Génesis 24
24
Pa Abraham voomey lhpa lhjaya pa Isaac
1Pa Abraham palha c'utsaaj, pa Lhcaanvacle yajatesh ti is pa yit'eshem. 2Ve'lha pa nalhu tôney pa ya'shesh ti c'utsaaj lhcavo pan lhcaanvacleesh lhacôm'a pava yitsôt'ajesh pa Abraham pa yit'esha:
—An'apee nava yacoc na atuuc, 3pa etônjop pa Lhcaanvacle Dios yi'shi' pa vôôs yiey shta na cotsjaat, ca ya aj ca nivashanem na yaôs Isaac ca lhjayaeesh lhpa nivacche yiey nôque cotsjaat Canaán yiey nan jôv'e', 4pa môôjey ja yicootsjat pa avoomey lhpa lhjaya yiey japi yivelhavot.
5Pa yicuulh pa lhcavo:
—Taj ti lhpa nivacche ca ninteetajesh ca nitatvotajyich'e, ¿pa ta yifanisheesh? ¿Pa istaa t'e ca jacha'jey na aôs ja cotsjaat yiey jan lhtay'e?
6Pa yit'esh pa Abraham:
—¡Am, ya aj ca lhech achaajshi na yaôs! 7Pa Lhcaanvacle Dios yi'shi' pa vôôs pan tsayjat'e lhapesh ja lhajpôyich ca tata shi' ja lhcootsjat japi yivelhavot pa nifacyam ti nijutyam nôque cotsjaat shi' papi tôlhyi'. Pa lhech yichenelh'ach'e jayu pa lh'ángel ca ninôyinelh'ac'oya ca anchajelhey lhpa ve'lha lhech'e ca lhjayaeesh jayu na yaôs. 8Taj ti lhpa nivacche ca ninteetajesh ca nitatvotaj'ach'e, pa avô'mesh jayu côque, taj ti ¡niyit'esh ca lhech achaajshi na yaôs!
9Lhechesh pa lhcavo pa yan'apee pa t'ituuc lhpa lhaco pa lhanvacle Abraham, pa yuesha ca nasnatesh pa lhjunash pa t'aalhsha. 10Pa lhechesh pa yeneyshi pava isis ti t'acum'e pava caajem pa lhanvacle ca natcufa'yesh. T'acum'e pava napunôjesh camellos pa yichey pa lhavtsaat pa Nacor yiey pa Mesopotamia. 11C'oya ti yamey pa lhavoj'e pa yitsaat, palha nuut. Lhechesh ti caaj'in papi nivacchey vat'acjuqu'een. Pa lhcavo pa yichayan pava camellos yiey pa t'itsech, 12lhechesh pa t'aalh:
—“Lhcaanvacle, lh'Dios shta ja yinvacle Abraham, asnateshyam pa is nôqueesh, pa anôclitem ti aissha'ne ja yinvacle. 13Nôque jayu ya mônlhee yiey na t'itsech, lhan'e papi lhutsjayech namey'in ti vat'acjuqu'e. 14Istaa ca at'eshayam lhpa lhutsja lhpan jayeetsha jayu: ‘Istaa ca ashalhanitsha'ne lha ôjque ca c'ayôji’, pa niteesh ca nascuulhtaj: ‘Ayô'ji avaatsha, pa c'ayôjayan jayu shta nava aclôy camellos,’ ca lhecha lhpa lhech lhpa lhatcumem'e ja acavo Isaac. Pa nôque lhjunash yijô'yam jayu jô ti aissha'nec'oya ja yinvacle.”
15Jôjjeclay ninameshch'e ti t'aalh, pa yi'van lhpa Rebeca, Lhôse pa Betuel, nichaaj lhpa lhôjque yan'e lhfatas. Pa Betuel lhavaatsha lhô'selh lhpa Milca shi' pa Nacor. Pa lhech lhch'inish pa Abraham. 16Lhpa lhutsja uj ti lhasnôyche pa jôjjeclay nintajayay shta, jôjjeclay ampa ca lhanfanasha. Lhpa lhech yuyeyshi lhpa t'itsech, pa yipontesh lhpa lhôjque, pa vapecfach'ee. 17Pa vacumajey pa vatcavo pa yamey pa yit'esha:
—Tajulhey, ca istaa ca c'ayôôji lha ôjque. Lhpa lhech pa yicuulh:
18—Istaa ayô'ji, lhcaanvacle —yit'esh lhavaatsha.
