San Lucas 1

Yasinôyanjop'in

1Acloj papi nôyôjeshch'ejoom nava matas ti yit'esh pava ti vaclan ti yijô'. 2Nôque lhjunash ti yeyjatsjanesh papi yi'van lhacôm'a pan tôlh'ejop, shi' japi lhanvaclesesh cava ya'clishay. 3Jalheclôjesh shta yivaatsha ca istajajop'am ca qu'isesh'e nava jasclansha'ne jayiôtsjanesh'in, ja yenach Teofilo.*xa* 4Jaspa natô'ya jayu jum nava matas pan yie' pa yijô' ti apis ti chineyjatsjanesh. #1.3 Hch 1.1.

Nifac pa ángel ti nivat'aj jayu pa Juan Vatnayjayash lhavo'

5Lhech t'aplhuqu'e ti lhcaanvacleesh pa Herodes ja Judea, ve'lha pa vatcasinô lhey Zacarías, tô'lha pa Abías. Lhjayaesh lhpa Elisabet, tô'lha pa vatcasinô lhey Aarón.*xb* 6Lhech papi lhech napu' yivo'yeshch'e ti yie' t'ajuyish pa Dios. Yajatesh ti ninasnatesh pa sasch'e, lhayaash ti niqu'ishamesh lhacôm'a cava tayôjijanesh pa Lhcaanvacle shi' pava vanqu'eyjatsjanesh. Ampapu ca nivanesh pa sasch'e. 7Taj ti ampa lhô'sa, lhayaash ti ôcts'ôtache lhpa Elisabet, pa jaalhpa c'utsjasesh atesha. #1.5 1 Cr 24.10.

8C'oya ti yamja vitsha pa Zacarías ti t'acum'een t'ajuyish pa Dios, jan lhnônashesh pap'elh lhcumjafas. 9Pan lhfanishesh'in papi vatcasinôc ti yamjaan pa chit'alhey'in pa Zacarías. Pa yich'ôcji ja is lhtôvash pa Dios lhajpôyich pa yitse'clôlhey pan yichaaj acôjqu'e pa lhniish. 10C'oya ti chitseclô'lha pan acôjqu'e pa lhniish, lhan'e papi yi'fach'ee pa t'aalh ts'ivee. 11Pa yivanjiyinesh pa Lhcaanvacle pa lh'ángel pa Zacarías pa yie' pa vatfayishey pa chivatsavat'ejop'in pa ti chitseclô'lhaan. 12C'oya ti yi'van pa Zacarías pa ángel, pa nitôyiyjat pa uj ti nijovayem. 13Pa yit'esha pa ángel:

—Zacarías, ya aj ca anjovay'in, lhayaash pa Dios ti yipe'ya pa alhjayash. A'va, lhja ajaya Elisabet lhactsôyan jayu, pa eyiyaneshelh jayu pa ô'sesh Juan. 14Pa c'usaam'in jayu, pa lhanshamesh jayu shta. Pa acloj papi yic'usinat'in jayu shta ca nanvat'ajtaj; 15lhayaash pa lhech aôs yiesh'e t'ajuyish pa uj t'unaj ja Dios. Ninyô'ji jayu pa cumjôtaj, p'alha jayu ca nôvji' pa Espíritu Santo ca mônlhatajshi lhpa lhavts'e' lhpa lhamimi.*xc* 16Acloj napi Israel lhcles yachaja jayu pa Lhanvacle lh'Dios. 17Pa Juan yinôyinjatlhavc'oya pa Lhcaanvacle, jaspa t'unjaniyashjulh shi' java lhfanishlhavach ja Elías, jô lhech chiytôyjata pava ti vaclan. Pa yisclaneemvatich'e papi vatanavôt shi' papi lhcles jaspa isisavatjulh. Pa nôquee papi ninatcajôyshaysha'ne yicajôyshiyanesh jaspa nanc'ashamsha'ne. Lhayaash ti tatômjalheshc'oya papu lhech jaspa natcuumjulh pa Lhcaanvacle.#1.15 Nm 6.3.,#1.17 Mal 4.5-6.

