb baah ke u tun tibir tan ni le ki tabin lidapunpunlin Yisa a yul bu: YISA WAN YE JUU YAAB A BƆRU WIN SƆ. 38Bi mu ji nan kpaa binaayigib bilee ki kpiɛ Yisa bu, le uba be u nɔɔjiim paam le uba mu be u nɔɔgam paam.#Matiu 20:23 39Le ban choon ki jo niin nmɔn gugin bi yuli ki sugir u, 40ke “Fin wan nan ke a li fir ber iwonjiɛn niin nan ki ji ta iweehn itaa ki maa fin sɔ, feem a ba jaau! Ni ye a sin ye Uwonbɔr a bija ke, a nya lidapunpunl nan a paab ki jirin!”

41Man le kumanug a yudam nin ban wɔɔnn Uwonbɔr a siimin nin Juu yaab a ninkpeeb n mu nan laa u. 42Ki len ke “U feen bitab le ki jaar, amaa le kaa sin li fir ki fee u ba jaa! U ye Iziral a bɔru le! Che un nya lidapunpunl nan a paab ki jiirin wee ti ŋa u yada. 43U gaa Uwonbɔr ki jin na Uwonbɔr li fee u ki jaa daandaan nan ni ye u ban u ke, nan bu-n u nan len ke, ‘N ye Uwonbɔr a bija le.’ ” 44Baah nan kpaa binaayigib bilee ban ki kpiɛ u bu-n mu nan laa u man le.

Yisa a kum a bɔr

(Mag 15:33-41; Lug 23:44-49; Jɔnn 19:28-30)

45Naah nan nan foo nwosisiigin le kutingbɔŋ bɔŋ ki tan kpaa liwonkagil a kur titaa. 46Tikur titaa nmɔn a yonn, le Yisa kunn papaab npɔɔn ki ke “Eli, Eli, lema sabagtani.” Ni taai wɔɔn ke, “N Wonbɔru n Wonbɔru ba ŋa wee a yii maa?”#Ilan 22:1

47Ban nan si niin ni a ni biba kaah gbir u yim nmɔn ni, le bi ke, “U yi Elaja le nmɔn.” 48Libol nmɔn le bi ni uba guun ki tan yuur chiisɔgsu ki ta bɔ lidamunmɔŋilin ki ta sagin kudaagin, le ki ta sei Yisa ke un nyu. 49Le u tabin bei u ke “Jiɛn mu, n jee Elaja li dan ki nan fee u jaa.”

50Le Yisa ji mann kunn papaab, le ki nin kpo.

51Iyaayoo nmɔn le likinkenl lan ti jɔn iwonjiɛn niin n-yaa sisiigin bɔgir paab ki tan kpaa tum, le tum nan dam dam, le titangbapir wogir. 52Le tikar loor, le bitakpiib ban nan kpo ki ye kasi a ninfobin takpem fii nkumin. 53Ki nyan tikarin, le Yisa a kum a fiim a bɔɔn le bi kɔɔ Jerusalam, le ki degir bininfob takpem bu.

54Bitɔtogibin a ninkpelu nin bitɔtogib ban kpiɛ u bu ki guu Yisa kaah kan kutingbɔŋ kaah damin nin nan biɛn tun ni, le bijawaam choo bi takpem, le bi len ke, “Ibamɔn buu, uja nan sin ye Uwonbɔr a Bija le.”

55Le bipiib takpem ban nan nɔɔ Yisa ki nyan Galilii ki nan ter win, nan si nan fɔg le ki lig nan tun nmɔn. 56Bi ni biba le nan ye Meri wan nyan Magidalin, nin Meri wan ye Jemisi nin Josef a na nan, nin Zebedi a poo.

Baah pii Yisa man

(Mag 15:42-47; Lug 23:50-56; Jɔnn 19:38-42)

57Kujɔɔg kaah nan foo n-yonn man ni, le Arimatiya a tiŋ a jɔɔndaau uba dan, le u yinl ye Josef u mu nan ye wan nɔɔ Yisa le. 58Le u jon uyudaan Palati ban, ki tan miɛ u ke un che un tan nyan Yisa a gbanann ki tan pii. Le Palati jaa u ke bin tan nyan sei wa. 59Le Josef yuur Yisa a gbanann ki pɔbin kikinkenpeŋin. 60Le ki ta u jon ki tan pii. U baantɔɔl a kaapɔŋ kan wee u nan lug kutangbapiig bu-n le ki bilin likalool ki biin ki mɔb, le ki jir kun. 61Le Meri wan nyan Magidalin nin Meri umiɛnin nan ka mal kukaag nmɔn ban.

Bitɔtogib kaah nan guu kukaagin man

62Naah nan yin won kutaag, Juu yaab a kpakɔɔl daalin, le kumanug a yudam nin Farasii yaab jon Palati ban. 63Le ki tan bei u ke, “Ti baa, ti tiɛr ke tibɔkar daan nmɔn kaah nan be-n, u nan bei ti ke, ‘Iweehn itaa daal n li fii nkumin.’ 64Mambu, sei bitɔtob bimɔb wee bi li ka ki guu kukaag nmɔn ki tan kpaa iweehn itaa nmɔn daal, naa ye man ke, u bɔɔnɔɔb na li dan ki nan kur u, ki sin len ke u fii nkumin le. Le bi bɔkar nmɔn na li jo chinchinn yaarin.”

65Le Palati bei bi ke, “Ni ta ban guu wee bin tan guur kukaag nmɔn naah ban man.” 66Le bi ta ban guu le bi tan guu kukaag nmɔn, le ki ŋa titann pɔn kukaagin nbamɔm.

Currently Selected:

Matiu 27: KUGL

Highlight

Copy