Pa lhfanishesh'in ti na'vuyjateshicham lhpa lhôjque ti t'acumesh'e pava t'itjuy pa yiyôjayanshi. 19Pa lhech ti yivaclhitesh ti yiyô'ji, lhpa Rebeca pa yit'esha:
—Shi' nava aclôy camellos c'ayôjayansha'ne jayu.
20Timsham'in tatsha lhpa lhôjque lhpa t'iyôjatshi, pa cajuqu'e ti vapeccheen lhpa t'itsech pa yiyôjayanemsha'ne lhacôm'a pava lhclôy camellos. 21Lhan'e pa vatcavo pa yiclôvalh ampa ca niteetsha, lhayaash ti yen ca nitô'ya jô pa Lhcaanvacle ca isa' pa t'ôtayjayash pa yam'e. 22Vooy ti yivaclhitesh ti yiyô'jane pava camellos, pa nivacle pa t'acum'e pa lhjunashjulh pa vatpascheshiy clesanilh cojiyaj ve'lhayama gramos pa lhcaclecli, pa yijocjeemsham lhnaash lhpa lhech. Yijutey shta pava napu' vatpôclôs clesanilh cojiyaj yash'apee pava cien gramos pa lhcaclecli. 23Pa yit'esha:
—Istaa ca anfacyam papin lhôse'ash. Ca nicaajtaj pa ca jôvelh'e yiey pa lhajpôyich pa atata napi nivacle ya chi' shta pa lhech jamelh'e ca tulhtaja.
24Lhpa lhech pa yicuulh:
—Lhôseyish ja Betuel, lhaôs lhja Milca shi' ja Nacor. 25Ja yijpôyich'elh caaj ja camamey ca amtajelhey ca tulhtaja. Caaj shta ja uj yitjataj ca nituj nava camellos.
26Lhechesh pa vatcavo pa t'acjatsuyshicham pa yôclôjey pa Lhcaanvacle,
27pa yit'esh'in: “¡Chinaisiyam Lhcaanvacle, pa lh'Dios ja yinvacle Abraham, lhayaash ti naantôvacleesh pa iseemsha'ne ja yinvacle, pa lhasvoyjatey shta yiey ja nôyish na lhajpôyich napi lhavelhavot!”
28Lhpa lhutsja vacumajey pa lhajpôyich lhpa lhamimi, ca nanfacleem lhacôm'a pava yi'van. 29Lhpa lhech caaj pa lhchecla' lhey Labán. Pa lhech vacumajey lhpa t'itsech ti vooysha'ne pa nivacle. 30Yovalheshaneen pa lhjunashjulh pa vatpascheshiy shi' pava vatpôclôs yiesh t'ituuc lhpa lhch'injô, pa tach'ansha ti nifaclem pan yit'esha pa nivacle. Pa Labán tac'uya pa Abraham lhcavo pa jôjjeclay mônlhajop pava camellos yiey lhpa t'itsech, 31pa yit'esha:
—Ata'lhun avaatsha, ti naisiyan pa Lhcaanvacle. ¡Sasjop ca amônlhaae nôque fach'ee, apis ti jasclan'e'am ja lhôv'e' jayu shi' ja yie' jayu nava aclôy!
32Lhechesh pa vatcavo pa yichey pa lhajpôyich. Pa Labán niclan'apee pava camellos pa yijutem shta pa lhôc. Pa nijooylhajat pa vatcavo shi' papi tanaôycheelh ti nichaajshey pa yinôôt ca nicleshesh pava lhafoc.
33C'oya ti t'acumem'e pa lhôc, pa Abraham lhcavo pa yit'esh:
—Niyit'esh ca yitsaccun ti jôjjeclay ninfaclelh'am nan jayeesh ca janfaclelh'am.
—Istaa ca anfac —yit'esh pa Labán.