18Pa niyôsesh pa Zacarías pa ángel:

—¿Ta ca lhjunasha ca yijô'a côque? Lhayaash ti palha niyataôvclaja, c'utsja' shta lhja yijaya.

19Pa yicuulh pa ángel pa yit'esh:

—Yivaatsha ya Gabriel, tsivayjatlhavne ja Dios. Tsitsichen'ay ca shtasinôy'in ca janôyôj'am jayu nava isis ayjates.*xe* 20Taj ti nan lhjunash ti lhascacu'esh ca jayeesh'a pa aclishaclayech'esh jayu lhamjey jayu ca nanvat'ajtaj pa aôs. Côque yôfisch'eam jayu pa ca t'aplhutajaa. 21Lhan'e papi nivacle yi'fach'ee tach'antajc'oya pa Zacarías pa nitôyeesh ti cletc'oya ti yiôcji pa vatishjanjavat. 22C'oya ti nachfach'ee pa Zacarías pa sasjop ca nitasinôy; pa lhechesh pa yitaôysha ts'ivee ti caaj t'e pa yivan'ôcji pa is Dios lhajpôyich. Pa tasinôyjtaj'in taj ti clishaclayech'esh pa nôclit pava yeetajesh'in. 23C'oya ti tifeshch'e pava lhnalhusesh ti t'acum'een pa vatishjanjavat pa Zacarías pa vapecley pa lhajpôyich. 24Paelh nalhu pa lhechesh pa yituma lhpa Elisabet, pa ve'lhanôjesh jive'clas ti mônlhee pa lhajpôyich, pa yaychavalhey: 25“Yisnateshyam pa Lhcaanvacle nôque jaspa tanca nitsapun t'ôyish'e nap'elh.” #1.19 Dn 8.16; 9.21.

Nifac pa ángel ti nivat'aj jayu pa Jesús

26Ve'lhayama pava jive'clas ti yicheney pa Dios pa ángel Gabriel pa ve'lha yitsaat yishi' ja Galilea lhey Nazaret, 27jaspa t'ôtayey lhpa ve'lha lhutsja lhey María, pa lhechesh ti yitsjulhc'oya lhpa lhech ca lhjayaesh jayu pa José, pa lhech tô'lha pa David.*xf* 28Yuyeyshi pa ángel yiey pan yie' pa yit'esha: #1.27 Mt 1.18.

—¡Chinacjuay, ti uj ti chinôclôj! Yiajop ja Lhcaanvacle; t'asheshc'oya pap'elh ôcjeclô ti yijut'ay ja Dios pa is.

29C'oya ti yi'van pa ángel, pa nijovaych'e pava nifaclem pa yaychavalhch'e pan lhnônash ti chiyecju'. 30Pa lhechesh pa yit'esh pa ángel:

—María, ya aj ca anjovay'in, lhayaash ti lhavan pa lhtants'aclanjayash ja Dios. 31Nôqueesh natuma jayu pa nanvat'aj jayu pa aôs pa eyiyanesh jayu JESUS.*xg* 32Uj jayu jô lhech; lhanquey jayu shita Dios Lhaôs pa uj ti yaashchisham. Vooy ja Dios yinvacleyan jayu pan lhjunash lhapesh pa ve'lha tôlhelh'e pa lhcaanvacle David. 33Yajatesh jayu ti lhanvacleesh napi Israel lhcles, tan pa ca nôj'e pa lhanvacleyash.#1.31 Mt 1.21.,#1.32-33 2 S 7.12,13,16; Is 9.7.

34Pa lhechesh pa yit'esha lhpa María pa ángel:

—¿Ta t'e lhjunash jayu ca vaclanyam cavôque, lhayaash ti jôjjeclay amyam pa nivacle?

35Pa yicuulh pa ángel pa yit'esh:

—Yiatshi jayu ja Espíritu Santo ca namtaj'ay, shi' ja t'unaj ja Dios yaashchisham yip'oatapee jayu jan lhjunash lhpa vôse'. Lhe'naa ca isa'sha'ne pa taôvclaj ca nanvat'ajtaj, pa lhanquey jayu Dios Lhaôs. 36Nôquee lhja avelhche Elisabet c'utsja' taj ti caaj jayu shta pa lhaôs; palha ve'lhayama jive'clas ti yituma, lhja lhanquey'in ôcts'ôtache. 37Lhayaash ti ampa ca saseemjop ja Dios.#1.37 Gn 18.14; Jer 32.16,27.

