Génesis 34
34
Pa lhanclôyash lhpa Dina ti chit'atshay'apee
1Lhpa Dina, lhôseelh lhpa Lea pa Jacob, t'ôtayey papi lhutsjayech papi lhech tsitenas'e. 2Taj ti yi'van pa Siquem, lhaôs pa Hamor, heveo lhavaatsha, lhcaanvacleesh'e pa lhech'e. Pa t'acum'e ti nachan jaspa yôjquenelhch'e pa lhanclô'esh. 3Tôlh'ejop ti uj ti yen pa nachan ca jaspa nen. 4Lhechesh pa nifaclem pa lhtata Hamor, pa yit'esha:
—Meey ca ayôjaayam lhjô lhech lhutsja. Jayeesh ca yijayaeesh.
5Pa Jacob yitôôysha pa Siquem ti tanclôôy lhpa lhôse Dina. Taj ti jôjjeclay mônlhashi pa joot papi lhcles, pa lhe'naa ti ampa ca niteesh vooy ca natpectaj'in. 6Lhan'e pa Hamor, lhtata pa Siquem, pa yichey pa Jacob ca nitasinô'yelh.
7Papi lhcles pa Jacob tapecl'in tôlhey pa joot. C'oya ti yitô'ya pa lhjunash pava vaclan, lhechesh ti uj ti suy, lhayaash ti uj ti tanclôyesh pa Israel ti yôjquenelhche pa Siquem lhpa lhôse pa Jacob. ¡Côque nintajulhtajey ca chinasnatesh! 8Taj ti tasinô'yelh pa Hamor, pa yit'esha:
—Na yaôs Siquem uj ti yen lha ôseelh. Istaa ca avashanelhem ca lhjayaeesh, 9pa istaa ca castatvelhavot'eesh. Jaspa yijayaseeshelh napi acleselh lhutsjayech, pa avaatsheelh ajayaseeshelh yitsha napi yicleselh lhutsjayech. 10Amônlhaaelhyijop. Na cotsjaat t'ajuyelh'a shta. Veelh'e na lhech, pa acumelh'een pa acashayelha pava acacovteselh.
11Pa Siquem yit'esha lhpa Dina pa lhtata shi' papi lhcheclavot:
—Yivaatsha jatants'aclaneshelh'a ca acu'melhjulh. Jajutelh'ay jayu pa ca aalhtajeshelh'yi. 12Lhama ca aalhtajeshelh'yi pa uj shi' pava acloj ca c'atisshelh jajutelh'ay jayu. Taj ti avashenelhyam lha lhutsja ca yijayaeesh.
13Taj ti pa Siquem apis ti yiclôqui lhpa Dina, lhe'naa papi lhcles pa Jacob ti yijôtsôclôn'in pa Siquem shi' pa lhtata Hamor, 14pa yit'esha:
—Sasjop ca yijutelhey lha yich'injô pa nivacle pa nichinseej, lhayaash côque ti uj ti tanvapenjayesh yivaatsheelh. 15Ve'lheey ca lhech afanishtajeeshelh pa jaycumelh'ajulh: pa casjunashvatjulh jayu; yich'e' ca lhacôm'aa papi yitsjôy ca chinseej. 16Pa lhechesh pa yijô' jayu ca ajayaeeshelh napi yicalhutsjayech'elh. Pa yijayaeeshelh jayu yitsha papi natsôt'ajeshelh. Pa shnôôvacop jayu pa casve'lhaasham ca castachifasa. 17Taj ti ca niacuumtajeelhjulh ca lhjunash ca chinseej papu, pa jayayelhnee jayu pa jachajelh jayu lha yôseelh.
18Pa Hamor shi' pa lhaôs Siquem yueshch'e pava chiyit'eshaan. 19Pa nicaju'ach'e pa nalhu pa nich'ayech ti chiyseej, lhayaash ti yen jum lhpa lhôse pa Jacob. Pa Siquem yaash ti chivijatana yiey pa t'ajôj'esha'ne pa lhtata. 20Pa yitshaam pa yitsaat tanôôycheelh pa lhtata yitsavalhey yiey pava vatcashaavtes. Lhech'e ti yit'esha papi nivacle:
21—Napuque nivacle catsic'utsfas. Pa yijajop jayu ca shtacashayelhvaneen, taj ti uj na cascootsjat tajulhsham napi lhech. Casvaatsha catsijayasesh jayu papi lhcalhutsjayech, pa lhjayaseesh jayu vitsha japi shtantsôt'ajesh. 22Taj ti ca jaspa casve'lhaasham, lhavaatsha yit'esh ca naôvjajop, taj ti ve'lha na yen ca lhjunasha: Ca lhacôm'a napi yitsjôy ca chinseej nan lhjunash ti yiyo'yesh. 23Lhacôm'a pava yitsôt'ajesh shi' pava lhclôy shtantsôt'ajshelh jayu. Casve'lheey ca shtat'esh jech, pa mônlhajop jayu.
24Lhacôm'a papi nivacle yiey pa yitsaat papi yitshaam ti c'afoquelhayesh, pa yueshch'e pa yit'esh pa Hamor shi' pa lhaôs Siquem, pa chiyiseejshamsha'ne. 25Lhan'e pa Simeón shi' pa Levi, lhclesh pa Jacob, lhcheclavot shta lhpa Dina, yichey pa yitsaat ti pu'janach'e pava nalhus, ti jôjjeclay uj ti yiclôyit papi nivacle pava lhansejchevshay, yichaaj pava clesatas pa yiclônsha'ne lhacôm'a eem ti nincônt'as. 26Pa yicôôj lhclesataj yiclônesha'ne pa Hanor shi' pa lhaôs Siquem. Lhechesh pa yayjat'e lhpa Dina pa lhajpôyich ca Siquem pa yich'in. 27Pap'elh lhcles pa Jacob pa yichey shta ti yitsavalhch'e capi vafsha'ne pa t'acut'e pa yitsaat ca nôfisjatemch'e ti tanclôôy lhpa lhch'injô. 28Pa yichaaj pava tashinshtas, pava vôcôc, pava cuvôyutas shi' lhacôm'a pava yie' pa yitsaat shi' pava yie' pa joot. 29T'acutesh lhacôm'a pava yiey pava jpôyjey pa yichaaj shta ti lhcumtesesh papi taôvclas shi' papi ôcjeclôy. 30Lhechesh pa yit'esha pa Jacob pa Simeón shi' pa Levi:
—Avaatsheelh lhavclanjatelhyam pava tavijatay. Nôqueesh japi nivacle yiey nôque, japi cananeos shi' japi ferezeos, pa tsicônitshi jayu. Pa yamvatshamyijop jayu ca nitaancletajyi. Pa yampu'elh nayajô'jelh napi nivacle pa chitsiclônelh jayu shi' napi yijôôjam.
31Taj ti yicuulh papi lhech:
—¿Pa tajulhey t'e ca lhanfanash lha yich'injôelh ti chiyjôney lhpa lhanclô'?
Currently Selected:
Génesis 34: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
