Génesis 35
35
Pa Dios is pa yit'eshem pa Jacob yiey pa Betel
1Pa Dios yit'esha pa Jacob: “Aneetsham ca meey ca vee' ja Betel. Lhech'e jayu ca asnatesh pa acufayjat'eshjop itôvat, na Dios nan tanôclit'am lhapesh ti lhclôtc'oya ja achecla' Esaú.”*xl* 2Lhechesh pa yit'esha pa Jacob pa t'ajôôjam shi' papi tanôôycheelh:
—Acumelheyshi lhacôm'a java diosec tavujuya java caajelh'am. Pa anayeelhjop ca uyelhch'e pav'elh. 3Shnôquelhey clap ja Betel. Lhech'e jayu jasnatesh pa yicufayjat'eshjop itôvat pa Dios pan ts'efen lhapesh ti ts'ijovay'in. Pan tavoyich'esha'ne pa ti jôcji'
4Pa yijutem pa Jacob lhacôm'a pava diosec tavujuya pava caajem, shi' pava lhasht'ôquey. Pa tish'ôcjic'oya pa Jacob lhpa aacjiyuc pa shalheema pa Siquem. 5C'oya ti yich'in, pa yijutem pa Dios pa t'ajovayi papi lhech'e yiey pa yitsaat. Lhe'naa ti nichinvoqu'e papi lhcles pa Jacob.
6Pa Jacob shi' lhacôm'a papi tanôôycheelh pa yamey pa yitsaat Luz, lhey shta Betel yi'shi' pa cotsjaat Canaán. 7Lhech'e ti yisnatesh pa lhcufayjat'eshjop itôvat, pa yeyiyanesh pa lhech'e El-Betel, lhayaash pa lhechesh ti yiclôtc'oya pa lhchecla', lhech'e ti tanôclitem pa Dios. 8Lhech vaf'e' shta lhpa Dêbora, lhpan vanujumatsenesh lhpa Rebeca, pa tish'ôcjic'oya lhpa aacjiyuc shalheema pa Betel. Pa Jacob lhqueyesh pa lhech'e “Aacjiyuc vatacshinjavat.”
9Pan t'aplhuqu'e' pa Jacob ti tôlhey pa Padan-aram, ti tanôclitem shta pa Dios pa yit'eshem pa is 10nôque t'ônash:
“Avaatsha ey Jacob,
taj ti tanca lhech eya t'ôyish'e;
nôqueesh eyesh jayu Israel”.*xm*
Pa Dios yivaclhitesh ti yinich'anatesh pa lhey, 11pa yit'esha:
“Yivaatsha ya Dios ampa ca ninastôyaeesh:
aclôja papi acles shi' papi acloj
vanichifansha'ne tôlh'a,
tôlhshaam jayu papi acles papi lhcaanvaclesesh.
12Na cotsjaat nan jajutem pa Abraham shi'
pa Isaac ti jajut'ay jayu shta,
pa jajutey jayu shta papi acles.”*xn*
13Pa Dios ti tayjop yiey pan yie' ti tasinôyelh pa Jacob. 14Pa t'acum'e lhpa utej pa yitsemaj'e yiey pa yiesh'e ti tasinôyelh pa Dios. Pa yôtsiy'apee shta pa vatshachivo shi' pa ôtjayetas t'i'. 15Pa yeyiyanesh Betel pa lhech'e.*xñ*
Ti vaf pa Raquel
16Ti tay'e pa Betel, ti jôjjeclay tojey clee pa Efrata ti nicavat'aj lhpa Raquel. Taj ti uj ti sasesha'ne. 17Taj ti ya'shesh ti tavijatayem pa yit'esha lhpa yefenesh: “Ya aj ca anjovayshi, ti caaj'am neelh aôs.” 18Taj ti lhavaatsha palha vaf jayu pa vôntôyitey ti yit'esh pa taôvclaj lhey Benoni, (nôque yich'e': na Vataôs Lht'ôôyte). Vooy pa lhtata lhqueyesh Benjamín, (nôque yich'e': na Vataôs Vancashamitjat).
19Nôque lhjunash ti vaf lhca Raquel, pa chitishc'oya pa nôyish yichey pa Efrata, pan lheyesh nôqueesh Belên. 20Pa Jacob yitsemaj'apee pa yaychavalheshch'e pa nivalhech. Lhpa lhech utej nôqueeshch'e nôôclheesha pa lhanvalheech lhca Raquel.
21Pa Israel tay'e pa lhech'e pa to'jemey pa yie' pa ujquishaam jpôyich yiey pa Edar. 22Ve'lha pa nalhu pa Israel ti yie' pa lhech'e pa yichey pa Ruben lhpa Bilha, ti yôjquenelhch'e, lhpa lhech lhjayaesh'in shta pa lhtata. Vooy ti yitôôysha pa lhtata, pa uj ti suy.
Papi lhcles pa Jacob
(1 Cr 2.1-2)
Pa Jacob doce papi lhcles. 23Papi lhcleselh lhpa Lea papuque pa Rubên, vatjutsa' lhaôs; pa Simeón, pa Leví, pa Judá, pa Isacar shi' pa Zabulón. 24Papi lhcleselh lhpa Raquel papuque pa Josê shi' pa Benjamín. 25Papi lhcleselh lhpa Bilja, lhpa Raquel lhcavoque, papuque pa Dan shi' pa Neftalí. 26Vooy papi lhcleselh lhpa Zilpa, lhpa Lea lhcavoque, papuque pa Gad shi' pa Aser. Papuque lhcles pa Jacob, nivat'as'e pa Padan-aram.
Ti vaf pa Isaac
27Pa Jacob yijôchiey pa lhtata Isaac yiey pa Mamre. Pa lhech yitsaat lhey shta Arba ja't'ajesha Hebrón. Lhech yie' lhapesh pa Abraham shi' pa Isaac.*xo* 28Pa Isaac ciento ochenta pava lhnincôpes ti vaf. 29Pa chiyanjop papi lhnavot ti c'utsaaj. Pa tishc'oya papi lhcles pa Esaú shi' pa Jacob.
Currently Selected:
Génesis 35: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