38Pa lhechesh pa yit'esh lhpa María:

—Nôque jôv'e lhcavoqueyish pa Lhcaanvacle. Pa Dios ca lhech lhfanishayish yiey can t'ônashch'e ca lhteesh.

Pa lhechesh pa tayjop pa ángel lhpa lhech.

T'ôtayey lhpa María lhpa Elisabet

39Lhechesh pava nalhus ti yich lhpa María yifaclitey pa yitsaat yi'shi' lhcachivat java uticuy yiey ja Judea. 40Pa yuyeyshi pa lhajpôyich pa Zacarías pa yecjueyshi shta lhpa Elisabet. 41C'oya ti yipe'ya lhpa Elisabet lhpa María ti yicju', pa lhechesh pa p'ulhp'ulhshi pa lhaôs. Pa lhechesh pa yamqu'een lhpa Elisabet pa Espíritu Santo.

42Pa yiyitesh pa t'ôjôj pa yit'esh:

—¡T'asheshc'oya pap'elh ôcjeclôy ti yijut'ay pa is pa Dios, yiisiyan shta pa aôs! 43¿Ta t'e yijunash, lhayaash ti namyi lha lhamimi pa Yinvacle? 44Meelh ti c'apeya ti lhts'eecju pa tanachanyitshi pa yaôs ti nisham'in. 45Anshamesh avaatsha ti naacacujanesh ti yôfisch'e jayu cava yit'esh'a ja Lhcaanvacle.

46Pa yit'esh lhpa María:

—“Pa yisôc'ôclit yôclôjesh pa uj t'unaj

pa Lhcaanvacle.#1.46-53 1 S 2.1-10; Sal 113.5-9.

47Pa vooy pa yicachi' nishamesh pa Dios

yi Lhavqu'ilhjenaj.#1.46-47 Is 61.10.

48Lhayaash pa Dios ti yi'van yitsha ti jayits'aclay

ti lhcavoqueyish,

pa lhech nitôlh'e jayu ca nanshamyish yinjôt

lhacôm'a papi nivacle.

49Lhayaash pa Dios ti ampa ca saseemjop

ti yisnateshyam nava ninvôôtô'yesh;

pa lhey jayu pa lhech issha'ne.

50Lhavaatsha yajatesh jayu ti tcavts'aclayesh

lhacôm'a papi ninashjatc'oya.

51T'unesh'in pa lhcumjayash ti yisnatesh;

pa yash'apee papi vataanvacleyantajsha'ne.

52Vooy papi vanunat chiyachajshicham,

vooy papi ninunat chiyashjatchisham.

53Nôquee papi caajem pa lhayipcu

pa yapenjansha'ne,

shi' papi acôsshisha'ne tanca ni'van pa'na

ca nôvji' pava lhpôcôtôy.

54Pa yefen pa Dios pa lhcavo Israel;

lhayaash ti yitôych'e ti nich'a tcavts'aclayesh.

55Lhech t'ônashesh ti nifaclem papi catsicchevot,

t'ajuya pa Abraham shi' ti lhetlha lht'ajôôjjam jayu.#1.55 Gn 17.7.

56Lhpa María mônlheevatcop lhpa Elisabet ti pu'jana pava jive'clas, pa lhechesh pa vapecley pa lhajpôyich.

Nivat'aj pa Juan Vatnayjayash lhavo'

57C'oya ti yama pan t'aplhu lhpa Elisabet ti nivat'aj pa lhaôs. 58C'oya ti tpeeycheyesh papi lhchifas shi' papi lhavelhavot pa yicheyvatich'e pa yicju'vatam, lhayaash ti yitôôysha ti yisnatshem pa Dios pa is. 59Pa yachajeyc'oya shta ti pu'janayama pava nalhus ti tc'aeshva'ne shta, pa lhechesh pa yiseej clee pa taôvclaj; ti yeetajesh ca netônesh ca lheyfaa pa lhtata Zacarías.*xm* 60Taj ti yicuulh lhpa lhamimi pa yit'esh: #1.59 Lv 12.3.

