Génesis 23
23
Ti vaf shi' ti chiyp'oe' lhpa Sara
1Lhpa Sara ciento veintisiete pava lhnincôpes ti mônlha. 2Pa vaf ti yiey pa Quiriat-arba, lhey shta pa lhech yitsaat Hebrón, yiey pa cotsjaat Canaán. Pa Abraham yip'in ti vaf lhpa Sara, pa uj ti yitacshin'in. 3Lhechesh pa tay'e yiey pa yie' pa lhavu'vat pa yichey ti nifaclem papi hititas papi lhech yie', pa yit'esha:
4—Lha'ma nic'achifastajeelh avaatsheelh,*xo* istaa ca avashanelhyam ca jaycasha'ya pa nivalhech ca janch'e' lhca yich'acfa ti vaf.*xp*
5Pa yicuulh papi hititas:
6—¡Tajulhey, lhcaanvacle, ach'anelhyi! Avaatsha lhôveelhyitshi ti lhcavoesh pa Dios. Anch'e' lhca ach'acfa pa yaash ti is nivalhech. Tan jayu yivaatsheelh papu ca natcavo'yesh'ajulh pa yitsôt'ajesh lhnivalhech.
7Lhechesh pa Abraham pa vatsavat, pa yicjuesh pa lhshatech papi hititas, 8pa yit'esha:
—Ca yijô'taja ca eetajeshelh ca nôque jan'e lhca yich'acfa, pa tajulhey ca aalhshayam ja yitsôt'ajesh ja Efrón, lhaôs ja Zobar, 9ca jaycashaaysha ja camam'e yiey ja Macpela yie' lhavôôj ja lhcac'ovat. Yivaatsha jashayan jayu lhacôm'a pa t'ajôjqu'e pa nivalhech. Pa nôque lhjunash tsitsôt'ajesh jayu jô pa nivalhech yiey na nôquee.
10Taj ti p'alha ti lhech yie' pa Efrón yi'shi' papi lhech'e, pa yicuulh pa Abraham ca jaspa nipe'yeesh papi lhchifas, shi' shta lhacôm'a papi lhech nash'een ti yitsham'in pa yitsaat.
11—¡Am, yinvacle, istaa ca ya aj na! yivaatsha c'atis'ash atesha ja nivalhech shi' ja yicac'ovat lhaôs. Napi yichifas lhavaatsha tsivanesh ti c'atisesh. Anch'e' lhca ach'acfa.
12Taj pa Abraham ve'lheesh tanjuyshicham pa yicjujaam papi nivacle lhech'e, 13pa yicuulh pa Efrón yiesh'e t'ajuyish pap'elh:
—¡Tajulhey ca ach'anyi cum avaatsha! Jatants'aclanesh'a ca acuumjulh pa peso t'ajuya na acac'ovat, pa lhecheesh pa janch'e' jayu lhca vaf.
14Lhechesh pa yicuulh pa Efrón:
15—Ach'anyicum, yinvacle: ja yicac'ovat cuatrocientas lhpa tinshanja tashaay tajulhsham. Ojeylhataj'am pa t'ajôjqu'e avaatsha ya chi'. Meey ca anch'e' lhca ach'acfa.
16Pa Abraham t'acuumjulh ca nishayan pat'ajôjqu'e pa yetôneyshi pa Efrón ti yivanesh papi hititas. Pa yijutey pava lhtinshajay. 17Pa nôque lhjunash pa lhcac'ovat pa Efrón yiey pa Macpela, lhum'ôcjinucjulh pa Mamre, ti nôqueesh pa lhcac'ovat shi' pa nivalhech shi' shta lhacôm'a pava aacjuy pava yi'shi' pa lhcac'ovat 18yitsôt'ajesh jô pa Abraham. Caaj papi yivanesh papi hititas shi' lhacôm'a papi lhech nash'een ti yitsham'in pa yitsaat.
19Ti nôjeshch'e côque pa Abraham pa yanch'e' lhca lhch'acfa Sara pa nivaclhech yiey pa lhcac'ovat Macpela, lhum'ôcjinucjulh pa Mamre, chitôyesha shta peelh lhey Hebrón, yiey pa cotsjaat Canaán. 20Pa nôqueesh yitsôt'ajesh jô pa vatcac'ovat shi' lhpa tinjôque' pan yie' pan tcashayesha papi hititas pa nivalhech.
Currently Selected:
Génesis 23: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
