Matiu 28

Yisa a kum a fiim

(Mag 16:1-10; Lug 24:1-12; Jɔnn 20:1-10)

1Juu yaab a kpakɔɔl kaah nan jin ki jon, ki won kutaag a jakpanyiɛn, nnyantoon a chinchinn a weem daal, le Meri wan nyan Magidalin nin u Meri kpiɛg nan fii ki jon Yisa a kaag a gɔnnim. 2Libol nmɔn, kitiŋ nan dam takpem le, nan bu-n Uwonbɔr a malaka le nan nyan paab ki jiirin, ki jon kukaag n-yaan ki tan binn likalool, ki kal li bu. 3Le u gbanann nyagin ke utaal a jugin, le u wan yee wan peen a li ke kitilangbɔŋ peŋin, 4Le bijawaam nan choo ban nan guu kukaagin takpem, le bi nin jegil ki nan lu lu ki dɔ ke bitakpiibin.

5Le malaka n bei bipiibin ke, “Ni laa san bijawaami. N nyi naah ban Yisa wan wee bi nan kpa u lidapunpunl bu-n. 6Waa be do; u fii nkumin na, ke waah nan len man ni. Ni dan ki nan lig waah nan dɔ nan yaan ni. 7Ni li chaa weem weem ki tan bei u bɔɔnɔɔb ke u fii nkumin na, le ki liir ni sam ki jon Galilii u. Daandaan nan n bei ni le, nin yaan le ni li kan u.”

8Le bipiibin nyan kukaag nmɔn ban ki guun jon ke bin tan bei u bɔɔnɔɔbin, le bijawaam jɔɔ bi, amaa le ki sin jɔɔ npopeen. 9Baah nan chaa-n, libol nmɔn le Yisa kenn bi nsann ki ke, “N poor ni,” le bi dan, ki choo u taafar le ki jiɛn u. 10Le Yisa bei bi ke, “Ni laa san bijawaam. Ni li chaa man ki tan bei n nabum nmɔn ke bi li chaa Galilii, nin yaan le bi ta li kam.”

Bikaguubin kaah nan jir ki tan pag man

11Bipiib nmɔn kaah nan chaa-n, le ban nan guu kukaag nan a ni biba nan jir kun kitiŋ poolin, ki tan bei kumanug a yudam niwann nan biɛn tun. 12Le kumanug a yudam nmɔn nin bininkpeebin nan lagin kal ki lol, le ki sei bikaguubin ilig takpem, 13le ki bei bi ke “Ni len ke, ‘Yisa a bɔɔnɔɔb le dan kunyiɛgtasiig, iyoo yan wee ni dɔ jiɛn ni, le ki nan sun kur u gbanann.’ 14Ni ye Uyudaan gbir man ke, tim le li degin ni bu u ban ki nyan ni.” 15Le bikaguubin gaa iligin, le ki jir ki tan mɔɔn, bininkpeeb nmɔn kaah wɔɔn bi man ni. Le Juu yaab gaa tibɔrin ki jin hali nin dinan.

Yisa kaah nan degir u bɔɔnɔɔb bu man

(Mag 16:14-18; Lug 24:36-49; Jɔnn 20:19-23; Litoonl 1:6-8)

16Le Yisa a bɔɔnɔɔb piig nin uba-n jon Galilii a jɔɔl liba a paab, nan yaan wee Yisa nan bei bi ke bin jon. 17Baah nan kan u n-yonn man nin, le bi jiɛn u. Amaa bi ni bibam nan biɛnn u le. 18Le Yisa fɔɔr mal bi, ki len ke, “Uwonbɔr seim paab nin tum a ninkpera. 19Ni bu, ni li chaa kutingbɔŋ nan yaan, binib a booli biɛn ban ki ŋa bi n-yaa bɔɔnɔɔb, ki fu bi Uwonbɔr a nyunful, Baa nin Bija nin Kasi a Naaŋ a yinl bu, 20ki wɔɔn bi wee bin chee nan wee n pii wɔɔn nimin n biɛn. Ibamɔn bu n yin be ni ban le hali nin dulinya a diɛm.”

Currently Selected:

Matiu 28: KUGL

Highlight

Copy