—Am. Lhanquey jayu Juan.

61Pa yit'eshvatam:

—¿Ta t'e lhayaash? Ampapu napi ave'lheelhsham ca chinetônesh côque vatey.

62Pa niyôsesh ts'ivee pa lhtata pa yinôôclhinitema pava yit'esh ti yeetajesh ca neyiyanesh. 63Pa t'alhjanesh pa ve'lha vatvanqu'isjavat yiclô' t'iya pa yit'esh ti yi'sesh'e: ‘Lhey jayu Juan’. Nitôyiyjateshch'e lhacôm'a côque. 64Tôcle'e pa tasinôy pa Zacarías pa lhechesh pa yôclôj pa Dios. 65Lhacôm'a papi lhchifas nitôyiyjatch'e, nôquee papi yiey ts'ivee java uticuy lhalhech'e ja Judea, lhayaash ti chinfaclemch'e cavôque matas. 66Pant'ajôôj papi namey'in ti yaya'esh pa ninayjatey lhcachi' pa yit'esh ti tay'ôtsjanesh'in:

—“¿She t'e nôque taôvclaj?

Lhayaash ti yiisiyan pa Lhcaanvacle.

Pa t'aclaach pa Zacarías

67Pa lhtata Zacarías, ujaam nôqueesh pa Espíritu Santo pa nifac pava ninôôlhjôney ti yiyôjiesha pa Dios, pa yit'esh:

68Chiyôclôj pa Lhcaanvacle lh'Dios pa Israel,

ti namjooyshicham na yitsôt'ajjooj, pa jaspa shinalhjensha'ne.

69Nijutjooy pa ampa ca nintô'yeesh lhavqu'ilhjenaj.

Jô lhech ve'lheelhch'e pa David.

70Nôque nifac papi p'alha' isissha'ne

chiytôyjata pava ti vaclan,

taj ti nilhnashaaesh.

71Nifac ti shinalhjenesh jayu papi nicasc'utsfasa

shi' pant'ajôôj papi shincôvfachi.

72Nifac ti tcavts'aclaych'e papi catsinavot,

ca ya aj ca nantôvacluque pan is ti vatpeya'shelh.

73Côque ninclôquiemch'e pa Dios

ti nifaclem pa catsitata Abraham.

74Nifac ti yilhjeneshjooy papi nicasc'utsfasa,

pa jaspa tanca shtanjova'yesh catsitapee ca shtacuumtajem'in.

75Shtanvoyeshemch'e jayu jum pa is

ca shtacuumtajeshem'in

yinjôt pa casmônlhajayash.

76Na yaôs, lhanquey jayu yitô'ya pava ti vaclan,

lhcavoesh pa Dios ti yaashchisham.

Vanôyinsha'nec'oya jayu pa Lhcaanvacle,

pa yisclansha'nec'oya jayu pa lhnôyish.#1.76 Mal 3.1.

77Yitôyjata jayu napi yitsôt'ajesh

pa lhnilhjenjayash

shi' ca chinvômjatajemch'e pava lhsasch'e.

78Lhayaash ti shinen lhe'naa ca natcavts'aclayjooj

pa catsitata Dios,

pa nijutjooyshicham na jumcuclaay t'ajuya ti nich'a nalhu.

79Jaspa nicha'jem pa lhqu'isjuyaj papi yi'shi' pa tulh'e'

shi' papi yi'shi' pa jpec vatvafi'.

Lhech lhavaatsha ti shinamjatey

pa nôyishesh pa vatcanoyash.*xñ* #1.79 Is 9.2.

80Pa vat'iychisham pa taôvclaj pa yunitjat pa Espíritu Santo. Ti pitej pa yie' pa cotsjaat ti ampapu ca nôv'e', yamjey pa nalhu ti yitôyjatlhavne papi nivacle Israel lhcles.

Nivat'aj pa Jesús

(Mt 1.18-25)

Currently Selected:

San Lucas 1: NIVA

Highlight

Copy