34Pa vatcavo yit'esh:
—Yivaatsha lhcavoyish ja Abraham. 35Pa Lhcaanvacle uj ti yiisiyan ja yinvacle pa yacônatshiin. Yijutem java tashinshtas shi' java vôcôc, ja clesanilh ts'ayôjiin shi ja cojiyaj clesanilh, japi lhcavos shi' japi lhcavoquey, java camellos shi' java cuvôyutas. 36Vooy shta lhja lhch'acfa Sara vacjô' ti tactsôôy ti palha c'utsja'. Vooy ja yinvacle yijutem ja lhaôs lhacôm'a java caajem. 37Ja yinvacle vanashanitjateshyam ti yit'eshyi: ‘Ya aj ca avashanem na yaôs ca lhjayaeesh napi yiey nôque cotsjaat Canaán, yiey nan jôv'e'. 38Meey japi ve'lheelhch'e ca tata, pa avoomey lhpa lhjaya yiey japi yivelhavot.’ 39Lhechesh pa jayeetsha: ‘Na yinvacle, ¿taj ti vooy lhpa nivacche ca ninteetajeesh ca nintatvotajayich'e?’ 40Lhechesh pa tsicuulh jô lhech: ‘Yivaatsha yajatesh ti jatanôycheelhsha'ne pa Lhcaanvacle, pa lhech yichen'ach'e jayu pa lh'ángel, ca jaspa isa' pa ôtayjayash. Acumem'e jayu lhpa lhjaya na yaôs yiey japi yivelhavot ve'lheelhsham ca tata. 41Ve'lheey japi yivelhavot ca ninteetajeesh ca nijut'ay lhpa lhutsja, pa lhech yôj'e' jayu ca lhjunash ti c'ayôjeesh'a.’
42“Nôque lhjunash na ti janamey lhja t'itsech. Vooy ca yalhjayash jayeetshey pa Lhcaanvacle, pa lh'Dios ja yinvacle Abraham: ‘Ca yijô'taja ca aisinatajyam nôque yôtayjayash, 43jatants'aclanesh'a nôqueesh ca nôque lhjunasha yiey lhja t'itsech: lhpa lhutsja ca ninamtaj ca nichaajtajesh pa yinôôt lhpa lhech jayeetsha jayu: Istaa ca avashanyam ca c'ayô'ji lha ôjque; 44pa niteesh jayu: Istaa ca ayôôji, pa c'ayôjayan jayu shta nava aclôy, ca lhecha lhpa lhech nivacche lhpan lhenem ja lhaôs ja yinvacle.’ 45Jôjjeclay niyivaclhitesh côque yalhjayash, ti ja'van lha Rebeca yan'e' lhfatas lha lhôjque, pa jayeetsha: ‘Istaa ca anjuteshyi pa yinôôt.’ 46Pa tatsha ti nijuteshyi lhja lhôjque pa yit'eshyi: ‘Istaa ca ayô'ji, pa c'ayôjayansha'ne jayu shta nava aclôy camellos.’ Lha lhech nijuteshyi ca yinôôt, yijutshey shta nava yiclôy. 47Ti yivaclhitesh pa janiy'ôs: ‘¿She papi lhôse'ash avaatsha?’ Lha lhech pa tsicuulh: ‘Lhôseyish ja Betuel, lhaôs ca Nacor shi' lhca Milca.’ Lhechesh pa janesh lhnaash lha lhjunashjulh lhpa vatpascheshiy, shi' nava napu' vatpôclôs. 48Pa jayicjatsuyshicham pa jôclôjesh pa Lhcaanvacle, lh'Dios ja yinvacle Abraham, ti tsivoyjatey yiey ja lhech nôyish, jaspa jaycumem'e lha lhôse na lhchecla' ca lhjayaeesh ja lhaôs. 49Vooy nôqueesh istaa ca anfacleelhyam ca istajeelh'am shi' ca amtajeelh'am pa na ja yinvacle. Ca nieetajeesh istaa ca anfac shta secl'esh ca nôstôya pa ca jasnatesh.
