Génesis 25
25
1Pa Abraham caaj lhap'elh lhch'acfa lhey Cetura. 2Papi lhclesesh lhpa lhech papuque pa Zimram, pa Jocsán, pa Medán, pa Madián, pa Isbac shi' pa Súa. 3Pa Jocsán lhtataesh pa Seba shi' pa Dedán. Papi tô'lha pa Dedán lhech papi asureos, papi letuseos shi' papi leumeos. 4Papi lhcles pa Madián papuque pa Efa, pa Efer, pa Hanoc, pa Abida shi' pa Elda. Lhacôm'a papuque tôlhesha lhpa Cetura. 5Pa Isaac mônlheesh lhacôm'a pava caajem pa Abraham. 6Vooy papi lhcleselh pap'elh lhjayas pa Abraham tsi'sha pava tisesh'in. Ti jôjjeclay mônlha pa tac'uyc'oya pa lhaôs Isaac, yicheney pa lhum'ôcjinucjulh.
Ti vaf shi' ti chitishc'oya pa Abraham
7Pa Abraham yamvatsham ciento setenta y cinco pava lhnicôpes ti mônlha. 8Ti vaf tôlh'ejop ti c'utsaaj. Pa chiyanjop papi lhnavot lhapesh. 9Vooy papi lhcles pa Isaac shi' pa Ismael tish'ec'oya yiey pa camamqu'e yiey pa Macpela yijuulh lhumôcjinuc pa Mamre yiey pa lhcac'ovat pa Efrón, lhaôs pa Zohar hitita lhavaatsha. 10Pa lhech vatcac'ovat yitsôt'ajesh pa Abraham, apis ti tcashayesha papi hititas.*xq* Lhech chitish'ec'oya pa Abraham, yiey lhca lhch'acfa Sara. 11Ti vaf ca Abraham, lhechesh pa yit'eshem pa is pa Dios pa Isaac, ca mônlhaajop yiey pan yie' lhpa t'itsech “Pan mônlha nan tsivan.”
Papi lhcles pa Ismael
12Papuque lhcles pa Ismael, lhô'selh pa Abraham lhpa Agar. Lhpa lhech lhcavoque lhpa Sara Egipto lhavoque lhavaatsha. 13Nôque lhjunash ti nivat'as: Pa Nebaiot, vatjutsa' lhaôs, pa caaj pa Cedar, pa Adbeel, pa Mibsam, 14pa Misma, pa Duma, pa Massa, 15pa Hadar, pa Tema, pa Jetur, pa Nafis shi' pa Cedema. 16Navôque lheyis papi doce lhcles pa Ismael. Cavôque lheyis chiytôyesha pava yitsôt'ajesh lhcootsjativshay shi' pava yiey'in. Papi lhech lhacôm'a ti lhcaanvaclesesh papi lhchifas.
17Pa Ismael ciento trenta y siete lhnincôpes ti vaf, pa chiyanjop papi lhanvot. 18Papi lhcles yie' pa cotsjaat yi'shi' lhcaavju pa Havila shi' pa Asiria. Lhech yie' ts'ivee lha'ma tcavoytajjulh papi lhch'injavot.
Ti nivat'aj pa Jacob shi' pa Esaú
19Nôque chichayeshch'e pa Isaac, pa lhaôs pa Abraham. 20Pa Isaac cuarenta pava lhnincôpes ti lhjayaesh lhpa Rebeca, lhpa lhôse pa Betuel vooy pa lhchecla' Labán. Papi lhech arameos yie' pa Padan- aram. 21Lhpa Rebeca sasjop ca nitactsôy, lhan'e pa Isaac ti vatants'aclane'mey pa Lhcaanvacle. Pa Lhcaanvacle yipe'ya pa t'alhjayash pa jaspa yituma lhpa Rebeca. 22Taj ti papi napu'ji nintan'ateshi pa lhcachi', pa yaychavalh'in lhpa lhech: “Côque ca lhet lha nôctajeshi, ¿she pa tajulhe'mey na yimônlhajayash?” Lhechesh pa nifaclem pa lhjunash pa Lhcaanvacle, 23pa yicuulh pa lhech:
“Yiey na acachi' napu'jam lhtachifas;
napu'jam yitsates t'ajuyvatjulh
ti jôjjeclay ninanvat'as.
Ve'lha pa yashc'oya ti t'un'in peelh,
pa c'utsa'jesh shichamc'oya jayu
pa taôvclajesh.”*xr*
24Yameyjop pa yôj'e pa nalhu lhpa Rebeca ti nivat'as papi napu'ji. 25Pa vatjutsa' ti nivat'aj yuc pa t'ôj pa uj ti tsashay, pa yeyiyanesh Esaú. 26Nijooylha ti nivat'aj pa lhch'inish t'acum'e lhp'ic'o pa Esaú, lhe'naa ti yeyiyanesh Jacob. Pa Isaac sesenta pava lhnincôpes ti nicavat'aj lhpa Rebeca.
Pa Esaú tcashayesh pava yitsôt'ajshi pa c'utsa'jesh vataôs
27Papi taôvclas yitônt'as. Pa Esaú yama ti joot lhavoesh pa lhavchajenajesh. Pa Jacob vena lhjunash, lhavaatsha yiyô'yesh ti cano, pa yen ti mônlhee pa t'ichavat. 28Pa Isaac tuj pa lhaje' pa Esaú pa uj ti yenesh. Taj lhpa Rebeca yen yitsha pa Jacob.
29Ve'lha pa nalhu pa Jacob ti tatay, lhan'e pa Esaú pa tôlhshaam pa joot uj ti yulhôj 30pa yit'esha:
—Jatants'aclanesh'a ca anjuteshyi pa tiqu'in na yucshi vatôc, lhayaash ti tsiclôn na yiyipcu.
(Lhe'naa ti chiyeyiyanesh Edom)
31—Nivatjutsa cum ca anjutyiy nava natsôt'ajshi ti ac'utsajesh —yit'esh pa Jacob. t
32Lhechesh pa yit'esh pa Esaú:
—A'va, tsiclôn na yiyipcu pa nôque lhjunash, pa cha'lheesh jayu t'e pava yitsôt'ajesh pa c'utsa'jesh vataôs.
33—At'eshyam tatsha nôqueesh —nachanesh pa Jacob.
Pa Esaú yit'eshem, pa yiey pa Jacob pava yitsôt'ajesh pa c'utsa'jesh vataôs.*xs*
34Jaspa yijutey pa Jacob pa Esaú lhpa yucuve shi' pava quicleychetas. C'oya ti tif pa lhôc shi' ti yiyô' pa Esaú, pa nitshaam pa yich. Nôque lhjunash ti yapun pava yitsôt'ajshi pa c'utsa'jesh vataôs.
Currently Selected:
Génesis 25: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
