Génesis 33
33
Pa Jacob shi' pa Esaú ti yisclaneelhvatjulh
1C'oya ti yi'van pa Jacob pa Esaú ti tanôôychielh papi cuatrocientos nivacle, pa yicatsônjat papi taôvclas papi yitsôt'ajesh lhpa Lea shi' lhpa Raquel shi' papi napu' lhcavoquey. 2Yijutsjatesh ti yanjop papi lhcavoquey papi lhcles, pa nijooylha lhpa Lea shi' papi lhcles, pa yôjesh'esha'ne lhpa Raquel shi' pa Josê. 3Lhechesh pa vanôyinc'oya papi lhech, pa napu'yama pa t'ajô'jesh ti t'avuya cotsjaat ti t'ajuyeshjulh pa lhchecla', pa yamje pa yie'. 4Taj pa Esaú vacumajey ca nivan. Pa yechepjalh'ôcji lha'vo' pa lhechesh pa yifin shta. Pa va'nôyan ts'ivee. 5Ti yivaclhitesh pa Esaú pa yovalhsha'ne papi nivacchey shi' papi taôvclas, pa niy'ôsesh:
—Napuque, ¿She papi yitsôt'ajesh?
—Vooy napi lhcles na acavo ti yijutem pa Dios —yit'esh pa Jacob.
6Lhechesh pa tac'uya papi lhcavoquey shi' papi lhcles pa tanjuyshicham yamja cotsjaat. 7Pa tac'uya shta lhpa Lea shi' papi lhcles, pa tanjuyshichamch'e shta, yiey pan lhfanishesh. Pa yôjesh'esha'ne ti tac'uya pa Josê shi' lhpa Raquel pa tanjuyshichamch'e shta. 8Pa niy'ôsesh tatsha pa Esaú:
—¿She pa lhaychavalhshey ti lhasnatesh lhacôm'a java tsivoyjulh ti ja'van java aclôy?
—Ca jaspa isa' pa ca ajunashyish —yicuulh pa Jacob.
9—Am, onaj; caajyam java yiclôy. Amônlhaaesh java natsôt'ajesh —yit'esh pa Esaú.
10Taj pa Jacob yimaj'e:
—Ama, tajulhey. Jatôôlhsha ti is na afanishyish. Acuumjulh na catis'ash, lhayaash ti c'avan jan yijunashesh ti ja'van pa Dios, lhayaash ti jaspa is ti lhatcuumyijulh. 11Jatants'aclan'a ca acuumjulh nava jajut'am ti janchaj'ay, lhayaash pa Dios ti ts'acônatshiin, pa ampa ca amac'oyayam.
Yimaj'e jumje pa Jacob, pa jaspa t'acuumjulh pa Esaú pan tisesh, 12Taj ti yit'esh:
—Nôqueesh, shtay'e clap nôque. Janôyin'ac'oya jayu.
13Pa yicuulh pa Jacob:
Yenach checla', avaatsha natô'ya napi taôvclas ti nincônt'as, pa jaychavalhey shta nava tashinshtas shi' nava vôcô lhcles. Ca nulhôs taj pa ve'lha nalhu jayu, ca nivafsha'ne lhacôm'a nava tashinshtas. 14Tajulhey ca anôyinc'oya na acavo. Pa jacheclanch'e jayu yivaatsha nava yiclôy vanôyinyic'oya.—Pa jacheclanesh shta napi taôvclas pa jamjey jayu ca casc'atajeevane ja Seir.
15—Tajulhey —yit'esh pa Esaú—, avashanyam ca janôy'ajop pap'elh napi nivacle, napi jatanôycheelh.
Taj ti yit'esh pa Jacob:
—¡Ama, tajulhey! ¿Ta lhayaash ca c'avenchatshaneen?
16Tatsha pa lhech nalhu ti vapecley pa Esaú pa Seir. 17Vooy pa Jacob yichey pa Sucot. Pa lhech yisnatesh pa lhajpôyich shi' pava jpôyjey lhcles t'ajuya pava lhclôy. Lhe'naa pa lhech'e ti lheyesh Sucot.
18Pa Jacob ti tôlhey pa Padan-aram, pa ampa ca nijumteey chiyilhjen shta ti yamey pa cotsjaat Canaán. Pa yie' lhavôôj pa yitsaat Siquem. 19Lhpa cien peso tcashayesha pa lhcac'ovat*xk* papi lhcles pa Hamor, lhtataesh pa Siquem, pa lhech yan'e pa t'ichavat. 20Pa yisnatesh shta pa lhcufayjavat'eshjop lhavitôvat pa yeyiyanesh El- Elohe-Israel.
Currently Selected:
Génesis 33: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