50Lhechesh pa Labán shi' pa Betuel pa yicuulh:
—Lhacôm'a côque ti tô'lha pa Lhcaanvacle, pa ampa ca yit'eshelh'ajulh. 51A'va avaatsha, anôque Rebeca; acum'e pa achaaj. Ca lhjayaeesh pa lhaôs ja anvacle, yiey pan t'ônash'am pa Lhcaanvacle.
52C'oya ti yipe'ya cavôque pa lhcavo pa Abraham pa t'acjatsuy'e t'ajuyish pa Lhcaanvacle pa yamjata cotsjaat pa lhtaco. 53Lhechesh pa t'acumey shi' pava matas tô'lha ca clesanilh ts'iyôjiin shi' pa cojiyaj clesanilh, shi' pava vat'uyjatshiyis, pa yijutey lhpa Rebeca. Yijutey shta pav'elh pa lhchecla' shi' lhpa lhamimi. 54Ti yivaclhitesh lhechesh pa tsaccunch'e shi' papi tanaôycheelh pa lhech mônlhee ti tulh'in. C'oya ti nalhu ti nitshamch'e, pa yit'esh pa vatcavo:
—Asvashanelh ca japecley ja lhajpôyich ja yinvacle.
55Vooy pa lhchecla' shi' lhpa lhamimi lhpa Rebeca pa yit'esha:
—Istaa cum ca amônlhaeshelhyijop lha lhutsja pava napunôjesh nalhus, lhecheesh pa isjop ca aôycheelh.
56Taj pa vatcavo yit'esh:
—Ya aj ca ve'lheesh asmônlhanitelh'e. Pa Dios yiisinatyam na yôtayjayash, pa istaa ca asvashanelh ca japeclelhey ja lhajpôyich ja yinvacle.
57Lhechesh pa yicuulh papi lhech:
—Jayônelhey cum lhja lhutsja, naô pa yit'esh yitsha.
58Pa tôney lhpa Rebeca pa niy'ôs:
—¿Lhteesh ca avoqu'e nôque nivacle?
—Jech —yicuulh lhpa lhech.
59Lhechesh pa yivashanem ti voqu'e' lhpa Rebeca shi' lhpa nivacche lhpan vanujumatsenesh yajatesh, shi' pa lhcavo pa Abraham shi' papi tanôôycheelh.
60Pa yit'eshem pa is lhpa Rebeca cavôque yit'esh:
“Lha tsitsôt'ajesh yich'injô,
¡lhamimiesh jayu papi acloj millones!
¡vooy papi tôlh'a jayu
nijô'clesh jayu pava lhavtsates
papi nilhc'utsfasa!”
61Lhechesh lhpa Rebeca shi' lhpa lhcavoque pa yi'apee pava camellos pa voqu'e vatich'e pa Abraham lhcavo. Nôque lhjunash pa vatcavo pa yôôychi lhpa Rebeca pa tay'e pa lhech'e.
62Pa Isaac nich'a tapec tôlhey lhpa t'itsech lhpan lhey “Pan mônlha nan tsivan”, lhavaatsha yie' ts'ivee pa cotsjaat yiey pa Neguev. 63Nichinaa ti t'ôtaaysha'ne ti nuutesh. Lhechesh ti yalhatajesh ti yivanjulh pava t'ajôôjjô camellos ti yujaa. 64Taj lhpa Rebeca yovalhch'e yitsha. C'oya ti yi'van pa Isaac pa tay'apee pa camello 65pa niy'ôsesh pa vatcavo:
—¿She nivacle nôcôô nan tôlhey t'e pa joot na nachjooy?
—Vooy na yinvacle —yit'esh pa vatcavo.
Lhechesh pa t'acum'e pa lhc'ôcle, pa yip'ooj'e lhtaco.
66Pa vatcavo nifaclem pa Isaac lhacôm'a pa lhjunash ti yisnatesh. 67Lhechesh pa yôôychiey pa Isaac lhpa Rebeca pa lhatsha'nuvo lhca lhamimi Sara pa lhjayaesh lhpa lhech. Pa Isaac uj ti yen lhpa Rebeca, pa yishamitjat ti nichinach'e ti vaf lhca lhamimi.
Papi lhcles pa Abraham shi' lhpa Cetura
(1 Cr 1.32-33)
Currently Selected:
Génesis 24: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
