Génesis 22
22
Pa Dios yic'alhtanesha pa nilhcacujayasha pa Abraham
1T'ajôjqu'e pava nalhus, pa Dios yic'alhtanesha pa nilhcacujayasha pa Abraham. Yetôn pa lhey ti tôney, pa yicuulh lhavaatsha:
—Nôque jôv'e'.
2Pa yit'esha pa Dios:
—Acum'e na ve'lhaam aôs Isaac, nan uj ti lhen, pa meey na cotsjaat yiey ja Moriah. Ve'lhaaesh pa lhech'e pa acufayesh ca anapjunsham na aôs yiey lhja utiyuc ti c'achayjatey jayu.
3Peelh nalhu ti nich'a nalhu, pa Abraham pa nitshaam pa yisclan'apee pa lhclô' cuvôyutaj. Yit'ôvôsch'e pava lhcajuy t'ajuya pa lhcufayjat pa yichey pan yie' pa nifacle'mey pa Dios, shi' pa lhaôs Isaac pa napu' shta papi lhcavos. 4Ti pu'jana pava nalhus pa Abraham jôjjeclay tojey ti yivaney pan yichey. 5Lhechesh pa yit'esha papi lhcavos:
—Amônlhaaeshelh'e nôque na cuvôyutaj. Vooy na necjôôc ya chi' jôqueelh jayu shta, pa jaya'lhelh jayu. Ca javaclhitajeshelh pa jatpecleelh.
6Pa Abraham t'acum'e pava lhcajuy t'ajuya pa lhcufayjat, pa yan'e lhfatas pa Isaac. Pa t'acum'e shta pa lhclesa shi' pa itôj, pa napu' ti yich'in. 7China pa yit'esha pa Isaac pa Abraham:
—¡Tata!
—¿She pôque, yaôs? —yit'esh ti yicuulh pa Abraham.
—A'va —yit'esh pa Isaac—, caajjoom nava lhajuy shi' na itôj, taj ti ¿ta yie' pa tashinshtaj lhaôs t'ajuya pa vatcufayjat?
8Yicuulh pa lhtata:
—Pa Dios lhavaatsha yicaatjat jayu pa tashinshtaj lhaôs t'ajuya pa vatcufayjat,—yaôs.
9Pa yichvatich'e ti tanaôychi shta. C'oya ti yamey yiey pan yichayjat'e pa Dios pa Abraham yisnatesh pa lhcufayjat'eshjop lhavitôvat pa yisclanvatich'e pava lhcajuy. Pa yôcfa' pa lhaôs Isaac pa yan'apee pa lhcufayjat'eshjop lhavitôvat*xl* yiey pava lhcajuy. 10Taj ti meelh ti t'acum'e pa lhclesa ca lhcufayjat'eesh pa lhaôs, 11pa lh'ángel pa Lhcaanvacle pa yie'jop pa vôôs ti yiyôjeeshey:
—¡Abraham! ¡Abraham!
Yicuulh pa lhech:
—Nôque jôv'e'.
12Pa ángel pa yit'esha:
—Ya aj ca asnatshem pa acavomat'esh na necjôôc, lhayaash ti tsitôy'a ti yijô' ti lhanjova'yem pa Dios, pa naacavoyeshyijulh ti lhanjutyam na ve'lha aôs.
13Lhechesh pa tpôychisham pa Abraham pa yi'van pa tashinshtaj cusasham lhac'uc, t'uneshi pava lht'oy lhpa aactsejsham. Pa Abraham yichey pa t'acum'e pa tashinshtaj pa lhcufayjat'esh nicôyôjat'e pa lhaôs ti napjunsham.*xm* 14Lhechesh pa yeyiyan pa Abraham pa lhech'e: “Pa Lhcaanvacle yijut pa ti suyeshi.” Lhe'naa ti nôqueeshch'e ti chiyit'esha: “Yiey lha utiyuc pa Lhcaanvacle yijut pa ti suyeshi.”
15Pa lh'ángel pa Lhcaanvacle yiyôjiey shta pa Abraham yie'jop pa vôôs pa napu'esh, 16pa yit'esha:
—Ja Lhcaanvacle yit'esh: “Tôlh'ejop ti lhasnatesh côque ti niacavoyeshyijulh na ve'lhaam aôs, janetôn'ajop avaatsha 17ti jayeesh'am jayu pa is. Jasnatesh'am jayu papi tôlh'a' ti tanca chinfajuulh nan lhjunash nava catiis yiey na nalhuyish. Nan lhjunash shta nava t'iyas na josôj ti yie' lhavôôj pa tovôc.*xn* Pa yash'apee jayu shta yinjôt papi nilhc'utsfasa. 18Pa lhacôm'a jayu nant'ajôôjjam napi vatachifas yiey na cotsjaat ca isa' pa niteetsha papi tôlh'a,*xñ* lhayaash ti lhanc'ashamyam.”
19Pa Abraham tapecley yiey pan mônlhee papi lhcavos. Pa lhechesh pa lhacôm'a ti tanaôycheelh ti yichelhey pa Beerseba, yiey pa mônlhee ti yie' pa Abraham.
Papi lhcles pa Nacor
20T'ajôjqu'e pava nalhus pa Abraham tpeeycheyesh lhpa Milca ti yectsôyan pa lhch'inish Nacor. 21Pa vatjutsa' ti nivat'aj lhey Uz; nijooylha pa lhch'inish Buz, nôque pa Kemuel, pan lhtata'esh pa Aram. 22Pa nijooylha ti nivat'as papi Quesed, pa Hazo, pa Pildas, pa Jidlaf shi' pa Betuel. 23Pôque Betuel lhtataesh lhpa Rebeca. Papuque pu'janayama lhcleselh lhpa Milca pa Nacor, pa lhch'inish pa Abraham.
24Caaj shta pa Nacor papi lhcleselh lhpa Reúma, yictsôyan atesha. Papi lhech papuque pa Teba, pa Gaham, pa Tahas shi' pa Maaca.
Currently Selected:
Génesis 22: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
